السلام عليكم ورحمة الله وبركاته
إلى الأخت زين أبيها
عساك بخير يالغاليه

بما انك زوجه ثانيه وزوجك ماشاء الله تبارك الرحمن عادل
حابه أسألك عزيزتي
كيف نظام زوجك بالعدل
يوم عندك ويوم عندها
طيب في حال في يومك حابه تطلعين مكان تتمشين
هل تصير تدخلات منها
وهل يعتبر ظلم اذا بيومي اطلع دائما
والا كل وحده براحتها بيومها
سواءآ طلعت تتمشى او لا

ابي منك تفصلين لي الوضع مع العدل شلون

وعليكم السلام و رحمة الله و بركاته

هلا عمري شلونج عساج بخير ؟
نظام زوجي يوم عندي ويوم عند عياله
مثلاً اليوم الأربعاء فرضاً انه يومي تمام ؟
الظهر قبل لا الغدى يروح يقعد عندهم ثلث ساعة
وبعدين يجي يتغدى ويريح وووو إلى آخره.
بعدين قبل النوم في الليل هم يروح يقعد معاهم ثلث ساعة و يرجع لي بما إنه يومي .
بحيث إن في يومي ما يفقدون وجوده
وفي يومهم ما افقد وجوده.

بخصوص المشاوير هذا الشيء مو مرتبط لا بيومي ولا بيومهم
هذا الأمر من البداية وضع قاعدة ( المشاوير أنا لي فيها السلطة التقديرية حسب حاجة الشخص وإنشغالاتي ومشاويري الخاصة ) لأن زوجي دائماً مشغول ، بالإضافة إلى أن أم عياله ما تحب المشاوير ، يمكن تطلع من البيت مرة بالشهر فقط وحق حاجة ضرورية مثل مستشفى بعيد الشر أو لبيت اهلها .
فالمشاوير صايرة غالباً مقتصرة علي و على بناته ، وبناته همن ما يطلعون تمشيات مع ابوهم ، يا يروحون معاي بسيارتي أو مع عماتهم ، وآنه عندي سيارتي اقضي فيها مشاويري ، لكن بعد مشاوير وايد مخليته هو يتكفل فيها بالإضافة للتمشيات.
فموضوع المشاوير والتمشيات أمرها متروك له فقط ، بغض النظر عن هذا يوم منو .

وطبعاً ممنوع ان انه اتدخل بمشاويرها وممنوع تتدخل بمشاويري ، واللي تتدخل يعني فيه أمها داعيه عليها بساعة إستجابة 😆😅 .

يعني حاط قوانين صارمة 😑 .

ومو ظلم لها إذا طلعتي بيومها أو العكس ، لأنه أساساً هالأمور مو داخله من ضمن العدل .
لكن تبين نصيحتي ؟ لا تتدخلين بمشاويرها
ولا تسألين عن مشاويرها تماماً
اشتري راحة راسج ، لأن إذا عرفتي بتظلين تقارنين ليش طلعها وما طلعني أو العكس .

اتمنى يكون شرحي وافي
وأي شيء بتسألين عنه إذا اقدر حاضر وبالخدمة حبيبتي
عسى الله يوفقج ويقضي حاجاتج

انتقلتي حق مدينته ؟

__________________

حاجة الناس إليكم من نعم الله عليكم ، فـ لا تملوا النِعم ☁✨

ياعمري انتي تسلمين ياقلبي
اجابتك وافيه

بالنسبه لسؤالك .. الحمدلله راح انتقل
الله يبارك ونبدأ حياة جديده افضل
عشان كذا طلبت منك تذكرين لي شلون تنظيم زوجك بالعدل
لانه ماشاء الله عليه مريح راسه وراس زوجاته بالعدل

وحابه اقول لزوجي النظام..
ماابي اظلم احد ولاأحد يظلمني
ونرضي رب العالمين