السلام عليكم اخواني واخواتي
كنت حابه اطمنكم ان حياتي مستقره
لكن تجري الرياح بما لاتشتهي السفن

بعد ماراجعت عند مستشار اسري
عمل لي خطه جميله لحياتي الزوجيه
وقرأت مجموعه كتب عن فن التعامل مع الزوج
ووضعت ببالي ان اجعل بيتي جنه
ولله الحمد قطعت شوط كبير جدا
لكن انعكاسات هذا على نفسي فقط
انا اللي كنت اجتهد واكافئ نفسي بنفسي
حتى لو بابتسامه لنفسي قدام المرآة

صار لساني ينقط عسل
رغم اني من زمان اقول كلام حلو
لكن صرت اجدد.. مع دعوات وقبلات
واقدم اشياء كثيره بدون مقابل
وزوجي مثل عادته: عالصااامت

رحت لاهلي على اساس انام عندهم
وكلمت زوجي اطمن عليه
لقيت صوته متغير.. كان تعبان وفيه حراره
اول ماعرفت خفت عليه
وطلبت من اخوي يرجعني بيتي بسرعه
واخذت له معي العشاء..
كنت كل شوي اقيس حرارته واعمل كمادات
واكلته بنفسي ولبسته قميصه
ودهنت جسمه بزيت زيتون دافي
ونومته زي الاطفال وهو كان مبسوط
واشياء كثيره مالي فضل فيها لانه زوجي
لكن الحمدلله وقفت معه كالعاده

ثاني يوم هو تعب ولاراح عمله
وانا اخذت اجازه عشانه
وعملت له فطور دسم وغداء مرتب
وبنتي للأسف صحيت تعبانه
هو نقل لها العدوى لانه كان مصر يبوسها
وانا صرت اتابع مريضين
بس الحمدلله كنت مفرفشه ونشيطه معهم
هو اللي كان متذمر ويقول اسبوع شين ويوم اسود الخ

البنت زادت حرارتها.. قال لي نأخذها الطبيب
قلت له حبيبي انت ارتاح وانا بكلم اخوي ياخذنا
قال لا انا اباخذكم للطبيب
ورحت معه للمستوصف
واحنا طالعين كان بيمر يجيب الدواء من الصيدليه
قلت له حبيبي هات معك مناديل جونسن
قال لسى من اسبوع شاري!
قلت له تركت كيس عند اهلي واللي عندي خلص
قال طيب امسحي للبنت بمنشفه! (وهو معصب)
قلت كيف منشفه! انت مو رايح الصيدليه!!
قال خلاص ازعجيتني.. حريم ماينعطوا وجه!! قرف!!

انا استغربت.. دمعت عيني وانا ساكته
قال: خير مايت لك احد؟
قلت: ارجوك لاتكلمني
قال: بديتي بالنكد يا ام النكد.. شخصيه زباله.. عقد نفسيه!!


مارديت عليه.. وهذا الكلام كله واحنا بالسياره
ورجعنا البيت ولاكلمته ولا كلمني
هو كان يسأل: عطيتي البنت الدواء؟ عملتي كمادات؟
وانا كل كلامي: ايه.. ان شاء الله
بدون ما اناظره..

وكل شوي اتعوذ من الشيطان.. وانا داخلي اغلي
دخل ينام وانا جلست سهرانه مع البنت
كل شوي تصحى وارجع اضمها وانيمها


اكثر شيء صادمني هذي الفطاظة منه
صحيح انه يمارسها باحيان كثيره
لكن اليوم بالذات توقعت يقول جزاك الله خير
لقيته شوي ويقوم يضربني.. بدون سبب
وانا الكلام انعقد بلساني وبكيت من الصدمه

احس زوجي كان مستأ جدا من لطفي معه
وكأنه رافض تماما اني اكون انسانه جيده
هذا الشي يمارسه معي بأوقات كثيره
على اختلاف الكيفية والاسباب
تذكرون موضوع الدونات؟ (للي تابعوا مشاكلي)
كان جزء بسيط وتافه من نفس السلوك
يعني يتضايق مني اذا كنت كويسه
ويحاول بأي طريقه يفتعل مشكله ويقلب الطاوله
لكن انا اليوم بالذات سكت تماما
وبداخلي مجرووووحه.. مجروحه والله ياناس


كل ما نتقدم خطوتين يرجعنا ألف مره وراء
فوق كذا يقول لي: انتي تحبين المشاكل والنكد!!
حسبي الله ونعم الوكيل
يتعمد يجرحني ويهيني بعدين يقول انتي السبب


طبعا هو دخل ينام ومسوي نفسه زعلان
حجته انه مريض.. وكأني انا المتسببه بمرضه
فوق كذا انا تعبانه من مسؤولياته ومسؤوليات بنته
ولا شكيت ولا شي.. والابتسامه بوجهي
والرجال لاحمدا ولا شكورا
فاضي بس يطلع لي مشاكل من تحت الارض


حاطه ببالي ما اكلمه بكرا
صعب اتجاوز عن اهانته وطوله لسانه
لكن ماراح اتصادم معه.. راح اتحاشاه تماما..
وانا يكفي علي تعب بنتي ومسؤولياتي
وياليت تفيدوني برأيكم جزاكم الله خير