تغيرت ونفسيتي متقلبة والسبب اخت زوجي.! الى البليغ ورجل الرجال والخالة جرين
السلام عليكم
عساكم في احسن حال
ترددت كثير قبل لا اكتب مشكلتي
بس صدري ضااايق علي .. واتمنى منكم المساعدة
ضيقتي سببها 3 امور .. هنا بس بتكلم عن سبب واحد وبحتفظ بالبقية لنفسي
يمكن اذا شفت منكم تفاعل بتكلم عن الامور الثانية
المهم
انا متزوجة من سنتين تقريبا وعندي ولد الله يحفظه يارب وعمري 22
حياتي بشكل عام مع زوجي رائعه والحمدلله .. اسكن في بيت اهل زوجي
زوجي عنده اختين .. لما انخطبت كانت علاقتي بوحدة من اخواته قوية جدا .. لدرجة اصبحنا فيها مثل الاخوات
كانت تحكيلي كل اسرارها .. وكنت تقريبا نفس الشي خصوصا ان طول فترة الخطوبة والملكة اللي استمرت تقريبا سنة كنا دايما نلتقي ونطلع سوا
بعد ما عرست وانتقلت للعيش معهم فاليبت بدأت اكتشف فيها طباع ثانيه ماتعجبني مثل انها صارت مزاجية كثير خصوصا انها كانت ترغب بالزواج بس ما صار لها نصيب .. للعلم هي اكبر مني
المشكلة بدأت بيننا لما انخطبت بس اهلها ما وافقوا على الخطيب وكانت تكلمه من دون علمهم ( للعلم كنت اعرف انها تكلمه بس ما تدخلت ولا خبرت احد)
واكتشف زوجي انها تكلمه وصارت هواشه بينهم .. وقتها لما حبت تنتقم منه وتطلع نفسها ما غلطت صارخت فيي قدام كل اهل البيت وقالت انتي ما كلمتي زوجك ففترة خطوبتكم من دون علم اهلك ... ولا هو حرام علي وحلال عليكم ...
انا وقتها انصدمت من كلامها .. لأن هالشي كان سر بيننا انا وهي وزوجي
قلت لها مشاكلك مع اهلك لا تدخليني فيها
وزوجي ما سكت لها ورد عليها وقال لها انو لما اتكلمنا كان خطوبتنا رسمية واهلي موافقين عليه وخلاص مسلم المهر ومحددين العرس
اما هي اهلها لسه ما أبدو موافقتهم على اللي خطبها .. وكانوا تقريبا بيرفضوه
انا هالموقف صدمني كثيييير فيها .. ما اتوقعت ابدا انها تستخدمني كبش فدا عشان تدافع عن نفسها
بعد هالموقف صار ما بيننا غير السلام .. وبعد فترة طويله حاولت ترجع علاقتها فيي بدون ما نتكلم فالموضوع
اول الايام تحاشيتها بس بعدين رجعت اكلمها عادي ... فنفس الفترة كنت احاول فزوجي يرجع يكلمها لأنه قاطعها وبعد الحاح قوي مني كلمها لما تمت خطبتها بشخص ثاني
المهم
بنفس الفترة انخطبت وتمت خطوبتها بشخص ثاني .. ويشهد الله اني فرحتلها من كل قلبي وتناسيت اللي صار.. وصرت اساعدها فأمور تجهيزها .. كنت احس مساعدتها لي فتجهيزي مثل الدين .. وكنت اريد ارد ديني لها بنفس الطريقة
الكل كان يقول بيوم عرسها اني وقفت معها اكثر من خواتها .. واني ابد ما قصرت فيها
طبعا بكل غباء مني رجعت اكلمها عن اشياء خاصة فيي .. وكنت دووم اقولها انو لازم تروحي شهر عسل لأني انا انحرمت من شهر عسلي بسبب امهم المريضة فاضطرينا نكنسل تذاكر شهر عسلنا عشان ناخذ امهم تعمل فحوصات .. فهذي السفرة سافرت انا وزوجي وامهم وهي ( اخت زوجي )
بعد ما رجعت اخت زوجي من شهر عسلها .. دار حوار بيننا عن السفر وكانت حامل فهذيك الفترة .. قلتلها بكل عفوية في ما معناه اني مفكرة اسافر مع زوجي هالصيف بس انتي ما بتقدري تسافري الا بعد ما تولدي ان شاء الله .. كنت اقصد انو بتعوضي بعد الولادة بس شكلها فهمت اني كنت اغيضها او شي مثل كذا بالرغم انها تعرف شخصيتي زين واني مو من النوع اللي ممكن يفكر يجرح او يحرج احد
ردت علي بكل غرورقدام اللي موجودين اني انا سافرت شهر عسل مو مثل بعض الناس ما راحوا مكان وضحكت ! قلتلها شكرا هذا جزاي لأني افكر فغيري اللي هي امك وسكتت
انصدمت كثير من كلامها ... خصوصا انها تعرف زين ان هالموضوع اتحسس منه كثيييير
هنا المشكلة الحالية بدأت
والقهر الكبير اني انربط لساني وما عرفت ارد عليها وكلمتها هذاك اليوم عادي بس بالليل بكيييت كثير وزوجي اصر يعرف ايش صايرلي وقلتله بكل شي .. وهو عصب كثير منها ولامني لأني ما عرفت ارد عليها
من بعد هالموقف تغيرت كثير
صرت دايما اردد " لا يلدغ المرء من جحر مرتان" الا انا انلدغ اكثر من مرة وبعدني ما اتعلم !
صرت احتقرها وما متقبلتنها ابدا بس ما كلمتها فالموضوع ابدا
هي حاسة اني متغيره عليها بس ما تعرف السبب وتحاول تلطف العلاقة بس انا مخليه علاقتنا متذبذبه... يعني يوم اكون عادي ويوم اطنشها ... وزوجي بدأ يتضايق لأنه يخاف امه تاخذ مني موقف لأني ما صرت اعاملها مثل قبل فدايما يقولي بليز ارجعي مثل دايما معها لأن شخصيتك مو كذا ... يقصد اني طيبة ودوم اسامح واطوف
بس ما قادرة ابلعها ..صرت ادورلها اي زلة .. خاطري بس تغلط علي عشان اسوي مشكلة .. حتى زوجها مع انو طيب جدا بس صرت ما اطيقه .. وهالشي مضايق زوجي لدرجة انو اليوم يقولي انتي الغلطانة لأنك ما عرفتي تردي عليها والحين ما قادرة تعدي الموضوع
احس مافي حد فاهمني
يعني موضوع جرحها لي بروحه سالفة .. بس الشي الثاني فقدت الثقة فيها وفي اللي حواليي
يعني بالاول كنت احاول ارضي ام زوجي حتى لو على حسابي .. الحين لا .. تغيرت .. صرت ما اهتم
لأن كل اللي اهتميت فيهم ما اهتموا فيي
صرت اريد اقدم مصلحتي بدل ما كنت اقدم مصلحتهم
صرت ما يهمني اراعي مشاعرهم .. لأن مافي احد راعى مشاعري
احس فيني قهر كبير
صرت كارهه الوضع فالبيت .. خصوصا انها دوم تجي عندنا .. لما تكون موجودة فالبيت اتمنى اطلع من البيت .. ولو صحت لي طلعه ع طووول اطلع
واحيانا العن ابليس واكلمها عادي ونكون كوول
بس ما اتقبل اي شي منها .. كل حاجة تسويها لي حتى لو زينة اكون حاطة فبالي انو اكيد بتعايرني فيها او بتذلني عليها
وصلت فيني اللعانة لدرجة ما احب انها تمسك ولدي كثير ولا اريد ولدي يتعلق فيها او يلعب معها
انا ما كنت كذا .. قلبي كان دوووم يسامح على طول وينسى .. بس هالفترة احس ما اقدر اكون مثل قبل
تعبت من كثر ما اداري الناس واهتم وفالاخير انصدم فيهم وانجرح منهم
ادري توهتكم معي
بس بجد احس ما قادرة حتى اوصللكم شعوري بالضبط
اتمنى انهي هالحالة اللي انا فيها .. اريدكم تساعدوني كيف اتعامل معها
طبيعتي اني اما اتعامل مع الناس عادي واكون كوول وع طبيعتي .. او اقاطعهم نهائيا وفهالحالة ما اكون مرتاحة لوجودهم معي فنفس المكان!
ماعرف اكون فالوسط!
هالسالفة بدأت تأثر بمزاجي بشكل عام وبحياتي مع زوحي .. وهذا الشي اللي ما اريده
انقهر واتهاوش مع زوجي لما يقولي مازين تسويي فيها كذا .. مع اني ما اقولها شي بس اكلمها ببرود واجلس طول الوقت فتلفوني او مع ولدي واحاول اتحاشاها .. دايما اقوله يعني اللي هي سوته فيي زين ؟!!
يعتبر اني مبالغه فالموضوع ... واعرف انو هالموضوع عند البعض سخيف .. بس انا ما اعتبره سخيف لأنه كسر شي بداخلي وبدأ يأثر فيي بشكل كبير
ايش الحل ؟ لو كنتوا مكاني .. شخص غلط بحقكم بغض النظر عن السبب اذا كان مقنع بالنسبة لكم او مبالغ فيه .. ايش بتعملوا؟
كيف اخلي هالموضوع ما يأثر على علاقتي بزوجي او حتى بنفسيتي ؟
واسمحولي بتعبكم معي