اعترفتي بنفسك انه يضربك لما تردين عليه وما تحترمينه

لو انتفى هذا السبب يختفي الضرب ،، بالنسبة للحشيش لحد الآن انتِ شاكة في الموضوع

وقد يكون كلامه صحيح انه اعترف على نفسه عشان توقفين معاه وتساعدينه

حلف لك حتى التدخين يبطله..وقالك اشرطي اللي تبغين،، (ترى نادر مين يسوي كذا)

اشرطي عليه يجيب لك تحليل وفحص انه ما يحشش

عشان تقطعين الشك باليقين وبعدها تقدرين تقررين ايش موقفك بالضبط

اشوف انه يستحق الفرصة والمحاولة والمساعدة..

__________________
ما يكتبه الله لنا ألطف مما نُحب ..وأعظم مما نطلب ..وألطف مما نشاء ..


[IMG]http://im67.***********/mg87DX.gif[/IMG]

ارد عليه بالحق مو بقلة ادب
هوا يبغاني اسمع تهزيؤه ليا وانا اقول سم ابشر وأهزهز راسي
دايما يقولي لما اعصب اسكتي وقولي حقك عليا ومن ذا الكلام حتى لو استفزيتك
قلت له معليش انا ماني حقة هزهزة و دلدلة راس مو شخصيتي حاولت ماقدرت
واسكت كثيييييير ما أسب وأشتم واتحكم بنفسي اثناء الخلافات
بس اول ضربه تجيني أنفلت سب ولعن ودعاوي وكل شي لانه خلاص ضربني ماتفرق معايا لو ضربني اكثر
مره انقهر على نفسي

هوا اللي يبدا الضرب وانا ابدا الغلط
قبل الضرب اقول الحق وارد بالصح هوا يبغاني اغلط نفسي عشان حضرته يهدا
وانا
ترا كلنا انسان نفس الفصيله نفس المشاعر
زي ماهوا يتنرفز ويعصب انا كمان نفس الشي
ليش تعاملو الحرمه كانها كائن خارق يسمو على الكائن الهمجي الرجل واذا ماسمت فوقه باخلاقها غلطانه
ترا كلنا واحد
ليش لما اغلط يمد يده واخر مره غلط تافه مو غلط حتى
انا ماني ملاك
راح اغلط واغلط واغلط
يعني راح يضربني كمان وكمان ؟!!
هذا مو اسلوب تعامل
احتقر هذا الاسلوب حتى مع الاطفال مقزز
اجل كيف معايا
عشان كذا انا مرات كثير احس اني ما اصلح له
هوا تربى ببيت ابوه يضرب امه واخوانه كلهم يضربو حريمهم
عادي عندهم
يبغاني أتقبل وأتصبر
.................................................. ...
لاني فخوره بنفسي اني رجعت بيتي اخر مره بعد ماضربته في السياره حسيت اني انسان عنده كرامه
عكس كل المرات السابقه ماكنت ارد بالضرب واحس باهانه فظيعه ............

__________________
لا اله الا انت سبحانك اني كنت من الظالمين

ما تشوفين ان هذا سبب قوي لضربك؟!!!
يختي محد يتحمل عدم الاحترام!!

امسكي لسانك واحترميه وان مد يده ساعتها بنشجعك على طلب الطلاق
اما تعترفين بطولة اللسان وعدم الاحترام وتشكين الضرب!!

بالنسبة للتحشيش
طالما جلس يبرر حتى لو كذاب ما كذب الا لرغبته بك وببنته وبيته
ف اعطيه جوه وصدقيه يمكن يكون فعلا يحشش
بس لما تعطيه فرصه يبطله منجد
ويعاهد نفسه بينه وبين نفسه ما عاد يرجعله بعد اللي صار

ويمكن يكون صادق بس خانته الحيله حتى يحتوي غضبك
وورط نفسه باعتراف مهو فيه
الله اعلم يمكن يكون صادق

بكل الاحوال يكفي محاولته للاقلاع فاعطيه فرصه بعد العهود والمواثيق منك ومنه
منك انتي باحترامه فالاحترام من حق اي انسان فما بالك زوجك!!
ومنه بعدم مد يده والتفاهم على كل شي بهدوء


سؤال هل زوجك شديد الغيرة؟
ان كان الجواب نعم ياليت تعطيني مثال او مثالين

__________________
( اللَّهُمَّ آتِ نَفْسِي تَقْوَاهَا، وَزَكِّهَا أَنْتَ خَيْرُ مَنْ زَكَّاهَا، أَنْتَ وَلِيُّهَا وَمَوْلَاهَا )

ايوا شديييييد الغيره اقدر اعطيكي 10 امثله
مره دق عليا موظف البنك وجاني وانا اكلمه واعطاني كف كيف تكلمين رجال ؟؟؟؟هذا كان بداية شهور زواجنا
مره كنا في المول وقدامنا شابين المهم طلعنا الدرج الكهربائي وهما قدامنا
ولما وصلنا الدور كانو قدامنا مسافه والتفت واحد منهم ورا يعني علينا وكملو طريقهم
هنا شعلل وخلاني اغطي عيوني وماقدرت اتسوق لانه يفور نار
ورجعنا البيت وهوا يسب ويشتم فيهم ويقول والله لو كنتي مغطية عيونك كان سحبته ووريته شغله لكن حرمتي مبينه عيونها
انا لا اراديا بكيت
ثاني يوم قالي ماخلي اثنين مغازلجيه يخربون علينا ورجعني السوق وقالي اشتري اللي ماكملتيه أمس
هذا اخر موقف غيرة حصل
وتقدرو تعرفو من الموقف ليش انا احبه احسه يضغط على نفسه ويحاول يتغير عشاني
عالعموم دايما نرجع من السوق متضاربين بس قاعدين نتحسن
ومن المستحيلات عنده اروح مع صاحباتي السوق رغم انه قال انه سال عني قبل الزواج وعرف اني اطلع من الجامعه كوفيهات مع البنات
تخيلو كيف عرف ههههه
بس برضه تزوجني وانا وقت الملكه بينت له طريقة حياتي وكنت منفتحه معاه بافكاري
وكان يقولي كل شي يجي بالتفاهم
يقصد بالتلطيش شكله
ومواقف كثيره مثلا مستحيل اتكلم عن اي رجل قدامه حتى لو قريبي لانه يغااار وحتى عيال اخته صغار 12 سنه يطردهم اذا جيت
وفي موقف يضحك و يخوف مره كنا نتفرج على فيلم القراصنه جوني ديب هذا بداية زواجنا كمان
قالي ايش رايك بالممثل طبعا انا ماصدقت انهبلت مرررره وسيم وامدح بشكله هو كان قصده من ناحية التمثيل بس خلاص قدي انجرفت
كان اخر يوم شفت فيه جوني ديب
اصلا وجهه حمممر من العصبيه وقالي بالحرف الواحد تدرين انه كان يمكن اطلقك اليوم لو ما مسكت اعصابي
مافي حرمه تمدح رجال اجنبي
طبعا انصعقت انطرمت ولم اتحدث عن اي رجل بعد المدعو الكافر اللي مو وسيم جوني ديب

__________________
لا اله الا انت سبحانك اني كنت من الظالمين

معاك ان الضرب مرفوض تماما
لكن تراه صادق لما يقولك اذا عصبت لا تردين علي

اي واحد معصب فهو خارج شعوره وممكن يتلفظ ويمد يده وهو مو واعي
السكوت اسلم حل .. ولا حتى تروحين بعيد عنه وتقفلين على نفسك الباب
طيب ايش الفايدة انك تخربين على نفسك بالرد عليه ويزيد هو عصبية وضرب

وبصراحة اللي ما تحط حد وتاخذ موقف قوي من أول مرة تنضرب فيها بتتعب في حياتها

ماقدرتوا توصلون لحل بخصوص الضرب سابقا ..عندك فرصة الآن اشرطي مبلغ كبير كرضوة
ومبلغ مماثل في حال لا سمح الله مد يده مستقبلا يمكن يردعه شوي

اذا فعلا تشوفين ايجابيته كثيرة وعنده استعداد يصلح من نفسه حاولي معاه
بالتفاهم مع دعم أهلك بخصوص الضرب اما الحشيش خليها بينك وبينه ..
والله يصلح احوالكم..

__________________
ما يكتبه الله لنا ألطف مما نُحب ..وأعظم مما نطلب ..وألطف مما نشاء ..


[IMG]http://im67.***********/mg87DX.gif[/IMG]

زوجك يحبك اختي
زي ما هو يغلط نفسه حتى ترجع حياتكم
غلطي نفسك من اجل حياتكم ومن اجل بنتكم

هل جلستي معه جلسه هاااااديه تحطون فيها النقاط على الحروف؟

اظن زوجك كان يقصد وسامة الممثل وليس اداءه
حس ان الممثل جميل قال اشوف هي منتبهه وعاجبها😜
عند زوجك كل الرجال كخه تعلمي الدرس😷

__________________
( اللَّهُمَّ آتِ نَفْسِي تَقْوَاهَا، وَزَكِّهَا أَنْتَ خَيْرُ مَنْ زَكَّاهَا، أَنْتَ وَلِيُّهَا وَمَوْلَاهَا )

اذا بترجعي اول شي تفاهمي معه على الضرب وخليه يتعهد أمام اهلك ان مايضربك
وش اللي يعطيك كف لأن موظف البنك كلمك!
انا ماادري اذا عندك أطفال ولا لا ولكن اتخيلي في المستقبل يضربك أمام اطفالك هذي ماهي حياة ..
اذا بترجعي له بشرطين يترك الحشيش و يتعاالج و التعهد بعدم الضرب.

هلا عزيزتي ..
بعد المستجدات ..

انتي اكثر وحده تقدرين تقيمين حالتك ..انتي ايش حاسه ؟
هل حاسة انه صادق في ندمه ؟ قلتي بكى وذل نفسه عندك لاول مرة ..هل يعني هذة المرة مختلفة عن اللي قبلها ؟

لو حسيتي بالاختلاف هذة المرة ..ممكن تعطيه فرصة ولكن مشروطة بالطلاق


فيما لو مد يده مرة اخرى يقع الطلاق ..ولو هو حاس بقيمتك ماراح يمد يده لانه عارف نهايته انفصال.

ولو فيه خط رجعة ..تفاااااهمي على وضعكم وقت العصبية..يعني تفلت اعصابك لو سمحت اطلع برا البيت فرغ اللي بداخلك بالطريقة اللي تحب او ادخل المجلس قفل على نفسك كسر عفس اللي يريحك..اهم شي ابتعدوااا عن بعض وقت المناوشات.

فهميه اثر هذا الشيء على بنته لو هو صحيح يعشقها ..لازم يسيطر على اعصابه ..الرجال لما يصير اب يلييين قلبه لو هو انسان صح.

وعلى سالفة الحشيش..الله اعلم اذا كان يحشش او لا ..لكن انتي لااازم تريحين بالك كيف ؟ خبريه يابو فلانه قولي الصراحة لو كنت تحشش فااعترف لي وخلني صحيح احتضنك ونحل المشكلة من جذورها مع بعض ..خلك تحت عيني لاتقول انت بتقطعه من نفسك الشيطان اقوى لكن لما يكون فوقك رقيب تكون اسهل..هذي الفرصة الاخيرة لنا مع بعض خلينا نشتعل فيها صح عشاااان نستمر....

ملخص..
من وجهة نظري ..اراه يستحق فرصة اخيرة من بااب تقديم كل الفرص ولكن
*طلاق مشروط بالضرب
*توضيح امر الحشيش اما بااعتراف او نكران ..فالباتالي اما احتضان او راحة بال
*التشديد على اهمية استغلال الفرصة الاخيرة بالتفاهم اولا على وضع كل منكم وقت المشادة




والله يوفقك يارب

والله يا اختي ما ادري ايش اقولك .. مرات اقول معاه حق في تصرفاته معك ومرات اقول لا .. (رغم رفضي الشديد في استخدام الضرب)

تقولي انك ماتحترميه واخر مرة فكيتي الحظر بس عشان ملفك .. يعني اخذتي عازتك ورجعتي الحظر .. وفوق هذا يحط ملفك عند الباب وهو يدق وانتي تطنشي .. (هذي الحركة تقتل) .. شوي ويترجاك ويبوس رجلك عشان ترجع المياه لمجاريها .. احس من داخلك مصدّقة اقواله من طريقة كلامه ومشاعره اتجاهك .. لكن انتي رافضة ومترددة وكأنه ودك تجي كلمة "طالق" منه عشان تفتكين وترتاحي. اشوفك تبتعدي رغم المستحيل اللي يسويه زوجك وقليل من الرجال اللي يقول اشترطي اللي تبيه.

مرات اقول المرأة ماتحب الانسان اللي يرمي نفسه عليها .. ومرات اقول لا.. هذي عشرة ومودة ورحمة ويجب التنازل لأجلها.

المشكلة يا أختي ان ردود الرجال قليلة جداً في الموضوع، لذلك سادلي بدلوي
اعتقد ان اغلب الرجال يتمنع عن الرد لحساسية الموضوع لكني ابتوكل على الله.. كوني اعرف عوائل كثيرة فيها رجال يستعملون هالشيء... بالسر.. او بالعلن... ولازالو يحاولون الاقلاع عنه ورغم ذلك زيجاتهم على احسن مايرام...

بالنسبة لزوجك:
ردود افعاله ليست من الحشيش، أبداً.. الحشيش ياأختي، يهدئ النفس، يجعلها بارده جداً، وفرحة.. ومبسوطة هذا مثبت علمياً واضراء الحشيش هي اضرار صحية على الرئتين، واذا وصل لمرحلة الادمان مايحدث هو تلف بعض خلايا الدماغ يعني قد يتسبب له فقدان ذاكرة، ينسى بسرعه، يصبح يضحك من غير سبب لكن انه يكون عصبي او انفعالي (مستحيل)
... يا أختي الشعب المصري اكثر من نصفه... يحشش! وهالسبب مخليهم علطول مبسوطين... رغم فقرهم المدقع... ماسمعنا ان نصف الشعب المصري تطلق.. بسبب هالشيء .. بل ولديهم ماهو اسوأ من الحشيش ويسمى بنقو! نوع من انواع المنشطات

والعكس، لو قلتي لي انه يسكر.. كان ربما كانت هذه من ردود افعاله...
اعتقد ان زوجك مضغوط، وطبعه عصبي.. ومن كثر الضغط ربما اتجه للحشيش، وسالفة العيون الحمراء هذه حقيقة مع بعض الشباب.. عيونه من الله لو فيه اي حساسيه تصير حمرا...

عموما زوجك واضح انه يحبك، وانتي تحبينه
الي صاير معكم اعتقد انه سوء تفاهم لشخصيات بعض... كلن يعامل الاخر بطبعه... وليس بالانسب له...

اتمنى انك ترجعين.. له

انا ما أحلل الحشيش، ولو تقدم لي واحد لبنتي محشش ويسكر.. مازوجته ابداً
لكن اذا كان ساتر على نفسه، وعرفت فيما بعد.. فلن اطلب الطلاق ابداً انما ساحاول معرف معدن الرجل واطلب منه يتركه.. واذا اثبت لي على الاقل صدق نيته في الترك وتحسن معاملته ترجع بنتي له.. انما الاعمال بالنيات...وطالما هو يحاول ويحب شريكةحياته فسيصل مع الوقت حين يزيد التفاهم

لكن ابائنا مايفهمون كل هالكلام.. لذلك استري على الرجل، وسواء كان يحشش او لا. سابقا. لاتعيرين هالشيء اهتمام... استمري في الطلب منه تركه اذا كان فعلا يحشش لكن ليس بصيغة الامر انما بصيغة المحبة، لان الرجل المضغوط مايحب احد يأمره ابدا... او يعامله بفوقيه حتى لو هو اسفل السافلين... كلمتين حلوة تغير هالنوع من الرجال فكري في عائلتك.. في اسلوبه معك هل تحسن او لا...في دينه وصلاته بشكل عام اذا كانت المحبة ظاهرة من الرجل فالاسلوب الامثل في التعامل معه على انه طفل، انظري عندما تعتبين على طفلك شلون يرجع لك... نفس الشيء عاملي زوجك فيه.. وابدا لاترفعين صوتك عليه نهائياً وسترين الفرق... الرجل في حالات المحبة والاحتياج قلبه مثل قلب الطفل تماما والاهم من ذلك كله ( انه مافيه رجل على وجه الارض نهائياً يقبل ان حرمه ترفع صوتها عليه.... وان وجد فهو ليس برجل! ) رفعة الصوت تفقد حتى احلم الرجال صبرهم وممكن يسوي اي شيء!


تحياتي