زوجك يعتمد المماطلة حتى تتم العودة وفقاً لوقته
من دون لا عتب ولا نقاش

تحيتي

قبل امس قابلته
رفض انه يتناقش .. قال انا جاي اسلم عليك ماني مستعد للعتب
طلبت منه يديني موعد.. لاني لازم اتكلم .. لازم نحط حد للي يصير لانه لو ما اتكلمنا واتفاهمنا. . راح يتكرر اللي صار بيننا بشكل او ب اخر ..
اليوم موعدنا .. انه ياخذني نروح البحر او اي مكان .. هو يقول البيت بس اما رفضت . . لكن شكله مُصِر انه يكون النقاش بالبيت وبنتي بسيبها عند اهلي ..
كان طول الوقت مشدود ومنقبض ويحاول بنفس الوقت يخفف دمه .. بس لما قلت له
يكون بعلمك انا الأهم عندي نتكلم بمشكلتنا الاولى .. ولا الثانيه صدقني لو انا شاكه واحد بالميه انه اللي وصلني صح كان ماشفت وجهي الان قدامك ..
( ملاحظه : الكلام اللي وصلني صح بس انا قلت كذا مدري ليش .. يمكن علشان ما احرجه ويمكن علشان ابغاه يأخذ حذره ويكون حذر انه مايوصلني اي شي من الجانب هذا منه )
قلت له ربي يحاسبك اذا كان في شي زي كذا صار وذنبك محد بيشيله غيرك .. رغم اني راح اعرف منك اكثر عن هذا الموضوع لما نتقابل .. لكن مو انا اللي اكذب تصرفاتك كإنسان تخاف الله وعايش معايا هالفتره واصدق وحده ما تخاف ربها وما اعرفها ..



هذا كلامي له وطبعا بعد هذا الكلام حسيت انه اتغير 180 درجه .. حسيت نشوة الفرحه بتطلع منه علشان انا مو مصدقه فيه ..
قال هذا الكلام .. هذا كلام العقل .. الان اصدق انك انسانه عاقله وبتحافظ ع زوجها وبيتها
وقال :
انا والله احبك وعارف انك تحبيني ..
وشكرا انك وافقتي تستقبليني اليوم ..
قلت له:
تحبني بدليل غيابك عني !
تحبني .. بدليل انه ينغلط علي واجي لعندك وأبوس يدك نتسامح وترفض وتردني !!
قال: وقتها كنت مشحون عليك وقلبي مليان .. ماهان علي لكن لمصلحتنا اننا نبعد وقتها .. انا بعدتك عني لاني بعيش معاك العمر كله .. بعدتك لمصلحتك .. بس صدقيني لو سمعت منك كلمة طلقني ثاني .. راح اطلقك واتركك مو شهرين .. ثلاثه شهور عند اهلك ..
قلت له :
طلقني يعني حبني.. يعني اعتذر لي .. يعني احتويني
قال: بحثت عن معناها بالقاموس مالقيته كذا .

اتكلمنا كثير بس كلام سطحي ما تعمقنا بالمشكلة ..
لكن قال متى ترجعي بيتك وتطبخي بقدر الضغط .. رميت عليه المخده ..

قلت له ترى انت مقنع الناس اني غلطانه وانت عارف انك انت اللي بدأت واستفزيتني ..
قال ليش ترفعي صوتك ..
قلت وارفع صوتي فين المشكله ؟ الانسان ما يعبر عن زعله ؟ ما افضفض .. ما تبغاني أعارضك ولا اقولك لا ! ليش فين عايشين علشان تصادر حريتي بالتعبير عن زعلي .؟
قال : عمري غلط عليك بالكلام زيك ؟
قلت له أغلط بالكلام .. رد عليا الكلمه بكلمه ... خليني احس انك مستعد تصفي قلبي من اي مشكله تصير بيننا .. مو اسكتي اسكتي الين خلاص امتلا قلبي وفلتت أعصابي ؟
قال: لو ارد عليك الكلمه بكلمه ما خلصنا ووقت المشاكل ما أحب اتكلم .
قلت: غير طريقتك ب كل اختلاف يصير بيننا .. مرا رد كلمه بكلمه . .مرا احضني... مرا قول اسكتي ..

ودار الكلام بنفس هذي الطريقه ..
قال تركتك تأديب عن مدة يدك وعن كلمة طلقني ..
قلت كلمة طلقني معناها احضني
وإذا بتأدبني علشان مديت يدي .. انا قبل اعرف انه يدك طويله على الحريم ايش كنت اقولك ؟ كنت اقولك مو رجال اللي يتقاوى ع حرمه ويمد يده عليها .. لكن هذا انا اقولك .. لاعاد تكررها وتمد يدك عليا .. لاني وقتها بنفذ قانوني ..
قال ايش قانونك؟
قلت : اللي يضربني اضربه.
قام يستهبل ويديني كفوف ع وجهي خفيفه يقول يلا هذا انا أضربك اتحداك تردينها ليا ...


انا الان اكذب عليه وعليكم وعلى إحساسي واقول انه المشكله الاولى اهم .. وانا والله قلبي بيتفطر من المشكله الثانيه ..

نفسي أواجهه بمشاعري الطبيعيه وابكي واصرخ واقول ليش وكيف وما تخاف ربك وايش هذا النفاق ومالقيت الا عرضك وطفله وبنت خالك فين أخلاقك العاليه فين ممنوع العريان ممنوع القصير .. حتى لبسي تنازلت عنه علشان اخلاقه الرفيعة انا ما قصرت معاك.. انا كل همي رضاك..فين اللي كان يقول ماعرفت الحب الا معاك .. فين اللي كان يحلف بإحتوائي له .. فين اللي كان يقول محروم اللي ماعنده زي أنثاي .. فين اللي كان يبكي بحضني ويقول انتِ ربي رزقني فيك نتيجة استغفاري ولا ماكنت احلم اتزوج وحده زيك .. فين اللي كان بعيني فووووق .. فين اللي لما أخرت صلاة العشا وخرجت معا رجعني البيت اصلي وأخذ مني تعهد ماعاد تتكرر ... ااااااااه ..
بس اخاف اخسر احترامه لنفسه قدامي .. ما ابغى احرجه ... كل ما تخيلت اني أصارحه اتخيل انكساره وما ارضاه... او اتخيل تاخذه العزة بالاثم ويقول هذا انا وهذي حياتي لا تتدخلي ..
ولا اخاف ان اعتذر لي .. يرجع ويسوي هالشي جهارا نهارا قدامي .. ويقول بباله دامها عرفت خلاص ..


تعبني التفكير ..
امس .. مدري قبل امس .. حلف لي انه ما يحب غيري ومافي بقلبه غيري ..

هذا اللي صار بإختصار
نسيت اقولكم لما دخلت وجلست
قال كيفك ؟
قلت مبسوطه الحمدلله
وسكتنا دقايق بعدها
انا قلت
ماراح أسألك كيفك لاني عارفه انك مبسوط ببعدي
قال وربي ماني مبسوط .. وربي انك غلطانه اني زعلان اكثر منك .. بس لمصلحتنا البعد ..

وقال انا اول لما طلبتي الطلاق تركتك شهر وهذي المره حلفت شهرين ما تدخلي بيتك علشان كذا اخذت المفاتيح

وكلااااام كثير يقرقع بقلبي

__________________

أشوفها تطورات حلوة

متى ترجعين بيتك

ع فكرة دايما يكرر كلمة. انت غلطانة و انت غلطانة
قولي له ترى افتح سيرة المشكلة الثانية اذا كررتها😁

__________________

سبحان الله
زوجك يخطط وبابنهايه يصير الي يبغاه بالضبط
خلاكي المده الي يبغاها
وخلاكي تتنازلي عن الموضوع الثاني
ماشاءالله عليه ما ينخاف عليه مضبط اموره

يعني النتيجة ما تغيرت في فهمه ان (((الاستفزاز ممنوع))

انصحك في وقت اخر ان تذكريه
ان مدة اليد لن تتكرر منه. و ان بعدك ان لا يستفزك

__________________

ما تكلمنا لسا
اليوم مو راجعه بيتي
انا طلبت منه موعد نتكلم واقول كل اللي بقلبي ونتناقش بدون مايسكتني
وافق بس قال بالبيت وانا رفضت البيت بس شكلو بباله انه نروح البيت

بس موعد الكلام ما راح ارجع الان قلت له اول نتعاتب ونتناقش
حتى بنتي ماراح تكون معايا

__________________

ناقشيه في بيتكم .. لو تناقشتوا في بيت الوالده وما عجبه الكلام عادي يخليش

تقعدين مو شهر بل واكثر

اما في بيتكم وين بيشرد مرده يرد لبيته ويخلص النقاش ... ارجعي لردود هند السابقه في طريقه محاورته

يفضل تواجهينه قريب لان لو اجلتي المواجهه وقلتي بسامحه من ظهر قلب

راح تفتحين الموضوع مره ثانيه ولو بعد حين وبتطلعين الشخص الحقود الغلطان الي ما ينسى

__________________
وهل من مصير اخر ؟

1_ انا مع كوكي
خذي بنتك و ارجعي بيتك ثم حاوريه بهدوء .

2_ منفردة
كنت تتمنين فقط ان يتواصل معك و يرد على رسائلك .. و ترجيتيه ان يأخذك لبيتك ..
و الآن لما لان و جاء و طلب رجوعك اصبحتي تماطلين و ترفضين العودة بسهولة و تكثرين العتاب ..
للأسف هذا ليس في صالحك ابدا
خاصة ان كانت اولى اولوياتك العودة لبيتك .

ما الذي تغير يا منفردة ؟
عندما كان بعيد كنت تتمنين قربه
و عندما اقترب صرتي تهربين منه

يا حبيبة
طالما انه قدم تنازلات قدمي انت تنازلات
ايضا .. حتى لا يشعر انه تنازل اكثر من اللازم
و انه تنازل لك و انت لا تستحقين ذلك
بما انه صار لين فكوني لينة معه و طاوعيه في الرجوع لبيتك .

منفردة
لا تتركي الشيطان يفرق بينكما
و يملأ قلب زوجك ضدك
و نعود لنقطة البداية .. و قد تكون هي النهاية لا قدر الله .

بالتوفيق

__________________
أستودعكم الله الذي لا تضيع ودائعه .. و احفظوا عني :
إن لم تكن إنسان إرادة تلتزم بفعل ما تريد فكن إنسان شغف و أحب ما تريد الالتزام به و ستنجح بإذن الله .

يمكن لاني زوجي ثانيه احس موقفي ضعيف لانه بكل بساطه منه ان ماعجبني الوضع .. فيه الف غيري


اصعب احساس لما تبغي تحافظي ع حياتك واستقرارك وبنفس الوقت عندك كرامة ماتبغيها تنهدر ..

ليت اقدر أواجهه ويكون عندي استعداد اخسره ..
بس للاسف ابغى أواجه بدون ما اخسره ...

__________________

تدرين ،، اكثري من لا حول و لا قوة الا بالله وربي يفرجها
سبحان الله التسخير بيد الله
الله ييسر دربك