السلام عليكم ورحمة الله

ترددت وايد قبل لا اكتب هذا الموضوع
لكني محتاجة لمساعدة اخواني وخواتي

قبل كم يوم كان عيد ميلادي

دخلت سنة جديدة .. سنة طافت ولازم احاسب نفسي اراجع اللي صار
وبالليل قعدت افكر بوضعي اللي انا عايشته
شفت اني تغيرت وايد خلال 3 سنوات ومع الاسف التغيير للاسوأ
اولا صرت اعصب واييييييد ولأتفه الاسباب وصار عندي طبع وهو اني اكل لأنفس عن هذا الغضب واريح نفسي
طبعا قبل كان وزني زايد بسبب بعض الادوية التي ظليت اخذها لفترة الى ان تعدلت حالتي الصحية الحمدلله
لكن الوزن زاد اكثر بسبب العادات الغذائية الخاطئة .. بتقولون روحي لاخصائي تغذية علشان يعطيج رجيم يناسبج
بالفعل رحت وسويت فحص دم وعطاني الطبيب الوصفة
لكن ارادتي صارت ضعيفة وانهار وارجع اكل اكثر وبعد خلال السنة اللي فاتت صابتني ظروف مع صديقتي ومع زملائي بالجامعة بسبب اسلوبهم الغير متحضر ..واثر علي هالشي

المشكله ان اسلوبي في التعامل تغير .. صرت ما اعرف نفسي كلش
غير العصبية صرت مترددة وايد .. اعطي قرار او وعد وارجع عنه بعد شوي
مثلا اقول لخالتي بطلع معاج وبعدها بشوي اتصل لها اقول سامحيني خالتي ما بقدر ايي وياج واطلع الف حجة مع انه في الواقع ماكو شي يمنعني وهالشي تكرر وايد وايد

او اني اشترك في نشاط او دورة تدريبية في اي شي وبعد نفس السالفة بعد فترة بسيطة اتراجع بعدما ادفع واخسر نفسي وطبعا الفلوس ما بيرجعوها عليك اذا انسحبت

وكل يوم اتغير اكثر واكثر
اسلوبي صار خشن وجاف في التعامل

اختي وبنات خالاتي يقطون نغزات مختلفة من بعيد او يسوون روحهم يتكلمون عن شخص ثاني بس هم يقصدوني ومعنى كلامهم : انت دفشة وثقيلة .. مافيج نعومة .. منو بياخذج وانت جذي بهالشكل والاسلوب
على بالج ليش ما انخطبتي للحين وماكو احد تقرب منج وحبج هذا بسبب اسلوبج

مع اني في الواقع رافضة سالفة الحب اللي يجي عن طريق اللعب والسوالف البطالة
اللي يبي يحبني.. فهو لازم يحبني لنفسي وشخصيتي مو تعلق فاضي وماله معني واخرته اذا صار ارتباط ينتهي بمشاكل وطلاق لا سمح الله
وسالفة الزواج قسمة ونصيب

صراحة محتارة ومتضايقة
الحين يجي السؤال .. ياترى هل راح اقدر ارجع نفس الانسانة اللي انا اعرفها والكل يعرفها ذات الاسلوب اللبق والهادئة والمرحة ؟ اذا اي فشلون ؟
حاسة نفسي مو مستحملة الوضع
ابي اتغير بس ما اعرف شلون

بليز ساعدوني ولا تتجاهلون موضوعي

والله عزيزتي لازم تنتبهين لنفسك من نواحي عده أولها العصبيه .....................


لازم تفكرين زين قبل ماتتكلمين لان العصبيه تخليك تقولين أشياء تندمين عليها .....وأحيانا نداوي العصبيه

بالسكوت ..إذا كان الكلام من فضه فالسكوت من ذهب ......


بالنسبه للأكل وزيادة الوزن هذي مشكله يبيلها رجيم ورياضه ومشي ....

يأختي ليش ماتطلعين وتوسعين صدرك قعدة البيت ممله جدا ..وتغيير الجو مطلوب أغصبي نفسك وأطلعي

صدقيني راح تنبسطين ....وشوفيلك صاحبات ترتاحين لهم وأن شاء الله تستانسين ...

الله يوسع صدرك بالعافيه ....

__________________

لا تحسب اني نسيتك
أو نسيت لمسة يدينك
لا تحسب اني نسيت ياأبوي

صوتك أو سواليفك
في جمعة من نصف الشهر

حال الموت بيني وبينك
عندي لك كل ليلة موعد
اجلس فية وأدعيلك

الله يكون بعونك اختي

لكن انا اشير عليك بكتابين بمنتهى الروعه

كتاب لاتحزن

وكتاب دع القلق وابدا الحياة

مرة فائدتهم راح تلاحظينها في تصرفاتك باسرع وقت

وخصوصا انك راح تستمرين بقرائتهم بدون ملل

فترة و بتعدي إن شاء الله

__________________

و ما تشائون إلا أن يشاء الله

أستغفر الله العظيم من كل ذنب عظيم

ALshouka شكرا لمرورك وتعقيبك صحيح مثلما قلتي لا زم انتبه لنفسي
راح احاول اسيطر على نفسي بس لحد الان ما اعرف شلون ابدأ



متغربه اشكرك عزيزتي .. لكن ماقلتي لي من المؤلفين لهذه الكتب وان شاء الله احاول احصلها
شورك وهداية الله


hulkpop ان شاء الله مثلما تقول فترة وتعدي

مشكورين جميعا ولازلت انتظر نصائح بقية الاخوة والاخوات

مرحبا حبيبتي
والله ينولك اللي في بالك ان شاء الله و يحسنك للافضل
بس حبيت اقولك ان الاحتفال باعياد الميلاد :14: بدعة
وكل بدععععععة ضلالة وكل ضلالة في النار فهي حرررررررررررررررررررررررررررررررام
ارجوا تقبل نصيحتي بصدر رحب والله يوفقك

اختي
انا اول مره اشارك
وان شاءالله تكون بدايه فيها خير لك
اجلسي مع نفسك ساعه وفكري وش استفدتي من التعصيب
خصوصا انك مو عصبيه بطبيعتك
هذا اللي فهمته منك
يعني تقدرين وبسهوله تتغلبين على العصبيه
لانك يااختي اذا عصبتي اكيد راح تغلطين على الناس بالكلام وتصير الناس تدعي عليك
فحاولي تستغفرين كثير لان كثرة الاستغفار فيها فوائد كثيره
منها مغفرة الذنوب وتعودك على الصبر لان بطبيعة الانسان الاشياء هذي تكون عليه شاقه رغم سهولتها
اما البدانه ماهي مشكله لاتسويين رجيم كولي اللي تبينه بس خففي ولا تتعشيين
اما الزواج مثل ماقلتي كله بأمر الله
اما التردد اذا حسيتي انك بتترددين اغصبي نفسك على اللي ترددتي عليه حتى لو انه خطا حطي فبالك انك ماراح تندمين حتى لو ماستفدي شي من قرارك يكفي انك تعلمتي منه
دائما انظري للحياه من الزاويه الجميله
حتى الاخطا انظري لجمال ماستفديه منها
وبهالطريقه راح تتغير شخصيتك وتصرين بدال ماتحتاجين للناس بالحل الناس تحتاجك تحلين مشاكلها
اعذريني على ركاكة اسلوبي فأني على عجله من امري
اختك فالله

كتاب لاتحزن كتاب معروف بيع منه اكثر من مليون نسخه

وهو للشيخ عائض القرني

ام الهوايل عزيزتي انا ما احتفلت بعيد ميلادي مثلما غيري يحتفل

بس لما يجي هذا اليوم الانسان لازم يقعد مع نفسه ويشوف هو شنو سوى وشنو فعل
ويحاسب نفسه قبل لا يحاسبه رب العالمين ويصحح اغلاطه اذا وجدت


تسلمين على نصيحتج

__________________

سوسو بنت دودو

شكرا عزيزتي
كلامج ريحني
وكلام كل الاخوة بعد وقاعدة هالايام اسيطر على نفسي بعدما كتبت لكم

ادعوا لي

__________________