السلام عليكم انا جديدة هنا ومالي في المقدمات بدخل على طول في الموضوع انا متزوجة من سنتين ونص وعندي طفل سنة واربع شهور زوجي انسان مهمل لبيته واهم شي عنده وناسته وطلعاته مايقصر من الناحية الماديه واللي اطلبه يجيبه لي لكن مايسمح لي اطلع اي مكان حتى لو مع اهلي وايش عذره اغار ..! ويعطيني فلوس لكن مايطلعني ولا يسمح لي اطلع مع غيره المهم جلست عند اهلي شهرين على اساس يدور شقة غير اللي حنا ساكنين فيها ويماطل شهرين يالله لقى شقة اول يوم سكنتها واغراضي مكركبه والشقه فاضيه مافيها اثاث بس الصاله فيها فرش الصاله القديمه واخوه اللي اكبر منه بخييل الله منعم عليه عنده 3 بيوت ومأجرها وطلب من زوجي يجلس عندنا 10 ايام واخوانه كثير وبيت اهله موجود لكن طاردينه طبعاً رفضت استقبله لان معه زوجته وعياله وشغالتهم ! وزوجي قال ماراح اطرد اخوي والشقه جدا ضيقه واساسا ننام في الصاله مافي مكان وفعلا استقبلهم وانا خيرته بيني وبينهم وقال ماراح اطردهم والبيت مو بيتك وزعلت ورحت لاهلي ودخلت اهله في الموضوع واخوانه الكبار وامه اتصلوا في البخيل وطردوه وقال طلع وزوجي يقول طلع لكن ماكلمني ولا اعتذر ولا رجعني بعدها باسبوع اكتشفت انهم مازالوا ببيتي وكلمت اهله ورجعوا هزأوه وطردوه وبرضو جالس مايبغى يطلع وزوجي ترك البيت لهم وساكن عند صديقه وانا عند اهلي بعدها دخلت ابوي في الموضوع وقال البنت تبي اغراضها بكرا تجيب مفتاح البيت وفعلا جاء لكن صار يحاول فيني اجي معه وقال انا بطرده وباخذ حقك منه ورحت معه لبيتي لكن مالقيتهم ولقيت فرشهم وغسالتهم ناوينها سكن شكلهم الزبده صار يراضيني وانا مااقتنعت انه طرده اللي قهرني جلسوا 9 ايام غصبن عني وبرضى زوجي ومارضيت لين جاب لي طقم ذهب ووعدني بسفره بعد يومين المهم مشيتها ورضيت لكن اهلي قالوا انتي رجعتي بسهوله وانتي ماعندك غير التهديد الكاذب لاني وصلتها للطلاق قدامه وقدام اهله وهو يقول مستحي اطرده الحين طلعوني اني ماعندي سالفه بتهديدي واني رضيت بسهوله لانه ماكلم اهلي جاء اخذني وبعلمهم بس ابوي برا البيت لما اخذني نفسياً احس اني كرهته لان صرت قدام الكل رضيت بسهوله وانه ماراح يهتم لو هددت مره ثانيه وللعلم هو شايف نفسه انجبر ومو غلطان لانه انحد يستقبل اخوه واهلي يبون اسحب عليه شهر لين يرضيني وش رايكم اللي سويته صح ولا غلط واعذروني على اطالتي في الموضوع ..

تم تعديل العنوان ليتناسب مع المضمون

غلطانه ونص مع احترامي قال بيجلس 10 ايام وسويتي مشكله طويله عريضه مهو ساكن معكم ع طوول وبهالمواقف تبين اخلاق الناس وفوق ماهو جايب ذهب عشان يرضيك بعد تحسي انه رضيتي بالساهل ولسه ودك تنتقمي !!! الله المستعان
واخوه ماشغلك فيه بخيل ولاكريم ولا لا هو ضيف لمدة بسيطه اكرميه وبيضي وجه زوجك لو هو ثقيل ع نفسك مو تعملي مشكله طويله عريضه

__________________
مضى مامضى والله على المقبلات يعين ..! وعسى الله يزينها على القلب لاشانت~

كل واحدة تحب بيتها لوحدها تجد فيه راحتها
لكن لو اضطررنا لاستقبال اقارب لمدة حتى تنفرج ازمتهم فهذا واجب

اما رضاك بسهولة فغريب الرجل جابلك طقم ذهب ووعدك بسفر وتقولين بسهولة
يا اختي غيرك ترضى بكلمة
المهم تكوني صادقة في مشاعرك
رضيتي خلاص اما تمثلي انك لسا ما رضيتي وانك غالية ولازم يبدل الغالي والنفيس عشان يردك فهذا اسلوب منفر يكره
فرجوعك لبيتك صحيح
لانه لو الواحدة تكره بجد ما يرضيها اي شي

جهاد الحياة اشكر لك ردك لكن انا اعرف اخوه زين فلوسه كثيره وعنده ثلاث بيوت لكن بخيل مايبي يدفع لنفسه واهله حق سكن لو كان محتاج كان على عيني وراسي وبيجلس اكثر من عشر ايام لكن رجعت بيتي وزوجي يقول انه طرده وغير كذا بيتي بلاط مافي اثاث ومعروف بين اخوانه انه عاله عليهم والكل مايستقبله لانه مايدخل بيت الا يخرب بين الزوجين واخوه الثاني وصل الموضوع للطلاق بسبب البخيل عشان كذا طردوه بالعربي سوسه ومايستحي

شاكرة لك ردك لكن اهلي يقولون لا عاد تدخلين احد اذا كنتي مو قد كلامك يعني بنظرهم غلطت لما بسرعه رجعت له

ماحب نوعية الحريم اللي كذا
ولا تشتكين من زوجك مرره لايقين على بعض
اذا هو مهمل فأنت مو مقصره من ادنى شي بينك وبينه سمع اخر الحي

شاكرة لك ردك لكن اهلي يقولون لا عاد تدخلين احد اذا كنتي مو قد كلامك يعني بنظرهم غلطت لما بسرعه رجعت له

العقد الفريد انا مو فاهمه ليش الهجوم وكأنو انا البخيله اللي ضيقت على الناس في بيتهم وهم بحاجه وفي حالة رحيل وانا اللي منعم علي الله واقط وجهي على الناس وزوجي هو اللي حدني اروح لاهلي لما قال البيت مو بيتك !!

اهلي واهلي ....ليش اهلك يحددوا كل شي وانتي وين رايك

اخوي عبدالعزيز انا لما اقول اهلي لانهم منكدين علي بنظرتهم لي حتى لو طنشتهم غير كذا لو صارت لي مشكله معه وطردني محد بيوقف معي منهم وشكرا لردك