حاولي التواصل معه عن طريق الواتس حتى لو مارد عليك ارسلي له رسائل عاطفية ذكريه بايامكم الحلوة وانك مشتاقة له وان البنات يسالو عنه وانك تعلمت درس ماراح تنسيه

ابوك راضي انك ترجعين له وزوجك يبغاهم هم يرجعونك
وهو جاي عشان بناته تجهزي له و روحي معاه .. واكيد ابوك ماراح يقول لا

__________________

المشكلة من اساسها انتي سببها.والسبب الاخر تدخل ناس غير اهل انهم يصلحوا بين زوجين.هم جو وزادوا الطين بلة.ردة فعل زوجك طبيعية واي رجل يسوي اكثر من اللي سواه.
اتمنى انك فهمتي الدرس.
لو جه زوجك لابوك هل سيظهر عمك مرة اخرى ويغلط عليه.فمشاعر الناس ليست لعبه.نصيحتي لك هي الاستغفار والصدقة.واذهبي لابيك وقولي له هل ستفرح لو صرت مطلقة.وبناتي ينحرموا من ابوهم.

دلوعة حبيبتي..

أنا عارفة انج حاسة بغلطتج .. وودج تحلين الموضوع اليوم قبل بكرة.

وعارفة ان فترة سبع شهور فترة طويلة .. وانتي استويتي خلاص.

لكن الله يرضى عليج لا تقعدين تحورين الأمور في راسج .. وتفسرينها بطريقة غلط .. ولا تلتمسين أعذار لأهلج.

زوجج هو الضحية هنا مب انتي .. وأي سلوك يعمله حالياً هو رد فعل .. وشكل من أشكال العقاب.


زوجج يبالغ في موقفه؟

الله أعلم .. وأنا شخصياً ما سألتج شو المشكلة الأخيرة اللي حصلت لأن يكفيني انج معترفة انج انتي السبب وانتي اللي كبرتي الموضوع .. لكن في نفس الوقت إنتي بس اللي تعرفين شكثر زوجج تحمل وشو هي المشاكل السابقة اللي كان صابر عليها طول الست سنوات واللي خلته ينفجر الحين.


أما إنه عايش حياته ومبسوط ومب مفتكر فيج .. فهذه وسوسة الشيطان اللي يحاول يقنعج إنه زوجج ظالم ويبا يقهرج .... والحقيقة الله أعلم فيها ومحد يقدر يجزم بمشاعره .. لكن اللي أرجحه إنه لو كان بايع فعلاً كان طلق من زمان .. وما في شي يضطره يعلقج كل هالفترة .. خاصةً أنه بشهادتج رجل والنعم فيه.



المفاضلة بين الزوج والأهل صعبة .. أنا فاهمة هالشي.

لكن الحق حق .. واحنا نتكلم عن حياة زوجية ممكن يدمرها العناد والمكابرة .. ولو في طرف المفروض يتنازل فهم انتي وأهلج.

ومثل ما قالت عذوبة مطر .. حق الزوج مقدم على حق الأهل .. فكيف إن كان الغلط منكم أساساً؟!

محد يقول لج اخسري أهلج .. لكن انتي نيتج الإصلاح والحفاظ على حياتج الزوجية وعلى رجل تعترفين انه زين ومكرمج ومعززج .. وما دام أهلج يعرقلون تحقيق هذا الهدف فالأولى أن تسعين له بنفسج.

روحي لابوج وحبي راسه وايده وريوله .. قولي له: ادري انك تحبني وانت تسوا عندي كل شي .. لكني ما اريد أخسر هذا الرجل .. ولا أبا بناتي يتشتتون.


الحل بيدج حبيبتي .. بس بصراحة السالفة ما تحتمل دلع زيادة .. يعني لازم تقوين نفسج شوي ويمكن تكون هذه هي الفرصة اللي تتعلمين فيها كيف تحلين أمورج بنفسج بدون الاعتماد على ابوج أو عمج.


وقبل كل شي صلي ركعتين واستخيري ربج وادعي انه يلهمج التصرف الصحيح.

__________________


اللهم طِيبَ الأثر .. وحُسْنَ الرحيل.

زوجك باين طيب وأصيل بس مجروح
لا تنتظرين من أهلك يحلون مشكلتكم
تريبه الأطفال بعيد عن أبوهم صعبه جداً
زوجك قال زي ما طلعت ترجع يعني ماعنده مشكله بروجعك ولا يبي يطلقك انت كلمي واحد حكيم من أهلك يرجعك شوفي واحد من خوالك او واحد من عمانك وخبري والده زوجك انك راجعة لانه يمكن يكون سلم الشقه لو كانت ايجار 7 شهور مو قليلة ابد
واعتذري من زوجك على غلطتك
والله اللي اشوفه من كلامك الغلط راكبكم انت واهلك تصرفي بسرعه قبل ماتحرمين اطفالك من حضن ابوهم

طيب انتي عارفه انك غلطانه كلمي ابوك بهدو وقولي له خلاص انا برجع مع اخوي

و اخوك اللى ضربه يعتذر من زوجك ما توصل بالضرب

جد ماالوم زوجك يوم يسوي معك كذا كلم واعتذر من ابوك
بس انتم تصرفتو بطريقه غلط مع رجال
شوفي حبيبتي خلي اللي وداك البيت ابوك يرجعك للبيتك
نظفي البيت ورتبيه وجهزي له شي ياكله اذا رجع من دوامه مثل ما فاجتيه بروحتك لاهلك فاجيهه برجعتك للبيت وجيب هديه بسيطه واعتذري منه

اللاسف بعض الزوجات هي تكون سبب في
تقاطع وزعل وخلاف بين زوجها وأهلها

والمشكله جدا تافهه المفروض أبوك لما عرف بتفاهت السالفة نصحك ورجعك بيتك

مو يتعصب لك ويتصل في زوجك ويطلب منه يجئ

الحين حاولي تكلمي زوجك وتقاربي بينه وبين أبوك

تكلمي أبوك وتفهميه انك غلطتي وان زوجك يعزك ويعزه

ويغليه وقولي لزوجك يراضي أبوك هو الأهم

وبعدين بعد ما تهدا الأمور أبوك يصالح بين اخوك وزوجك وعمك

وانتي حاولي بكم رسالة حب وشوق لزوجك لعله يحن قلبه

عليكم السلام ورحمة الله وبركاته
كيف علاقة امك بابيك ؟ هل تقدر تقنعه وتقول له نحن المخطئين في حق الرجل والاعتراف بالذنب فضيلة لا منقصة وليس من حقنا نهين الرجل ونطالبه يهين نفسه اكثر ، كفاية اهانه ونحن المفروض لا نقبل نصر على مواصلة اهانة زوج بنتنا ونتسبب في ضياع بنتنا ول ما مرت الايام ستصبح في النفس اثار كبيرة وحتى لو الرجل قبل ياتي وياخذ بنتنا الا انه لن يرتاح وستبقى في نفسه طعنه قد تخرج تتضرر بنتنا بسببك انت والمفروض نتعقل ولا نكابر على الاصرار بظلم زوج بنتنا واهانة كرامته .
واذا امك لا تؤثر في ابيك فليدخل طرف مؤثر حتى لو من خارج نطاق العائلة .

شوفي يا أختي ،، من الاخررررر كذا دامك معترفه بغلطك
نصيحتي لك كلمي عمك يجي للبيت واجتمعي فيه مع أبوك
وقولي لهم انك اساسا كنتي معصبه من زوجك ودخل بينكم
الشيطان وانك الحين حاسه بغلطك وندمانه وان زوجك ماقصر
معاك ولا مع عيالك بشي بس كانت لحظة غضب ،،
وحبي راس ابوك وعمك واعتذري عن كل اللي صار وقولي انك ماتبي بيتك
ينخرب ولا عيالك يضيعوا وقولي لهم إذا تهمكم مصلحتي ومصلحة عيالي
خلوني ارجع بيتي مثل ماطلعت منه بأرادتي ،، حاولي تكسبيهم بالكلام الطيب
وقولي انك راح تجهزي اغراضك واغراض عيالك وتخلي اخوك يرجعك للبيت
ومثل ما قالت الاخت. سموحه مثل ما فاجأتيه بخروجك من بيتك فاجئيه برجعتك
انتي وعيالك واعتذري منه واعطيه وعد ان كل مشاكلكم بعد كذا تحلوها بينكم وبس
بدون تدخل أي احد ،،
هذا أفضل حل ممكن تسويه وربي يسهل لك اللي فيه الخير ،،

وعليكم السلام ورحمة الله وبركاته ..
مرحباً أختي الكريمة ، الأخوات لم يقصروا أبداً معكِ ، أنتِ من ترجعين إليه واعملي بكل مابوسعكِ إصلاح الأمر ،
اجعلي أحد مقرب للوالد من أهلكِ هو من يقنعه ..
وتعلمي من هذا الدرس جيداً ، أسراركِ مع زوجكِ لاتجعلي أحد من أهلكِ يتدخل فيها لأن هذه المشاكل تعمل حواجز وتؤدي للكره وووو فيما بعد ، وليس كل مشكلة تُخبريها لهم هذا سيدمر حياتكِ ..
مشاكلكما أنتما من تحلوها وزوجكِ لاتخسريه حافظي على بيتكِ جيداً ..
وفقكِ الله ..