اهلا اختى العزيزة نبض الحياري
وانا حاسة انو فعلا بعض الردود كانت قاسية عليك
بس كلها صدقينى تصدر من قلب طيب يتمنالك الخير
اما بالنسبة للانسان الى حبيتيه ادرى انك منتى مصدقة انه كذب عليكي او انه مايحبك يمكن لانه كان ممثل بارع
بس والله يا اختى العزيزة ياما رجال احلفو وبكو او ادعو انهم يبكون بس كله كذب لو تقرين المجلات والقصص تشوفين الادهى والامر يا اختى العزيزة فى رجال متزوجين ويقولون لزوجاتهم كلام وحب وبعدها تجى الخيانه الكلام ماينفع الكلام لوحده مايعبر عن الحب الافعال هيه الى تعبر عن الحب الصادق

انا ما ابيك تفقدين الامل فى كل الرجال لاكن هذا مبين عليه كذاب والله لو يبيك كان حاول
في ايامنا هذى البنت تعترض فما بالك الرجال فى الف طريقة وطريقة كان ممكن يلجى لاى احد من اقاربه عشان يقنع ابوه بس صدقينى يكذب
لاتضيعين وقتك بالتفكير بواحد مثل هذا مايستاهل على قولت الاخوان تكلفة الاتصال فيه حتى حرام
صدقينى عيونى هذا مايحبك الانسان لمن يبي شي ويحب شئ يسعي للحصول عليه يحاول قد مايقدر بس هذا كذاب
وبعد ابي اقولك شئ حاولى انك تبتعدين عن الاغانى على الاقل هالفترة رمضان وصديقنى فعلا الاغانى توقض المشاعر وممكن تخليكى ترجعى تفكير مرة ثانية في انسان مايستاهل
بعد تبين تضيعين من عمرك 10 سنين عشانه هذا دقيقة حتى حرام تضيع بالتفكير فيه
ولاتفكرين انك ماراح تنسينه والله لتنسيه وراح تقدرين

والله يوفقك ويوفقنى ويوفق والجميع يارب الى مو متزوجين بناس طيبين يارب في هذا الشهر الفضيل
والى متزوجين الله يسعدهم يارب
وانشاء الله تتزوجين واحد ينسيكى اسمة

مع السلامة

السلام عليكم اختي نبض الحيارى
الحقيقه انا قرأت الردود وصحيح انها كانت قاسيه شوي على قلب رهيف مثلك لكن هذا كله لمصلحتك
والوفاء في الحب شي جميل بل هو اساس الحب بس ما وفى معاكي فهذا لايستحقك صدقيني اختي وفري دموعك ومشاعرك واحاسيسك الى شخص وفي يحبك وانشاء الله تحبيه ادري انه صعب عليكي النسيان بس لازم تقدري ودوسي على قلبك ولا عاد تتصلي فيه حتى اذا اتصل هو لاتردي عليه اسف اذا اتدخل في امورك الخاصه بس هاذا المفترض منك
بس انا اللي مستغرب منه صحيح في بنات يحبوا من قلب كذا ؟
الله يسعدك انشاء الله في حياتك القادمه
تحياتي واسف اذا غلطت بشيء
الله يرزقنا انشاء الله بالزوجه الصالحه

بسم الله الرحمن الرحيم
السلام عليكم
أنا أوفق أختي توت بري موافق تامة في ماهمسة لك به ((وهمسة..في اذنك..

"انه..مافي..رجل..شرقي..يضيع..وقت..مع..وحدة..ايام.. العزوبية....يفكر..انه..يتزوجها..ابداااااااااااا...
ولا تصدقين..انه في رجل..في هذا الزمن..يتزوج..غصبا..عنه.."))

__________________

تحياتي

السلام عليكم
مشكورين اخواني على الردود
اخوي لعيونك انتي انا معك انه الرجال ماينغصب ابدا ممكن البنت تنغصب
بس انا ابغى اقلك انه هو حاول مع اهله لمدة سنتين لكن رافضين تماما بحكم اني انا مو من نفس المدينه هذا اولا ثانيا انهم يبغونه يتزوج من العايله عرضوا عليه كل البنات الي في ديرتهم لكن رفضهم في الاخير حس انه مو قادر يواجه ابوه قله الي بتسويه سويه
وفعلا ابوه سواها وخطبله بنت عمه وهو ماكان داري في حكم انه ابوه في مدينه وهو كمان في مدينه
وابغى اقلكم هو من اهل الجنوب ويقلي انه اهل الجنوب مايقدرون يقفون في وجه اهاليهم يمشون الولد زي البنت
وعلى فكره هو مااخذ مني شي لدرجة اني عمري ماطلعت معه ولا سوالي ابد اي شي يعني مااخذ ولا شي من شرفي
اختي نورا
اقلك صحيح لو يحبني تزوجني بس والله العظيم النسيان صعب جدا جدا
اخوي
ms_mr
انا قلت له هذا الكلام قلتله لو تحبتني تتزوجني على بنت عمك سكت ماقالي شي المهم انا ماقدرت قعدت اضحك رغمنه الضحكه فيه صارت بس صوت وشكل لكن ماهي من قلبي وقلتله على العموم ربي يوفقك مع بنت عمك ولا مع غيرها وصارت دموعي تنزل من عيني لكن بدون ماابين له

اخوي SiM_SiMa
والله العظيم يااخوي انه حبه ماجاء فجأه انا حاول مرارا وتكرارا انه يتقرب مني لكن انا كنت رافضه ماكنت اتوقع انه في يوم من الايام اكلم شاب
حاول حتى حبيته واعرف نفسي اذا حبيت اخلص للانسان الي احبه ومااتركه بسهوله الكل قلي ماينفعك لكن حبيته ايش اسوي ارمي قلبي وادوس عليه صعب جدااااااا
اخوي النبيل انا اقول الحب اسمى علاقه بس ليه تندسونها انتم ياشباب والله العظيم اكتب الردود وانا عيني تدمع من القهر واخفيها ماابغى احد يشوفها قلبي محروق بس ساكته
اختي توت بري
صحيح الزم على الانسان كرامته بس انا ايش اسوي بقلبي الي بين ضلوعي ماهو قادر ينساه
حبني غصب عني وتركني غصب عني شايفين قد ايه ظلم الانسان للانسان
وتقوليلي ارمي الماضي ورى ظهرك قوليلي بس كيف اذا كان ماني قادره انساه اااااااااااه يالقهر اتعب واحب واضحي وابني بعدين تجي واحده تاخذه جاهز لها هذا الي قاهرني
اختي جودي العسل
فعلا كلامك صحيح مع كثرة الردود الي تقول انه كذاب لكن ماني مصدقه ابدا انه مايحبني مو معقول ابدااااااا
معقوله كل الكلام الي قاله كذب يكذب بالحب ااااااااااااه وينكم ياقيس وليلي وينكم ياعنتر وعبله وينكم يارميو وجوليت وينكم ياكل العاشقين تشوفون شلون الحب صار اكبر كذبه واقوى مشهد تمثيلي

وتقوليلي لاتفقدين الامل في الرجال انا فقدت الامل بدون ماتقولين انا صرت ضحية رجل وماتبغيني اكرهه
تعرفين راويه الي في مسلسل الحريم انا هي نفسها
اما عن الاتصال والله العظيم احاول مااتصل حتى جوالي قفلته ولغيته ورميت الجهاز عشان مااتصل عليه لكن بعض الاحيان احس اني مشتاقه وولهانه على اني اسمع صوته وبغربه واتصل عليه لكن يقفل الجوال ولا يرد عليه اصدم بواقع اكبر من ظلم الغربه والزمان
حرام اني سنتين احبه ومتعوده اكلمه وفي الاخير يروح كذا حتى بدون كلمة وداعا ايش انا حجر مااحس ماابكي زي مااضحك مااكره زي مااحب مشكلة الرجال انهم يعتبرون البنت ماتحس رغمنه ربي وضع فيها عاطفه لو توزعت على الكون كان كفته.
اخوي المشاعر صحيح الوفاء احلى شي بالحب بس وينه ياحسرتي على قلبي الي مايعرف يخون لازم اتعلم اخون واحقد واكذب عشان اعرف اعيش في هالزمن
عشان ماابكي لان دموعي خلصت على حال الحب ااااااااااااااه ياقلبي
اخوي بدر
صحيح مافي رجل شرقي يتزوج الي يحبها تدري ليه لانهم مو وجه احد يحبهم حرام الحب فيهم
وخاصة ...... حرام احد يحبه لانه مو رجال يقف في وجه الناس كلهم عشان يتزوجني
الرد طويل لكن كله من حرقة قلبي
===================================
وقفه:
يمر ليلي يقتلني
وعندي تبطي الاحزان
ودي للبشر اروي
حكاية ظروف انسان



تعديل...توت

اختى نبض الحياري انا بعد من الجنوب
ولاكن مافى شئ اسمه غصب الا اذا الواحد سكت انا بنت ومن اهل الجنوب ابا عن جد ولا عندنا غصب في الزواج
اما الى مايتكلم راح يزوجونه غصب عنه
اذا هوه رفض سنتين يرفض ويقول مانى متزوج ومايتزوج مرررة لانو لو فرضنا انه يحبك ليش يتزوج بنت الناس يظلمها معه وهوه يحبك هذا يسير انسان انانى الى يحب مايظلم الناس الحب الحقيقي يطهر النفس الى يحب يحس بالاخرين مو يظلمك ويظلمها ويقول ما اقدر
ومثل ماقلت لك انا من الجنوب وكثير عندنا اتزوجو بهذى الطريقة

ولو فرضنا انه يحبك وهذا فرض غير صيحيح بس خلينا نفرض
بتقعدين تسنينه وليش تضيعين بعد الباقي من عمرك وهوه متزوج ومستمتع وحاصن نفسة وانتى تنتظرين صدقينى ياعيونى وابيك تفكرين فى الكلام الى بقوله زين
انو ربي اذا كاتب لك ان تتزوجينه بتتزوجينه بس الله مو كاتب ماتقدرين تغيرين شئ الله مو كاتبه لو جلستى تسنين العمر كله
واحمدى ربك الف مرررة واشكريه يمكن الله كاتب لك رجال احسن منه
ولاتقولين انا مثل روايه الى في مسلسل الحريم والله انى اكرهها مو من محبتى فى الرجال ادافع عنهم بس مثل مافيه انسان كذاب في انسان صادق مثلهم مثل البنات
لاتخلين نفسك تتعقدين عشان واحد مايستاهل عيشي حياتك مو انت قبله كنتى عايشة وبعده راح تعيشين وادعى الله وقولى يارب سامحنى
وانسي

السلام عليكم
اختي جودي العسل انا ماادري عن عوايد اهل الجنوب وهو قالي هالكلام يمكن كان في نفسه شي
يمكن عشان استفزيته وقلتله مو رجال الي يقبل باي كلام ينقاله والله ماادري يااختي احترت
انا قلتله اذا تحبني لاتظلم بنت عمك معاك ولا تخلي في هالدنيا ضحيتين بدل ضحيه
على العموم الله يوفقه وادعيها من قلبي
الوحده مننا ايش تسوي غير كذا

اعتقد حتى لو اتكلمت وكتبت وزدت على الردود ما راح اوصل للنتيجة اللي تريح البال ..اختى نبض الحيارى ...

لكن ما اود قوله ..... عليك بالصبر واحتسبي الاجر من عند الله سبحانه وتعالى ..... ولا تنسي الاجور في هذا الشهر الكريم

الله ييسر لك ابن الحلال ويستر عليك وعلى اخواتنا في كل مكان .............

مع تمنياتي لكم بوافر الصحة والعافية

مشكور اخوي فاهم احساسك على الرد
والردود كانت كافيه انها تريحني وشكرا لك
وربي يرزقنا مانتمناه وتتمناه

نعم أختاه سنتين وأنتي في أتم السريه لهذا الشيء.................أتعلمين لماذا لأنك تعرفين ان اهلكي لو وقعوا عليك في هذا الحال لسمي الحب الذي بينكم عار ولو علم به أحد من غير أهلك سوف يبقى عار على جبين أبوك وأخوتك...............أختاه تذكري حريتك قبل هذه العلاقه السريه والمبنيه على باطل.....تذكري كم كنت مرتبطة بأهلك تذكري كم من عمل قمتي بأنجازه وتذكري مابعد هذه العلاقه من تأجيل لعباداتك ولأعمالك الدنيويه وأبتعادك عن أهلك......تذكري كم مرة جعلتك هذه العلاقه تخلوقين الأعذار أمام أغلى البشر وهي أمك لكي تحصلي على فرصة حتى بالكذب من أجل من؟ من أجل إنسان فارقكي وفي حضن غيرك .....انا لا أقول لكي أنه لم يحبك بلا والله أنه أحبك لأنه قام بالستر عليك...ستقولين إذآ لماذا لم يتزوجني لأنه يحبني ؟ أتدرين ما منعه من زواجك....أنه ليس أبوه ولا عاداته ولا أختلاف المناطق السكن لأن الكثير من الناس تزوجوا وهم يختلفون في الجنسيه واللغه ولكن علاقتهم بنية على الحق ووفق الله بينهم ولكن صدقيني أن ما منعه الا هذا النوع من الحب او العلاقه الغير شريفه أتعلمين ماذايفكر به حبيبك كل ما أراد أن يقوم على خطبتك ..... أنا سأجيبك كان يفكر في بداية أمره معك وماكان يخفي عنك أثناء مطاردته لكي في بداية علاقتكم التي تقولين انه تعب لكي يتوصل إليك.... نعم تعب كثيرآ ولكنه لم يجد ما كان يفكر فيه الا وهو إشباع رغبته منك ثم تركك......ولكن رفضك لهذا النوع من المطالب لعلمك مدى تحريمها ومدى عواقبها لو علم بها أحد من أهلك, وان دل هذا الشي فأنما يدل على أن البيئه التي تعيشين فيها صالحه والحمدلله انكي لم تدخلي عليها مايضيع محافظتها على السمعه الطيبه.....دعينا نعود إلى محور حديثنا الا وهورفضك لمطالبه البذيئه والتي تخل بشرفك .... وانا أعرف اجابتك له بالحرف الواحد أثناء رفضك الا وهي ....(مستحيل يتم هذا الشي الا بعد الزواج ) وهذا ماجعله يدخلكي في أوهام الزواج حتى الوصول الى مايريده في البدايه ولكن أصرارك بالرفض لهذا النوع من المطالب وصفاء نيتك بعد توهمك في ان مطارته لكي بسبب حبك جعلت الايام تمضي وتمضي حتى أزداد حبكي له وحتى وقع هو إيضا في حبك وهذا ماجعله يقوم بالستر عليك والحمدلله .................. صدقيني يانبض الحيارى ان مامنع حبيبك ابآ ولا أختلاف العوائل أنما ما منعه الا سوء النيه التي بداها معك.....ستقولين لماذا وكيف ساتؤثر أفكاره السابقه..........سأقول لك تفكيره بعد تفكيره بالزواج منك ....الا وهو ماقاله في نفسه كثيرا ومن بعد أتخاذ قراره في الابتعاد حب فيك.....أتعلمين ماذا كان تفكيره في الايام الأخير في علاقتكم .....كان يفكر حبيبكي في نيته السيئه السابقه وكان يفكر في مستقبله معك والذي سوف يدخل عليه الشك كثيرا بأن من قامت على مكالمته قبل الزواج سوف تقوم بمكالمة غيره ومن هنا يبدا الحب في الإنهيار وتبدا المشاكل ويدخل الشك أتعلمين ماذا سوف تكون نهايتك معه الطلاق......اتوريدين حبا من هذا النوع اتريدين ان يصبح أغلى إنسان في حياتك أكره إنسان طبعا لا إذا يأختي نبض الحيارى أبتعدي عنه وحافظي على حبه في الذكريات وتوبي الى الله وادخلي الى البيوت من أبوابها مثل ما قام حبيبك بعمله وما جعله يقوم على على هذا الاحبا فيك وللمحافظه على ذكرياته الجميله بدلا من واقع مر وكله كراهيه ......أختاه أنه في موقف يحتاج الى المساعده الا وهو الابتعاد عن طريقه لانه ضعيف جدا في بداية مساره فأنصحكي يأختي بمساعدة من أحببتيه على أتمام مساره أبتعدي عنه هذا هو الحل الأنسب لكي وله حتى لو ضعف وقام على الإتصال بكي يانبض الحيارى قومي على إحساسه أنكي نسيتيه وأن إنسان ما دخل في حياتك ....وادعيه أن يكون أمين على حياته الزوجيه ولا يقوم بخيانة زوجته وأخبريه انكي سوف تقومين على ذلك مع الشخص الذي أنتي خطيبة له حتى يرجع الى زوجته..... وتتم حياته.....لما أختاره حب لكي وليس بغضا لكي ....صدقيني يأختي أن حياتكي سوف ترجع الى مجراها الحقيقي...... والإيام كفيلة بذلك وفكري بالزواج من شخص لا يعرف مامضى من خطأ لكي...وعلى مأسنه ديننا وعادتنا وتقاليدنا ......لأن إقامة هذا النوع من العلاقات لايتم زواجها لما يدخلها من شك بين الحبيبين....وان تم الزواج بعد هذا النوع من العلاقات كانت نهايته حصره وندم وكره وبغضاء وإذا فات الفوت ماعاد ينفع الصوت ..... وأكثري من الشكر والحمد أن أخرجكي الله منه............واتمنى لكي مستقبل مشع بالأمن والأمان وبعيدآ عن الشقاء والعناء الذي مررتي به طوال السنتين الماضيتين......ووفقكي الله وصدقيني وأعيدها لكي الأيام كفيلة بأن تخرجكي من هذا الذي أنتي به ولكن بالمحافظة على عباداتك.... وأكثري من قرأة القرآن كلما كثرة عليك الأفكار وأبتعدي عن الجلوس لوحدك حتى تنسي وأحرصي على تواجدك بين أهلك بعد أبتعادكي عنهم لشيء هم يجهلونه.....وتذكري كثرت سؤالهم عن كثرة نومك وسوء حالك ولاحظي انعدام كذبك وصدقك مع أهلك هذه الإيام ولاحظي أيضآ كلام أهلك في هذه الإيام بأن حالكي أفضل من قبل وأسعي لما يحبه الله ورسوله وبالتوفيق إنشألله ........................ !

تحياتي لكي مع أطيب التمنيات...................نصائح من واقع تجربه وأحمد الله انها لم تتم.....ومضى عليها الآن مايقارب التسع سنوات ......ومضت مع الإيام وأصبحت ذكريات وأنا الأن متزوج ولي أطفال وأما من مضت معها الذكريات فأخر مأتاني من أخبارها أنها تزوجت بعدي بنصف العام فأسلكي الطريق الذي سلكناه لكي تهني بحياتك........وفي الختام أقول أن شكواك للموقف الذي أنتي به دعتني أتكلم بكل صدق وأمانه وما مررت به ووضعت حبيبك في الموقف الذي مر بي وما كنت أفكر به وما الذي جعلني أترك من أحببت.......لكي تمضي به الذكريات في صفحة الماضي من غير كراهيه...دعيه يذهب مع الذكريات...وتذكري دائما هذه الكلمات (الأيام كفيلة في النسيان) وكل يوم راح يكون أخف من اللي قبله.......وكم من قريب وصديق.....أخذه الموت ونسيناه...... !

مشكور اخوي love me على الرد
اقلك فعلا انا كنت غلطانه لما حبيته
وخبيت عن اهلي كثير اكذب عليك لو قلتلك كنت راضيه ومستمتعه على الوضع بس ماكنت اقدر اسيبه لاني احبه
وانت تقول ان الشاب مايتزوج الا وحده ماكان يكلمها عشان اشك والمشاكل
طيب انا لما حبيته عرفت عنه اشياء كثيره ممكن تبعدني عنها بس قلت احنا اولاد اليوم ومافكرت بالماضي الاسود الي كان عايش فيه وكان لو يتقدملي اوافق
طيب انا مالي اي اعتبار انا ماراح افكر بماضيه بكل شي
ولا انا انسانه قلبي حجر وعواطفي تجمدت مع الايام
لالالا يااخوي انا انسانه لي قلب يحمل الحب الكبير لهذا الشخص وبالمقابل يحمل الكره الشديد له تقول مايجتمعوا .
اقلك عندي يجتمعوا حبيته وضحيت عشان وفي الاخير يتركني ليه عشان وفيت له اجل لو كنت خاينه وش صار مصيري لو كنت كذابه وش صار مصيري
ابسأل كل شاب انتم ليه تعاملون حبكم للانسانه الي وفت لكم بانه بعد الزواج يكون في شك وفراق وطلاق
ليه الحب صار معيار لكل الماسي
على كذا ماراح احب حتى زوجي تدري اخاف اقول لزوجي انا احبك واتعامل معه بكل رومانسيه ويشك فيني
انا رفعت يدي عن كل الرجال
وانت بنفسك تركت حبيبتك وتزوجت ليه
عشان ماتشك فيها
يوووووووووووه هذا تسميه حب
لا والله مو حب ولا عمرك عرفت الحب لاتقول حبيتها بجنون لو حبيتها ماكان فكرت بيوم من الايام بانك راح تشك فيها
صراحه معادلتكم صعبه انتم يالرجال وحياتكم اصعب لانكم مانتم عارفين تتحكمون بقلوبكم ولا عواطفكم

حسافه والله العظيم حسافه
كويس انك رديت لانك زدت في قاموس الرجل سيئه