فكرة الزواج من البداية كنت معتقده انها شي اساسي في الحياة لازم كل فتاة تمر فيه مثلها مثل دخول المدرسه او المرحلة الجامعية، او زيارة الاقارب.. شي اجباري يمر علينا، كل الي عليك تختارين رجل اخلاقه كويسه ويصلي ومعجب اهلك وبكذا انتهى الموضوع.. مع الاسف انا وحده منهم، تقدملي شاب قبل تقريبا 8 شهور، مطلق وضعه المادي كويس، الكل يمدح فيه كبروه في عيوني، الرجل ماعرف عنه اي شي لكن مدحهم له خلاني التفت له ويجذبني طاريه.. ووافقت طبعا لاني ماني صغيره والناس بدت تحكي علي ولان اختى الصغيره تزوجت قبلي، خلينا نقول برمي عصفورين بحجر وبكذا بتزوج وبعيش حياة سعيده والى اخره، لكن الطامه الكبرى هي يوم الملكه من هنا بديت اتعرف على هذا الكائن البشري الي راح يكون زوجي، خليني اكون صريحه انا من البداية ماعجبني لا شكله ولا جسمه ولا طوله ولا اي شي ظاهري منه لكن مشيت على كلام ابوي واهلي طالما انه انسان كويس خلاص، سكت وقلت اكمل واعطيه فرصه لاني ماعرف هالانسان كويس مادري يمكن يعجبني؟ بديت اكلمه وكل يوم عن يوم اتاكد انه انسان مختلف عني، تفكريه، استنتاجاته للامور، تحجيره، نظرته للحياه هالامور ماعجبتني، انا اكبر اخواتي فبطبيعة الحال تكون عندي حس المسؤوليه من انا وصغيره، استقلاليه، ماحب الاوامر والضغوط الكثير لكن هو احسه مرات كثيره يستخف بافكاري، يحب يعطي اوامر مثلا لا تسوين انا ماسمح لك انا زوجك، يبي يغيرني على مزاجه ومرات كثيره يردد انه بيطلب التغيير بعد الزواج وهذا بحد ذاته يجرح كرامتي وكبريائي، ليه مايحاول يقبل فيني مثل مانا؟ من كلامه اني عجبته وحبيته لكن يتنقدني بحكم انه مايشوف مني اهتمام كبير.. طبيعي لان مابادله هذي المحبه، وبنظري المحبه تحتاج مده كبيره لا بل سنوات طويله وعشره عشان اقدر احكم واحبك، فليش يضغط علي؟ ليش يحسسني ان انا مراقبه من قبله الليل والنهار؟ يقول ماتصلتي ومارسلتي ماتهميني فيني انا احتاج اهتمام!! احسه طفل وانا كره هالشي فيه كثيييييير، في وقت كنت احتاج شخص ناضج يفهمني وافهمه ويكون لنا نفس الاهتمامات، الاقي يشخص يحكمني واحسه معاه بضياع الوقت لا اكثر ولا اقل!!! تخيلو كل هالامور في شهرين فقط، المتملكين يحتاجون في هالشهرين يتعرفون على بعض مب يتامور ويطلعون الي لهم والي عليهم! ولمن اطلب منه يترجم هالحب لفعل، ولاهو استغلال لمشاعره فقط امور طبيعية يسويها اي رجل لزوجته مثل حفل زواج معلن غير مكلف يقول ماقدر! شبكه يقول اشتروها انتم وبعدين نتحاسب! طيب سفر يقول لاتتاملين لاني ماقدر!

دايم نختلف في مسائل كثيره,, والاهم اني لحد الان ماني متقبلته، لكني اسكت واقول بعد الزواج بيتغير كل شي، احس اني عايشه في دوامه كبيره، او بالاصح تناقض كبير بين عقلي وعاطفتي.. اساس الزواج هو القبول وانا ماقبله؟! كل يوم عن يوم اكره اكثر من قبل واكره كل تصرفاته وكل ماتعرف عليه كل ماكره اكثر واكثر واكثر، احاول اتجاهل مكالماته قدر المستطاع في الاونه الاخيره عشان ماسمع صوته، احس كل شعري جسمي يكش كل ماقالو اسمه.. الدموع صارت رفيق دائم لي اصحي وانا اصيح انام وانا اصيح احس حياتي جحيم وهو فيها.. مدري ناس تقول صابتك عين وكرهتي الرجال وناس تقول مجرد تراكمات وشكلك ماتبينه من البدايه، وصلت لمرحلة اني فعلا ودي اهرب من هذا الواقع و يموت هو لكن ماتزوجه احسه اكبر قرار غلط خذيته في حياتي وماني قادره اعدله بسهوله،، او ممكن من البداية ماكنت راغبه اصلا في الزواج او راغبه في هذا الرجال كنت ابي اسعد اهلي وبس.. والنتيجه هم وغم واكتئاب.. يقولون الملكه احلى فتره في حياتك وانا جالسه اعيش اسوء كابوس في حياتي، حقيقة مابالغ... ودي اعرف رائكم في الموضوع وش تقترحون علي؟