السلام عليكم ..

أنا راح أتكلم باللهجه العاميه علشان أعبر زين وأرتاح أكثر ان شاءالله .. لأني بإذن الله بلقى التوجيهات السليمه من الأعضاء الكرام. أنا طرحت قبل فتره مشكله أصابت زوجتي (بعيد الشر عن المسلمين أجمعين) .. المشكله بدت معها من رمضان اللي فات .. تعرضنا أنا وياها لعدم تفاهم وصار فيه شد بالبيت شوي .. ونتج منه توتر عصبي أثر على زوجتي وخلاها تحس بكتمه بالصدر ودوخه وأشياء ثانيه .. بعدها استخدمت علاج نفسي وخفت كثير .. وفي شهر ذو القعده كانت تستخدم العلاج النفسي وكانت بتروح عند أهلها ترتاح عندهم شوي .. عموما هي راحت هناك وكنا مخططين (طبعاً باتفاق مع الدكتور النفساني) انها تترك العلاج النفسي بالتدريج. بس الدكتور قال لها نصايح كثيره قبل ماتتركه من بينها كان النوم بدري بالليل .. وأنا أعرفها اذا راحت لأهلها تسهر لين الفجر .. وحرصتها قبل ماتروح .. روحتها هناك كانت فتره 3 أسابيع. بالبدايه كان منتظم نومها .. وشوي شوي لين صارت ماتنام الا بعد الفجر .. ومن خلال المكالمات اليوميه عرفت أنا انها تسهر .. وقلت لها مايصير لازم تنامين بالليل لأن هذا يضرك .. وماسمعت كلامي .. قبل لاتنتهي الثلاث أشابيع هذي جتها نفس الأعراض من دوخه ومادري حول الفجر .. ووداها أبوها للطوارئ وقالوا مافيها شي .. وبعدها ارتاحت شوي .. وجت اجازه عيد الأضحى ورحت أنا عندهم .. وفعلاً لقيتها متعوده على السهر.. اعتقدت فترة 3 أسابيع كانت كافيه لتغيير الجو والنفسيه .. وكنت متوقع انها مشتاقه لي .. بس ماشفت أي ردت فعل منها .. وقلت لها وين اللي بتشتاقين لي؟؟ .. قالت اصبر طيب لمن نرجع للبيت .. قلت اوكي .. خلصت الاجازه ورجعنا للبيت وأنا مستمر على عطائي لها ومبين لها شوقي .. بس هي ماسوت شي أبد .. لين عرفت انها مو على بعضها .. صارحتها وقلت لها وش فيك؟ .. قالت أحس اني تعبانه .. كتفي وصدري ومادري ايش .. قلت أنا الدكتور محذرك .. وأنا حذرتك .. ليش ماسمعتي الكلام وصرتي تسهرين .. قامت (ورفعت صوتها) وتقول هذا من الله .. قلت كل شي من الله أكيد بس بعد لاننسى ان أي شي يصير بسبب شي .. فصاحت وزعلت مني .. وهديت الوضع .. بعدها بكم يوم كنا عاديين .. وحابين نغير جو .. وطلعنا لديره قريبه منا علشان نتمشى فيها .. يوم صار بالليل جتها نفس الأعراض .. ووديتها للطوارئ على الساعه 3:00 الفجر .. ورجعنا للشقه ونمنا .. من بكرا رجعنا لديرتنا الظهر وكانت تعبانه وتحس بأوجاع براسها .. بس كان يوم جمعه .. يعني مافيه الا طوارئ .. اخذتها مره ثانيه للطوارئ وقالوا مافيك شي .. كل التحاليل بينت انك سليمه .. وأخذنا موعد مع دكتور المخ والأعصاب .. من بكرا رحنا للدكتور وكشف عليها كل أنواع الكشف .. وقال انتي سليمه بس يبدو انك مرهقه وأعصابك تالفه .. عطاها مهدئات وهدت أمورها شوي. بعد 3 أيام جتها أوجاع بالكتف وبيدها اليسرى وتحت الصدر .. ودورت بالانترنت .. ولقت موقع يقول ممكن يكون القلب .. وبذيك اللحظه بدت المصيبه الكبرى. صارت توسوس ان المشكله في قلبها .. فتغير حالها .. صارت لاتاكل ولا تضحك .. ولا تجتمع بأحد .. ولا تلعب بنتنا الوحيده .. فصار البيت كئيب استغفرالله بدرجه فضيعه .. انا دوام لين الساعه 4:00 وارجع للبيت القى زوجتي بحاله لاتحسد عليها .. وأقوم أواسيها وأطمنها ,, وألعب البنت علشان ماتحس بملل .. حتى البيت اهملته زوجتي وصارت تحس بضعف بالجسم .. وصرت أنا قايم بمسئولية البيت وزوجتي والدوام والبنت .. والله مرت 4 أسابيع وانا على هالحال .. انضغطت فيها نفسيا وجسديا .. وصرت غاااايب عن العالم .. تخيلوا وديت زوجتي من أول اسبوع قرت عن القلب الى دكتور قلب .. وكشف عليها 3 كشوفات .. بالسماعه .. وتخطيط قلب .. و سونار .. وقال انتي سليمه .. وطلعنا ذاك اليوم وكانت متطمنه .. وبعدها بيوم رجعت لها نفس الحاله .. قمت ووديتها لدكتور قلب عربي لأن الأول كان هندي وسوى كل الكشوفات هذي وقال نفس الكلام .. وقام يطمنها وتطمنت نوعاً ما .. بس بعدها بيوم زادت حالتها .. ووديتها لنفس الدكتور مره ثانيه وسوا تخطيط قلب وهي تجري بسير الجري .. وطلع التخطيط سليم 100% ... وتطمنت وأنا صرت أطمنها والدكتور يطمنها .. عموما بعدها يمكن بيومين او 3 أيام قالت أنا بقول لك شي بس لاتزعل .. قلت قولي عادي .. قالت انا ابي أروح لدكتور قلب ثالث .. طبعاً أنا انصعقت .. بس قلت يالله مافيه مشكله .. بس وش يضمن لي انك راح تقتنعين .. قالت أكيد ان شاءالله بقتنع .. وأخنا موعد مع دكتور وسوى كل الكشوفات وقال انتي سليمه .. قلت يادكتور أنا بقول لك شي .. انت ثالث دكتور قلب نمر عليه ... قال اذا المسأله كذا لازم تروح لطبيب نفساني .. لأن قلبها سليم .. وديتها لطبيبه نفسانيه .. بس ما اقتنعت وحاطه في بالها ان المشكله بالقلب ... طلبت مني نرجع للدكتور الأولاني (اللي هو الهندي) علشان يسوي لها تخطيط بسير الجري .. وقال مانسوي التخطيط هذا الا للكبار اللي واصلات مرحلة اليأس .. بس انا بسوي لك علشان تقتنعين .. وسى وقال انتي سليييييييييييييييييييييييمه 100% ..

أقول لكم .. مرت 4 أسابيع كلها استغفر الله مستشفيات .. واطلع من الدوام واجي استلمها 3 ساعات بعد الدوام اقنعها انها سليمه .. وألعب البنت .. وأشيل البيت كله فوق راسي .. قلت أزمه واتحملها وان شاءالله تعدي على خير .. بالأخير قلت مافيه الا تروحين عند أهلك وتريحين عندهم لك كم اسبوع .. واقتنعت بالقوه .. وأهلها عارفين السالفه .. أنا قبل ماتروح اتصلت على عمي (اللي هو ابوها) وقلت اصح توديها لشيخ يقرا عليها .. لأن هو من أول على طول قالي يمكن عين .. قلت ياعمي أنا عايش معها وعارف بالضبط متى بدت الحاله فيها ومن ايش .. قال ماعليه ممكن تكون عين .. طبعاً هو الله يهديه جاهل شوي .. ويابس راسه شوي ماياخذ ويعطي .. اللي يفكر فيه هو اللي لازم صح .. المهم كلمته قبل ماتروح زوجتي عندهم وحذرته كل الحذر انه مايوديها لشيخ يقرا عليها .. لأني خايف انها تشوف حرمه تطيح بعد مايقرا عليها الشيخ وتتأثر زوجتي .. فقلت لعمي لاتوديها الا بعد 10 أيام أقل شي واذا شفت ان حالتها سيئه .. بعد ماراحت زوجتي بأربع أيام لقطها العم الله يهديه ونفذ اللي براسه .. ووداها هي وعمتي .. وصار بالضبط نفس اللي كنت خايف منه وتأثرت زوجتي .. بعدها صارت زوجتي باليوم 10 مرات تصيح تقريبا ً ... تروح بمكان لحالها وتصيح ويضيق خلقها .. قلت لعمي الله يهديك ليش استعجلت قال راح ترتاح ان شاءالله .. قلت أنا المسئول .. لن راح ترجع للبيت وأخاف تصير متغيره وتفكيرها متغير ليش استعجلت .. ليش وديتها للشيخ؟ .. قام وحط في باله اني ماصدقت بالعين .. قلت العين حق .. والله اني مصدق فيها .. بس كان غايه في نفسي .. وفعلاً اللي خفت منه صار .. كلمت زوجتي وقلت لها ليش .. قالت هذا قرآن .. قلت القرآن مو لازم يكون بمكان يخوف .. انتي اقري قرآن وراح تحسين براحه .. (على فكره هي يومياً تقرا سورة البقره) .. عموما قالت لا هذي رقيه شرعيه .. قلت على العين والراس بس مو الحين .. انتي حالتك ماتسمح .. وماصدقت كلامي .. ومنعتها غصب .. بالأخير صاحت وقالت انا ابي اتعالج .. قلت انتي محتاجه علاج نفسي والله .. قالت لا .. انا ابي اروح للشيخ .. وقامت ترجاني .. قلت اسمعي .. اذا تبين الشيخ لازم تأكدين انه يقرا عليك انتي بس .. مايكون عندك حريم ثانيات .. واتفقنا على كذا .. وقمت وكلمت عمي وقلت له نفس الكلام .. قال أكيييييد .. تعرفون وش صار .. زوجتي كل يوم أكلمها وتقول رحت للشيخ .... واقول لها كنتي بروحك .. تقول ايه .. وأكلم عمي ويقول لي لا اطمئن أنا قلت للشيخ ابيك تقرا عليها لحالها وصار يقرا عليها هي بس .. تعرفون وش تبين بعدين؟ .. تبين ان الحركه صارت لها مره ثانيه .. طبعا عرفت من أمها .. وتعرفون وش المصيبه؟ .. المصيبه ان زوجتي بعدين كلمتني وقالت بقول لك شي بس لاتضحك علي .. قلت خير ان شاءالله؟ .. قالت أنا شاكه اني مسحوره!!!!!!!!!!!!! .. .وهنا انقهرت انا .. لأن بسبب الشيخ اللي راحت له قامت تشك انها مسحوره .. ودخلت في متاهه ثانيه .. وعرفت انها تكلم شيوخ طبعا من دون ما أدري وتقول لهم عن حالتها .. طبعا عرفت من أمها .. بالأخير صارت مكلمه واحد شيخ يقرب لها في ديره ثانيه .. وكان عمي متفق وياه انه لو تكلمه يقول لها انتي مافيك لاسحر ولا شي .. بس اتفقوا بالأخير ان اللي يقرب لها يقرا عليها علشان تطمن .. وهذا اللي صار أمس .. قرا عليها وماصار فيها شي .. وقال لها الشيخ اللي يقرب لها انتي تعبانه نفسيا .. وابعدي عن الوساوس .. بعدين كلمت عمي وبين من كلامه انه متحسف انه وداها للشيخ .. يا الله .. أنا مقهور من الشي هذا .. كأن ماحط لي شخصيه بحركته هذي ..

بقول لكم شي .. امها متضايقه منها .. وعارفه ان اللي فيها بسبب حياتها الزوجيه .. وأمها تحبني موووت .. وتقول والله مالقيت رجال مثلك .. حتى خواتها واخوانها معترفين بهالشي .. بس انا اللي تعباااااااااااااااااااااان .. المشكله في زوجتي .. جلست اتذكر كل الأيام اللي فاتت .. فعلا لقيت انه فيه أغلاط .. دايماً اذا حصل شي بيننا يبدا بنقاش هادي .. بعدين اذا حسيت انا ان اللي اسويه صح اقوم وأقول لها رايي .. تقوم تزعل ويصير الشد .. لين بالأخير تنهار اعصابنا .. ويصير زعل .. وبالأخير اجي انا واعتذر وأمشي حياتنا بس علشان بنتي .. اللي اموووووووووووووووت فيها .. والله ياجماعة الخير ماتتخيلون .. كل شي تطلبه أسويه .. ومن ناحيه ماديه ماقصرت الحمدلله معها .. ومن ناحيه رومانسيه مايمر اسبوع الا ولازم أنا اقدم لها ياورده ياهديه .. وباليوم 20 ابف مره اقول لها حبيبتي .. طبعا هي ماتقول الا بطلعة الروح .. وكل الأشياء الرومانسيه دائماً أنا السباق فيها .. ومن ناحيتها هي .. صارت فوضويه .. البيت مايترتب الا اذا صاروا ضيوف يبون يجون .. وحتى الطبخ وشغل البيت صارت مقصره فيه .. مو مثل الزوجات اللي يحبون الترتيب وشغل البيت .. تخيلوا ثيابي ماتكويها .. تخليها لين بعد شهر نجيب شغاله بآجار يومي وتكوي الملابس وتعدل البيت ..

انا أحس ان كثر الدلع هو اللي خربها .. حتى امها اليوم تقول لي انت ليش تدلعها .. المفروض لازم تشد عليها .. وتخلي كلمتك هي اللي تمشي ... ولاتتأسف منها دامك مقتنع انك انت الصح .. الكلام هذا والله طالع من أمها ..

حتى امها تقول بالبيت اذا جت عندنا ماتشتغل ولاتسوي شي .. وواضح عليها فوضويه ..

المهم أنا الحين ملييييييييييييييييييت .. وخصوصا بعد ماعرفت من امها كل الكلام هذا .. وبصراحه بصراحه .. بديت أكرهها ... والله الحب اللي كان بقلبي لها ومن كثر ماكنت أحبها صرت شاعر وأنا ماكنت أحب الشعر ... والله كنت باني مستقبل كبير .. بس للأسف .. ما أظن راح ألقاه .. أنا حاس في شي .. زوجتي غامضه للأخير .. أنا أشك ان في من زميلاتها اللي قبل الزواج كانوا مأثرين عليها .. وكانوا يقولون مثلاً خليه خاتم باصبعك .. تصدقون انا من كثر ما مريت بالثلاث سنين هذي وكثر مامرينا بأخطاء عودتني اني انا اللي غلط .. مستحيل أصير صح .. وعودتني اني انا اللي مافهمتها وهي (ماشاءالله عليها) فاهمتني .. والله لو تحب السماء السابعه مافهمتني ..

وش رايكم ياجماعة الخير .. وش رايك بوضعي ووضع زوجتي؟ .. انا والله مليت من الكتابه .. وان شاءالله تكون قصة حياتي مع زوجتي (غريبة الأطوار) واضحه لكم .. ,ابي الردود من الأزواج والزوجات ..

وشكراً

الله يعنيك صراحه معقده كثير
زوجتك توسوس زياده عن الزوم وشكلها مرتاحه من وضعها
يمكن انك دلعتها كثير
يبغى لها وقفه جامده يعني تعالجها عند دكتور نفسي بدل الخرابيط الي هي معيشه نفسها فيها
واذا رفضت ترا فيه نوع من الحريم مايجي الا بالقوه والتهديد(مثلا تتزوج عليها لانك مليت منها) لانها ماتكون مريضه من الاصل لكن تسوي روحها تعبانه
بالتوفيق

__________________

اللهم لك الحمد حتى ترضى ولك الحمد اذا رضيت ولك الحمد بعد الرضا

حمداًكثيراً طيباً مباركاً فيه كما ينبغي لجلال وجهك وعظيم سلطانك

اللهم بارك لي فيما رزقتني واجعله من عبادك الصالحين واحفظ ولدي من كل سوء ومكروه واجعله قرة عين لي ولوالده

السلام عليكم
اصبر ولا تتسرع ولا تعصب عليها ان شاء الله حلتها بتتحسن بتدريج لان الوساوس ما تروح بسرعه

اكثر من الدعاء وان شاء الله يفرج كربتك ويشفي زوجتك

__________________

يبدو انك وضعت السبب
في مرض زوجتك في نهايه كلماتك
يعني الدلع الزايد
انت مدلعها واجد واسمحلي
يعني شلون من تقولك ابغى اروح مستشفى وديتها
وش هالكلام وهي مافيها الا مرض نفسي ان شاء الله بسيط
عموما في الاول والاخير
بيدك انت الحل لا بيد دكتور ولا بيد اهلها
هددها خوفها انك مليت ويمكن تترك البيت
واذا حسيت الامر فعلا زايد وشيئ غصب عليها ودها
دكتور نفساني
وحاول تقلل الدلع شوي وشد بس كم يوم وان شاء ترجع مثل قبل واحسن
بس المسأله يبغاها صبر
وربي يعينك ....

__________________
الحمد لله على نعمه وفضله وكرمه ..

ماأقول ألا
الله يفرج همك في أقرب وقت!!

__________________
سبحان الله وبحمده سبحان الله العظيم

الله يعينك زوجتك تسوي هالحركات علشان تلفت انتباهك وتصير شغلك الشاغل لازم تقنعها تروح لطبيب نفساني وتتعالج

يا أخوي خلك كم يوم بعيد عنها لاتسال عنها ولا تداريها ولو ردت البيت لا تنظف وترتب خل كل شي على حاله تغير عليها خلها تحس وان شاء الله بتتغير حالتها لانه الباين انها مجرد وساوس مالها اي صحة ومافيها اي مرض والحمد لله فلازم تغير من تصرفاتك معاها وتخلي عمتك بعد تفهمها دورها كزوجة لازم شتسوي وبعد حتى وهي عند اهلها مايعطونها الدلال ويسمعون لها كل ماقالت تعبانة ودوها المستشفى لا يبعدون شوي عنها علشان تحس .. وان شاء الله تتغير للاحسن وربي يكتب الي فيه الخير ان شاء الله .. تحياتي لك .. أختك فجر

__________________

الله يكون بعونك
مالك الا تصارحها باللي في نفسك وزي ما قالوا الاخوان قبلي ترى فيه حريم ماتجي الا بالتهديد خوفها من الزواج بثانيه لو ما تسنعت وراعت الله فيك وفي بنتك وبيتك
اسأل الله لها الشفاء مما هي فيه واذا هي مش موضفه شوف لها وضيفه وللا اي شغله لأن الوضيفه تعلم الترتيب والانضباط

__________________

شكراً على ردودكم ( smsh و mzoo7ee007 و هند ام احمد و um soso و lavendergm و Fajer202 و rosered ) ..

بصراحه والله ريحتوني بكلامكم .. بس أحب أوضح بعض النقاط ..

1- بالنسبه للوقفه الجامده هذا اللي أنا بسويه .. وانا مخطط اروح ان شاءالله بكرا مو علشانها .. لا والله .. ما اشتقت لها .. الا علشان بنتي ... اللي مجرد ما أسمع صوتها أحس بحلاة الدنيا كلها .. الله يخليها ويصلحها ان شاءالله .. وراح أرجع لحالي ان شاءالله .. بس خميس وجمعه .. طبعا هي عارفه الشي .. وقالت لي البارح ليش ما تأجل جيتك للأسبوع الجاي علشان أنا ارجع معك .. بس انا مخطط اني أخليها أكثر من اسبوع .. واذا رحت بكرا لازم أحرك أشياء في قلبها وأحسسها بغلطاتها .. أحسسها انها كانت غلطانه بس من دون ما أقول لها عن أغلاطها

2- بالنسبه لأمها .. والله أمها ماقصرت .. أمها اذا كلمتني تصيح .. وتقول والله انك ماتستاهل اللي يصير لك .. وحتى تقول لي انها تفهمها أكثر وشلون التعامل مع الزوج .. وتفهمها أمور الحياة الزوجيه بشكل عام .. بس زوجتي تحاول تصدد .. وماتسمع كلام أمها

3- بالنسبه للي قال انها يمكن أصلاٍ مو مريضه .. بس تدلع .. لا والله .. زوجتي مريضه .. والدليل الوساوس اللي جتها .. وجسمها اللي تغير ونقص تقريباً 7 كيلو .. واضح عليها انها تعبانه .. بس السؤال وش اللي خلاها تتعب؟!! .. طبعاً كل شي من الله بس حتى هي يمكن تسوي أشياء وأنا على نياتي ... ومثل ماقلت لكم انا أشك بزميلات الكليه سابقاً لاعبات بعقلها !!

4- هي حاليا تتعالج نفسياً .. تاخذ حبوب وصفها الدكتور النفساني لها .. وراح تسوي كذا جلسه .. الدكتور وصف حالتها اللي سماها حالة الهلع


المشكله في أبوها .. مدلعها كثير .. ودايماً يحط في باله اني أنا الغلطان وان بنته لازم تكون 24 ساعه مرتاحه .. مع انه رجال والمفروض فاهم حركات الحريم اللي كذا .. وأنا بإذن الله مخطط اني أكلمه وأكون قوي شخصيه وأفرض رايي قدامه .. وأقول لاتتصرف في زوجتي من وراي ترى ما أسمح .. وتصرفاتك هذي ممكن تسبب في انفصالنا لاسمح الله .. وأقوله لا يدلعها ويوقف بصفي ويبين ان بنته هي الغلطانه .. والله هو اللي مخربها .. تصدقون لو يجيها مثلاً صداع تتصل عليه ويقولها استخدمي العلاج الفلاني .. ويجلس يكلمها ويطمنها ساعه كامله بس علشان فيها صداع!! .. وبعدها يقوم كل شوي يدق يتطمن عليها .. حتى هذي أحس فيها احراج لي انا كزوج .. كأنه يحسسني اني ما اهتميت فيها ..

آآآآآآآآآآآآآه ثم آآآآآآآآآآآآآآآآه .. الله يفرجها ان شاءالله .. وأنا خلاص براسي الحين شي ثاني .. بس بخليه يجي بسياسه .. لازم أخلي كل شي يتغير بإذن الله .. لازم أغير شخصيتي .. وانا متأكد انه مافات الأوان .. بالعكس .. يمكن اللي مرينا فيه وضح لنا أشياء .. وخصوصاً أنا .. أنا اللي استفدت من الحاله هذي ..

عموماً مشكورين وجزاكم الله ألف خير

بصراحة مالقيت حل لمشاكل الازواج مع الزوجات المهملات المدللات الا ورقة الزوجة الثانية لانها الرابحة...

لمح لها انك تحتاج الى امراة تكون زوجة فاهمة للمتطلباتك من طبخ وغسل ملابس وحُسن استقبال وليس استهبال..

وانك مقدر تعبها ومرضها لذا سيظطر ان يبحث عن زوجة اخرى وقول لها انتِ خليك ببيت اهلك وازورك كل فترة الين تتشافين..

والله بتلاقيها تركض ركض قدامك..