عندي مشكلة واتنمنى من اعضاء هذا المنتدى مساعدتي في حلها مشكورين
تقريبا من سنه اصيب أبو زوجي بجلطة ومن بعدها صار زوجي يتدخل في شؤون خواته الي اعمارهن من 20 – 24 والغير متزوجات
فأصبح كل مالاحظ شي اتصل بأمه بالجوال واخذ يشكو خواته وبأتفعال وبصوت عالي ((ليش بناتك يلبسون بناطلين ليش يلبسون نقابات وسيعه ليش ما يشتغلون في البيت ليش مقابلين التلفزيون والنت وليش يروحون لصديقاتهم وليش وليش ))
الكلام هذا كله بس بالجوال لاكن مستحيل يقوله لامه أو خواته وجها لوجه المشكله أنه يجلس يوم أو يومين ويروح لهم ويسولف مع أمه ولاكأنه رفع صوته عليها
وأصبح كل فتره وفتره أذا لاحظ شي دق على أمه أو أخوه الصغير الغير متزوج وقالهم هالكلام وغير هالكلام
ويشهد ربي أني مره أخذت الجوال منه وهو يكلم أمه وقلت خلاص أمك تعبانه لاتزيدها والله أنه طردني وقال لاتدخلين بيني وبين أهلي
بعدها صار كل مره يكلم امه ويقول لها الكلام هذا اذا رحت ازورهم القاها مبوزه علي وعلى عيالي وأقول في نفسي يحق لها أكيد أنه زعلانه علينا من زعلها على ولدها وصرت أمشي ومره قلت لها تراني يا خالتي أقوله لاتدخل فيهم يقولي ماعليك مني ومن أهلي بس ما صدقتني
بس لاحظت ان الوضع بدا يزود صاروا خواته بعد يبوزون ووحده من خواته ابد معد تسولف معي ولاحتى تناظر عيالي وصاروا يتناغزون ويعلقون بيناتهم وإذا كانوا زوجات أخوانهم الباقين فيه يسولفون معهم ويطنشوني
وأنا على نياتي إلى الان وأنا أفكر أنهم بعد زعلانين علي وعلى عيالي من زعلهم على أخوهم الي هو زوجي علشانه يتدخل فيهم
إلى حد رمضان معاد قدرت أتحمل والي زادني أني سمعت كلام أنهم يقولون أني أنا الي أشحن أخوهم عليهم وأعلمه على كل شي يسونه ويشهد ربي أني عمري ما شحنته عليهم طيب أنتم عارفين أن اخوكم له عيون وبشوف كل شي
في آخر رمضان قلت له خلاص معاد راح أروح لأهلك إلا ألين تقولهم أني ماعمري تدخلت فيكم ولاعمري شحنتك عليهم
بس هو رافض ويقول خذي حقك بيدك
ما أدري وش لون آخذ حقي بيدي ما أدري هو يبيني أتهاوش معهم والا وشلون
أنا أعرف زوجي مستحيل يواجههم والله أنه من يوم قلت لهم ماراح اروح الا الين تقول لهم ان مالي دخل انه هاجرني وحاقرني ولا يطلب مني شي جالس يخدم نفسه بنفسه وينام لحاله لنا أسبوعين على هالحال
انا عارفه طريقته هذي يبيني اتراجع واروح لهم بس انا خلاص مليت وش هالاسلوب تهجرني وتنكد علي من قبل العيد علشان تبيني اروح واتحمل التبويز والشيل في النفس علشان ماتواجههم
تعبت ياناس وش رايكم ؟