السلام عليكم ... عمري 25 وحياتي مستقرة مع زوجي وعلاقتي جميلة مع اهله


لكن من رمضان صاروا يجيبون اخت زوجي الصغرى -8 سنوات- لبيتي عشان يصلون التراويح ..

المشكلة ما اقدر انا اصلي التراويح ! يروح وقتي الاحق فيهم بنتي - سنة - واخت زوجي

الموضوع جدا محزنني انهم يتعبدون ويصلون ويدعون بينما انا محرومة من هالشيء عشان الاحق ببنتهم ؟! رمضان مرة بالسنة وانا ما ادري ربي يكتب لي عمر برمضان الجاي او لا

اول يوم انا هليت ورحبت فيها وحاولت ابسطها لانها طفلة وضيفة .. بس مادريت الموضوع بيصير يومي !!!

عشان تكونون بالصورة بيتي شقة بالدور الثالث بعمارتهم .. يعني متى مابغت جت

طبعا اللي مضايقني ما احد دق من اهل زوجي يستأذنني بمجيء البنت ؟!! كذا فجاة جت وبجلس عندك !


امس صار موقف ضيق صدري مررة .. اتصلت ام زوجي تطلب بنتي بعد الفطور وبلغتها يرجعونها لي ع الاذان لان عندي موعد مستشفى ..

الحاصل لما اذن جابوا لي بنتي ومعها اخت زوجي ههههههه !!!! واخذتهم اثنيناتهم بالسيارة لحد ما انتهى موعدي !

(((( مع العلم عند زيارات ام زوجي تترك البنت عند الخادمة لوحدهم بالمنزل عادي جدا وبشكل يومي ، لكن وقت الصلاة تجيبها عندي !!!! ))))

والعشر جاية .. واكيد بتجي بالتراويح وبالقيام واكيد بيروح وقتي الناس تدعي وتبكي بالمساجد وانا ماسكة البزارين الاحق فيهم !


للتوضيح .. بنتي صغيرة واحطها بكرسي الاكل واشغل التلفاز لها وقت التراويح كاملة واصير جمبعا انا اصلي .. لكن عادة والاغلب يكون وقت قيلولتها وقت التراويح

بس من صارت تجي اخت زوجي صاروا يبون اكل وبعد الاكل انظف وراهم ويفتحون الابواب وداخلين المطبخ وغرفة الكوي والدرج ولازم احد كبير ينتبه لهم مستحيل اصلي واتركهم !
ومستحيل اخاصم اخت زوجي مهما كان طفلة صغيرة ..

النهار كله يروح وقتي بالمطبخ ... وبالليل زي ما انتوا شايفين !

انا ضايق صدري بس ع رمضان يروح وانا ماسويت شيء يذكر مقهورة ان اهل زوجي بالمسجد وانا بالبيت الاحق الاطفال! ولا احد يقول اجر ..
عمره ماكان الجلوس مثل الصلاة .

وبصراحة مضيق صدري موضوع ليه ما استأذنوا ع الاقل ؟ او قالوا ع الاقل شكرا !

لا كانو واجب عندي اسويه !


بخصوص ردة فعل زوجي فهو اول من يفتح لها ويهلي فيها ويرحب .. دقيقتين وهو رايح يصلي

يعني بالاخير انا اللي ابلش .


قبل شوي قلت بتناقش معاه مايصير تجي اخته يوميا ويضيع وقتي ع الفاضي خصوصا بالعشر الاواخر .. اول مافتحت الموضوع رفع صوته علي وانتهيت الحوار ورحت لغرفتي جالسة اكتب لكم ..

اي ماقلت علاقتي حلوة معاهم واخدمهم كثيير واهلي وصديقاتي ملاحظين هذا الشيء .. ودايما ارحب فيهم ولما اروحلهم غالبا اجيب معاي طبق وحتى لو رحت اشتغل وكذا يعني مو ضيفة

واخت زوجي الصغرى عادي انا كم مرة اقولها ترقى معي واحيانا اذا طلبوا بنتي اقولهم خلوها تصعد عندي تنبسط مع بنتي


بس برمضان؟ صعبة والله .


اليوم ابوي جاي للرياض ان شاءالله وماشي بنفس اليوم الليل ..
وبلغت زوجي احتمال اسافر لاهلي لكن صعّب علي الموضوع اتركه واروح ، فكنسلت الفكرة.. الحين جديا افكر اروح لاهلي ع الاقل الاقي وقت اتعبد فيه ..حتى لو مالقيت اكسب اجر بامي وابوي افضل من ملاحق البزران !


ايش رايكم بالموضوع؟

ملاحظة : بعد التراويح غالبا يازيارة يا طلعة تجهيز العيد او تجهيز فطور بكره من لف سمبوسة وغيره .. يعني وقتي مو ع كيفي .


المشكلة هي :
1- كيف اقنع زوجي عشان يتواصل مع اهله بخصوص اني انا بهالوقت اكون اصلي ومو فاضية حق استقبال .
2- لو ما اقتنع زوجي ، سفري لبيت اهلي اليوم يكون اجباري او ودي ؟
3- كيف افتح موضوع سفري لأهلي مع زوجي ؟
4- لو ماصار فيه ردة فعل اليوم .. كيف استقبل اخته لو جت ؟

وشكرا جزيلا .

ليش ما تروح البنت تصلي في المسجد ؟!
8سنوات فاهمة وتوقف في الصف بسهولة وتصلي بدون أي اشكال

__________________
الحمدلله الذي بنعمته تتم الصالحات

السنوات الماضية كانت تروح لكن يبدو انها اعجبتها الجلسة عندي اكثر من المسجد

يتضح لي ان زوجي زعلان عموما الجملة اليتيمة اللي قلتها عشان افتح معاه الموضوع هو انه غريبة كلمت امك اليوم بلغتها عندي وموعد وتجيب لي اختك ؟ - باسلوب حلو طبعا-رد علي ينافخ انه اكيد نست الواحد ما ينسى

طبعا قلت هالجملة لان جاء ع بالي انو ام زوجي ماعندها خبر بقدوم بنتها لي فور خروجها للمسجد ، كنت انتظر تأكيد أو نفي لفكرتي .. لكن بسم الله علي تهزأت قبل اكمل الفكرة هههههههه

تعديل :

زوجي طلع فعلا زعلان وعطاني ظهره ونام بدون تصبحين ع خير او اي شيء

قولي لام زوجك ابغى اروح اصلي معاكم

ما اقدر اروح للن عندي طفلة صغيرة .. زي ماقلت بنتي انومها واتفضى للصلاة لكن طالما اخت زوجي موجودة فمستحيل تنام بنتي ينبسطون اثنيناتهم وانا الضحية

ههههههه أعذريني يا أختي مدري ليه ضحكني موضوعك مو تقليل من شأن من مشكلتك بس تخيلت شكل البزر اللي كل يوم رازة وجهها عندكم ..

طيب ليه ماتنومي بنتك قبل ماتجي عمتها الصغيرة يعني من يوم يأذن حاولي تنوميها ثم خليها بغرفة نومك وإذا جات هايدي الصغيرة خليها ع التي في ولا تجيب آيبادها وتجلس لين أهلها يجوون وانتي صلي .

إذا بنتك ما نامت حطيهم معك بغرفة وقفلي الباب بالمفتاح وصلي وخليهم يحوسون حولك . ومافيه مثل الآيباد يشغل بنتك وهايدي 😅

__________________
فقدتك يا بعد عمري وحبي وأطهر أشواقي، فقدت أيام ما ترجع فقدت البيت واللمة، رحلتي بالفرح كله وبعدك مابقى باقي، وتركتي وحشة الذكرى تجر الروح يا يمه، يا أغلى قلب ودعني ومثله صعب أنا ألاقي، يا أروع من عن الدنيا رحل وأطهر ثرى ضمه ..💔

الا تعلمي انك اذا ساعدتي ام ومسكتي طفلتها يحسب الله لك من الاجر ............احتسبي الاجر في انك ساعدتيهم باداء صلاه التراويح
انتي كسبانه

نصيحه لا تضيعين رمضان وأنتي مو ملزومه فيها

زوري أهلك وتفرغي للعباده



الكل يقول لنا أنا وزوجي أستمتعو لاحقين على المسؤوليه والتعب وأنا أحب الأطفال


وفهمت قصدهم من موضوعك

عفوًا ، لكن ع أي أساس أفتيتِ بأن لي أجرًا ؟
قلت بالموضوع أن أم زوجي رايحة رايحة سواءً بنتها عندي أو عند خادمتهم ماتفرق معاها . لكن تجي عمدي لأنها تستمتع أكثر ببيتي !

هذا أولاً ، ثانيًا " منطقيًا " تحسين الصلاة والدعاء والقنوت بشهر رمضان واحتمالية ليلة القدر والتي هي خير من ألف شهر ودعاءها مستجاب ان شاءالله مثل لما أسكر علي بغرفة مع بزارين ؟؟

شوية منطقية الله يرضى عليك ..