السلام عليكم و رحمة الله و بركاته

بسم الله الرحمن الرحيم

و الحمد لله و الصلاة و السلام على رسول الله

الحمد لله الذي رزقني بعد هذه السنوات
و صدق من قال (إن مع العسر يسرا )

راح احكي قصتي من البداية عسى إن شاء الله تتفائلو و ما تيأسو من المحاولات و يارب يجي رمضان و كلنا حوامل يا قادر يا كريم

أعذروني ما رديت عليكم والله من فرحتي الحمد لله كأني في حلم


في البداية أنا متزوجة من 4 سنوات و الحمد لله

مشكلتي كانت و ما زالت هي وزني الزائد و الذي ما زلت أعاني منه حتى اليوم و لكن الحمد لله خفيت عن أول

لما عدت أول سنه زواج كانت الأمور عادية يعني حتى لو ما صار حمل مو مشكلة مافي تأخير كثير ولا مشاكل الحمد لله

بس لما ما شاء الله أخته الصغيرة اتزوجت بعدي و خلفت قبلي تبارك الله لا قوة الا بالله حسيت من نظرات زوجي للعيال قد ايش هوا مشتاق لهم
و تضحكو عليا لو قلتلكم انه اول سنتين ما كان يهمني احمل ولا لأ

بس مع مرور الوقت ما شاء الله الحوامل في العائلتين في ازدياد ما شاء الله تبارك الله
و كل كم شهر خبر اما وحده أو مجموعه في نفس الوقت

الكل كان على لسان واحد يقول كلام يحبط و يحطم
(انتي متينه ما تحملي الين تنحفي ) هذي اكيد تكيسات و لازم تخسي
أو (انتي تربي بساس البساس يعملو عقم ) حتى القطط اللي في البيوت ما تناسبك
الله اكبر سبحان الذي ارادته فوق كل شيء و الحمد لله على نعمته

و الكل يسأل نفس السؤال الكريييييييييييييه (ها ؟؟ مافي شي في الطريق ؟؟)

أتعذب
و اتقطع و ابكي في قلبي من القهر
ليش ما يتركوني فحالي ؟؟
انا ما طلبت منهم شي و انا و زوجي مبسوطين و هذه خيرة من الله مو ذنب أحد

حاولت أدرس الموضوع و اقلب فيه يمين شمال

قلت المؤمن ربنا سبحانه يحبه عشان كده يبتله
و احنا ربنا ابتلانا بعدم الخلفة 4 سنوات

بس يا ترا هل في طرق انه الواحد يتقرب فيها الى الله و يرضيه
طيب انا ايش ممكن أعمل عشان أقوي ايماني؟؟

في البداية لو تتذكرو اني كتبت موضوع عن حجابي

و اهله قد ايش حاربوني عشان ما اغطي عليهم و عاداتهم ما تسمح و هم زي الاخوان

لكن كيف و الرسول قال (الحمو الموت )ّ!!!

و ما همني ولا احد فيهم و ربنا الحمد له و الشكر أخذ بيدي و ساعدني و ثبتني

المهم غطيت و الحمد لله و ربنا من على زوجي و رزقه بالأرادة القوية و بطل التدخين

و كنت دايما اكثر من الاستغفار و اوصي زوجي بذلك
في كل وقت
استغفر و كلي يقين بأن الله سيرزقني الذرية و يثبتها في رحمي باذن الله
و ليس ذلك على الله ببعيد
قبل شهر و نص كانت عندي التهابات قالقتني و افرازات قلت يا بنت انتي عمرك ما رحتي كشفتي عند دكتورة روحي و شوفي ايش الحل
رحت و الحمد لله و ما كان في التهابات ولا شي بس سألتني كم سؤال عن موضوع الانجاب
الا و هي من غير ما اسألها سبحان الله كتبتلي من نفسها على تحاليل و اشعة
و بعد ما طلعت النتائج قالتلي عندك بس ضعف في التبويض و هذا اللي كان يخلي الدورة تجيني مرتين بالشهر و كتبتلي الكلوميد و الابره و الدافستون
والله يا بنات سبحان الله ما كنت مستغربة سبحان الله و كأني كنت متوقعة هذا الشي و بسرعة بدأت في العلاج

جاني خبر انه سلفتي حملت و هي متزوجة ما كملت سنه
اتصلت فرحانه و باركت لهم و كلي امل بأن الفرج قرييييييييييب و عشان هيا تخينه زيي اتشجعت
فرحت مو بس عشانها
لان قاعدة التخان اللي ما يحملو انكسرت اخيرا و حملت تخينه

بس يومها انا عمري ما بكيت في يوم مثل هذاك اليوم
والله مثل الأطفال الصغار
بصوت عالي و ما ادري ليش
و قضيت الليلة و انا ادعي و استغفر و اغمى عليا من التعب
ما ادري لي كذا حسيت بانكسار
ياربي كلهم حملو
صغار على كبار
نحاف على تخان
طيب و انا ؟؟ أكيد الفرج قريب


و خلصت الدورة و اخذت الابره في موعدها
و في يوم انا و زوجي كنا سهرانين ما فينا نوم و من فجر الجمعه
و نحن بالعادة كل جمعة نكون عند الاهل بمكه
قلتله اش رايك نضرب عصفورين بحجر و نعتمر و بعدين نزور الاهل
قال فكره حلوة
و الحمد لله كله يا بنات سهااااااااااالة و تسهيل من الرحمن الرحيم
و وقت الخطبة دعيت بل و اقسمت على ربي انه يرزقنا الذرية الصالحة أنا و زوجي و كل محروم و انتم يا حبيباتي دعيت ربنا يفرحنا كلنا بالخلف الصالح

و مرت الايام و نسيت الموضوع بس الاستغفار ما تركته على طووووووووووول استغفر الله استغفر الله استغفر الله .....
لحد ما كتبت في احد الردود اني ابغى اعرف الدورة تجي بعد كام يوم من الدافستون ؟؟
اجابات متفاوته و في كل يوم سبحان الله اقول اكيد بكره تنزل و انا حاسة كده
بس سبحان الله ما تنزل
عملت تحليل الحمل المنزل مرتين بس في كل مره استعجل و اعمله في الليل مو في الصباح اول ما اصحى من القلق اللي كنت فيه و يجي الخط باهت

اخرها امس الفجر
ردت حبيبتي كوكار و شجعتني اعمل التحليل
و قلت ان شاء الله بكرة في الصباح

و اليوم

اول ما خرجنا انا و زوجي من البيت رحنا المستوصف القريب
و قالو لسة ما فتح المختبر ارجعو بعد ساعه
يا الله راح اجلس في هذا القلق كمان ساااااااعه
و زوجي قال خلينا نروح نفطر
و رحنا و كان يوم غريب
مومعقول يمكن 10 مطاعم نروحلها و اما ما يعجبنا الاكل و اما مافي فطرور
و اخرتها ولو اني ما احبه بالمرة اكلنا برجر و القلق و الدوارة خلوني اجوووووووووووووووع موت

و جات اللحظة الحاسمة

ها يا دودي نروح البيت ولا المستوصف ؟؟
قلت نروح البيت و اذا كمان يومين ما نزلت احلل
بس قربنا من البيت قلتله خلينا نروح المستوصف انا مو مطمنة
و لما وصلنا هناك قلتله خليك في السيارة و ان ااروح لحالي
و كنت قمة في التوتر
كيف دفعت الفلوس و كيف طلعت و كيف سحبت مني الدم ؟؟؟؟

ما ادري؟؟

من خوفي قلتلها اخذ النتيجة بالتليفون قالتلي لا خليكي 10 دقايق بس

يا الله 10 دقايق والله كثير
و بعد الانتظار

نادتني زي الافلام (مدام دودي )
و انا والله حسيت برعب و خوف و جسمي يرجف و ايديني بااااااااااارده و كاني منومة مغناطيسي رحت و زي اللي عاملة عملة وقفت بهدوووووء على طرف الطاولة و قلت نعم قالت الكلمة اللي انتظرتها سنيييييييييييييييييين
positieve؟؟؟
نعم
اش يعني ؟؟

يعني حامل يا مدام
ايوه ادري حامل بس يمكن مو ورقتي اتأكدي
قالتلي شوفي دا اسمك هنا مكتوب
اشوف فعلا اسمي
الله اكبر
اللهم لك الحمد و الشكر
يمكن 100 مره و انا اقولها لحد ما وصلت السياره و قال اني كنت ابغى امثل على زوجي ما قدرت
دخلت و حطيت الورقة مطوية
قلت مافي شي
و من الانفعال انفجرت بالبكاء و التهليل و التكبير و الشكر
و وقف السيارة و طالع في الورقة و سلم عليا و كان موقف والله و الله اتمناه لكم كلكم قريبا ان شاء الله

و حتى هذي اللحظة و انا حاسة اني احلم

الحمد لله

سبحان مغير الاحوال

و الليلة انا اودع نور عيوني و ونيستي السنين الماضية و كأنها بنتي والله (( قطتي الغالية ))

كل التطعيمات تاخذها في مواعيدها و اكلها دايما نظييييييف و عمرها ما مرظت او نقلتلنا مرض
و عمرها ما خرجت الشارع و دلووووووعه عالاخر و انا و زوجي حولينها اليوم
كأنها حاسة تتمسح فيا تفارقنا انا وزوجي تقطع قلبي والله و البكا خنقني
يا بنات ادري كلامي يضحككم بس والله الفراق صعب و العشرة ما تهون والله اني احبها مووووووووووت بس ما عندي خيار ثاني
الله المستعان
الله يربط على قلبي و يسخرلها ناس يحبوها اكثر من ما انا حبيتها و ترتاح معاهم

و سامحوني قرقرت كتير بس مو بيدي كل اللي على بالي قلته و يمكن ملخبط شوية بس ما حبيت انام بدون ما اطمن عليكم و اطمنكم علي