*أسجل استغرابي وذهولي الكبير مما أقرأ هنا.
*لن أجيبك بأي شيء ولن أسأل عن أي شيء حتى تنفذي هذه الخطوتين:
1) قرب شديد من الله.. وبث الشكوى والحزن إليه.. وبكاء على سجادة الصلاة.. مع اتخاذ أسلوب العزلة أنت وأولادك في البيت والتواصل الهاتفي الطبيعي مع الأرحام والأهل.
2) إخراج أهلك من الموضوع الآن.. وعم تصعيده أبداً..
*افعلي هذا لمدة يومين ثم تعالي اكتبي هنا.. وخلال هذا اليومين اكتفي فقط بالفضفضة المتواصلة عن مشاعرك فقط.

لا حول ولا قوة إلا بالله العلي العظيم نسأل الله يبدلك في ما اصابك خير ويعينك ويصبرك ويكتب لك ولأولادك كل مافيه خير وصلاح لأمركما يارب ياكريم إنك تهون عليها ما اصابها من هم وحزن وإبتلاء وتصبرها وترزقها الحكمة وتدبرها في امرها فإنها لا تحسن التدبير اللهم آمين يارب

غاليتي روح الطير والله لا ادري ما اقول لك ولا إيش اكتب لك هذا الخبر نزل علية كالصاعقة ويشهد الله اني اشوفك في مقام اخواتي وتمنيت اني مادخلت للمنتدى واقرأ هذا الخبر التعيس اللي احزنني جدا ولست ادري ماذا اقول لك غير إني ماراح انساك من دعواتي ان الله يسهل عليك كل امورك وان شاء الله ان المرأة اللي مثلك تمتلك عقلية متميزة وتفكيرها كبير جدا ماعليها خوف بإذن الله سوى استمريتي في حياتك الزوجية او انفصلتي بإذن الله ماعليك خوف وكلنا هنا نعرف من هي روح الطير وكيف تفكر وتقرر وربنا يسدد خطواتك بكل خير ويسهل لك امورك والإخوان والأخوات اهل العقول الرزينة والأقلام الآمعة والأفكار النيرة ماراح يتركونك بعون الله ونحن محبينك ومغلينك تأكدي انا ماراح ننساك من دعواتنا حتى الله يفرج همك وكربتك ويحل كل امورك بكل يسر بإذن الله تعالى ومهما غبت عن صفحتك تأكدي بأني متابعتك بكل لحظة وادعو لك بكل وقت إن شاء الله تعالى
وربنا يكتب لك كل مافيه خير يارب وينور بصيرتك ويرزقك السعادة في حياتك ويصرف عنك كل شر وسوء يارب .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله

رغم عدم المامي بالمشكلة
بس حابة اقولك نصيحة يا روح
لا تستعجلين في قرارك و حتى زوجك لا يعرف انتي ايش ناوية عليه
استني شوي فكري احسبيها من جميع النواحي عشان ماتندمين على اي قرار بعدين ..

الله يكتب لك الخير وين ماكان

__________________

الله يفرج همك الزمي الاستغفار والدعاء
قلوبنا معاك ولن ننساك من دعائنا ياغالية

الله يفرج همك في هذا اليوم الفضيل
ويلهمك الصبر والثبات ويشرح لك صدرك يارب
قلوبنا معك يالغاليه

__________________
《اللهم استودعتك أطفالي الذي لا تضيع ودائعه》

السلام عليكم ورحمة الله تعالى وبركاته

ياجماعة الخير ، الله يرحم والدينكم ، ويجزيكم الجنة ومن تحبون ، ياتاج راسي كلكم
أختكم روح الطير بشر وعندها مشاعر وأحاسيس ، وعندها كرامة وكبرياء وتحس .!!

الرجال خان فراشها + انه مايصلي + أنه مايصوم + انه مايخاف الله ولاهو معبر احد!!

شلون تبونها تصبر على كل هذا ؟ والله ماتتحمل كل هالهموم !!
واللي يقولها أصبري؟؟ تصبر على شنو ؟؟ تصبر على إنهدار كرامتها وعزة نفسها؟؟ وإلا تصبر على ذلها وإنكسراها له؟؟

والله ولاسمح الله لو كل الحريم اللي شاركوا هنا صارلهم مثل ماصار للأخت روح الطير بتتغير أرائهم والجميع بيقولها تتطلقي!! لأن اللي أيدة بالماي مو مثل اللي أيدة بالنار!!

محد سأل نفسه منكم ؟؟ ليه الله سبحانه وتعالى حط حد الزاني المحصن رجم حتى الموت ؟؟؟
لأن الله سبحانه وتعالى يبغض الخونة ، ولايحبهم ، إلا إن شاء الله وصفح عنهم وتاب عليهم.

الحرمة إذا خانت فراش زوجها كلنا راح نتفق ونقول للرجال طلقها ولا تتحسف عليها حتى لو عنده اولاد منها
بينما الرجال اذا خان فراش زوجتة تجون للزوجة الفقيرة وتقولون لها أصبري عشان عيالج وبيتج وووالخ!!

ليه أنسيس الحرام ونتساهلة للرجل ؟؟ بينما لانقبل تسييس الحرام ونستصعبة على المرأة!!
ترى المرأه ماهي أسمنت ماتحس !! إلا تحس وعندها مشاعر وأحاسيس وعواطف وشعور وكرامة وعزة نفس.

والله ياروح لو انج أختي فلا تقعدين عندة دقيقة وحدة!! الله الغني عنة وعن أشكالة
واللي يترك شي لوجه الله ، بيعوضة ربي باللي أحسن منة ، ويرضية إلين يكتفي.

والقرار الأول والأخير لج ، وأنتي حرة وسيدة نفسك وقرارك.

__________________
استغفر الله واتوب إليه

__________________

بسم الله الرحمن الرحيم ..

أرجو من المشرفة الفاضلة إضافة ( المستجدات بصفحة رقم 3 ) ..
لإني أعتذر عن تأخري الخارج عن إرادتي .. حتى أولادي و نفسي أهملتهم ..

.
.

اللي صار ، كله مترابط ببعضه ..

.
.

و معليه بأكتب و أضغط ارسال عشان لا يطير و ينحذف ..
أنا سهرانة اليوم لحد الفجر ، عشان أخلص من الكتابة ..

هلا ياقلبي إحنا متابعين معاك الله يفرج همك

__________________
اللهم إن أبي نزل بك وأنت خير منزول اللهم أكرم نزله ووسع مدخله وارفع درجته وجازه بالحسنات إحسانا وبالسيئات عفوا وغفرانا .. آمين

الموضوع و مافيه ، متعلق كله ببعضه ..

حياتي سابقاً :
- زوجة مدللة من قبل والدتها و بس تمدح فيا أمي أمام زوجي ، و أخواني و أخواتي متواصلين مع بعض،
لي عزوة و سند و هم أهلي، ولدي أمي ربته و أنا و زوجي ما شعرنا بمسئوليته، ما عمري الصراحة
أعرف اطبخ و أشيل البيت و كذا ، لإنه بداية الحياة كانت أمي ترسل شغالتها و أنا اهتمامي كان
فقط ( بزوجي ) ، و بعدين في بريطانيا كانت معاي شغالة ، و لما سافرت الشغالة صار زوجي
يساعدني بشغل البيت ،

و مع كذا ، كنت عصامية بدراستي و تحملي لمسئولية البيت من مقاضي و حل المشاكل المادية
و اتخاذ قرارات كبرى مثل سفر أو دراسة أو غربة أو غيره ، و من نجاح لنجاح بمجال العمل و الدراسة ..

.
.

أمي ماتت ،، و بدأ كل شي ينقلب و يتغير الحال من حال إلى حال :
ظهرت غيرة و حقد أخواني و أخواتي ( مو كلهم ) لكن فيه وحدة نمامة بالنصف تنتقل بين الجميع
و تنشر أقاويل خاطئة ، تعودوا على الأخد و عدم العطاء لإنه أمي كانت تعطيهم دايم و ما تطلب ..
فوجدت حالي ( وحيدة ) وسط مسئولية طفلين ( و أنا اللي ما عمري ربيت طفل ) ..

أهلي يعرفوني ، إني ما أعرف و لا تعودت على تربية طفلين فجأة و مسئولية بيت ( من - إلى ) ..
تركوني يتفرجوا و ما مدوا يد العون ، و لو طلبت مرات ( يرفضوا و يتحججوا و يتشمتوا ) ..

حبيت إني أثبت لنفسي إني ناجحة بتحمل مسئولية الإهتمام و العناية بطفل رضيع و إني أكون أم
ناجحة، خلال 9 أشهر .. و لإنه ما يكفي النجاح بالدراسة و الحياة العملية فقط ..

و الحمد لله و الشكر .. قدرت و بدون مساعدة من أي شخص ..
قمت بنفسي في فترة نفاسي و الإهتمام بالرضيع ..

زوجي ما كان عاجبه الشي هذا و كان يكتم بداخل قلبه ..

طيب إيش اعمل ؟؟؟؟؟؟؟؟؟؟؟؟؟؟؟؟؟؟؟؟
لا عندي أهل أترك أطفالي عندهم لو نص يوم ، و لا أهله يحبوا الأطفال ..

قلت له : يا قلبي هي فترة بس معليه .. حمودي لسى نونو و ما يقدر يعتمد على حاله ..
و نحن وقت فكرنا نجيب حمودي ، عشان يكبر شوي و ينشغل مع أخوه الكبير ..
و أبدأ ( أتفضى لك إنت و بس ) ..

و مع كذا ، كنت قدر المستطاع .. أحاول أتفضى له ..

.
.

مشكلة زوجي (كتوم لأبعد حد ، و ما يظهر أبدا إنه منزعج من شي ، و لو متضايق ما يحب أحد يسأله)

يبغاني أترك الأولاد يناموا مع الشغالة .. طيب ولدي الكبير وقت ما كنت في الخارج أدرس ..
كان ينام ولدي مع الشغالة و أنا بالجامعة ، لإني مرات كنت اضطر أواصل بالجامعة لمدة يومين
و كان يجي زوجي عندي و يجلس معاي بمكتبة الجامعة ..

فكنت مقصرة جدا مع ولدي ، و بداخلي كنت أتألم لإني محرومة من ولدي و هو محروم مني ..
و غير كذا ، زوجي إلى الآن .. يعامل ولده الكبير ( ما كأنه ولده ) لإنه ما حس به أبدا ..

كنت طول فترة زواجي ، أهم شي ( زوجي ) و راحته ..
في دراستي بالخارج ( كنت بسسس أقدم المطلوب عشان أضمن درجة النجاح ) ..
حتى أتفضى لزوجي .. ولدي كنت مرات أتركه مع الشغالة و يلعب معاها بالحديقة بس عشان أجلس
مع زوجي و بسسسس ..

.
.

زوجي كان يبغى الشي هذا دحين يتكرر ..

بس كتبت لكم من فترة عن مشاكل الشغالات و مصايبهم اللي شفتها هنا ..
كيف أثق بوحدة من غير إقامة و لا كشف صحي ، اترك ولدي ينام معاها ؟؟؟

كيف أحسس زوجي بمسئوليته تجاه أولاده ، إن حققت طلبه و خليته هو قبل أولاده ؟؟؟
أنا طيب دحين ماعندي أمي اترك أولادي عندها لو يوم واحد و اتفضى له و أروح معاه مطعم لوحدنا مثلا
و لا أخواتي يرضوا إنهم يمسكوا أولادي لو شوي ..

المهم ، ولدي الصغير دحين أبوه مرة يحبه و تعلق فيه ..

لإني كنت أقربه لأبوه ( طيب هذه نتيجة رائعة أحسها في إني ما حققت طلب زوجي بإبعاد الرضيع
و التفرغ له فقط )

.
.

أنا بأتفرغ لزوجي و أهتم فيه ، لكن أنا ماني ( إمرأة آلية ) ..

- زوج عاطل عن العمل
- ضغط عمل
- بيت و طفلين
- أعباء مادية
- بيت و سيارة و غيره
- إدارتي للمنزل
- إدارتي للشغالة و تحملي لقرفهم و مشاكلهم و ذلهم لنا ..
- غير كذا أمي ميتة قريب و خروجي من صدمة ، لإني كنت شايفتها تموت قدامي يوم عن يوم ..
- و حقد دفين من الأخوات و الأخوان بسبب الماضي و تمييز الوالدة لي و غيره ..

.
.

المهم ..

قدرت و الحمد لله ،، إني انجح بإني أثبت لنفسي إني إمرأة ( منزل ) أو ( ست بيت ممتازة ) ..
أولادي نظاف و شبعانيين و الحمد لله ، الملابس دايم تتغسل و تتنشر و تتطبق و تترتب بالدواليب ،
البيت نظيف و الغرف ، و كنت أنقل غرفة من غرفة لغرفة و أغير في ديكور البيت ..

كله عشان زوجي يرجع من شغله ( طبعا توظف من 3 أشهر فقط ) ..
يرجع و يلاقي أولاده مرتاحين و مبسوطين و البيت نظيف ووو إلخ ..

.
.

حياتنا رتبتها و الحمد لله .. علاقتنا الزوجية و الحمد لله رجعت تمام ،، زوجي متحمل مسئولية البيت
معاي ..

.
.

كان كل شي تمام و الحمد لله ..

كان بس باقي اضمن وجود شغالة أمينة، عشان تترتب حياتنا أكثر ..
استغليت الإجازة قدر المستطاع بترتيب حياتنا ..

لا خرجت مناسبات ، و لا رحت أسواق ، و لا كنت ارتاح ثانية ..
من شي لشي .. و فوق هذا كله .. مشاكل زوجي المادية و راتبه اللي ما يبقى منه شي ..

.
.

فين بدأت المشكلة الحقيقية ؟؟؟
و اللي شعرت بوجودها ( مثل ما قالت نورة ) ..

بدأت المشكلة من أسبوعين ( و الحمد لله ) إنها ما كانت من قبل ..
لإني شعرت من وقته ( و هو اللي أعطاني الثقة بأحاسيسي و إني ماني غافلة عن منزلي و زوجي و
بيتي )

.
.

( أكمل دحين ) ..