اختي مجاهده.. لا انتي مب مريضه نفسيا... انتي بس متعبه.... متعبه فقط...
مجاهده.. انتي تكلمين حد عن وضعج؟ يعني تطلعين اللي داخلج لوحده من خواتج او صديقاتج؟ الغضب اللي تحسينه اتجاه حياتج و اتجاه الرجل اللي وثقتي فيه... يالسه تفرغينه في اللي حولج... حاولي تتكلمين اول بأول مع وحده من خواتج تثقين فيها... علشان تطلعين كل الشحنات السلبيه... انا ليش طلبت منج انج تروحين النادي و تمارسين رياضة المشي على الجهاز بالذات؟ لأنج راح تطلعين كل طاقتج هناك... بتركضين لا ارادي على الجهاز بس علشان تفرغين الغضب اللي داخلج.. بعدها راح تحسين بأن نفسيتج احسن ان شاء الله... انتي داخلج غضب كبير من اللي صار.... و لازم تفرغين هذا الغضب علشان ما تتعبين أكثر... و هذا الشخص اللي تحسين انه متحكم في حياتج.... لدرجة انه قال لج ما راح يطلقج الا إذا وافقتي على التواصل معاه.... انسان غريب فعلا... انتي معصبه منه.. بس انتي معصبه من نفسج اكثر.... و تلومين نفسج ليش وافقتي عليه... و تلومين نفسج احيانا ليش طلبتي الطلاق... كل هالأشيا تدور داخلج حاليا.. و انتي محتاجه تفرغينها أول بأول علشان ترتاحين.. و صدقيني يا مجاهده... ما راح ترتاحين بسرعه... راح تاخذين وقت... و كلما دخلتي في موضوع الطلاق راح تزيد شحنة الغضب فيج اكثر و اكثر... بس ان شاء الله راح تتغيرين و ما راح تفرغينها في اللي حولج... و ليش ترفضين ان الأمور تسير بشكل طبيعي معاج... هذي المراحل الطبيعيه... بتكونين معصبه و لكن في النهايه راح تهدين و تتقبلين اللي صار... خلي الأمور تسير معاج بشكل طبيعي... خليها عاديه... من حقج تزعلين.. من حقج تعصبين.. من حقج تصرخين... انتي انسانه طبيعيه.. و لكن إذا استمر هالشي فتره طويله هني نقول ان فيج شي... و لكن حاليا انتي في بداية مرحلة الطلاق... فليش تبين تكونين طبيعيه فيها؟؟؟ انتي انسانه... راح تمرين بكل المشاعر الى ان تستقر نفسج.... و بعد حصولج على ورقة الطلاق... راح تمرين بنفس المشاعر.. و لكن هذي هي النفس البشريه يا مجاهده.. لهالسبب اقول لج الرياضه و المساج و الروائح العطريه المهدئه تلعب دور في تسكين المشاعر عندج.. و اعطيج ضمان ان اول مساج بتسوينه ما راح تسترخين.. لأن عقلج مشغول.. و لكن مع ثاني و ثالث و رابع مساج راح تتعلمين الإسترخاء.. و ان من حقج انج ترتاحين.. |
مجاهده... زيت الللافندر هو نفسه زيت الخزامى... دوري عليه... يمكن تحصلينه بهذا الإسم...
عبي البانيو ماي ساخن... و حطي فيه قطرات من الزيت... و اغطسي فيه يا مجاهده... غمضي عينج و احلمي في مكان حلو... احلمي في دنيا حلوه... اغسلي همومج وقتها... الله يغسل همومج و يبدلها افراح عاجلا غير اجل |
اختي مجاهده.. آسفه على التأخير... عندي شوية اشغال في هذه الفتره...
زيارتج للمحامي صحيحه و وايد زين انج سويتي هذا الشي... المحامين عموما راح يظهرون لج ان الأشيا جميله و سهله و ورديه خاصة اذا كان محامي غير متمكن لأنه يبي يستلم القضيه و نسبته منها و السلام... لهالسبب تأكدي في عالم المحاماه انج تروحين لشخص موثوق به... شخص له وزنه في عالم المحاماه و يعرف كيف يتصرف بطريقه صحيحه في القضيه... القانون في الدول الإسلاميه يحكمه الشرع.. و خاصة في امور الزواج و الطلاق و لهالسبب انا ما اقدر انصحج بأي شي بهالخصوص... هو بيكون عارف شو بالضبط اللي لازم يسويه... و هو راح يفسرها لج افضل مني.. خليه يراويج بنود القانون و الماده اللي يستند عليها.. كلما قريتي في قضيتج كلما فهمتي اكثر... إذا كان من المتعارف عليه في دولتكم ان البنت في فترة العقد تطلع و تسافر مع زوجها قبل حفل الزفاف فابصمي بالمليون ان الشباب حاطين في بالهم ان صارت خلوه و امور خاصه و لكن بدون الدخول... فما اظن ان كتابة هذا الشي في عقد الزواج راح يغير عليج شي... ما في اي فايده من الندم حاليا.. فانسي موضوعه خلاص... سالفة نصحناج و قلنا لج ما لها اي محل من الإعراب و ما راح تفيدج في شي... فليش البكاء على اللبن المسكوب؟؟؟ انت اللي عليج تشوفين قدام حاليا و تشوفين شو اللي لازم تسوينه علشان حياتج المستقبليه.... و اعتبري انج خذتي درس من اللي صار انج تدرسين اي خطوه كبيره في حياتج دراسه شامله قبل الإقدام عليها... إذا ما كنتي راغبه في التواصل المستمر مع زوجج... فلا تردين بشكل مستمر عليه... و إذا حاول يستظرف في الكلام (اظن فهمتي قصدي) سكري الخط على طول بدون ما تقولين مع السلامه و افصلي البطاريه.... خليه يظن ان البطاريه فضت... بس لا تأكدين الكلام علشان ما تكتب كذبه عليج.... |
مواقع النشر |
أدوات الموضوع | |
انواع عرض الموضوع | |
ضوابط المشاركة |
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك
BB code متاحة
الابتسامات متاحة
كود [IMG] متاحة
كود HTML معطلة
|