السلام عليكم ورحمة الله وبركاته

انا اشتغل اداريه في مدرسة بريطانيه في احد الدول الخليجيه التي انا مقيمه فيها،،طبعا المدرسه فيها مدرسيين ومدرسات اجانب ..في معلمة امريكيه الاصل مسلمه ومن اسره مسلمة مشاء الله عليها مثال للفتاه المسلمه ،،هذي المدرسه تعمل على نشر الاسلام ومشاء الله اسلم على يدها مدرس ايرلندي ،،هم اصدقااء بحكم انها مدرسه وهو مدرس علاقتهم قوويه ،،وفي نهايه السنة الدراسيه صيف 2013 سمعنا انهم راح يتزوجوون ،،طبعا رجعنا من الصيف ،،وماكان في خبر لزواجهم .

علاقتي مع المعلمة الامريكيه و المعلم الايرلندي سطحيا نوعا ما،،

مررت الايام وفي تاريخ 28/5/2014 صار سووء فهم بيني وبين المدرس الايرلندي وانا عصبت المشكلة كانت خاصه بالعمل ،،بس هو جاء واعتذر وقبلت اعتذاره ،،اليوم الي بعده واحد من طلاب صفه دخل عندي المكتب وشايل علبة شوكلاته ويقولي هذا من مدرس الصف وحاب يعتذر ،،طبعا هذا كان امام الطاقم الاداري انا ابتسمت وقلت مافي داعي خلاص هو امس اعتذر,, بس مع ذالك اخذت علبة الشكولاته ،،ورحت عنده اشكره وقلت له اعتذارك امس كان يكفي ،كان متوتر ويرجف،،طبعا كل الي في المدرسه يعرفون هالمدرسه انه جدا خجووول ويمشي وعينه في الارض انسان رراقي ،،ومحترم حتى قبل لايسلم.

بعد 10ايام من الموقف الي صاار ،،كنت مداومه يوم السبت طبعا هو يوم اجاازه بس بعض طاقم التدريس والاداره يداومون اذا في شغل..هو كان موجوود خلص تصوير الاوراق وراح انا خلصت شغلي وانا طالعه ،،المدير جايب لي ظرف ويقول حصلت هذا على زجاج سيارتك في الظرف كان مكتوب اسمي عليه ،،انا فتحت الظرف,, المدير كان واقف ،اول ماشفت الاوراق رحت لاخر ورقه وقريت اسم المرسل واغلقت الظرف ،،المدير كان حاب يعرف شنو مكتوب بس ماعطيته مجال ،،

رحت البيت قرريت الرساله ،،الرساله مكون من 4 صفحات ،،كان مضمونها انه يبغى يتزوجني وكاتب كل شي بما يخص نفسه ومستقبله وطموحه وكاتب ادق التفاصيل حتى المهر كاتبه ،، وذكرانه يبي يتواصل مع اببوي ،،انا فكرت بالموضووع رديت عليه بالايميل حابه اعرف بعض الامور وسألته بخصوص علاقته مع المدرسه الامريكيه ،،لانه جميع الي في المدرسه بما فيها اولياء الامور عارفيين انه بينه وبينها علاقه،،قال: انه صحيح كان بينهم مشرووع زواج بس الامر منتهي بنسبه لها وبنسبه له والحين هم اصدقااء فقط،،انا كلمت امي وابوي والحمدالله هم متفهميين قال ابوي عطيه موعد انه يجي البيت ،،وجى البيت وسولف مع ابوي ،، ابوي ارتاح له ،،بس مع مرور الايام قمت اكتشف اشياء فيه ،،طبعا المدرسه الامريكيه جات وكلمتني وقالت لي انه علاقتهم صداقه وانه سبب عدم زواجهم هو رفض اهله انه يتزوج مسلمه ،،قلت لها طيب وشلون بيتزوجني قالت يقول انه هو الحين صار اقوى ،،انا بديت اشك ،،اولا علاقتهم جدا جدا جدا قوويه بس قلت الاجانب غير عنا احنا العرب عندهم الصداقه شي والزواج شي ثاني ،،انا اتواصل معاه عبر الوتساب ،،وكلمته يقولي احنا اصدقااء وهي دوم تكلمني عن الاسلام وانا ماعندي اصدقاء غيرها ،، المعلمة هذي علاقتي فيها صارت قوويه ،،قامت تقولي اشياء عنه ،،انا أصدقها لاني واثقه فيهاا،،هي جدا محترمه وماتعطيك مجال تشك فيهاا،،طبعا هو زارنا اكثر من مرره وخلال الزياره الثانيه قال لابوي انه بيقعد في نفس البلد الي احنا فيها ،،بس لمن كلمني انا قال انا بساافر بروح بريطانيا وباخذك معااي.

مع مرور الايام سالته عن المدرسه الامريكيه،، قالي شي خلاني ما اثق فيه ،،سالته عن عدم زواجهم بما انه هم قريبين من بعض قال السبب اهله رافضيين ،،هذا السبب انا اعرفه ،،قال في سبب ثاني !!مو بس اهلي قال انها هي ماتجيب عيال ،،وقالي اني ما اقول لحد!!! شي ما يدش العقل ..

طبعا كنا نطلع انا وهي(المعلمه الامريكيه) مع بعض وكانت تقولي انا احترم فلانً وحنا جدا اصدقااء بس ما ابغى يصير عليك مثل ماصار علي ،،الصيف الي طاف وعدني بالزواج وقال بسافر امريكا وبخطبك من ابوك ،،وكلم ابوها عبر الاسكاي وقالت انا كنت ناطرته ،،اخر شي قالها اهلي ماوافقوا وانا ما اقدر ازعلهم ،،كفايه انهم كانوا مقاطعيني بسبب اسلامي.. مع العلم هو متعلق بأهله كثثير..

انا تضايقتً من الي عرفته وصرت جدا محتاره،،

وهو يكلمني دايم يقولي احنا لازم نفهم بعض ونتكلم مع بعض نكون اصدقاء قبل لا نتزوج،،ولازم تكون عندنا اهتمامات متشابهه،،عصبت عليه وقلت له انت والامريكيه اصدقاء من سنتين ونفس الاهتمامات ونفس المهنه ونفس الثقافه ليش قالت لها بتزوجك وبعدين خذلتها ،،سكت مارد علي ،،بعدين حاول يعتذر ويبرر،، انا طنشته وما ارد عليه ،،

اخر يوم دوام كان يكلمني خلال الدوام واتساب وانا ما ارد ،،قام جى الاداره وقعد قدامي وانا متجاهلته تمامآ طبعا مايقدر يواجهني لانه محد في الدوام يعرف الي بينا ،،كنت جدا مشغوله ،،ومطنشته ،،انقههر ،،وراح،،وطول اليوم يكلمني وانا ما اررد بعدين كلمته بالتلفون وكان يبكي يقوول ارسلت لك 68 رساله وماتردين ،،حسيت اني اكلم طفل ..

انا حاولت ابعد عنه،،وقلت لامي كل شي..قالت هذي الامريكيه تبغى تخرب بينكم..لاتسمعين لها..
رجعت كلمته وقلت له انت مو واثق من نفسك وانت ضعيف وانا ما اقدر ارتبط برجل ما احس بالامان معاه وماعرف شنو يبغى بالضبط ،،قال اوعدك بكون ققوي بس انتي خلك واثقه فيني وادعيلي
الي يوم الي بعده كان مسافر وقالي انه الامريكيه بتوصله وسالني اذا ماعنددي مانع قلت له مو مشكله ..مع انه بيكون وقت متاخر الساعه 2 الفجر بس قلت معليش هم اجانب وعادي هالوضع ..
نفس اليوم الي هو مسافر فيه طلعت انا والامريكيه وبعض المدرسات صلينا تراويح ورحنا نتمشى .
من خلال كلامي معاها قالت لي ترى انا الي قلت له يقولك اني بوصله المطار ولا ما كان راح يعلمك ،،واليوم الي قبله كان طالعه معاها رايحين يستحرون بفندق وهي الي قالت له قولها انه انا معاك..
طاح من عيني تماما،،مو عشان الصداقه الي بينهم لا عشان انه كذاب والي صار عليها بيصيير علي ..
انا ما اقدر اقول اني حبيته بس انا معجبه فيه ،،جدا مثقف و طمووح ،ويحب التعليم ،، وحسيت انه نفس شخصيتي ..
طبعا هو ساافر وقال انه بيرجع شهر 10عشان نتزوج انا ماصدقته ،،وحتى لو صادق مادري شسووي ..

في عندي مخاووف كثيره من الزواج؟!
ابتداءً انه اجنبي ومو عربي و وانتهاء بالاشياء الي اكتشفتها عنه
صليت استخااره اكثر من مره بس ماحسيت بشي
انا كلمت امي بكل التفاصيل بس ابوي ماقلت له الاشياء الي اكتشفتها عنه لانه بيتضايق ،،

احيانآ يرسل لنا الله اشارات وتنبيهات مانفهم معناها الا متآخر
علاقته بالامريكيه غريبه اجانب كانو او لا
اختي لا تتعبي نفسك استخيري واتبعي قلبك

الله يكشف لك مين الكذاب فيهم
حتى لو أجانب تكون حساسيات من طرفه ممكن خائف يخسرك و من جهتها لانه كان خطيبها و الله اعلم
المهم الرجال يكون صادق و قد الكلمة و قد الزواج و أقوى من تأثير اهله

مثال للفتاة المسلمة وعادي تطلع فندق مع رجال أجنبي

مادري أحس اثنينهم مو مريحين

الصراحة أختي الوضع كله مو طبيعي ولا يشجع على الزواج
وﻷنهم أجانب احذرررري،،
والله أحس كأنه كمين بيوقعوك فيه الله يحفظك من كل شر ويرزقك بالزوج الصالح التقي النقي.

هو طبعه ضعيف وخجول وحب شخصيتش لانش عكسه قويه وممكن توقفين معاه ضد اهله حتى يقتنعون بالزواج
الامريكيه اظن والله اعلم تغار وتحاول تتفركش الخطوبه عشان يرجع لها
استخيري وادرسي الوضع بتمهل بس اعتقد ما بيرد من يلاده الا واهله خاطبين له بريطانيه ، الي مستغربته هو اسلم فمن الطبيعي ياخذ مسلمه ، فكيف قدر يقنع اهله بأسلامه ولا قدر يقنعهم بزواجه من مسلمه !!!

__________________
وهل من مصير اخر ؟

مكانه الانسب ...

__________________



احيانا يجب ان نفقد ذواتنا كاملة لكي نستعيدها كاملة ...

اختي العزيزه
انتي كم عمرج؟؟
وهل هذا هو الشخص الوحيد اللي تقدم لج؟؟

اختي من خلال مافهمت واستنتاجي ان امج معاها حق الامريكيه تبي تحرق دمج ..معقول وحده حبت واحد وعندها علاقه معاه وتخلى عنها ..وقلبها عادي ؟؟؟ وانتي تعرفين ان الاجنبيات قليل يلاقون اجانب مسلمين وزينين واخلاقهم زينه مثل هالايرلندي ..
يعني اختي لاتثقين فيها لانها امرأه والمرأه لها قلب وقلبها بيكعد يوسوس لها خذته منج وهي صفر عالشمال هي كاعده تلعب دور البريئه الصديقه النصوح لكنها اساسا تخرب الصداقه حتى ترجع تستحوذ عليه باسلوب بارد وانتي تقولين لها كل شي يمكن فطبيعي عارفه نقاطج شو هي ونقاطه ...

انتي كاداريه حطي سلبياته وايجابياته على ورقه وصلي استخاره على الامريكيه وشوفي قلبج بيرتاح لها وله لا يعني شوفي قلبج بيقولج زينه وله لا...

مافي حرمه بالدنيا شو ماكانت جنسيتها ومذهبها بتوافق وبتكون سعيده ان اللي كانت تبيه راح بسهاله لغيرها..

خلي قلبج حازم وواقعي ولاتفكرين بطيبه لان باين من كلامج على خبرتج بالحياه طيبه وفقيره وبسرعه ينضحك عليح ....

كوني قويه معاه ولاتعلمينها اي شي بينكم ..ولا عن مشاعرج تجاهه
ربي يوفقج ويسعدج يارب

مدري ليش احسه يجرب فيك وبيرجع لهالامريكيه
خصوصاً ان علاقتهم ببعض جيده ولا بقين لبعض
صداقات وخرابيط ماتمشي عندنا ولا راح تقبلين
بهالوضع بعد الزواج ..

تتزوجين برجل له صديقة ؟؟؟ فكري في هذا قبل كل شيء ، بما أنهم مسلمون فلا تقولي أمريكيون أو ابريطانيون محاولة لايجاد عذر لهم ، زملاء في العمل ربما ، لكن صديقة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

__________________

	رأيي يحتمل الخطأ