السلام عليكم ورحمةُ الله وبركاته
بدون مقدمات بدخل جوا الموضوع
وترا العنوان ماله دخل
1.
سلوى بنت عمرها 23 وش زينها كأنها البخت ذذ
كان عندها عرس بنت خالتها وتكشخت هي وأمها وراحو
وهي ب العرس جاتها إمرأة وقالت لها وش زينتس ي بنتي
أشوف إبرمي لي برمه > قويّة ذذ
الزبدة قالت لها يابنتي شحلاتس بس شعرتس كأنه مب ناعم
المهم البنت عادي مشت وكلمت حياتها
2.
بعد فترة أنخطبت سلوى من جديد وجاو أهل خطيب الغفلة
يجلسون معها ويآخذون ويعطون ,
أول مادخلت المجلس قاموا يفصفصونها ويطالعونها من فوق لتحت ,
وقاموا يمدحونها ويمدحون ولدهم وبتطلعون حلوين مع بعض
وترا ولدنا كذا ويحب كذا وبيسوي لك كذا وجلسوا ينفخون ب ولدهم
الشاهد إن الولد شاف سلوى ولا جازت له
بس اتصلوا الأهل واعتذروا وقالو بنتكم يتمناها ألف واحد
3.
مرت الأيام وسلوى تنتظر فارس الأحلام
وانخطبت وهالمرّة جاو الأهل فصفصوها وسولفوا معها
وتقهووا عند أهل سلوى ثم طلعوا من البيت
ولا رجعوا أبداً
ولا دقوا اعتذروا!
---------------
زبدة الموضوع هذه المشاهد تتكرر مع كل بنت ,
وإن م حصلوا كلهم يحصل وآحد منهم
بحط رقم كل موقف وتعليقي عليه
1. برآيكم هل البنت سِلعة ؟ أو بضاعة ! - طبعاً مكرمّة عن هالشي -
لكن حركة لفي ودوري وبعضهم يتجرأ ويلمس الشعر عشان يعرف نآعم ولا !
هل معقولة وصلنا لهالمرحلة .؟
2. سالفة أن أهل الولد يجون ويتكلمون عن ولدهم ويمدحونه ويعيشون البنت أن خلاص بكرا عرسكم , هل هذا فعل صحيحة ؟
فرضاً البنت تحمست وارتاحت للموضوع
وفرضاً راحو وحللّو وطلع مايصلحون لبعض مثلاً
يعني أحس فيه جرح للبنت !
تعالوا وتكلموا عن الولد بس مب تجلسون تقولون بتطلعون حلوين مع بعض
وتراه يحب البنت اللي كذا - ويذكرون مواصفاتها الظاهرية -
وش رآيكم ؟
3. البنت وأهل البنت لهم مشاعر وأحساسيس المفروض نحترمها ونقدرها
وإحتراماً لهم إذا م حصل نصيب , نرفع السماعة ونعتذر وندعي أن الله يرزقها وآحد أحسن من ولدنا
بس سالفة نجي ونتقهوى ونوسع الصدر وننحاش " لا وألف لا "
وبعضهم تجيب معها أختها عشان توسع الصدر
---------------------------------------------
وبالجانب الآخر
أذكر مرّة لمّا خطبنا لأخوي
كلمت أمي ام البنت قالت لها أم البنت
بنتي كثير يجوون ناس يشوفونها ولا يدقون ولا يرجعون
وأنا شفت هالشي يأثر ع بنتي
ف إذا تبين تشوفين بنتي ف روحي لها ب المركز الفلاني هي تشتغل فيه
شفتوا كيف ؟
" إحسِان "
*
مّرة قريب بأحد الردود هنا
إن وآحد يبي بنت مواصفات خيالية
راحت أخته خطبت له وحدة عادية لكن شخصيتها حلوة
وعاش معها أحلى عيشة والحين هو يشكر أخته
-----------------------------------------
فايدة الموضوع
* تذكروا قول رسول الله صلى الله عليه وسلّم : ( إنما بعثت لأتمم مكارم الأخلاق ) ولا ننسى أن " الدين المعاملة "
ف الإعتذار إذا ماجازت لكم البنت والذوق والتعامل الحَسن مع البنت وأهلها هذا من " الأخلاق"
* الجمال مب كل شي ياعيال
* قل لأمك ماتسوي هالحركات ب العروس
---------------------------------
طبعاً أنا تكلمت عن السلبيات في الخطبة
يعني ترى في ناس ذربيين وكذا
يعني أنا م أعمم ()
اترك التعليق لكم