مساء الخير حبايبي . اعود لكم بعد غياب
وأعطيكم آخر المستجدات . النفسيه
٨٥ في الميه مرتااااح والحمدلله وتقدرون تقولون ١٥ في الميه ذكريات موجعه . وين مااروح هنا وهنا اتذكر ايامنا الحلوه . صحيح كرهتا كره ونزلت من عيني . لكن الحمدلله هي اقدار والله كاتبها ولو فيها خير لأبقاها الله لي . ولكن شاءت الاقدار ان نفترق والحمدلله . يمكن خيره . والخيره فيما اختاره الله ولانقول . إلّا الحمدلله على كل حال
المستجدات هي كالتالي وعندي سؤال
١/اوقفت الواتس مؤقتاً بجوالي الاول وماراح افتح الواتس إلّا بعد زواجي
وأخذت لي رقم ثاني مسجل فيه الواتس واعطيته جميع زملائي واقاربي . وبالنسبه للطليقه وأهلها كلهم محد يعرف رقمي الجديد ابد . وهدفي من الموضوع هو ان افتح صفحه جديده مع نفسي وأبدأ حياتي والماضي ودعته بخيره وشره . وهدفي الاساسي انه ماابغى شيئ قديم يذكرني بالماضي . حذفت صورها . وغيرت شقتي . ومااعطيتهم خبر بشقتي الجديده اللي استأجرتها ولاراح اصلاً اقول لهم وين ساكن . سألني اخوها وابوها وين ساكن . قلت قريب ماني بعيد وفهموها وهي طايره بأن هذا شي خاص فيني .وساكن عزوبي . والحمدلله حذفت كل شي يذكرني بها ومعاد شي ابد يذكرني فيها . سوى الاماكن زي مايقول محمد عبده . وفعلا وين مااروح بعض الاماكن اقسم بالله قلبي يحن . عشرة عمر . لكن كرهي لها ساعدني ان اتخطى ذكرياتها . وتبقى ذكريات موجعه . وسبق وقلت لجميع اقاربي واهلي رجاء لااحد يجيب لي سيرتها قدامي . لان ضروري لازم اسوي لنفسي تحديث والنفسيه لازم تتحدث اذا انا ماوقفت على رجلي وساعدت نفسي ان اتخطى هذا التعثر . فراح ابقى زي ماانا وماراح اتزوج . خلاص الدنيا ماتوقف عشانها . طيحت من كرامتي لعيون اطفالي هذيك الايام . ولاموني كثير من الاعضاء وأنا كأني امشي بطريق ماله نهايه وبدون هدف . خجلت من نفسي . هذيك الايام نحفت . انهلكت . اصبح وجهي اسمر . جالس وحدي مهموم . انقطعت شهيتي . معاد لي نفس . فراق الاطفال كسر ظهر مايعرفه الا من عاش مثلي . وجاء الوقت المناسب وقررت انه الدنيا ماتوقف عشانها . لازلت شباب . والدنيا ماتوقف عشانها . اقسم بالله لو فيها خير لأبقاها الله وجمع بيننا حتى نموت . لكن المسلم يؤمن بالقدر بخيره وشره والحمدلله راضي بما كتبه الله لنا . ويمكن خيره . وحالياً وضعي اصبح بنسبه كبيره مرتاح .وبعد سنه ان شاء الله اعطيكم الاخبار اللي تسركم
٢/ابو الطليقه وأخوها الكبير . قالو اذا جيت تآخذ اطفالك عطنا خبر واحنا نجيبهم من عند امهم وتعال استلمهم من عندنا وقصدهم من بيت ابوها . وقال لي اخوها الكبير بأنه كان بينك وبين اختي علاقه زوجيه وهذا شرع الله ولكن مانبغاك تجي الشقه الجديده حقت زوجها وتستلم اطفالك من عند اختي لان زوجها اشترط بذلك. وقال انت مالك الا اطفالك ولو تبغاني اجيبهم لبيتك او تبغى تستلمهم من عندي ابوي او اجيبهم لك بالمكان اللي يناسبك ولكن ماتجي عند شقت اختي لان كان بينكم علاقه سابقه واللي مضى مضى . قلت له ابيض وجه . انا اهم شي اطفالي ومالي صلاح بأي شي آخر ولايعنيلي شي شقتهم او غيرها . اذا اتصلت بك جهز اطفالي . ولالي تواصل مع الطليقه ابد ابد ولاابغاها تتواصل معي مستقبلاً عشان اطفالي . عندها شي بخصوص اطفالي هي تكلمك وانت رد مني . ومع العلم يااعضاء مصروفهم يمشي شهريا
والولد ١٠ سنوات والبنت ٧ والبنت ٦ وساكنين مع امهم بشقه مستقله وزوجها متزوج الاوله وهي لازالت معاه وعنده خمس اطفال وكل وحده بشقه . واطفالي ابلغوني بان عمهم طيب معاهم . قلت هذا اللي ابيه .وايضا ابلغوني اهل الطليقه ان زوجها ملتزم ويعدل . قلت كل هذا الكلام مايعنيلي شي . ان وصلني خبر انه ضرب اطفالي لأحرقته وهي حي . والحمدلله اطفالي يقولون انه دايم يشتري لهم من البقاله ويلعب معاهم فأنا فرحت بذلك . والحمدلله كلها ان شاء الله سنوات قليله جدا وبآخذ اطفالي
ولاني زعلان . هذي اقدار والحمدلله. ولو شاءت الاقدار ومثلا تزوجت مطلقه وعندها اطفال . راح يكون اول شرطي بأن ابو الاطفال لايجي شقتي ابد . والحق ماينزعل منه
٣/عندي سؤال
اذا جيت اخطب هل تنصحوني اعطي خبر لأهل المخطوبه بأن عندي اطفال وراح اسحبهم بعد ٧ سنوات اذا وصلو سن البلوغ
او تنصحوني اعطيهم خبر بأن عندي اطفال ولكن ماراح اقول لهم اني راح اسحبهم اذا وصلو سن البلوغ . لان في بالي اذا وصلو سن البلوغ اكلم الزوحه الجديده بأسلوب حلو واقول لها بسحب اطفالي وبجيب لهم شغاله واخاف ماتوافق وهذا من حقها
لكن هل تأيدوني اذا جيت اخطب اني اشرط عليهم باني راح اسحب اطفالي اذا وصلو سن البلوغ واذكر هذا الشرط بالعقد
هل تأيدوني . اعطوني ارائكم
26-09-2017, 07:12 PM
ضوابط المشاركة
العرض العادي
