يتبع للمستوصفات والمستشفيات
اول شئ انصح عن تجربة اذا عندك اطفال خاصة من الولادة عليك بالمستوصفات الحكومية التطعيمات مجانية وكل شهر تروحي ياخذوا فحص للبيبي من طول ووزن وغيره
او اذا حالة المريض مو خطرة راجعهم مثل مرض سكر او ضغط صرف الادوية مجاني
اذا شاكة بموضوع مرض اطلبي تحويل على المستشفى وهم على طول يحولكم لا تقول لي مواعيدهم طويلة ووو غيره من الاعذار البايخة والله اذا شك الدكتور ان الحالة محتاجة لمتابعة على طول يخلي المواعيد قريبة
يعني اللي راح تتحمل المواعيد بتوفر مبالغ طائلة خاصة اللي عندهم اطفال ومحتاجين تقاويم اسنان او علاجات ثانية
اما اللي ماله خلق على الحكومي اذا رحت الحكوميي واهلهم واعطيهم مسمى الوظيفة او مكان العمل مو خسرانة شئ اغلب المستشفيات تعمل خصومات او اذا المستشفى تصرف بطاقة تامين صحي خاصة فيها شوفي مميزاتها والخصومات عليها واستفيد
(( حتى الفنادق تعمل خصم للموظفين الحكوميين ( اذا ماكنت غلطانة الموظف بوزارة الزراعة له خصم بفندق الشيراتون 15 % ) وعليك القياس ))
وبعض المحلات التجارية الكبيرة او الشركات ايضا تعمل خصومات للموظفين الحكوميين
كلها مكالمة تليفون واسال
في حاجة مهمة اغلب الناس تهملها وهي بطاقات العضوية و الخصومات لبعض المحلات لاتقولي مالها فايدة او تعمل حسم قليل لا كل شئ فية توفير حتى لو ان شاءالله 40 ريال حسم على مشترواتك يعتبر انتي الكسبانة (( كل اللي عليك انك تجمعي الفواتير اذا وصلت مبلغ معين قدمها واحصل على العضوية مجانا))
من المحلات اللي مشتركة فيها
السواني , مكتبة جرير , سيتي بلازا , المخازن الكبرى , ايكيا
(( ياليت اللي تعرف غيرها من المحلات اللي تقدم عضويات تبلغني عشان اشترك ))
انا عندي جوال خاص ( فقط لاستخدامات العمل والمحلات والبوتيكات والمطاعم اواذا كنت بتفق على طلبية وطلبوا رقم للتواصل) اذا رحت لمحل اسألهم اذا عندهم خدمة تبليغ برسايل الجوال وقت التخفيضات واذا كان عندهم اعطيهم الرقم ( يعني ماعندي خوف ان رقمي ينتشر او تجيني ازعاجات لانه خاص فقط لهذا النوع من المكالمات) وبكذا اكون على اطلاع على العروض والتخفيضات اول ما تبدأ
الترفيه
بالنسبة للخروج والنزهة سبق وقلت ماعندي اطفال لكن اللي مستغربة منه ليش الواحد ما يخرج اطفاله الا ايام الخميس ليش مو وسط الاسبوع
بعطيكم كم اقتراح
في بعض مراكز ترفيه تقدم عروض وخصومات وسط الاسبوع عادة من السبت الى الثلاثاء على الالعاب واسعار التذاكر او اوقات معينة ( اتصل واسأل ) فيها توفير
اهم شئ انكم تعودوا الطفل انه له ميزانية محددة لللعب او عدد مرات محددة مثلا له 25 ريال للعب يحب يلعبها ورا بعض او يلعب شوي ويجلس يتفرج ويكمل الباقي ولايطلب غيرها مهما كانت الالعاب مغرية ولا تتنازلوا وتعطوهم اكثر حتى لو بكيوا واترجوكم مع الوقت بيتعودوا على اللعب بمبلغ محدد ولايطلبوا غيره
بالنسبة لوجبات العشا لاتشتريها من المركز قبل ما تخرجوا اطبخي وجبة العشا وخليها وجبات سريعة وتعشوا بالبيت وبالمركز اشتروا للاطفال ايسكريم او اي شئ ثاني
ادوات المدرسه ومستلزماتها
من دفاتر وغيره ماعندي اطفال لكن ممكن افيدكم روحي للمكتبات الجملة اسألي عنها او تلاقيها بدليل الهاتف بالنسبة لجدة تلاقونها على امتداد شارع السبعين قبل تقاطع شارع فلسطين جميع المكتبات بالجملة حتى ادوات ومستلزمات الهدايا اشياء روعة .
نجي للسفر وخساير السفر
اذا انتم عائلة فيها طلاب مدارس او كلية وحابين تسافروا داخل المملكة اطلبوا تخفيض الخطوط السعودية للدرجة السياحي من المدرسة او الكلية يعني تطلع عليكم التذكرة للطفل او الشخص الواحد ذهاب وعودة بنص السعر ( كتبتها عشان اللي ماعندها خلفية عنها او ماتعرف عنها يجيها العلم)
اما اللي ما عندها طلاب مدارس او عندها اطفال تحت سن المدرسة وسفرها كثير لاهلها او زوجها سفره كثير حتى خارج المملكة في حل حلو لهم اتوقع كثير مايعرفه عضوية الفرسان من الخطوط السعودية ( على فكرة تنفع للسعوديين والمقيمين داخل السعودية)
انا مشتركة بعضوية الفرسان ( ( لان سفراتي انا وزوجي كثيرة ونستخدم المكافات اللي نحصلها من العضوية عشان نحصل على ترفيع درجة السفر يعني اكون دافعة قيمة تذكرة درجة سياحية ثم اطلب ترفيع التذكرة على درجة رجال اعمال او اولى يعني اسافر على الدرجة الاولى بنفس سعر السياحي بدون ماادفع ريال زيادة وممكن انك تخلينها تذاكر سفر مجانية او خصومات لبرامج العطلات ( راجعي موقع الخطوط الجوية السعودية لمزيد من المعلومات واشتركي مجانا عن طريق النت ) )
بتكلم عن خطوط طيران دولية يمكن ماعندكم خلفية عنها وهي العربية للطيران اسعارها رخصية جربتها مرة من الشارقة للدمام لاني مالقيت حجوزات على ما اذكر كلفتني الرحلة 300 ريال وانتي تشري وجبات الاكل على حسابك لانهم مايقدموا لك الا الماء فقط ( صحيح ما اعجبتني حسيت نفسي بباص لكن هي حلوة للعائلة الكبيرة او اللي ميزانيتهم قليلة وحابين يسافروا للخارج ) وهي تروح لكذا دولة وسعرها على حسب الحجز اذا من بدري او لأ ( لمزيد من المعلومات زوروا الموقع الخاص بها )
والجديد من خطوط الطيران الرخصية الجديدة في المملكة طيران ناس وخطوط سما ( زوروا المواقع على النت للمزيد من المعلومات)
نجي للمكياج والعطور
الكل يحب الزين وكلنا نحب اننا نتجمل وتكون ريحتنا حلوة ومميزة لكن بعيد عن خسارة الفلوس
انا دايما اقول انه المكياج واحد وتصنيعه واحد اللهم اسم الماركة هو اللي يحدد السعر
عشان كذا اهم شئ كريم الاساس والبودرة والكونسلر وكحل العين يكونوا من ماركة غالية
والمكياج الدائم او الالوان الاساسية اللي تستخدميها باستمرار مثل الوردي ودرجات البيج او البني اللي تنفع لكل المواسم ممكن غالية
لكن الوان الموسم لا والف لا لأنك راح تستخديمها فترة ثم تنتهي موضتها وترميها او تستخدميها للبيت ومستحيل انك تخزنيها على امل ان موضتها ترجع الموسم الجاي لانه من المعروف ان حتى الكياج له تاريخ انتهاء فا ليش اشتريها غالية واخسر عليها مبالغ يمكن استخدمها كم مرة بعد كذا مصيرها الدرج او الزبالة
في ماركات رخصية وحلوة ومعترف فيها من قبل اخصائي مكياج عالميين مثل برجوا ومايبليين وغيرها اختاري اللي يناسك
اما بالنسبة للعطور اذا رحتي تشتري عطرك المفضل او اللي متعودة انك تستخدميه اطلبي من البايع عيانات للعطور الجديدة او حابة انك تشتري عطر جديد وجربتيه بالمحل واحترتي لاتشتريه على طول اطلبي عينة مجانية منه واستخدميها برواقة وشوفي يناسبك او لأ
احيانا حتى المكياج بعض الماركات تنزل عيانات مجانية للمستحضرات الجديدة اطلبي واسألي عنها
خلي عندك قاعدة عطر واحد غالي ومميز مع كمالياته للسهرة والخروج افضل الف مرة من عطور كثيرة ورخيصة وغير مميزة
بالنسبة لعطور البيت خليها حلوة ورخصية مو اكثر من اثنين اذا حابة التغيير وكل مرة غيري الانواع بكذا تكوني مميزة كل مرة
بالنسبه للهدايا
اذا كنت كريمة وما تحبي تكوني مثلهم اتبعي اسلوبي في نوع الهدايا حلو وغير مكلف وينفع لكل مناسبة سواء ولادة نجاح زواج ( اذا ما كانت تقرب لك او ماعمرها اهدتك شئ) او زيارة اول مرة لبيت وحدة ( اذا قلنا الميزانية 100 او 150ريال للهدية) اشتري سلة حلوة من محلات ابو عشرة يكون حجمها مناسب وورد مجفف واشتري كم قطعة من محل ذا بدي شوب او نكتار او زهور الريف وخليه ينسقها لك بالسلة او اشتري مجموعة شموع وزيوت عطرية وفواحات من لايف ستايل او ممكن براويز صور او البوم صور فخم او اي شئ غريب وحلو و بنفس الوقت غير مكلف اذا ولادة اشتري من محلات التعليم المبكر لعبة مناسبة لسن كبير شوي عشان تستفيد منها مستقبلا
او اذا كنت ماهرة بنوع غريب من حلى قهوة او حلى عشا او اي طبق اعمليه وقدميه بشكل حلو
اخر شئ بتكلم عن تجربة صديقة وزوجها موظفين عارفين ايش عملوا حولوا الراتب ينزل لنفس البنك وفتحوا حسابات ايداع لاطفالهم الاربعة وكل شهر ينقطع من رواتبهم على 400 ريال وينزل بحسابات اطفالهم يعني كل طفل ينزله بالشهر 200 ريال طبعا الاطفال ما راح يستفيدوا منها الا بعد 25 سنة او اكثر اذا كبروا وتخرجوا من الجامعة ان شاء الله
( 200 ريال * 12 شهر = 2400 ريال / 2400 ريال بالسنة * 25 سنة = 60000 ريال )
وعليها قيسوا لو تعملوا ايداع شهري ثابت ينقطع من الراتب يستخدم وقت الحاجة او للمستقبل