السلام عليكم
صارلي فتره ادخل بالمنتدى واتصفح مشاكل الاطفال وشفت تفاعل حلو بين الاعضاء
وفكرت اعرض مشكلتي واتمنى تساعدوني وتنصحوني شلون اتعامل مع ابني الي جنني وحيموتني
طبعا ابني عمره 6 سنوات ومن كان عمره 9 اشهر ابوه توفى وعشت مع اهلي واهلي دللوه عالاخر
وانا كانت عندي مشاكل مع اهل ابوه وانعكست عليه بحيث كنت من اعصب من جدته اطلع غضبي بيه واعصب عليه واضربه المهم بعد سنتين تزوجت من شخص طيب القلب ويحبه ويعامله مثل ابنه وحتى ميرضى اضربه
بس المشكله اني ابني عنيد جدا وماعنده احترام ابد ومسمع كلمه يعني زوجي شكد ميحبه ويعامله زين اوقات يطلعه عن طوره ويخليه يكره نفسه واني احس انه اوقات يتندم لان تزوجني واني عندي طفل ويمكن يجي يوم ويكلي رجعيه لاهله ماريده بما انه صار عنده ولد وبنت
ابني تعود عالضرب يعني يمكن اضربه باليوم 20 مره وميفيد وياه اضربه ويضحك ويثير غضبي اكثر احاول اتكلم وياه بهدوء افهمه انه انت صرت كبير وماريد اضربك ميفيد يرجع وره شويه يسوي حركات يثير غضبي بيها يعني وصلت مرحله انه اظل اصيح واكسر شغلات بالبيت من شدة عصبيتي وميفيد وره شويه يجي يضحك ولا كأنه صار شي
يعني بخلال وجوده بالبيت تشن حرب والبيت نار ومشتعله صار وجوده اثاره اعصاب
علموني شلون اتصرف وياه يعني حتى بالروضه يشتكون منه وحتى من يطلع ويه زوجي يتصرف ويه اصدقاء زوجي بقلة احترام ويصيح عليهم وزوجي ينحرج من هالحاله
اتمنى تتفاعلون بموضوعي وتنصحوني لان من صدك تعبت اعصابي وما اعرف شلون اتصرف وياه
مليت من الضرب ومن الصياح