السلام عليكم
عندي موضوع ما قدرت ارد عليه بسبب الاعلانات
المهم
دايم اقرا تذمر النساء ليه المجتمع يلوم الحرمة اذا تطلقت و اذا تزوجت
و الرجال يتزوج و يطلق و عادي
اكتشفت ان اكثر من يتكلم
من يرغي
من ينتقد
من يسب
من يلووووم
بجميع المصطلحات
هم النساء و النساء فقط
الرجال ممكن يتكلم بس ما يقارن اطلاقا بانتقادات النساء اللاذعة و لا حول و لا قوة الا بالله
تخيلوا قبل مدة تطلقت مشهورة و تزوجت
يا قاموا عليها الحريم
ليه تتزوج
عندها عيال ( طفلين ) فقط
عجوز ( عمرها 30 فقط )
وش يبي فيها ليه ما اخذ اختها اللي توها متخرجة
و كلام يشيب له الرأس
ليه كذا احنا يا معشر النساء😅
بينما الرجال لو تزوج عززوا له الرجال و قالوا له الله يوفقك
خلاصة القول الاستنكار يبدأ وينتهي من عندنا نحن النساء
وهذا شي ملاحظ حتى في المجالس مش السوشال ميديا فقط
فهل فعلا المرأة عدوة المرأة؟

موضوعك يا استنكار سيتعرض للاستنكار من قبل شلة المستنكرات هنا

ترى محتوى موضوعك ماله علاقة بالعنوان
أونقدر نقول العنوان واسع و شامل لأشياء كثيرة
وإنتِ علقتي على موضوع الزواج و الطلاق فقط .

أنا أشوف فعلا إنه المجتمع ذكوري في اشياء كثيرة
للرجل فرص كثيرة ومجالات كثيرة و أبواب مفتوحة وأخطاؤه مغفورة مسبقا.
أما المرأة فالعكس لها فرص قليلة ومجالات محدودة و أخطائها مهما كانت مصائب و كوارث
غير الضغط اللي عليها من الأهل و من المجتمع.

كمثال بسيط : باخذ المثال اللي حطيتيه عن الزواج لكن بصيغه بشكل آخر
الرجل هو نفسه يشوف البنت لو وصلت ل 30 وماتزوجت كبيرة وعجوز وعانس
أما هو مايشوف نفسه لو وصل ل 30 كبير وعجوز و عانس : )
البنت للأسف من هي صغيره حط المجتمع في بالها لو وصلت لعمر معين و ماتزوجت بتكون في نظر المجتمع عانس ,أما الولد عمره ما كانت هذي الفكرة في باله أبدا , شايف نفسه دائما شباب : )

ترى هذي نظرة المجتمع الذكوري للبنت اللي وصلت لل 30
هي نظرة أنحطت في عقلنا الباطن من احنا صغار لذلك تشوفي
حتى البنات بنفسهم لهم نفس النظرة .

من ينظر للبنت انها عانس اذا وصلت 30 او حتى 25
النساء نفسهم
حتى هم ما يبون يخطبون لولدهم وحدة كبيرة
من يكثر هرجه اذا تطلقت الحرمة ؟ النساء نفسهم
اذا تزوجت المطلقة مايقولون الحريم ليه تتزوج المفروض قعدت على عيالها
لكن بالله عليك لو يتزوج شاب وحدة مطلقة ما يستغربون النساء عندنا و يقولون البنات واجد
؟
انا مجرد حديث و تعليق حاك في خاطري و قلت اطلعه 😅
و المرأة في مجتمعنا معززة مكرمة

المجتمع الذكوري هو اللي غرس فيهم هذي النظرة
هو اللي أعطى الرجال الضوء الاخضر لما قال الرجال مايعيبه شي
تلاقيه يخربط إلين مايشبع و بعدين يروح يتزوج ويتشرط إنها تكون على خلق ودين
المجتمع الذكوري هو اللي يقول ظل راجل و لا ظل حيطة
( و إن كان المثل مصري لكن كل المجتمعات تقريبا تطبقه)
المجتمع الذكوري هو اللي يجبر المرأة تصبر على إهانات زوجها
عشان لو تطلقت مين راح ياخذها !!!
اما الرجل يطلق من هنا و يتزوج من هنا !!!
المجتمع الذكوري هو اللي يكبر أخطاء البنت و الولد بكره يكبر و يعقل .
المجتمع الذكوري هو اللي يقول للبنت عيب تسوي كذا عيب تقولي كذا
عيب عيب .. حتى لو كان في نظر الشرع عادي و من حقها
لكن المجتمع له كلام ثاني .. هذا الممنوعات .. ممنوع تروح وممنوع تقابل مدري مين
وممنوع وممنوع وممنوع .. و روحي شوفي موضوع الاخ اللي يقول يخلي زوجته
تقابل صديقاتها في الكوفي ، شوفي الردود كيف !!
في المقابل الرجال عادي يقابل اصحابه في اي مكان ، هو حر و له كل الصلاحيات
ومحد يقوله ممنوع مايصير ولا عيب و لا خطأ.. ولانخاف عليك !!! : )
طيب ليش كذا ؟!
الكوفي اللي تكلم عنه صاحب الموضوع ، مرقص مثلا !!

عموما هذا هو المجتمع الذكوري بإختصار شديد

الرجل ان اخطاء عرف بخطاءه عند الناس ويعرف فلان مين ومين
لكن البنت اذا اخطات جابت العار لعائلتها إن عرفت
تخيلي انا كرجل وتعبان في تربيه بناتي طول عمري تجي وحدة منهن تجيب لي العار؟ ماذنبي؟ وكل التعب اللي اتعبه طول حياتي وين راح. لهذا يحصل تضييق على البنت
واﻻن مع اﻻنفتاح جالسين نشوف "مقاطع غير اخلاقيه" لبنات وﻻ همهم احد وبعدها تبي تتوب وتغش زوجها بحجة ان العيال كلهم يذهبون الى مراقص والخ وهي غلطتها بسيطة
تدرين ليه الرجال مايحبون جمعات البنات؟
ﻻن اغلبكم كلمه توديها وتجيبها
كم من بيت خرب او مشكلة حصلت بعد جمعه في كوفي او مناسبه؟

المقاطع اللاأخلاقية اللي تشوفوها من البنات بسبب التضييق
لو لاقت البنت التفهم و الثقة والحرية وماتحس نفسها مقيدة ماراح تعمل هذي
التصرفات المخزية.

وبالنسبة للسبب اللي يخليكم ماتحبوا جمعات البنات
فالبنات مو مثل بعض
مثل ما الرجال مو مثل بعض
فيه اللي عقلها صغير كلمة توديها وكلمة تجيبها
و فيه اللي عقلها كبير ما تتأثر
وطبعا تعامل الرجل معها له دور ، لو كان متفهم و مرن معها وعطوف ومريحها
و مايقصر عليها بشي ومعطيها الثقة بيصير مستودع أسرارها وبيعرف عنها كل شي
وحتى أهلها مايقدروا يأثروا عليها ما بال صديقاتها !

وش دخل المثال اللي قلتيه بأن المجتمع ذكوري اولا🤔 واصلا ليه الرجال يقهرون لما نقول لهم أن المجتمع ذكوري مهو ذكوري فعلا الأعمى و الأخرس و الميت يحس ،،، الدنيا كلها لهم نسيتو سالفة عمل المرأة أو قيادتها للسيارة أو ماشابه كيف نظرتهم للمرأة و تحكمهم و فرحهم بالمنع اللي كان زمان ،،، المرأة ترى تقرقر كثير هذا السبب اللي تحسي أن المرأة عدوة المرأة و ألا فيه رجال فيهم بلااااوي و نظرة دونية للمرأة،،، لكن مالهم خلق يتكلمو في مواقع التواصل عن كذا لأن التعبير عندهم فيه نظر لكن تلاقيهم تحت صورة بنت جميلة يطبع الكلام الخادش و نظرتهم للمرأة ،،، بس لازلت اذكر اول ما قرأت كلمة مستعملة تعبيرا عن المرأة المطلقة كتبها رجال و انها تنفع زوجة ثانية مو أولى هذه الكلمة وحدها تكفي لجمال ذكورية المجتمع و اذكر جدا مواضيع من نفس التفكير و الله قرأت مواضيع تشابه فكرة ما فائدة المرأة و موضوع المرأة خلقت للرجل ومتعته المرأة حية و غبية و الكثير

__________________

بالضبط يا مسز داني
انا كمان سمعت كلمة مستعملة في الواقع
وسمعتها من رجل يقولها لإمرأة مطلقة عرضها عليه إخوته ..

هو مجتمع ذكوري بشكل جدا واضح
ومن لا يرى ذلك إما هو أعمى أو يعيش في صندوق : )

استنكار كل الي قلتيه يدل على انه مجتمع ذكوري فعلا
من جعله ذكوري الرجال والنساء
الرجل تدعمه المراه و الرجل
والمراه يحاربها الرجل و المراه
لذلك هو بالنتيجه مجتمع ذكوري بين رجال يستهينون بالمراه ونساء يقسدون الرجل على حساب المراه
نعم مجتمع ذكوري
من جعله ذكوري النساء و الرجال