ههههه انا احترم وجهة نظرك وعلى راسي ، ولكن لا تقول هي ماتبغاني ، زي ما قالو الاعضاء هي تحبني وماتكرهني ولكن تكره الصفات اللي فيني ، اقسم بالله تبغاني ، ولكن هذا كله زعل في زعل بسببي وقالتها لي بان خاطرها انكسر وقالت انت قللت من قيمتي وقالت انت قللت من قدري وماعندي امان منك ، في اي وقت لتتزوج علي وقالت كل هذا بسببك ولسانك الجارح وهي حساسه وعاطفيه ومن المعروف النساء كلهم مشاعر واحاسيس مو زي احنا الرجال اللي قلوبنا مثل الصخور تتحمل ، انا رجال غلطان وغصبا عني يجب ان اتحمل وأثمن كلامي ، انا غلطت والاعتراف بالحق فضيله والإعتذار من شيم الرجال ، فضروري اتحمل واصبر حتى الله يفرجها ، ولساني يبغى له منشار ، أنا السبب والحين جالس اتندم على غلطاتي ، فياخالد مثل هذي المشاكل يبغى لها طولة بال ههههه انت لو بدالي كان طلقتها وجبت العيد ،، فلاااا وانا اخوك لازم نتحلى بالصبر ولانستعجل ، هي ام عيالي وعندي ولد وبنتين ولاهو انا اللي انكر واجحد العشره الطيبه اللي كانت بيننا ، وأقسم بالله هي تحبني وقبل المشكله بشهرين ونصف كنا في حديقه اسمها حديقة الملك عبدالله ، مافيه الا تريقه وسواليف وضحك وهي متعلقه فيني ، ولكن انا ابصم بالعشره وايديوني الاخوان والاخوات أنه فعلا هذي تراكمات في قلبها وانا السبب والحل يبغى له طولة بال ، فلو كان فعلا هي تبغى الطلاق فليش حضرتها ماراحت المحكمه وتكون عند كلمتها انها بتطلب الخلع ، انا زي ما قلت الموضوع يبغى له طولة بال ولاهو انا اللي انسى العشره الطيبه ، ولكن مسألة اعطيها طلقه فأللف لا ولا ولا ومستحيل اقدم على هذا الشي ، ضروري من طولة البال والصبر الجميل والله لايريكم اي مكروه ، عندي ملحوظه / للامانه فيه فوائد كثيييييره ومعلومات انا استفدتها هنا بالردود من بعض الاخوان والاخوات ، الله يكتب لكم الاجر على الردود الكافيه والوافيه ، ومتابع معاكم حتى ترجع او لاقدر الله خلفيات اخرى ، وعندي احساس كبير سوف تحن وترجع ، والله اعلم

ممتاز

الله يلم شملكم عاجلا و ليس اجلا

ة لا تنسى تشوف ردي الاول

__________________

الشاهد الله سبحانه عجبني ردك وقرأته وايضا قرأت ردود اخرى لبقية الاعضاء فكانت ردود ايجابيه ، وانا اعيد واكرر ، والله ثم والله انها تبغاني ومستحيل يكون هذا كله كره او زعل فهو يعتبر هي تكره الصفات اللي فيني، وحياتنا حب وتقدير ولاعمرها غلطة علي بكلمه ، ولكن انا السبب بلساني الجارح ، فجالس ادفع ثمن غلطاتي ، والله يسهل الامور ، وآخر المستجدات عندي ، اخر رساله نصيه ارسلت لها قبل اربع ايام وتوقفت نهائي عن الاتصال والمراسله وانتو شجعتوني على ذلك بأنه لازم أتوقف ، حتى تهدأ ، وانا اتوقع بنسبه كبيره والله اعلم يمكن ترجع بشهر رمضان او قبل رمضان ، والله اعلم ، ولكن انا مستحيييييل اتصل اواراسل عشان ضروري تهدأ

زين عرفت اخطائك واسباب زعل زوجتك اشوفها قوية حتى لو بعض الاعضاء هنا اتهموها بدلع
كلمه بتزوج عليك و ياعاطله ما منك فايده مو سهل وحده تسمعها واكيد
انت ما خبرتنا بكل شي فيه حلقه مفقوده
اشم ريحه زواج مسيار في موضوع
ليش مديون وليش تبيع ارض ؟؟
شكلك من نوع المعددين اللي يتزوجو ويخبصو الدنيا ويعفسوها ع الزوجه الاولى
واخر شي يجي زعلان عندنا
زوجتك مجروحه واكيد لاسباب انت تعرفها
المشكله والجرح منك والحل عندك مو عندنا

__________________
اللهم اغفر لي ولوالدي واخواني واخواتي الاحياء منهم والاموات .. اللهم نسألك حسن خاتمه يارب .. لاتنسوني من دعواتكم

ههههه في مثل عندنا بالسعوديه يقول
ليتها بحمولها تقوم ،،، يعني انا مديون بأقساط عاديه مثلي مثل الناس ،، فكيف اتزوج مسيار او غيره ،، وانا اصلا سالفة الزواج من وحده ثانيه ماطرت في بالي ، لان الاولى ماليه عيوني ، فكيف اتزوج عليها ،،، مستحيييييل ،، وابغى ابيع الارض اسدد ديوني ، وبسترد الارض وبشتريها من رحيمي بعد سنه ان شاب الله حسب اتفاقي معاه ، وأقسم بالله لاني متزوج ثانيه ، المسيار ولاغيره ، لكن بصبر وبتحمل ، ،،،،، عندي معلومه حاب اقولها الحين لكم ،،،، الحين اتصلت باخوها الكبير قلت يا اخي انت اخبر جميع العائله لااحد يضغط عليها ويجيب سيرتي أمامها ويقول ارجعي ارجعي ارجعي ، خلوها تهدأ ،،، هههه كفايه اني جبت العيد وغلطت بحقها ، اقسم بالله انا اللي غلطان ، وقال ابشر اكلم جميع العائله معاد نقول لها ارجعي ومعاد نضغط عليها حتى تهدأ

اشهد بالله قلبي يحن لها

اعذرني لو غلطت عليك ..واستعجلت بردي لك

، وانا اصلا سالفة الزواج من وحده ثانيه ماطرت في بالي ، لان الاولى ماليه عيوني ، فكيف اتزوج عليها ،،، مستحيييييل

لازم تحسسها بامان وتوصل لها اللي قلته هذا
مدري ليش انتو الرجال كذا يكونو قدامهن جافين وقاسيين ومن وراهن يمدحو فيهن
دام تعرف تمدحها وتحبها ليش تبخل بالكلام الحلو هذا وماتقوله قدامها

__________________
اللهم اغفر لي ولوالدي واخواني واخواتي الاحياء منهم والاموات .. اللهم نسألك حسن خاتمه يارب .. لاتنسوني من دعواتكم

اخي الكريم لا اريد احباطك لكن ضع نصب عينيك انها يمكن كارهتك فعلا وتريد الطلاق.

لأنه المرأة ناذرا ما تجرح زوجها وتقول له انا كتفيت منك عطيني طلاقي وتكررها عليه دون مناسبة.. الكلام هذا مو قليل وماجاء عقب مشكلة خلتها تفقد اعصابها، وتاكد ان الغرفة هنا مالها علاقة هي شماعة للانفجار. حتى الي تراودها فكرة الانفصال لما تشوف زوجها كويس معاها ويطيب خاطرها مابيطاوعها قلبها تقول له هالكلام. زوجتك يظهرلي لسبب او لاخر فعلا تريد الطلاق ليس لأنك سيئ ولكن هي لم تعد تريدك. صعبة الوحدة تقول لزوجها بوجهه ماعاد ابيك اذا قالتها معناه تقصدها وبكاءها لااراه تعب نفسي بسببك بل هو شعور بالذنب لانها تعرف انك في الحقيقة لست بذلك السوء واخطاءك معها لاتستحق كل هذا..


عموما مثل ماتفضلوا الاعضاء الكرام اثقل ولا تتواصل معها الا لضرورة تخص اولادكم وفكرة اعلام اهلها بعدم الضغط عليها صائبة الله يهديها ويردها اليك ردا جميلا

__________________
{قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ}

صدق الله العظيم

اسمح لي نرفزتوني انتو الاثنين 😲🙄
وايد مضخم اخطاءك و ماكل في نفسك و تعيد و تزيد في الكلام...
انت عندك أخطاء و زوجتك مو ملاك على فكرة..
بس لأنها عيشتك دراما حسيت فعلا أنك شيطان بحت و هي ملاك بحت.

نقطة أخيرة
ترا كثرة الاعتذار و الاعتذار المتواصل يحسس الطرف الثاني ان فعلا على حق..
فلا تزودها بليز

و الله يجمعكم ببعض عاجلا ليس آجلا و يهديكم

يا أخي الكريم

عطيناك الحل من أول ما كتبت موضوعك وقلنا لك أن الموضوع ماهو مستاهل كل إللي عملته زوجتك والكلام الذي قلته لها أو الأفعال ليست قوية لدرجة أن تعافك وتصل بكم أبعاد المشكلة لهذه الدرجة

وأنا أرى من خلال كلامك أنك تعيد وتزيد في الكلام وأنت بنفسك إللي معطي المشكلة أكبر من حجمها .

ولو دخلت لبيوت كثير من المتزوجين وسمعت بعض الكلام بينهم أو بعض الأفعال لرأيت أنك لم تفعل ولو عُشر ما هو موجود في حياة بعض الأزواج .. بل أن بعض الزوجات من تصبر على خيانة زوجها وترجو أن تستمر حياتها على خير

وعلى فكرة
رأيي الشخصي أنه لا فائدة من هجر زوجتك أو تركها بدون أن يتم الكلام معها من أحد الأشخاص الحكماء الذين يرغبون الإصلاح بين الزوجين .. والتبيان للزوجة أنه الأخطاء التي عملتها مع زوجتك سواء القولية أو الفعلية لا تستحق مقدار التضخيم الذي تعمله وتحاول أن تخرب بيتها من أجل ذلك

أما بعد الكلام معها وتوضيح درجة الأقوال والأفعال التي صدرت منك .. ولكنها لازالت لم تستجيب وتستمر على كلمة عايفته .. فعندها يمكنك هجرها وتركها فترة من الزمن لعلها تتأمل مع نفسها وتدرك أنها زودتها أكثر من اللازم .. خصوصاً وأنك أعتذرت كثير وقدمت وعود بتغيرك وعدم عودتك لأفعال السابق .


أعانك الله