السلام عليكم

عندي مشكلي وايد مأرقتني
زوجي الله يصلحه ويهديه صار له فتره مقاطع اهله ولا في اي تواصل مابينه وبينهم
انا مايهمني شخص كثر مايهموني امه وابوه
لاني احرص كل الحرص انه زوجي يكون بار بوالديه


سبب الخلاف غامض ما اعرفه
ولما سألت اهله هم بنفسهم مايعرفون السبب اللي خلاه يقطعهم جي
يمكن مره صار نقاش وهو انجرح ومن بعدها شوي شوي قام يبتعد وقطع كل وسائل التواصل وياهم
مايرد لا على اتصالات ولا على رسائل امه وابوه او اي حد من طرف اهله ويتهرب من شوفتهم

انا اعرف طبع زوجي للاسف لما يحس انه غلطان يتهرب ومايواجه المشكله او الشخص اللي غلط في حقه
اتوقع انه زوجي حالياً ماله ويه يشوف اهله ويرد على اتصالاتهم لانه منحرج كيف بيكلمهم وطول هذه المده يتهرب ويزيد الموضوع صعوبه اكثر كل ماصد وهم يحاولون يوصلون له بس مافي فايده

للعلم
زوجي ملتزم الحمدلله و بار في امه وابوه وعمره ما اشتكوا منه وهو انسان قلبه طيب وعاطفي .. يعني امه وابوه منصدمين من اللي صاير فيه الحين وهذه اول مره بحياته يسويها يقطهم لمدة شهور

بس ماعرف شو السبب اللي يخليه يتهرب منهم

وحبيت اوضح انه زوجي يمكن احيانا يتعرض لكلام يضايقه من امه وابوه من توجهيات ومحاسبه ونصايح
بس اكيد مهما كان هذيله امه وابوه ماتوصل المواصيل انه يقطعهم كل هذه المده

وانا ترى سألت زوجي ليش قاطعهم شو السبب
بس على طول يقول لي سكري الموضوع
وسألته نفس السؤال على فترات وتميت احن لكن يرد بنفس الجواب ويعصب علي وينفعل

ذكرته بفضل بر الوالدين تكلمت معاه من الناحيه الدينيه والعاطفيه ومن كل النواحي وطرشت له رسايل بالواتساب ومرات كنت من عندي اقول له امك تصيح حابه تشوفك تعال معاي نزورهم و غيره بس ابدا مانفع وياه اي شي لا حول ولا قوة الا بالله ..

شو الحل والله تعبانه نفسياً من هذه السالفه
قلبي يعورني لما اروح ازورهم بروحي بدون زوجي وكل مره يسألوني عنه ويقولون سلمي عليه ومشتاقين له قلبي يتقطع وماعرف شو اقول لهم
انا بروحي مب عارفه شو فيه ولين متى جي بيتم مقاطع اهله

الحين انا ناويه اصلح ذات البين
ودي اصلح مابين زوجي واهله
ودي افرح قلب امه وابوه وهو بعد متأكده انه بيرتاح نفسيا لو رجع يكلمهم
لانه اكيد عايش بعذاب نفسي حاليا بس مايعترف


الله يهديه ويصلحه
ارجوكم عطوني حلول وطرق اقدر اصلح مابينهم

الكلام والنصح والمقاطع المؤثره بالواتساب مانفعت وياه