السلام عليكم و رحمة الله و بركاته

أبغى أخذ رأيكم في شيئين بخصوص ولدي اللي عمره 4 سنوات :


++++++++++++++++++++++++++++++

* 1 *

بأسافر الشهر الجاي إن شاء الله لبريطانيا ، فهل أخذه معاي و لا لأ ..؟؟؟
و بأجلس بس أسبوع واحد ، عشان أخلص أشغالي هناك مع الملحقية و البنوك و غيره
زي ختم الوثيقة و إغلاق حسابي في البنك و تسديد فاتورة الحضانة حقة ولدي و زي كذا ..
و غير حفل التخرج اللي راح أحضره إن شاء الله .. و بننتقل بين الفنادق طبعا ..

و في الأخير بأتسوق ليوم واحد فقط ، أشتري الضروريات ..
و أشحن أغراضنا اللي أحتاجها - زي الكتب و الملابس - و اللي تركتها هناك و الباقي نتصدق فيه ..
و طبعا وقتها بأكون حامل في الشهر السادس إن شاء الله ..

أمي تقول ، خذي ولدك معاك لإنه مرة متعلق فيك .. أو اتركيه عند أخوك و حرمته ..
و أختي الكبيرة كل يوم تزن علي إني أخلي ولدي مع أولادها .. بس أختي أعرفها مو مرة
حريصة عالأطفال و ممكن يغيبوا عن عينها و كل يوم يخرجوا ماشاء الله ..
و أختي الثانية ما أقدر أخليه عندها ..

و زوجي يقول يا تتركيه عند أمك أو تخليه عند أختك أو تاخديه معاك ..
و رافض أخليه عند أخوي ، لإن زوجي ينحرج منه مرة ..

و أمي مريضة ما تقدر تهتم فيه و ولدي بيزعجها في الليل لإنه نومه قليل و ما يخليها تنام ..

و شغالة أمي ( شريرة ) ..
و صدتها مرة تشتم ولدي عيني عينك و قدامي ، و الصراحة ينخاف منها و ماهي ثقة ..

و مرة وحدة رحت لزواج أرحامنا و تركته عند أمي 4 ساعات و مع أختي و أخوي الكبير ..
و يقولولي جلس يبكي و يقول ( أنا ما أحب ماما ،، و ماما تركتني لوحدي ) و ما قدروا يسكتوه ..
كل شوي يروح عند الباب يستناني متى أرجع ؟؟؟ مع إنه متعود على بيت أهلي ..

و زميلتي تقول ، دام إنه أسبوع واحد .. فما راح يأثر و إذا أخدتيه معاك بتتعبي و هو يتعب معاك ..
و بتشيلي همه ، نومه و أكله و شربه و لبسه ... و تقول لي تذكرته 4000 ريال و خسارة و مادري
إيش ..

و قالت لي : استغليها فرصة إنت و زوجك تكونوا مع بعض .. و الولد ما حيفهم إيش سفر و ما سفر ؟؟؟
لإنه زميلتي هذه ، أكبر مني بسنوااااااااااات و عندها أطفال و تقول إنها ( مجربة ) ..
و قالت لو رايحة لمدة ( شهر ) كنت نصحتك تاخديه ، بس أسبوع واحد .. ولدك ما يفهم و تتعبيه معاك

و أنا عن نفسي ، أفكر أخذه معاي و يغير جو و غير إنه هناك جيران نعرفهم ، بينبسط يوم يشوفهم
و يسلم عليهم و يودعهم .. فهل تفكيري صحيح ..؟؟؟
و لا صحيح ما حتفرق معاه ..؟؟؟


إيش رايكم ..؟؟؟


أخذه معاي و لا لأ ..؟؟؟ ( ما تهمني قيمة التكاليف ، لو مافيها تعب لولدي )
لإني الأسبوع هذا خلاص لازم أأكد الحجز إن شاء الله ..


++++++++++++++++++++++++++++++

* 2 *

ولدي أبغى أسجله في ( نادي صيفي ) .. و أمامي خيارين و لازم أحدد قبل يوم السبت :

*. نادي بمدرسة (نموذجية) و سمعته على مستوى المنطقة من ناحية (المباني و النظافة و الديكور )..
و بسعر 1000 ريال في الشهر ، و من الساعة 4 و نص لحد 9 ..

*. نادي صيفي كنت مسجلته الشهر اللي فات لإنه ما كان أمامي غيره ..
و بسعر 500 ريال في الشهر ،، من الساعة 4 و نص لحد 7 و نص ..


سؤالي ؟
- هل التعامل بيكون أفضل في المدارس النموذجية ،.
و لا مجرد ( مظهر و ديكور ) لكن المضمون واحد في كل الأماكن ؟؟؟

- هل في عمر ولدي ، بيكون الفرق واضح إذا سجلته في مدرسة نموذجية أو مدرسة عادية ..؟؟؟

- تنصحوني فين أسجله ..؟؟؟
مع العلم إنه مو مهم السعر ، إذا كان ولدي بالفعل بيستفيد من النادي الصيفي ..

و مع العلم إنه ماعندي أي خبرة ، و الصراحة ما عندنا أحد في العيلة يهتم بتسجيل الأطفال في
النوادي الصيفية .. بس أطمح إني أعلم ولدي من صغره في إنه يستغل أيام الإجازة و أوقات الفراغ ..

و مع العلم كمان <- طفشتكم ..
أخواني الكبار كلهم دخلوا ( روضة ) و هم صغار .. لكن أنا و اللي أصغر مني ما عمرنا درسنا في
( روضة ) و مع كذا .. مستواي الدراسي أنا و اللي أصغر مني كان ( أفضل ) من الكبار ..
و كنت من المتفوقات و المثالية .. يعني الروضة ما شفتها ( أثرت ) في أخواني ..؟؟؟

فهل إذا سجلت ولدي في مدرسة نموذجية و بمستوى أعلى ..
ممكن بالفعل ألاحظ الفرق ؟ أم مجرد اختلاف بالأسعار لسمعة المكان و اهتمامهم بنظافة المباني

.
.

و سامحوني طولت عليكم ..

بالنسبه للسؤال الأول :

رأيي انك تأخذينه معك لأنك أنتي امه ومسؤوله عنه ، ولو امك ليست تعبانه لكان أيدتك تتركينه عندها. وتذكرة 4 آلاف ريال ليست كثيره على ابنكما ، والأولاد يحققون السعاده ولايعرقلونها بين الزوجين.


بالنسبه للسؤال الثاني:

أنا لاأؤيد ان تسجليه في نادي في فترة الصيف نهائياً لصغر سنه ومن الأفضل أن يبقى في البيت معك ومع أبيه ، للأمان . اما اذا كان ولابد فاختاري المدرسه المميزه والآمنه

وأسأل الله أن يصلحه لكم ، كما أسأله أن يسخركم له وأن تقدروا مسؤولية الأبناء. وان يرزقكم بره.

الله يعينك يارب ..
بصراحه مو معاك انك تتركينه لوحده اسبوع كامل ياحرام دام
متعلق فيك زي ما تقولين ، مااشوف انو 4000 مبلغ كبير اذا نظرتي
لنفسيه ولدك انتي ما تدرين وش يعني اسبوع غياب عنه
انا ولدي سافرت عنه اسبوع لظروف صحيه وكان مع خواتي ويحبهم وبرغم
اني كنت اكلمه مكالمه فيديو كل شوي لكن أثرت فيه وربي لما رجعت يبكي وماسك فيني 24 ساعه
ندمت اللي ما اخدته معايه ،
والمدرسه ما يبين ترا الفرق تدرين في مدارس رسومها أقل وتكون افضل
لو تمرين على دور القرآن تسوي برامج صيفيه رائعه وتنمي تفكيره افضل لانو النموذجيه عندهم اللعب مكثف لأنهم يعتمدون ع الألعاب اكثر
الله يصلحه لك ويقر عينك فيه

__________________

سيبيه يابنتي عند اهلك ،، لو مطمنه انك تسيبيه خصوصا في حتة انك هتروحي حفل تخرج ،، هتتصرفي فيه ازاي وقتها ولا وانتي بتتسوقي بتبقي محتاجة تركيز وماحدش يجهدك اساسا

انما لو مافيش حد تقدري تآمنيه معاه يبقى خوديه

حقيقي هو ولا هيفرق معاه الاسبوع ده خالص ،، وكمان اوعديه انك هتجيبيله حاجة او هدية وانتي راجعة

بالنسبة للنشاط الصيفي انا مش بحبذه اوي لو العيلة كبيرة وعنده ناس كتيره يلعب معاهم او ينشغل بيهم

هيتطور بدون مجهود انما لو وحداني وفاضي ومافيش حد بيقعد او يلعب معاه طبعا ارجح يدخل نادي صيفي

اما لو هنتكلم في موضوع الروضة كدراسة او مرحلة ماقبل المراحل الاساسية ،، بالنسبة لي بشوفها مهمة على الاقل يتعود على اجواء الدراسة والمدرسة قبل مايدخل في مرحلة حقيقية ،، يعني مش بيكون هدفي فيها اوي انه يدرس كويس

وربنا يعينك

__________________

أخوي غريب

معاك حق ، و أنا كمان متعلقة في ولدي و ماني مستخسرة فيه أي شئ أبدا ..
كنت خايفة عليه من التعب ( الجسدي ) ، و نحن أصلاً رايحين ننهي أشغالنا الباقية هناك ، مو الهدف
( سياحة ) .. حتى السوق ، عشان فيه أشياء مالقيتها هنا ، زي أدوات متطورة للحامل و مابعد الولادة

و هو يوم يشوف أولاد أختي ينساني أصلا و لا يفكر فيا .. بس ماني متشجعة أبداً إني أتركه عند
أخواتي ..

.
.

أما مسألة النادي .. فالأطفال هناك في عمر ولدي تقريبا و هو بيطفش و يملّ من جلسة البيت ..
و ولدي مرة بينبسط هناك ، لإنه ( اجتماعي ) ماشاء الله درجة أولى و مرة مرح و نشيط ماشاء الله ..
و ما عنده أخوان و لا أخوات للأسف ..

و زوجي طول الأسبوع مشغول بدوامه ، لإن عمله ( فترتين ) ..
و الجلسة قدام التلفزيون ، ماهي صحية للطفل ،، و جربت خليته في البيت أسبوع و حسيته يملّ ..


النادي اللي سجلته فيه ما عجبني كثير ، فمادري كيف ؟؟؟
هل كل النوادي هنا .. نفس الشئ و نفس الأسلوب و التعامل ؟؟؟
و لا فيه فرق في المستوى لو سجلته في مدرسة نموذجية ؟؟؟

في الخارج كان يتعلم أشياء حلوة منهم ، زي كلمة ( اسف ) ، ( شكرا ) ، ( لو سمحت ) ... إلخ
بس هنا ( بيتضارب مع الأطفال في النادي ) و ( المعلمة تعاملهم كأنهم كبار و تطبق الأنظمة عليهم من غير أي نقاش ) ..

و ألف شكر لك

خذيه معاك افضل انت ترتاحي نفسيا وهو كمان
وبالنسبه للنادي شوفي كيف ظروفك وعلى اساسها قرري

عزيزتي حبر راقي ..

تسلمي لي ، عشان نقلتي لي تجربتك .. و أنا عشان كذا سألت ؟
لإني يوم تركته بس كم ساعة ، مانسي ماشاء الله .. و قال لأبوه في السيارة ..
ماما راحت و تركتني و أنا ماأحب ماما ، و ماما ماتحبني ..

و من الموقف هذا ، أمي نصحتني إني أخده ..
أو أتركه عند أخوي ، لإنه أخوي يخاف على أولادنا كأنهم أولاده و ما يزعلهم ..
بس المشكلة إنه بيكون مضغوط مع شغله ..


و سألت عن أماكن للقران و كذا .. بس للأسف ما لقيت ..
لإني أبغى أحسسسن مخارج الحروف عنده ، و خاصة إنه توه متعلم العربي ..

و ما عندنا إعلانات كافية أو مواقع ممكن تلقي فيها أشياء زي كذا .. : (

أختي الغالية روح الطير، أكتب لكِ على عجالة، خذي طفلكِ معكِ حفظكِ الله واياه من كل سوء

__________________

إذا كثُر الاستغفار في الأمة وصدَر عن قلوبٍ بربّها مطمئنة دفع الله عنها ضروباً من النقم، وصرَف عنها صنوفًا من البلايا والمحن، {وَمَا كَانَ اللَّهُ لِيُعَذّبَهُمْ وَأَنتَ فِيهِمْ وَمَا كَانَ اللَّهُ مُعَذّبَهُمْ وَهُمْ يَسْتَغْفِرُونَ}

عليكم السلام والرحمه،،

روح اساسا انتي مو متطمنه تتركينه اتوقع ماراح ترتاحين من التفكير خلال هالاسبوع فيه خوذيه معك وارتاحي ،،

رحله موفقه .

__________________
1-5-1433هـ
الحمد لله رزقت بأجمل بنوته ربي يخليه ويصلحه ..

أشوف من الأفضل تاخذيه معك عندي بنت بعمره تقريباً

بالذات أنه متعلق فيك كذا أكيد بيتأثر

والوضع يفرق لما يكون مع أولاد أختك وكم ساعه وأنتي موجوده

عن لو كان معهم على طول اليوم وانتي غير موجوده

__________________
أشتقت لكم جداً 💔