السلام عليكم ورحمة الله وبركاته..
عساكم بخير جميعا...

جايتكم اليوم وكلي ألم وحزن
حاسه بقهر لايعلمه إلا الله
اتمنى منكم الدعوات والتوجيه..

قبل كذا بمواضيعي تكلمت عن وضعي
وان زوجي يطول بغيبته وبالفتره الاخيره
صار يجلس عندي بس خمس ايام
وعند زوجته الاولى شهر ونص
تخيلوا كيف راح تكون النفسيه...تحت الصفر
يتعذر بظروفه مو قادر يصرف عليا انا واطفالي..
كيف أجل يصرف عليها وعلى عيالها واخوانها مسكنهم ببيته
من شدة تعبي النفسي اليوم قبل لايمشي
كلمته طلبت منه يراعي مشاعري
واني تعبت نفسيا من هالوضع مااقدر أتحمله
يرد علي باستحقار وباستهزاء
مافيه اي احترام او يعطيني ظهره ويقوم
او يغير الموضوع
اخر شي قلتله
لو مانت راضي تعطيني اذنك وتفهمني
اسفه راح تخليني اظطر ادخل ابوي بالموضوع
قال خير ان شاء الله تركني ونام
ثاني يوم سألته
كم محتاج فلوس عشان تجلس زياده خمس أيام
قال ألف ريال
قلتله معاي خذها واجلس قال طيب بجلس اربع ايام
سكت وطلع عنده شغل ورجع البيت
واحد ثاني وانا مستمره بسكوتي
بعد ماتغدى قال والله مدري امشي او اجلس
قلتله براحتك اللي تبي تسويه بكيفك
مع اني قلتلك الألف معاي بس انا عارفه الموضوع مو فلوس
قال لاتتفلسفين علي
جلست ألعب عيالي وسكت منه..
بنفس اللحظه قام يلم ملابسه دخلت عنده طلبت منه
يجلس لو يومين زياده
قال بينزل راتبه بكرا او بعده قلتله طيب تمام اجلس
وان نزل الراتب بيكون معاك فلوس
عطاني ظهره يقول ان شاء الله ويشيل ملابسه
قلتله انا اتكلم معاك قال ماتفهمين ولابتفهمين
وكلامي ع الفاضي
قلتله كلامي منطقي جلست بس خمس ايام
اجلس كمان يومين وقلتلك لو ع الفلوس معاي
وانت تقول راتبك بينزل قال افرضي مانزل الراتب قلتله مو مشكله وقتها انت معذور
وليش اصلا تتشاءم
قلب وجهه وسكت اتكلم معاه كمان طنشني
تركته ورحت اتصلت ع ابوي قلتله ترى زوجي ماشي وتعال عندي
نزل الوالد يوم شاف ابوي انصدم
دخل الغرفه يضبط اغراضه وترك ابوي ينتظره
بعدها جا جلس بدون احترام لوالدي طريقته مرا مافيها احترام
ابوي قاله ماشي توك جاي
انا ملاحظ الفترات الاخيره تمشي بسرعه عيالك محتاجينك الله يهديك
قال والله كل انسان وله ظروفه
ابوي مسكين ساااكت رد عليه زوجي
وكلامي أقوله قدامها وهي تسمع
لو بتصبر حياها ماتبغى
بسلامتها ومن بكرا اجيب ورقتها والعيال لو مابتتحملهم
اشيلهم اربيهم مع اخوانهم
ابوي انفجع قاله ليش انت ناشف وقاسي كذا
انا جاي استفسر منك ايش السالفه تقوم تجيب سيرة طلاق
قاله هذا كلامي ورجع يعيده
وقال البيت مو مرتاح فيه من يوم سكنته مادخلني ريال
طبعا =كذبه
قلتله لو البيت مو عاجبك انقلني بيت ثاني
مالي ذنب تحطني ببيت وتتركني قال ايش قال متضايق
واجلس انا معلقه عند اهلي بالشهر وزياده
قال ماجتني فلوس عشان انقلك=كذبه ثانيه
قال ابوي انا نفسيتي تعبانه ياعم وصحتي ماتتحمل
اي كلام زياده وحتى هيا شوفها تعبت نفسيتها
قاله ابوي نفسيتها لانك مو عندها
جالسه عند اهلها دايما
انت واجب عليك توازن بين الحرمتين
ترى مو زين هالشي
قال لابوي ماني مجبور اجلس وانا ماعندي
====الكذبه انه بينزل راتبه وانا قلتله خذ ألف ريال مني
ورفض
بعد هالموقف هل راح يكون صدق يبيني
بعد ماطلع ابوي
قلتله كلمة طلاق وتهديدك فيها
ترى نفسيتي ماتتحملها ويعتبرها اخر مرا تكررها علي
والله لو جبت سيرتها بعد كذا
مااجلس لك يوم زياده عطاني ظهره
شال اغراضه مشي بدون مايسلم
حتى على عياله..

ياناس مو قادره استوعب
انا صابره لي قريب السنه على هالوضع بالشهر يجي ست ايام اوخمس ويمشي
وكتبت موضوع قبل كذا أنه قرر لي اسبوع وهناك شهر
قال كذا العدل والحين يكذب يرميها بالفلوس
ويقولي لو ماعندي شغل ماراح اجي إلا عشان اشغالي
ونصحتوني وقتها ادخل اهلي ضروووري
لانه تمادى ومو راضي يضبط اي شي
هذا انا دخلت ابوي لحاله لسى ماجو اخواني
وسمع ابوي كلام زي الزفت
واهانني بتهديده اللي دايم اسمعه
كل زوجين يصير بينهم زعل ومشاكل
زوجي لو بنفسيتي اي شي افضفض له
يقطع كلامي يقول مو عاجبك روحي لأهلك
يبي يفتك من المسؤوليه..
وماهمه العيال..
تعبت جدا والله
والحين مسافر عندها مستحيل اتصل فيه
لو بس شاف اتصالي بيعتبرني خفت من الطلاق
واني غلطانه باللي سويته
يوم دخلت ابوي بالموضوع.مع اني مااشوفها غلط
وبالعكس ابوي يتكلم بالحسنى وبكل ادب
بس هوا اللي يستحقر كل شي
ويبي كل شي على مزاجه بدون اي اعتراض من احد

طريقته واسلوبه قبل لايمشي ووقت التفاهم مع ابوي
حتى ماتنازل واعترف بتقصيره ولاأعتذر حتى
حسستني أنه يدور الطلاق بأي طريقه
وبايعني
هل الزوجين كذا يصير بينهم او زوجي بجد بايعني
مو عارفه الحين ناوي على ايش
واصلا ماعاد يهمني وش اللي ممكن يصير

‎‏ تم تغير العنوان ليتناسب مع المحتوى

مو حارقني غير عيالي
محرومين من ابوهم وبدون استقرار نفسي
وحتى ابني أبيه يدخله روضه
قال ماعندي فلوس ولاحق ع الدراسه
كل شي يخصني مهمله

اظن الاخت ابتسامة هي الزوجة الثانية
زوجك مو قد التعدد
وانت عزيزتي ان كنت لا تريدين الطلاق لا تظغطين عليه لانه اما خايف من ام العيال او انه تورط في هذا الزواج
فنصيحتي لك لا تشحذينه حقوقك ان لم يقدمها بطيب نفس ايش لي تدفعين له عشاق يبقى يومين زيادة وهو يرفض
خليك منه ولا تكلمينه حتى يدق عليك
لانه يظهر انه مضغوط كثير
واهتمي بنفسك واولادك ولما يجي عندك وتقبلي وضعك وقللي من الشكوى واجعلي بيتك جنة وخليه يتعلق باولاده لانهم سلاحك الاقوى
هذا ان كنت لا تريدين الطلاق
اما ان تعبت ونفسيتك تاثرت فاستخيري في امرك
لانه في الوقت الحالي يبدو انه لن يتغير
والله يدلك للخير ويريح بالك

ياعمري انتي
شكلك ماقريتي موضوعي تمام ماركزتي
اني ازعل من سيرة الطلاق
واللي جابها هو مو أنا
دائما تخطر على باله
انا ماتجي ببالي ومراعيه انا فيه عيال..
وعلى فكره انا الزوجه الثانيه

مكالمة وحده لاترفعين الجوال عليه ابد ابد .... بس في حالة الاولاد بيكلمونه ومش دائما ... الامر الاخر ارخصتي نفسك كثير ايش اللي ادفعلك وتجلس عندي ... بايعة نفسك انت .. والرجال مايحبون ابد هذا النوع .... لاتنزلين نفسك وخليك قويه بشخصيتك ...بتجلس هذا بيتك ...بتروح مع الف سلامة... عيشي حياتك انت واولادك ... بيرجع لك بس بالتغلي منك مو برمي نفسك عليه .... الوقت اللي قبل يجي عندك ...جهزي كل الاطباق اللي تفتح النفس وحطيهم بالثلاجة ... بحيث تكونين فاضية له .... ولعلمك عندي صحبات كثير وهم ماعند ازواجهم الا زوجة وحده يمكن ماتشوفه الا بالاسبوع مره ... مثل حالتك وكثير بسبب عمل ازواجهم... اعتبريه بعمل بشغل وشهر وينتهي ... ومع مرور الايام بيشتاقلك ويجي من نفسه .... ماراح اقسى عليك لو انا مكان زوجك طبيعي ببنفر ومااحب اي شخص يتلزق فيني ....

قال رسول الله صلى الله عليه وسلم: من كانت له امرأتان يميل لإحداهما على الأخرى جاء يوم القيامة وأحد شقيه ساقط . وفي رواية: يجر أحد شقيه ساقطًا أو مائلاً أخرجه الإمام أحمد في (المسند) ج 2، ص 295، 347، 471، وأخرج النسائي وابن ماجه في سننهما نحوه.
وعن أبي هريرة رضي الله عنه، عن النبي صلى الله عليه وسلم قال: من كانت له امرأتان فمال إلى إحداهما جاء يوم القيامة وشقه مائل أخرجه أبو داود في سننه ج 2، ص 601، وأخرج الترمذي في (الجامع) نحوه.
وفي هذه الأدلة دليل على توكيد وجوب العدل بين الضرائر،

__________________
سبحان الله وبحمده سبحان الله العظيم

بس من قريت مواضيعك ....زوجك بايع ويبيها تجي منك

دخول والدك في الموضوع نرفز زوجك وخلاه يرد هذا الرد القاسي
صحيح ما نبرر له هذا الرد مهمى كان هذا عمه واحترامه واجب ..
اتمنى انك ما تكونين من النوع اللحوح اللي على الطالعه والنازله تطلبين العدل في المبيت منه ..
ترا قليل اللي يعدولون بين الزوجات في التعدد ..
غالبا اذا كان من نفسه يميل للزوجه الثانيه ... اما اذا كان عشان يقهر الاولى فتره قصيره ويرجع لها ..
الله سبحانه وتعالى يقول ولن تستطيعوا ان تعدلوا بين النساء ولو حرصتهم ..
يعني العدل مو انه اذا جلست معك شهر يعني اجباري اجلس معاها شهر بالدقيقه والثواني
ممكن يزيد يوم ينقص يوم .. خليكم مرنين ..
خصوصا انكم في مكانين مختلفين يعني مو بيت واحد ..
فهذا الشي قبل لا يتزوج شي متوقع .. لانه المشاوير بروحها تخرب النفسيه
اضيفي الى ذلك مصاريف اسرتين مو اسره وحده ..
الله يعينكم ويصلح حالكم ..
حاولي ما ادخلي اهلك في مواضيعكم الا اذا وصلتوا الى طريق مسدود ..

انا فقط قرات هالموضوع ماكان واضح انك الزوجة الثانية
لكن كلامي نفسه , وارجع اقول لك انه مقصر قلبا وقالبا
ومو من حقه انه يحدد , الحق انه ينصف قد مايقدر
وانتم بينكم اطفال يعني ماكانت نزوه وقت وخلاص
المفروض يكون قدها ,
حاليا مالك الا الصبر لان أي كلام بينكم بيكون ضايع ومارح يسمعه
لكن لابد من التفاهم ماينفع تستسلمي عالوضع
لكن الحين مااتوقع ينفع معه لا كلام ولا تفاهم لان راسه راكبه وطفشان
اصبري عليه واذا حسيتي بوقت هو رايق وهادىء والامور مستتبه بينكم
لازم تكلمينه , ودخول ابوك بالموضوع يبدو انه مااعجبه فا الافضل انك ما تدخلين الاهل بينكم
حاولي تحلينها بينكم , الامر يحتاج الى صبر والله يعينك ويصبرك صراحه موقف يقهر
هالوقت ادعي واستخيري وتصدقي لعلها تتيسر من عنده