السلام عليكم ورحمة الله وبركاته

الله يسعدكم دنيا وآخره

اسمحولي محتاجه احد يسمع لي ابي ابوح الي بداخلي احس مكتومه مرررره يعني بكتب الي يطلع بخاطري سواء عامي بحت اوغيره <الله يجزاكم الجنه>

انا فتاة عمري33 سنه غير متزوجه جامعيه وكنت متفوقه غير موظفه بس اعمل بمؤسسه خيريه يعني متطوعه واهتم بالمخيمات الدعويه وآماكن الدعوه مع اخوات من اهل الخير كل عملهم خالص لوجه الله
واجد سعادتي بأماكن الخيروالحمدلله
اخواني وخواتي متزو جين الي اكبر مني واصغر

برجع شوي لأيام الطفوله كنت هاديه مالي صوت ابد كانت هناك مشاكل بين امي ابوي احيانا قد تصل للطلاق لولا ستر الله سبحانه تلك الفترة اشغلت نفسي بالدراسه والتفوق موعشان ذاتي لأ عشان الوالد لأني احس بنقص داخل نفسي فارضي ابوي بتفوقي المهم ماحسيت بفترة المراهقه الي مروا فيها اخواني وخواتي انا مثل انا بالعكس ماعندي اي ر أي في البيت حتى التخصص الجامعي ولم اطالب بجوال وغيره من متطلبات البنات الى ان تخرجت في ذاك الوقت مافكرت بالزو اج ابدا حتى مع صديقاتي مجرد نرسم صوره خياليه لزوج المستقبل كنت اسمعهم واضحك معاهم ومع خيال كل وحده وانا لأ كنت استحي مرررة ويمكن السبب البيت والأهل ويمكن من مشاكل الوالدين والله اعلم

مر على التخرج سنوات قليله مافكرت بالزواج بسبب انشغالي بالمؤسسه الخيريه

ولم اخطب الى ان فتحت عيوني على عمر30سنه وقبله زواج الأخوان والأخوات الي اصغر مني وصار العائله عندها احفاد حبيتهم مررررررررررة مااستغنى عنهم احس ارجع للطفوله معاهم واشوف أفلام الكرتون اضحك والعب وانطط مثلهم احس بسعادة يمكن اعوض عن طفولتي الكئيبه بس احب الماضي ودي انه يرجع ببساطته وسعة صدور الناس لاخدم ولا سواقين ولاجوالات ولا مجمعات واثاث بسيط وغيره وغيره واكيد بتايدوني انا اتكلم عن مجتمعي السعودي

المهم انخطبت من رجل رفض الوالد والسبب ماهو قبيلي
الى ان وصلت هذا العمر33 انخطبت من رجل متزوج وعنده أولاد انا وافقت لأني كنت اتمنى متزوج عشان العمر وانا اعرف نفسي مو مثل متطلبات البنات مأحب السفر ولا الزواجات وغيره لأنهاتشغل الواحد وتجيب مشاكل وانا مأحب المشاكل لأني تعقدت من أهلي وربي صارت عندي عقدنفسيه حتى المهر مو مهم وعشان العمر قلت بنفسي بتنازل واحمد ربي ابي استقر وابي اصير ام وبعوض عن الأستقرار الي ادور عليه لأني محتاجه استقرار داخلي محتاجه لأسره وابنائها مثل احمد بن حنبل ومصعب وعبدالله بن رواحه
ابي طفل سليم التربيه سليم البيئه له هدف بالحياة ابي اعوض الي انا فقدته من الأهل سامحهم الله

المهم كل شي تمام وصارت النظرة الشرعيه والفحص وتحديد الملكه


فررررررررررحت مررررررررررررة ونزلت دموعي قلت واخيرا على طول تخيلت نفس عندي اطفال ااكلهم ونوم الثاني واطبخ وانظف ياألله ياألله على هالشعور والحلم الي حلمته

لما اروح السوق مع الأهل اروح عنهم وادخل ملابس المواليد واجلس اشم ريحتها واضمها على صدري واتخيل طفلي وهو لابس بيج بعدين اقول لألأ بشتري كحلي ياحلو هالحلم <ياااااااااااارب يرزق كل من يتمنى طفل ذريه صالحه وربي انهم زينة الحياة الدنيا>

كان راعي المحل احس يقول بقلبه شبلاها ذا الخبله تروح من مكان للثاني بعدين قعدت اسوم السراير
والعربيات احساس غررررررررررريب ياناس


حلمت وحلمت وحلمت وحلمت وحلمت الى ان قمت برفض الوالد


والسبب مافيه راحه من هالخاطب . لأن اخلاق الخاطب لم يثنو عليه...ليتني ماقمت حسيت ان خاطري انكسر
وحسيت بالفشيله من نفسي لأني حلمت حلم وانا ادرك من انه حلم واقول عساه يتحقق

وربي صدمه قويه بقلبي ابي ابكي ابي اصارخ بقوة للحين ماحس بالي يدور حولي

يعني حتى صلاة التراويح اطلع من البيت اروح للمسجد امشي وامشي وامشي من غير شعور وادراك بالخارج الى ان ادخل المسجد من غير تفكير

وبعدين ؟؟؟؟؟؟؟؟



ماقول ألا...... لحكمه ربي يعلمها وانا لا أعلمها..... الحمدالله الذي لايحمد على مكروه سواه
الحمدلله الحمدلله الحمدلله


ولعل ولعل ولعلها
من عقد الأمور يحلها

آآآآآسفه طولت عليكم الله يحقق آآآآآآآآآآآمانيكم ياااارب
ويقضي ربي حوائجكم ياااارب