رد : أزواج ضيعوا الرجولة أمام النساء!
لسلام عليكم ورحمة الله وبركاته اخي الفاضل البليغ موضوعك جميل واغلب ماورد فيه صحيح وانا عندي ملاحظة بسيطة فقط وهي مثل ما ماقالوا الأخوات اللي سبقوني نقطة اختيار السيارة اشوف من وجهة نظري الخاصة ان مافيها شئ لو الواحد اخذ زوجته معاه واتشاورها في لونها ونوعها انا شخصيا اكثر السيارات اللي نشتريها ما ناخذها إلا بعد نشوفها مع بعض وفي كثير من الأوقات ياخذها من المعرض ويمرني ونطلع نلفلف فيها ونجربها ونشوف هل هي مناسبة او لا كذلك بالنسبة للأجهزة الكهربائية وطلاء البيت دائما نتشارك في الرأي وحتى الأضحية ضحية العيد ننزل ناخذها سوى انا اجلس بالسيارة وهو يختارها ويجيبها الين السيار ة ويسألني تصلح او ماتصلح او انه يتصل ويسألني عنها لوكنت اشوفها من السيارة اذا قلت له تصلح اخذها وان ما اعجبتنا نرجعها وندور غيرها واختار له عطره ونوعية ثيابه وجهاز جواله تعودنا على كذا من اول مشوار لنا في الحياة نتشاور ونختار مع بعض كمان انا دائما البس على ذوقه واشتري العطر على ذوقه ويختار لي الذهب اللي بشتريه بنفسه وملابس عيالنا وبناتنا نختارها مع بعض مثلا لو لكل طفل لبستين هو يختار لكل واحد لبس وانا كذلك اختار لبس اخر مسألة الإستشارة واخذ الرأي بكل احترام من الطرف الآخر هذا لايعني ان قوامة الزوج تعرضت للإنتهاك من قبل زوجته هناك بعض الزوجات الواحدة منهم لو ماصار اللي تبغاه تقلب العيشة على زوجها لنكد وتلاقيه هو شخصيته ضعيفة ومايبغى مشاكل معاها يعني بيدرء شرها فيذعن لها ولأوامرها علشان هو يرتاح من قرقتها وحنتها وعصبيتها يبغى يريح باله طبعا فيخضع لها ويسايرها غصب عنه بالذات لوكان عنده اطفال وعنده امل بأن وضعها وحالها بيتعدل مع الوقت طبعا انا امقت هالشخصية من النساء اللي تستغل ضعف شخصية زوجها وتخليه يسوي لها الأشياء اللي تبغاها غصب عنه وبدون نفس ورضا وتوافق بينهم مثلا يجيب لها او يطلعها للمكان الفلاني او يقاطع اهله علشانها وتقول له بالمعنى الفصيح سوى كذا ولا طلقني او وديني بيت اهلي او اقل تقدير تقلب البيت كله نكد وتأفف كمان هناك صنف آخر تستغل الزوج وتدعي التمارض والمرض وانا شخصيا اعرف نساء اسلوبهم كذا تستدر عطف زوجها ومحبته لها وخوفه عليها بمرضها مثلا صارت مشكلة وتعصب وفجأة يغمى عليها وعلى طول للمستشفى ويعملون لها فحوصات وتحاليل والنتيجة في النهاية سليمة وزوجها يروح للي بينها وبينهم مشكلة اخواته اخوانه امه اي واحد حت اولاده ويسوي لهم محاضرة طويلة عريضة وتهزئ مرتب وانتم ماتحبون زوجتي وتبغون تقهروها انتم تكرهونها وتبغونها تموت يالطيف كأن ملك الموت بأيديهم واخر شئ حتى بعض اخوانه طردهم من بيته وفي العيد ما خلاهم يسلمون عليه امه جاء العيد وهي عند اصغر عيالها زعلانه منه وهو اكبر واحد يسمع زوجته على نظر اخوانه واولاده وهي تقول لأمه انتي مخرفه وانتي مالك دخل ومالك شغل بأي شئ وتسخر منها وتتهكم عليها بالعبارات اللي كلها قلة ادب وذوق واحترام ام زوجها عمرها في الستين وما حشمتها ولا احترمتها ولو احد اعترض على معاملتها على طول تحط نفسها مريضة وتعبانه ويغمى عليها وتروح للمشايخ يقرون عليها وكل يوم طالع لنا زوجها بسالفة مرة في حرمتي سحر ومرة مس ومرة حالة نفسية ومبهذلته بهذله اي سالفة تبغاها وماينفذها لها على طول تمرض ويغمى عليها وتتعب حتى الحين خلاص ماعاد يقدر يقول لها لا من كثر خوفه عليها لاتموت تلاقيه يراعيها مثل الطفل وازود حتى اولاده وبناتها تحكمت في مستقبلهم وفسخت على بناتها ثنتين خطبتهم من عيال عمهم بسبب شروطها المبالغة فيها وطلباتها اللي ماتخلص ولدها راحت خطبت له بنت اخوها والولد مايبغاها مو موافق عليها ولما شافته مو راضي قامت تعصب وتزعل وتمرض حتى الولد مسكين انصاع لها ووافق على طلبها قلت له انا شخصيا ليش توافق عليها وانت ماتبغاها قال وش اسوي امي ما ابغاها تزعل عليه هيىمريضة واللي فيها مكفيها انا بتزوجها علشان ارضي امي بس ياربي والله اني انقهرت عليه ولد اخلاق وطيبة ومحترم ومايستاهل اللي يصير فيه امه هي اللي كل شئ بالبيت يصير على كيفها واللي تبغاه يتنفذ غصب عنهم كلهم زوجها وعيالها واهل زوجها والمشكلة انها مو راضية احد يناقشها او ينصحها لو جيت تتكلم على طول تتشكى لزوجها وهو مايقصر يقوم يتهاوش ويزعل ويسبب مشاكل كله علشانها خلاص فكرة مرضها سيطرت عليه بشكل كامل صار مثل الخادم عندها هي تأمر وهو ينفذ بس انا اللي قهرني منها تطاولها على ام زوجها وكمان هي السبب بفسخ خطوبة بناتها وخطوبتها لولدها بنت هو مايبغاها ولايفكر فيها اساسا والمصيبة اللي اعظم من كذا كله ان زوجها هو اكبر واحد في العائلة يعتبر قدوة العائلة وعاقلهم وافهمهم معليش طولت بالسالفة لاكن هناك بعض الزوجات تكون سبب في عدم احترام الناس لزوجها او الإستماع له او طلب مشاورته بسبب طريقتها اللي تتعامل فيها مع زوجها امام اهله واقاربه وامام الناس تحس انها كاسرته كسر ماله اي اعتبار ولا اي تقدير واحترام عندها وتجد بعضهم لو زوجها تكلم بشئ اقترح موضوع امامها عند اهله او عند اهلها وماعجبها ماتصبر الين توصل بيتها وتجلس معاه وتناقشه بخصوص اللي قاله لا تروح تشب فيه قدامهم ولا تحط له اي احترام او اعتبار وتعارضه وتناقشه بطريقة مستفزة وهذا اسلوب غلط وبيوصل لنقطة يكون احتمال فيها اثارة مشكلة بينها وبينه وكلن منهم بياخذ بثأره ويبغى ينتصر امام الحضور ولا انكر ان هناك بعض الأهالي هداهم الله يحرضون ابنائهم على زوجاتهم مثلا لو حضر احدهم وهو يساعدها في المطبخ او طلبت منه انه يمسك طفلهم او يؤدي عمل هو في الأساس من اختصاص الزوجة لاكن حب يساعدها تجد هذا القريب يسخر منه وينتقده وكأنه عمل شئ غلط وكبير ويطلع عليه بإشاعات وكلام يضر بسمعة الزوج هذا من ما يجعل اللي حوله ينظرون له انه خروف زوجته على قولتهم فيصير مسخرة لتندرهم والإستهزاء والسخرية كمان هناك ازواج فيهم قلة ادب واحترام للزوجة وفاهمين القوامه غلط تجد بعضهم لما يأتي لذكر الزوجة او ذكر المرأة بشكل عام يسبقها بعبارة اجلكم الله او اعزكم الله وكأنها قذارة ونجاسة كيف سيكون حال نساء وزوجات من يتلفظ بهذا القول كيف سيحترمهم ويقدرهم ويجلهم ويعطيهم حقوقهم مثل هاؤلاء الرجال بل والله قد يصل بحال بعض الأزواج بالإمتناع عن اكل الزوجة الحائض او النفاس بسبب انها عليها نجاسة حتى لا يجالسها ولا ينام عندها ولا يقربها وكأنها فيها مرض معدي وكمان فيه ازواج ناسين اسماء زوجاتهم او يحسون منادتهم بأسمائهم او كنيتهم ثقيلة على السنتهم وتلاقيه ينادي عليها في البيت وخارج البيت هيييييييه يا هيييييه ياولد ماتسمعون ولا كحكح احم احم ولا يابنت يابنت ولا يا حرمة ادري اني طولت وشطحت كثير بس كلام بخاطري وحبيت اقوله وجزاك الله خير يابليغ وبلغك الله بأولادك واحفادك ورزقك الله برهم وطاعتهم اللهم آمين
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
التعديل الأخير تم بواسطة أم سلطان1 ; 07-11-2012 الساعة 08:57 PM
29-10-2012, 02:06 AM
رد : أزواج ضيعوا الرجولة أمام النساء!
ضوابط المشاركة
العرض العادي
