طبعا مقررة ااجر الشقة باذن الله ..

ادري لو تركتها فاضية .. بيحتلوا الشقة لنفسهم.. و عشان كذا اخباري ما توصل لهم ابدا

زمان كانت اخبار زوجي توصل لهم مني لما يسألوني .. اجاوب على طول .. دحين زوجي مبسوط مني و يقول لي ( اخيراً تعلمتي كيف تردي عليهم )

ما يبغاني ادخل معاهم بمشاكل و نفس الوقت ما يبغاني اعطيهم سبب للتدخل في حياتنا .. و هو شكله عارفهم

حتى كان يرفض اني اروح و اخد شي معايا .. يقول لي تروحي و يدك فاضية .. يبغوكي كذا الله يحيهم ما يبغوكي كذا خلاص لا تروحي ..

مع العلم انه ابدا ما يرد عليهم و لا يتضارب معاهم الحمدلله .. و هذا أسلوبه التطنيش فقط

بس انا انقهرت من الموقف الأخير .. حاولت اطنش و انسى
لكن لماً افتكر انقهر ..

قلت خلاص قبل السفر اروح مع زوجي اسلم عليهم ببرود و امشي

مع العلم انه ابو زوجي مو عارف عن حركات مرته و بناته و كلامهم مع زوجي عني و امس كان يسال ابو زوجي عني و يسال زوجي ايش عملت و كذا

سوال :
ليش انقهر !؟

لاني احب اكون طيبة مع الكل و لأني اذيتهم و لا مرة .. كنت راضية انهم كافيين خيرهم عني ..

بس ابغاهم يكفوني شرهم

انا الغبية الي زرتهم اخر مرة و جبت معايا حلى لأبو زوجي عشان اتحمد له ع السلامة و حماتي سالتني عن دراستي و جاوبتها بكل عفوية و سذاجة .. سالتنيً ايش ميزات اكمالي لدراستي برة و عددت لها ..

و بعده على طول راحت تعبي راس زوجي و استغلت ردي بالشكل هذا انها تقول له ترجع و تضمن مستقبلها و مستقبل اولادها و ترفسك و اسمع كلامي و بكرة تندم و الله يهديك يا ولدي و ماعرف ايش .. و لا تروح معاها يقولوا له

ياأهلا وسهلاً وحياكي الله يادكتورة

سبحان الله لو تسأليني متى كان الموضوع هذا كان قلت مو اكثر من خمس شهور!

شوفي كيف بتجري الايام

ماعلينا

انتي الى الان ماسافرتي؟!

والله حسبتك بعد اخر موضوع لكي انك سكرتي السماعه من هنا (مجازاً) ورحتي المطار من هنا

اتاريكي لسى هنا!

طيب ليش مابتشاركي معنا؟!

خلاص انغريتي بالدكتوراة وشفتي نفسك فوق؟

ماعلينا (للمرة الثانية)

وخلينا ندخل في الموضوع

الموقف اللي صار من امه واخواته كان امامك؟ هل له علاقة بزيارتك لهم من عدمها؟

زوجك مايشوف والدته واخواته الا اذا زرتيهم انتي؟

فين النفاق في الموضوع؟

انتي مازلتي مصرّة انه ممكن في يوم من الايام يكرموكي ويكافؤكي على صبرك عليهم وعلى ولدهم؟

ان طيبتك جابت نتيجة فيهم فهم كرماء

وان طيبتك جعلتهم يتمردوا فهم لؤماء بعيد عنك وعن القارئين

لأن المثل يقول ( ان انت اكرمت الكريم ملكته وان انت اكرمت اللئيم تمرّدَ)

والواضح لكي انهم اقرب للنوع الثاني

اذن لماذا نتوقع منهم انهم يتصرفو مثل النوع الاول!

هذا واحد

اثنين

انتي ماذا تريدين منهم الان؟

يكفوكي خيرهم شرّهم؟

صعبه هذه

طيب ماهو الحل؟

ماهي حلولك التي في بالك الان؟

__________________

يعني لو زوجي مثل اخوه الكبير .. كان ممكن عمل لي مشاكل و سمع كلامها و فسدت علي عيشتي

و زوجي هو الي من سنة كان يقول لي شكلك مو مسافرة و لا راح تكملي و مرات لما يطفش هنا .. كان يسألني هاه متى تجيبي قبول و نروح نعيش برة

يعني ما ضربته على يده و هو يدري من زمان اني بارجع و اكمل و المسالة مسالة وقت ./ و هما كمان عارفين من اول .. لكن ما توقعوا انه بيتحقق كلامي ..

.
.

حاسة اني مقهورة منها

تبين لي انها تحبّني كاني وحدة من بناتها ( بالكلام لاني ما شفت اي افعال ابدا من يوم تزوجت و انخطبت ) و كنت من عينها احسها ما تحبّني و تدور اي فرصة علي .:

شكرا لسوالك و اطمئنانك اخوي ..

سبب عدم ردي
غيرت الواي فاي و يحجب لي فقط صفحة المنتدى سواء من اللاب توب او جوالي
وماعرف ليه ..
الاقي صعوبة في تسجيل الدخول لكن كنت اصبر نفسي و اقول لو سافرت و غيرت الشبكة
باذن الله
و هانت الحمدلله ..
و انشغلت عشان الإجراءات و مازلت لسى باكملً إجراءاتي و بقي اخر مرحلة الحمدلله

.
.
انزل الرد منفصل عشان شبكةً الجوال سيئة

الموقف الي صار منهم ماله علاقة بزيارتي .. هما كدا

يشوفوا انه ولدهم خروف لانه رايح معايا .. ما يرضيهم غير لما يشوفوا ولدهم (زوجي او اخوه) .. يذلوا حريمهم و يضربوهم و يخلوهم خدم عندهم .. و هذا الشي يحسسهم بالسعادة و على قوة السيطرة الي عندهم ..

كيف دحين مرت ولدهم تصير اعلى منهم !؟ مو قادرين يستوعبوا !؟

و قلت لك من اول طبعهم ( يخافوا و ما يختشوا ) و القوة عندهم في المنصب و المال .. و الدليل حماتي صارت ما تحاول تغلط علي الحمدلله .. وعشان تفكر بمصلحتها مستقبلا ..

و كيف عرفت و قدامي او لا !؟

كنت في البيت و زوجي يوريني مقطع و شفت رسالة ظهرت باسم امه كاتبة ( فلانة ترجع و ترفسك ) .. و لما قرأت اسمي

فتحت الصراحة القروب و قرأت كلامهم .. لانه دائما يقولوا لي نحن اهل و امه تقول انتي مثل بناتي و اشوف في عينهم شي مختلف و نظرات غريبة .. و اشوف زوجي يبعدني عنهم .. و يخاصمني لما اقرب منهم .. و سلفتي تقول لي انتبهي منهم و تحذرني و تقول لي خليكيً كذا افضل بعيدة .. و ما اعرف ليه و اوسوس مع نفسي انه يمكن فعلا يحبوني و طيبين و انا ظالمتهم ؟؟

حماتي تعرف انا ايش تحملت وتعرف بداخلها اني استنى الفرصة هذه من زمان باني اكمل دراستي .. و شكلها قالت اجرب اخلي ولدي يوقف بطريقها ..

مع العلم اني لما رحت كملت الماجستير .. كل بناتها إليّ و اولاد خالات زوجي .. و آخوان زوجي و خال زوجي .. كلهم سجلوا انتساب و تعليم عن بعد في نفس الوقت و السنة !!!؟

ليش كلهم مرة وحدة !؟ و ليش لما انا رحت في نفس الترم كلهم !؟ مع اختلاف أعمارهم و خاله عنده ولد خاطب ..

.
.

المهم انا قرأت المحادثة غصب و بالصدفة لما شفت رسالة وصلت مكتوب فيها فلانة اسمي ترجع و ترفسك ..

زوجي يشوفهم الحمدلله و يزورهم باستمرار .. و لو تاخر عنهم بسبب دوامه و زعلوا منه .. و انا لو عرفت بالصدفة .. اعاتبه و اقول له لا تزعل ابوك مهما كان و اصبره انه يبغى مصلحتك و كبير بالعمر و خلاص هو تفكيره كذا

بس الفرق بين ابو زوجي و امه

ابوه ماً عنده لؤم و لا خباثة .. و لا تخطيطات

امه كل مين يشوفها ما يرتاح ابدا .. ابدا ماهي مريحة .. تمثل/ تكذب/ تستغل/ تتسلط/ تخطط/

فما اتدخل فيها لا بشر و لا خير ..

زعلت منه .. ما اتدخل و لا ليا فيها .. و بس اقول له لما تتصل عليه و ما يرد ( لا تطنش امك و رد عليها ) .. و لو قالي زعلانة مثلا .. اقول له لا تزعلها او اني اسكت و ما اتدخل

و انا تلاقيني من حالي .. اتصل لهم و اخد عشاء و اخد اولادي يشوفوا جدهم و يفرحوه ..

.
.

زوجي يواصلهم و ما اتدخل ابدا و لا اعرف متى راح و متى زارهم .. و لا احب اتدخل في خصوصياتهم و اخبارهم و لا أتمنى الشر لأحد .. حالي حال نفسي ..

النفاق بالموضوع

انها جلست تسالني أسئلة و لما جاوبتها بحسن نية .. يعني ليش تكملي !؟ ايش تستفيدي ؟ ليش ما تكملي هنا !؟

و اجاوبها اعطيها المزايا عشان اخليها تتحمس .. و قلت لها ايش يستفيدوا اولادي مستقبلا

تروح تستخدم ردي هذا ..
انها تحرض زوجي علي !؟

و تتصل و تسالني لو اعطيها الجهاز الفلاني و اراعيها في قيمته .. و تقنع زوجي اني أبيع أجهزتي و هي عشان حاطة عينها على وحدة من أجهزتي !؟

لاني فاهمتها .. عرفت مباشرة انه إقناعها لزوجي بخصوص الاجهزة عشانها طمعانة في وحدة من أجهزتي و تتمنى تاخد كل أجهزتي و شقتي ( عشان لا احد يطلع لي و يتفلسف .. أجهزتي كلها من جيبي و فلوسي و مو من جيب ولدها )

حتى والله اقترحت على زوجي اول ما فكرت ااجر الشقة .. انه أهله ينقلوا من بيتهم الشعبي و يجوا يعيشوا في شقتي عشان اريح لابوه و صحة ابوه .. بس زوجي ما رضي و قفل الموضوع ..

ايوة قالت راعيني في الجهاز و أعطيكي فلوسه بعدين لما تخلصي بعثتك و اعرفها كذابة

و هي مرة كانت تبغى تبيع لي وحدة من بضاعاتها .. و تقنعني أشتريه و أعطتني أسوأ نوع و الي مكسر و معدوم و ضاعفت لي في السعر .. و خلاص قفلت الباب هذا

بس ابين انه هي ما تراعيني اصلا في ابسط شي .. عشان كذا قررت حتى لو تعطيني قيمة الجهاز و ضعف سعره .. ما راح أبيع لها و ابغاها تشيل عينها و تفكني

سلفتي ما عندها مكنسة كهرباء
مسكينة و لا عندها غسالة اتوماتيك

كله عشان حماتي اخدته من بيتهم و ولدها يسمع كلامها .. و ولدها حالته المادية ضعيفة

.
.

ايش المطلوب منهم .. سؤالك !؟

مو مطلوب منهم شي ..
مطلوب انا مني .. ( اني اتغير و اقنع نفسي اني أصير مثل زوجي في تعامله معاهم ) بس اخاف انا اتغير لا شعوريا و يصيبني احساس اللامبالاة الي عنده !؟؟

و مرات بداخلي انقهر و اقول ليتني أرد عليها و على بناتها و اواجههم بنفسهم و بولدهم

بس ارجع و اقول عيب و ما يصير و انا ما تربيت على كذا

انا اذا غلطوا علي قدامي .. أرد باحترام و ادب و رد يسكتهم و يحرجهم و زوجي عاجبه كذا

.
.

بنت خالة امي لما عرفت اني اسلم على يد حماتي .. خاصمتني و قالت لي بلاش عادات و هبل و ما تنزلي راسك لأحد و غلط انك تسلمي على يدها .. و ابغى تجيني الجرأة و القوة اني ما اسلم على يدها ( تقبيل اليد ) .. امي الله يرحمها كذا ربتني اقبل يد الحريم الكبار و اسلم على راس ابو زوجي لو غبت عنه فترة طويلة

بنت خالة امي تقول لي غلط
و انا الصراحة نفسي انسدت اني اسلم على يد امه وأحس انها ما تستاهل

اخر شي

مرات افكر .. ايش بيكون إحساسي لو جاني خبر وفاة امه لا سمح الله .. الدنيا فانية هذه .. و ماً ابغى اظلمها و لا هي تظلمني ..

خلاص طالما انا صبرت و متحملة ولدها و اعدل سلوكه و هي بداخلها تعرف الشي هذا و شايفة بعينها .. خلاص لا تقول لي شكرا .. بس تحترم حالها ع الاقل

.
.

اخر مكالمة بيني و بينها .. من شهرين ..

زوجي ما ياخد ولدي في موعده للعلاج الطبيعي .. و تاخر مدة شهر .. فقلت لها عشانه حفيدها و لاني طفشت من زوجي .. و قلت بداخلي مرة وحدة خليني اشوف لو مرة فضفضت لها ايش بتعمل تنصفني او تستغل الفرصة !؟ و استشف نيتها بدون ماً هي تحس

ردت علي :
ليش ما تعملي له انتي بنفسك العلاج الطبيعي

و خلاص عودي نفسك تخلصي اشغالك لوحدك من دحين .. مو رايحة تعيشي برة و هناك تخلصي امورك بنفسك .. خلاص يالله عودي نفسك من دحين ..