مساء الخير جميعا
بصراحه انا الان مره متضايقه
وقلت اكتب هنا
عالأقل اقرا نصيحه
او كلام يقويني شوي
مثل ماتعرفون انا مطلقه ام لولد الله يحفظه ويخليه لي
وعمره تقريبا ب 6سنوات
وربي وحده عالم انا لأي درجه ضحيت
حتى بكرامتي عشان ولدي مايتضايق من اي شي
او يحس بأي حرمان او نقص
وماقصرت معه بأي شي لا مادي ولا معنوي
ماشاءالله تبارك الله
واسأل الله ان يعيني ويقدرني
على تربيته التربية الصالحه
واحاول قد مااقدر كل ماسأل عن ابوه او اهل ابوه
اوديه لهم لين بابهم
عشان مايحس اني حارمته منهم او يحس انه مايقدر يشوفهم
حتى احيانا بأيام الدراسه يطلبهم واوديه
هذا بشكل مختصر
قبل شوي صدمني
قال لي ماما انتي ليش ماتبينا نروح لبيتنا
ليش مايجي بابا وياخذنا ونروح معه
انا ماابي اجلس هنا ابي اروح لبيتنا
انتي ليش ماتبين بابا
ماتتوقعون شكثر كسرني كلامه
كأنه يحط اللوم علي
وطبعا انا رديت عليه
ورجعت افهمه وش معنى طلاق
واحنا ليش ساكنين هنا
بس كأنه مااعجبه كلامي
وقتها والله جاني إحساس
انه ودي ارسل مسج لابوه
ولا اخلي كلمه ---الا واقولها له
والله وقليله عليه
باع ولده بأرخص ثمن
وبالأخير ولدي جالس يلومني
طيب انا انخنت وصبرت وانغدر فيني وانهنت
وبعد كل هذا جالسه قد مااقدر اكبر ابوه بنظره
عشان مايحس بأي نقص
بذمتكم هل غلطت يوم رسخت في عقل ولدي
شخصيه لابوه غير حقيقته
اسأل الله ان يعافيه مما ابتلاه به ولا يبتلينا
والله مقهوره
مدري هل هو شي طبيعي
وكل الاطفال كذا يحطون اللوم على امهم
والا هالشي ممكن يأثر على نفسية الطفل
وهل تنصحوني اني بين فتره وفتره
افهم ولدي انه ابوك هو اللي مايبينا
لان فعلا هذي الحقيقة
والا وش الطريقه الصحيحه
في الاجابه على الطفل لدرجه ان يقتنع ويحس بالأمان
تم تعديل العنوان ليتناسب مع المضمون