الله يبارك لك في البيت ويجعله بيت مبارك وفاتحة خير لكم

أنا لي مع مكيفاتي بكمل التسع سنين ولامره خربوا وتبريدهم ماشاء الله (الزامل)
وثلاجتي أخذتها من محل الوكالة سانيو وبرضو رح تكمل التسع سنين وهي زي الفل
والغسالة أتوماتيك LG بتكمل الخمس سنين وهي من اروع ما يكون ولامره اشتكيت منهما

ولله الحمد

بس بنصحك نصيحة برا الموضوع نصحتنا فيها مدرسة لنا في المرحلة الثانوية الله يسعدها وين ما كانت ويوفقها يارب

وهي اول ما تدخلي بيتك اول شي تسويه تقرأي في كل زاوية في البيت بعض آيات من سورة البقرة وتجيبي موية وتقرأي فيها آية الكرسي وترشي في البيت
مدري أحس بأحساس مرييييح جداً وراحه عجيبه بعد ما اعمل هالشي في البيوت الي أنتقلت لها
الله يوفقك ويجعله بيت السعادة يارب

__________________



هل تتعرضين للأبتزاز ؟؟ أدخلي هنا

مفضلة المتزوجين 2011-2014



مفضلة المقبلين على الزواج 2014

.

بصراحة انا تجربتي سيئة مع الافران المسطحة




احنا العرب بشكل عام بنطبخ كثير و طبخ ثقيل فا مع مرورو الايام بيتخدش السطح
ويصير شكله مش حلو

ثانيا يمكن تضحكو عليا بس بحس الغاز بيطلع الاكل اطيب

__________________
سبحان الله... الحمدلله ... لا اله الا الله .. الله اكبر
سبحانك لا اله الا انت اني كنت من الظالمين
استودعكم الله

متابعة باستمرار ..

لكن موضوع سيدة مو مخليني افكر بالبيت .. اليومين هذه ..
و الفرن المسطح صادقة نورة .. جربته في بريطانيا و كان الاكل ما يطلع لذيذ فيه ..
لانه ياخد وقت لحد ماالحرارة تقل او تزيد .. مو مثل العادي

هو شكله حلو مرة و مرتب بس مو عملي ابدا .. و كان متعبني بالخارج

و عندي اسئلة كثيرة بخصوص كل شي ..
بس تعبانة مرة اليومين هذه مع الحمل كمان و الوحام ..

.
.

زوجي يبغانا نبدأ بغرف النوم ..
يقوللي انت ما حيمديك تطبخي مع الحمل ..

لا يا روح معليش

الأهم فالمهم ..

إنتي محتاجه تتغذي كويس وخاصة الآن بما انك حامل ..

أرحمي نفسك وعيالك شوي واطبخي لهم أكلات صحية ..

حتى لو تخلين الخدامه تغسل وتقطع و وتطبخ قدامك وإنتي تشرفي عليها يظل أنظف من أكلات المطاعم ..

أنا لما كنت حامل في ولدي وهو أول حمل لي كنت تعبانه كثير ونقلنا لشقة وكنا شاريين البوتاجاز واغراض المطبخ لكن طولوا أسبوع لين وصلوا لنا الغاز .. أسبوع كامل ونحن ناكل من برع وكنت مضايقة من االوضع .. لكن كنت اقنع نفسي انه غصب عني وما في خيارات ثانيه ... واول ما صار المطبخ جاهز قعدت أطبخ بالرغم من تعبي وكنت أرفض أكلات المطاعم إلا بين فترة وفترة ..

إنتي كمان إذا ما جهزتي المطبخ حتعذري نفسك وما حتحسي بتأنيب الضمير إذا ما طبختي لكن صدقيني تضرين نفسك وعيالك واللي في بطنك .. لكن غرفة النوم إذا ما جهزتيها ما حتتضرري أبدا ..


واسمحي لي يا روح والله احتراما لك ومراعاة لمشاعرك ما بكتب شيء لكن زوجك يقهر ..

وليتني قريبة منك أطبخ لك إنتي وعيالك أغذيكم واطمن عليكي ..

كنت بنزل لك وصفات سهله تعمليها في البيت لكن اللاب توب تعطل وكل مشاركاتي حاليا من التلفون ..




و

__________________

داماس

معاك حق ، و أنا مقتنعة بكلامك ( 100% )

و أصلاً أنا عارفة بداخلي ، إنه ( يفكر بنفسه و بس ) ..
لإنه هو يحب الأكلات الجاهزة و أكل السوق ، من يوم كان في بيت أهله ..
أمه ماشاء الله ( فنانة بالطبخ ) ، و هو يترك أكلها و ياكل من برة ..

فلو ما عندي مطبخ ، هو ما عنده مشكلة ..
بالعكسسسسس ، هو الكسبان ( لإني راح أحس بتأنيب الضمير مثل ما قلتي ، و أضطر اشتري من برة أو أوديهم مطاعم )
و هذا عز الطلب عند زوجي ..

.
.

و ربي يخليك يا قلبي ..

و الله ، إني بأهتم إني أطبخ بالبيت كل ما لقيت نفسي كويسة ..
و اليوم اللي ما أروح فيه للدوام ، أضيعه بالطبخ و تجهيز أي شي بالبيت ..

حتى ما صرت أهتم ، إذا زوجي ياكل أو ماياكل ..
لإنه ما يحب الخضراوات ، يحب اللحم ( و هو ما عمره اشترى لحم ) ..

و أنا ما تفرق معايا ، لإني أحب الخضار و الفواكه و الأكل الصحي ..

.
.

نروح المطعم ، زوجي يطلب شوربة عدس ..
إذا عملت في البيت ، ما يشرب و لا حتى إذا أمه عملت الشوربة ..

خلاص ، أهم شي أولادي يتغذوا ..

.
.

خلاص نويت أبدأ بالمطبخ من الأسبوع الجاي ..


لإني الأسبوع هذا ، هو أخر أسبوع ليا في الوحام بإذن الله ..
و مضغوطة عشان الإختبارات ، و مناسبات كلها جات ورا بعضها الثلاث أيام الجاية ..

.
.

تعرفي داماس ..

زوجي جاله القولون ، تشحم الكبد ، السكر ، الضغط ، القلب ، فقر الدم ..
و هو لسى شاب ..

أقول له ، من أكل السوق و من اللحم .. يا دجاج يا لحم ..
و من الكولا ..

و ما أبغى أولادي يتعودوا على نظامه ..
فمهتمة جداً بالمطبخ و أدوات المطبخ .. و إني أجبر نفسي على الطبخ ..

عشان كذا ، حاطة المطبخ هو الأساس ..
و غرفة أولادي ..

.
.

زوجي مهتم بغرفته أهم شي ..
بس خلاص ما راح أسمع له ..

يعني ماتطبخين لحم ؟؟

كيف

كيف غدا بدون لحم او دجاج ..

معليش الفواكه والخضار مع الغدا او وجبات جانبيه

بس متعارف ان الوجبه الرئيسيه لازم نوع من اللحوم ..

__________________

روح زوجك ماشي بالمقلوب
الرجال بشكل عام بتمنو طبخ البيت

المهم زي ماقاالت داماس المطبخ اول شي ينفرش و يتجهز
هذا اساسي باي بيت ... وبعدين كل شي عادي


بالنسبة للطبخ لما تشوفي نفسك قادرة تطبخي .. اطبخي كمية اكبر .. واول ما تستوي الطبخة
اغرفي لعلب بلاستيكية و بعد ماتبرد تحطيها بالفريزر وتحطي عليها ورقة باسم الطبخة

الاكلات الي ممكن تتفرزن كثيييرة ... المسقعة .. الايدامات (الخضرة و اللحم) الدجاج لا تفرزيه بيتغير طعمه
العجينات .. غلفيها ببلاستيك وفرزيها

في اكلات ممكن تسويها اليوم الاول بكميات تكفيكم يومين .. وتخبيها بالثلاجة و اليوم الثاني تسخنيها و تاكليها
مكرونات بالكريمة و الخضار .. اللازانيا .. المكرونات بانواعها عادي مابتتغير
الفطاير ..

الكبسة احيانا تعرفي ايش اسوي ... بعمل كمية تكفي يومين بس نص طبيخ كيف
يعني بسوي اللحم و الخلطة الي بتيجي تحت الرز.. بعملها بشكل كامل مع البهارات و البطاط و اي خضرة حابة تحطيها
وقبل اخر خطوة (الي هي اضافة الرز) .. بقسم الخلطة الجاهزة دي نصفين .. نصف بخليه بالثلاجة لليوم الثاني
ونص بسويه بكمل طبيخه عادي

اليوم الثاني لما اجي اطبخ بيكون بس باقي علي تسخين الخلطة و اضافة الرز .. و خلاص
احلى شي بالطريقة دي.. انك لما تطلعي خلطة الكبسة من الثلاجة بتكون طبقة الدسم متكونة فوق
تشيليها بالملعقة و بعدين تسخنيها و تكملي طبيخ
بالطريقة دي تنعمين بكبسة خالية من الدسم ..

ونفس الشي الشوربات زودي و سخني اليوم الثاني


لا تقولي لي زوجي وعيالي مايحب الاكل البايت ..
زوجك لا تقولي له انه بايت و مابيدري .. اصلا الموضوع كله حالة نفسية بس يدري انه بايت
يعوفه بدون حتى مايذوق
ولو مش عاجبه يروح ياكل من المطعم لحاله
وعيالك لازم يتعودو على الاكل البايت ...

الله يقومك بالسلامة حبيبتي

__________________
سبحان الله... الحمدلله ... لا اله الا الله .. الله اكبر
سبحانك لا اله الا انت اني كنت من الظالمين
استودعكم الله

أم يوسف

ما عندنا ايكيا للأسف ، في عندنا ( هوم سنتر ) ..
و أنا الصراحة ، كان نفسي من ايكيا ..

إلا إذا أجلت موضوع غرف النوم ، و استنى متى بنسافر للمدينة الي فيها ايكيا ..
و من هناك اشتري ، بس برضو صعب .. لإنه مين راح يركبهم لنا بعدين ؟؟؟؟

.
.

شكلي بأشتري من ( هوم سنتر ) ، أو أدور محلات حلوة هنا لغرف النوم ..
تكون نفس نظام ( ايكيا ) ..

.
.

و أنا نفس الشي أشوف ، إنه أهم شي المطبخ و المكيفات ( حتى مو كل المكيفات ) ..
المهم قبل لا نسكن هناك ، لازم المطبخ يكون جاهز و متركب و الغسالة كمان ..

ايكيا عندهم شحن وتركيب

يشحنون لك على شركة tnt

ويركبونه بعد ..

__________________

.
.


سيدة الموقف ، حبيبتي ..
قلبي معاك ..

و بالنسبة للمكيفات ،


- بالفعل ، (إل جي) ما عجبتني ..
البيت اللي ساكنة فيه حالياً ، مكيفاتها ( إل جي ) ..

- راح أشوف الماركات الي قلتيها ..

- و أفكر إني أخد بس 20000 وحدة .. أظن كذا رقمها ( لغرفة نومي عشان زوجي يحب المكيف الثلج )
و للصالة

بقية الغرف ، 18000 وحدة .. شفت الفرق في النت ما بينهم بس ما كنت زمان أعرف أو أدقق ..

.
.

المطبخ :


- إلى الآن ، ما شفت الصراحة ( مطابخ الألمنيوم اللي تشبه الخشب ) ..
إن شاء الله من يوم الأحد هذا، راح أفضى .. و أروح أختار و أبدأ بتفصيل المطبخ و شراء الأجهزة للمطبخ

.
.

- بالنسبة لورق الجدران .. ما أعرفه الصراحة .. : (
و من فين ممكن أشوفه ؟؟؟؟؟

- و الحلو في غرفة الأطفال ، إنها جاهزة و تشتريها طقم و خلاص ..
ما يبغالها تفصيل مثل المطبخ ، و أجهزة و أدوات وووو إلخ ..

راح أخلي غرفتهم عالشهر الجاي إن شاء الله ..
و إلى الآن ، أنا شفت بسسس ( هوم سنتر ) ، و فيه محل اسمه ( فراولة ) يمدحوا فيه كثير ..
بس زوجي يقول لي ( غالية مرة و حرام ) ..

.
.