السلام عليكم ...

عندي طفل عمره 9 سنوات تعبني مرررره في بعض تصرفاته أنا أعشق النظافه لكن مو بوسوسه الحمدلله وعودت اطفالي ع امور اكيد كثير يعملوها مثلاً ايام الصيف كل يوم يتحممو والكبير والصغير بدون مااقولهم يروحو للاستحمام الاوسط لو اجلس سنه مااقوله مايروح اكتشفت انه يكره المويه وضوءه اي كلام انا اغلب الوقت مااحاسبه انصحه فقط ومافي فايده

بعض الامور الي تضايقني وبدأ الصغير بالتقليد ( رمي المنديل في الارض بعد استخدامه ، التبول وهو واقف، عدم التنظيف جيداً بعد الاستحمام يعني عادي مايغسل راسه مثلا يرش ع خفيف صدره ويلف الفوطه ويطلع😒، ملابسه دائماً متناثره ع الارض ، يدعس ع اي شي قدامه لبس نظيف او منشفته الي كانت ع راسه او أكل عادي عنده ، يحب امتلاك اشياء تدوخني

مثل الحجاره واغطية العلب وخيوط وغيرها واكتشفها في جيوبه او في الدروج الخاصه فيه ...

اشجعه ، اخاصمه للاسف مافي نتيجه انا مو هامني الا النظافه ابغاه يكون نظيف مايهمني يرمي ملابسه واغراضه بقدر انه يهتم بتنظيف جسده ويفرش اسنانه لكن لازم اكرر الكلام عشان يستحم ويطلع وهو لا استحم ولاشي اضطر احياناً ادخله بنفسي واحممه لاني مااطيق اشم منه ريحه تنرفزني ...

تعبت ياجماعه من توجيهه احس هذا طبع فيه شايله هم مراهقته ...

ايش الحل برأيكم ...؟؟؟؟

الله يعين
هالسن عنوودين
بس لاحظت ان مدح العمل الصغير الجيد منهم. يحفزهم
المدح بمبالغة. لو تنظف جيدا
قولي فلان ماشاء الله سوى كذا. ماشاء الله عليه نظيف
هو طبعا لازم تجي حالات تعصبي. بس تذكري هالقاعدة. المدددح

__________________

أختي متفائلة

ولدك الوسطاني ، نفس الوسطاني حقتي ..

هو يشعر انه - في النص - ، فيعمل الأمور هذه ( لشد انتباهك له ) ..
و هذا دليل على الذكاء ماشاء الله ، يفهمك و يعرف كيف يستفزك و يحصل على انتباهك له
بأفعاله اللي تغيظك ..

لا تعاقبيه ، امدحيه ..
تعاملي معاه ( بأسلوب المديح + المنافسة + المسابقة )
ياللا ، مييين الشاطر اللي يعمل كذا ؟

تلاقيه يتحدى اخوانه و يجري ينفذ المطلوب ..

و حكاية الخيوط و الأغطية اللي يجمعها ، أتركيها له .. هو يعتبرها من ممتلكاته ..
و يعيش في عالم خيالي معاهم ..

المهم يجمعها في مكان معين و مايرميها هنا و هناك

شكراً لك مسز 😘

تصدقين مو عنيد الولد كلمة خدوم قليله في حقه يدخل معاي المطبخ ويخدمني بشكل ماتتخيليه صحيح يجيبه اوقات ماله نفس يقوم لكن مايعند أبداً

احس فقط ماعنده اهتمام بنفسه وهذا يخوفني لاني تعقدت من بعض اخواني حمامهم الخاص ماكنت ادخله حتى لو طلبو مني اجيب شي منه وامي اهم شي ينظفوه قبل النوم
اخواني كبروا وتغيرو وريحة النظافه تفوح منهم

لكن مااظمن انه طفلي لو اهملته حتى يكبر يصبح زيهم

المدح اه من المدح مليت من المدح لدرجه اني توقفت عنه واستخدمت التشجيع بالهديه او اي شي يحبه هو وفتره ويرجع الوضع...

حياك روح ❤️

ولدك ياروح لسى صغير عشان كذا يحب يثبت وجوده اما ولدي كبر عن الشي هذا كنت الاحظه قبل وتغير صحيح الاوسط عادة يكون حساس واحياناً اكثر انتقاد لكن تعبت احاول قدر الامكان مااقارن بينه وبين اخوانه لكنه يحدني ع دا الشي مثلاً طلبته يستحم يقول وفلان وفلان ليه مايستحمو طبعاً هم استحمو قبله فاوضح له متى استحمو فاصبحت اقله شوف فلان خرج وهو يلق ابغاك كذا واليوم مدحته مدحته بعد ماشفت ردودكم وقلت اعرف انك تحب النظافه بس كسول شوي واضحك معاه واشجعه وراح تخيلي جلس اكثر من ساعتين وانا بحكم انه بيتي دورين توقعت انه خرج وراح غرفته يلعب او شي وكنت مشغوله ولما نزل المفروض اني امدح نظافته لانه جاء يوريني ايش رايك ياماماا وكعادة اغلب امهات العالم ينظروا للسلبيات قبل الايجابيات (( توك خرجت من الحمام ليييييييه ) واخذ نفس واتعوذ من الشيطان وامدحه 😟 واقول والمويه مو حرام تجلس تحتها ساعتين ...😕

تعبت مرره من توجيهه وهذا الشي ياثر عليه اشوفه يطالع في اخوانه لما انصحه او انتقده

للاسف قوة امهاتنا مانمتلكها في الصبر الله يعين

أهم شي يا متفائله لا تقارنيه بأخوانه..... المقارنه والمنافسه تولد الكره بين الاخوان... لا تنتقديه قدام اخوانه كلميه في أذنه وبطريقة حماسية يلا يا بطل أريدك تقضي على كل الجراثيم بقوة الصابوت الخماسية مثلا 😆 .... واتقبلي تمايز الاولاد واختلاف شخصياتهم.... بنتي عمرها قريب من ولدك ونفس الشي بس هيه الكبيرة فأحاول معها بالمدح بس نصيحة لا تكثري عليه نقد.... نبهي مره وعدي مرة
الله يباركلك فيه وتبخريه بالعود عريس

عمرج أطول من عمري يا متفائلة.

سبحان الله من فترة هالموضوع شاغلني .. ولأن عندي ولد واحد فما أعرف هل سلوك ولدي مألوف أو متوقع بين الأولاد .. وإلا أنا ولدي غير!!!!

عيالي من يومهم أعلمهم كل شي .. ومع ذلك تعالي شوفي حركات ولدي.

مثل ما تعرفون هو البكر .. عمره الحين عشر سنوات .. ومشكلته الأساسية إن كل شي يسويه بسرعة ... كل شي كل شي.

ولأن كل شي بسرعة فما في إتقان!


يدخل على أساس يتسبح .. وأحصله جدامي بعد دقيقتين ..... بدون مبالغة دقيقتين ويمكن أقل!

أسأله .. يرد: تسبحت!

متى مداك تتسبح؟!!!!!!!!!!!!

يدخل يوقف تحت الدش دقيقة .. بدون لا صابون ولا شامبو .. ويطلع!!!

حتى جسمه ما ينشفه زين .. ويلبس ملابسه وبعض مناطق جسمه مبللة!


والوضوء .. مثلاً لما يغسل ريوله .. يغسل مقدمة الأصابع وما يكمّل لين الكعب! .. أو يغسل ذراعه لكن ما يكمّل لين المرفق!


فهّمته .. الوضوء لازم يكون صحيح عشان صلاتك تكون صحيحة .. ما منه فايدة هالكم دقيقة وما تكون مقبولة عند الله! ...... الماي بروحه ما يكفي .. إنت تعلب كرة مع ربيعك .. حر وعرق ووصخ .. لازم صابون عشان جسمك ينظف وتحس بالانتعاش وترتاح.

وعشان أتأكد إنه يتسبح مثل الناس صرت أطلّ عليه وهو في الحمام .. أو أشيّك عليه عقب ما يطلع من الحمام وأشم راسه وجسمه عشان أتأكد إنه استخدم الشامبو والصابون!



عيالي من أول ما يبدون يمشون أعلمهم مكان الزبالة ـ الله يعزكم ـ وأعلمهم يرمون الكلينكس أو القراطيس فيها .. وأعلمهم يرجّعون ألعابهم مكانها عقب ما يخلصون .... الحين ولدي ياكل بسكوت مثلاً ويتم القرطاس مكانه .. أروح وأرد وأروح وأرد وهالقرطاس مكانه ما يفكر يشيله ويرميه حتى لو تم لين ثاني يوم .. وما في غرض يرجع مكانه أبداً .... هالمواقف دايماً تنتهي بتنبيهي وطلبي المباشر: قوم ارمي القرطاس في الزبالة .. قوم رجّع غرضك مكانه .... لحد الآن وبالرغم من تلف أعصابي لكني مستحيل أرمي عنه شي أو أرجّع أغراضه مكانها .. مسؤوليته ولازم يتحملها.

أحياناً أهاوشه.

وأحياناً أحاول أستثير ضميره .. أقول له: يعني معقول لما كنت صغير كنت شاطر وتحب النظافة وكنت منظم ومرتب .. والحين لما كبرت صرت فوضوي؟! ..... لكن أبداً يختي الضمير ميت.


ما أدري هل هذا سلوك شائع بين الأولاد في هذا السن وإلا شو المشكلة بالضبط!!

__________________


اللهم طِيبَ الأثر .. وحُسْنَ الرحيل.

سبحان الله
هي طبائع و الإخوة. على انهم في نفس البيئة و التربية
يطّلع احدهم منظم اكثر من الاخر. او احدهم عصبي و الاخر بارد
و لكل طريقته. اللي الام تكتشفها مع الأيام


مهرة. نفس الشيء حاصل عندي
بنتي و هي صغيرة. اول خطواتها و هي تعرف اي ورقة او قرطاس او او
ترمى في القمامة أكرمكم الله. و لما كبرت. صارت تترك أشياءها و مخلفات لعبها و أوراق الرسم و غيره
اللي أسويه اني ما أستجيب لأي طلب تقوله لي الا لما ترتب. و تقوم بترتيب شيء إضافي كعقاب
وهي عمرها 11
بنتي اللي عمرها خمس ماشاء الله مهتمة بغرفتها و منظمة اكثر و تحب أغراضها و ترتبهم في الدولاب بنفسها

__________________

خففتي عني شوي يا مسز داني .. وفي نفس الوقت خوفتيني.

كنت أتمنى البنات يكونن غير.


مهرة ما شاء الله عليها مثل بنتج الصغيرة .... عمرها الحين ست سنوات وتتسبح بروحها من حوالي سنة .. وشعرها طويل وغليظ ما شاء الله وتطلع من الحمام شعرها نظيف تماماً ما فيه حتى بقايا شامبو .. وتطلع على طول حتى ما تتم تلعب بالماي.

حتى إنها تسبّح أختها أحياناً .. وتدخّلها الحمام الله يعزج.

وعقب ما تخلص لعب ترجّع كل شي مكانه .. حتى أختها صارت مثلها وما ترضى تروح المطبخ تتغدا مثلاً وفي لعبة طايحة على الأرض .. ترجّعها مكانها الأول وعقب تروح المطبخ.


تذكرين لما كنت أحكي عن الفترة اللي كنت فيها بدون خدامة .. مهرة كانت تساعدني في شغل البيت بدون ما أطلب منها ..... وهالأيام صايرة تسترجع الذكريات وتقول لي: ماما خلي الخدامة تمشي وأنا وإنتي نشتغل في البيت مثل قبل .. إنتي تطبخين وأنا أنظف المطبخ.



يا رب تتم جذي على طول.

__________________


اللهم طِيبَ الأثر .. وحُسْنَ الرحيل.

نفس حكاية ولدي في صف ثالث وهو برضو الوسطاني

مطلع عيوني في أشياء كثييير...

يكره الاستحمام والنظافة ودايما غير منظم

كل يوم في الصباح لما يقوم للمدرسة انا وهو مشاكل،

تخيلو يقوم من النوم يلبس اليونيفورم يدون مايدخل الحمام او يتشطف او يتسوك

ياكل ويرمي في الارض وعلى الكنب، اجي الاقيه اكل لبن زبادي وتارك العلبة على الكنبة وكلها متبقعة

الكتب حقت المدرسة ودفاتره الاقيها معفوسة ومتقطعة في الشنطة..
ومرة حط قارورة الموية مع الكتب وانكبت وعدمت الدنيا.. وطول السنة يداوم بكتب معفنه

كل ما ابوه اشترى له شيء يا يضيعه يا يكسره، ضيع واحد أيبود، وكسر الثاني، غير الطيارات والسيارات اللي كلها راحت في خبر كان

كل اللي قلته عكس اخته 10 سنوات قمة النظافة والترتيب وتحمل المسؤولية سبحان الله