لماذا اصبح الغضب يسيطر على تصرفاتنا
السلام عليكم ورحمة الله وبركاته
صراحة انا واااايد مضااايقه وبدش في الموضوع على طول والله اني منصدمه ما احس انه المشكله صايره بيني وبين وحده عمرها قريب ال 33 احس اني انا وهي يهال عمرنا 12 سنه والا اقل
بحكم غربتي مع زوجي تعرفت على بنات وصرنا مثل مايقولون شله وحده ومن فتره دخلت معانا بنت يديده وانا كنت اكثر وحده متحمسه معاها - وللعلم بالشي انا الوحيده منهم اللي متزوجه - بس الشهاده لله البنات طيبات وخايفات ربهم
المهم كانت البنت من نفس بلادي وكانت صج معوره قلبي لانها كانت تقول انها يات هني ومحد معاها وفي اكثر من بنات قالوا لها جي احنا مانبيج تكونين معانا واللي كانوا متزوجات وقالوا لها مانبيج لانج بنت فيعني البنت كانت صج متضايقه
اللي صار انه دخلناها في شلتنا وصارت وحده منا والله يعلم كنا نعزها ومانطلع الا يوم نقول لها مع انه هي مب في نفس عمارتنا
المهم هي في الفتره الاخيره صارت مع بنت في الشله اكثر مني وانا قلت حقها مسكينه يعني انا متزوجه واكيد سوالفي سخيفه وماتناسبها مع اني اتجنب اني اسولف معاها في هالسوالف بس قلت عادي شالمشكله هي مرتاحه مع هالبنت تكون معاها وايد
المهم البنت اللي هي وايد معاها سافرت دوره فالبنت الجديده مادري اش صار فيها هي حاسه انه احنا بنطلعها من الشله ليش مادري مع انه الله العالم محد حسسها بهالاحساس وكانت مسويه حفلة نجاحها رحنا لها وشلنا لها الحفله ووجبناها بهدايا محترمه
عقب هي انشغلت واحنا اتشغلنا وماصارت بينا اتصالات كلمتها وحده من بنات الشله وردت عليها بزعل وانه هي وايد متضايقه وتدري انه احنا نبي نطلعها من الشله قالت لها صديقتي من قال لج هالكلام والله محد يا ف باله هالشي
والله انا ماكنت حاطه في بالي ولا هالكبير انها بتزعل المهم قمت انا وقلت لا والله مايصير تزعل وهي اكيد مسكينه مع ضغط الشغل حست انه احنا متخلين عنها
قمت اتصل واتصل لها ماترد اطرش لها مسجات يا بنت الحلال ردي ردي ماترد كللللللللش الا اكلم رفيجتي اللي رايحه دوره وسالتها كلمتج فلانه قالت اي توها مطرشه لي مسج تقول لي انها شرت لي هديه شي كان خاطري فيه
والله انا مب زعلانه على الهديه والا انها شرت لها والا شي لا والله بس انا تضايقت هني انه في نفس الوقت اللي انا حارقه تليفونها بالاتصالات هي مطنشتني وتروح تطرش مسجات حق رفيجتي اللي برع
المهم قلت حق رفيجتي اللي فالدوره قولي حق فلانه ترى الزعل مايسوى واحنا مب يهال ولو هي زعلانه خل اتكلمني وانا براضيها وبعرف منها شالموضوع مب تطنش
بعد ماردت
والله من كثر ما انا افكر ومتضايقة من هالموضوع كان الفجر وقمت طرشت لها هالمسج
صباح الخير سوري على الازعاج في هالوقت عرفت انج زعلانه وشاله في خاطرج عشان كنا قاطعينج والله اني مب قادره ارقد من كثر ما افكر فيج
انتي صرتي اخت عزيزه وغاليه والله يشهد بهالشي
يعني حتى لو انشغلنا فالفتره اللي راحت الله يعلم انه مب بقصد
اسمحي لنا قطعناج في فتره يمكن كنتي محتاجه فيخا خواتج حواليج
وان شاء الله ربي مايجيب زعل بينا
امنتج الكريم
تخيلوا ردت علي اليوم الثاني العصر
مشكوره ------ ماقصرتي على الرسايل الطيبه وبيض الله وجهك ولاتحاتين طاح الحطب بس اسمحي لي انا لما ارجع من البلاد ان شاء الله بكلمك -- هي عندها اجازه من 1-8 لين مادري متى
قلت لها معقوله يعني مابنسلم عليج قبل لا تسافرين
تخيلوا ولاردت علي ولاتبي تكلمني ولا ترد على مسجاتي
انا والله مب فاهمه الموضوع يعني احنا قطعناج انتي قطعتينا ليش الناس صايره جي وجنه يهال
والله انا مب عارفه اشلون اتصرف يعني ردها اني لما برجع بكلمج واااايد ضايقني يعني ما احترمت اني من متى اتصل لها وحرقت تلفونها
ساعات اقول خلاص كيفها انا بعد لما ترد مابي اكلمها وساعات اقول يمكن هي متضايقه بس الحين انا وايد متضاييييقه من تصرفها
احس اني سخيفه وتافهه والموضوع مب محتاج انه بكبر لهالدرجة بس يمكن اللي مضايقني اني كنت اشوفها بنت مؤدبه وناضجه وهالامور يعني ماتزعل الصراحة يعني لو كانت هي تتصل واحنا مانرد ومطنشينها لها حق تزعل
لكن هي كانت تقول انا وايد مشغوله مع الدوام وهي دايما يوم عندها شغل تقول لا تتصلون فيني
اسمحوا لي طولت عليكم وعورت راسكم بمشكلتي اللي يمكن تشوفونها سخيفه بس يمكن لاني ما احب احد بشيل في خاطره علي
دعواتكم
__________________
يارب فرج كل هموم نساء ورجال المنتدى وارزق كل بنات المنتدى الزوج الصالح ... وارزق من يتمنى الذرية الصالحة .. اللهم آميييين ...
يارب يا رحمن يارحيم يا قادر على كل شي .. يارب فرحني في اختي نايت ... عاجلاً غير اجل ...
يارب نسمع خبر ملكتها على رجل خير طيب صالح فالح يعينون بعض على طاعتك وعبادتك ...