السلام عليكم ورحمة الله وبركاته ..

كيف حالكم جميعاً ، فقدت و الله هالمنتدى بس ماقدر ادخل باستمرار بسبب الشبكة شريحتي زين و ما تدخلني لبعض المواقع

ف اضطر اشحن شريحة سوا و ادخل للضرورة ..

عندي مشكلة صايرة لي ف الدوام , بدايةً
احنا 12 موظفة تحت ادارة المدير للمنطقة اللي احنا فيها رجل و اللي بعده امرأة ..
اللي اعاني منه احدى الموظفات امرأة ناضجة و عندها عيال اكبرهم ف المتوسط
لسانها بذيء جداً جداً ، و تتلفظ و لكن من باب المزح و دائماً احذرها و لكن ما فيه اي فائدة
يعني حتى لو تحاشيت الكلام معها هي تبادر
و اساساً نضطر نجلس ف مكتب واحد لمدة شهر و هكذا ، المهم هالانسانة كانت قريبة جداً لزميلة اخرى
يعني لدرجة الزيارة المنزلية و الخروج معاً صارت بينهم مشكلة , قامت اختنا المعنية ,, بالكلام في شرف البنت شيء كبير جداً
كانت تتكلم عندي و انا بصراحة كنت اصدقها مادري غباء مادري لانها كبيرة و مستبعدة انها تكذب خصوصاً ان انا كنت وقتها 23 سنة ..
كانت تتكلم عندي و انا اسمع و اسكت مو طبعي نقل الكلام بين الموظفات
المهم بعد فترة تفاجأت انها تكلمت عند اغلبية الموظفات تقريباً عن نفس البنت و نفس الكلام!! تشويه سمعة يعني
يعني صار الكل يدري الا المتضررة بالكلام ..
بعدها انخطبت و تزوجت و اخذت اجازة طويلة 7 اشهر تقريباً رجعت و الوضع متغير 180 درجة
اللي رحت و هم مع بعض لقيتهم مفترقين و اللي كانوا ما يطيقون بعض صاروا حبايب
انا بطبعي احب اكون مع الجميع اسلم على الكل اتكلم مع الكل امارس العمل بكل اريحية مع الكل و احب الخير للغير مثل ما احبه لنفسي .
يوم من الايام جاتني الانسانة اللي تمشي بعرض زميلتنا تشتكي عندي من وحدة اخرى زميلة عمل
وعينها مليانة دموع !!
مختصر كلامها ( هالانسانة تسخر من صديقتنا و من ماديتها الصعبة تعلق على لبسها من وين جبتي هالفلوس يعني كلام جارح ، و انها تبغى تسافر معي و انا ما ابغاها )

رديت قلت مانتي مجبورة تسافرين مع احد خلاص روحي انتي و زوجك و تعذري باي شي مو شرط تعلمينا وين رحتي و وين جيتي عشان لاحد يجيك و يقولك بروح معك )

بحكم العمل جلست مع زميلتنا اللي كانت محور حديثنا اليوم الماضي
و قالت فلانة تبغاني اسافر معها بس صار ظرف و مارحت قلت كيف تروحين معها وهي ماتبغاك ؟!
فتحت جوالها وشفتها مرسلة تبيها تسافر معها ، وش خلاها تكذب علي مادري
المهم مرت الايام فجأة صارت مع قروب ثاني من نفس الادارة كانت تكرهم و تذم فيهم و تتكلم في عرضهم
حتى السلام تمر ما تسلم ، فجأة صارت تسلم بل و تنقل الكلام اللي هي كانت تقوله و تقول ان القروب الثاني يقول كذا عنكم !!
متخيلين انتم حجم الفتنة اللي قاعدة تسويها ؟!
تواجهنا معها بحكم انها تقلب الكلام اللي تقولها و تتهم به الاخرين انكرت و جحدت و ذكرتها بكلامها مره تنكر و مره تقول ايه قلت بس كنت زعلانة
و هكذا !
المهم نصحتها قلت لها يا فلانة لا عاد تتكلمين ف شرف احد ترى الدنيا تدور خلي الناس عنك رجاءً
و انا اعتب على نفسي اني ما كنت اتعامل معها من البداية كذا
بس و الله اني كنت صغيرة سن مقارنة بها بيني وبينها 10 سنوات و كنت احترمها مثل امي و ماعرف شي اسمه كذب اي شي ينقال عندي اصدقه
لكن مع مرور السنين اكتشفت كذبها تضايقت لاني ما دافعت وقتها عن زميلاتي كنت اكتفي بالسكوت

بعدها صارت مشكلة لي معها و كان فيها سوء فهم
لكن للاسف هي كما فعلت مع الزميلات فعلت معي تمشي و تتكلم فيني عندهم اني ورطتهم في مشكلة مع المديرة و اني تغيرت ماعدت البنت الطيبة و من هالكلام و اقسم بالله البنات يردون عليها يقولون مستحيل شوق تسوي كذا و هي لازالت مصرة

اتجهت للمديرة تنظر للموضوع و اخبرتها بكل شي فلانة لا يسلم احد من لسانها و تتحدث في اعراض الزميلات بكل وقاحة

الان المديرة قررت تسوي اجتماع مفاجىء للجميع و اعتقد راح تحصل فيه مواجهه
و ممكن الناس اللي كان ينقال عنهم الكلام يدرون

انا متضايقة لاني و الله ماحبيت اورطها ف شي لكن اقسم بالله على قد صدمتي فيها تصرفت
و خفت يجيني الدور تتكلم في عرضي عند احد و انا مطلقة في مجتمع متخلف
ف بيكون شي سهل عندها
متضايقة على البنات اللي كانت تتكلم عنهم لو دروا كيف بيكون شعورهم شيء قاسي و يعور القلب
متضايقة لاني نزلت نفسي لمواضيع القيل و القال كان بالامكان ان اصمت و لكن هي مراح تصمت
اعرفها تماماً

ابغى نصيحتكم شوركم توجيه منكم الله يسعد قلوبكم

__________________