هذا رابط موضوعي السابق ...
http://www.66n.com/forums/showthread.php?t=260758
الحمدلله انقضا شهر رمضان بمعاناة وتعب
خصوصاً من ناحيته هو
مرض الاب وتعبه ودخوله للمستشفى 22 يوم
ثم توفى في 22 من رمضان (( الله يرحمه ويغفرله ))
والحمدلله من بعد اخر مشكلة
حياتنا مستقرة وتكاد تخلو من المشاكل والعناد والعصبيه
ولكن زوجي طبعه حب التملك والغيرة الزائدة عن حدها
مثال /
* يتضايق لمن اخرج مع اهلي .
* يتضايق ويزعل اذا خرجت عند احدى صديقاتي .
* يزعل اذا رحت لمناسبه عائليه .
ياجماعه والله وبدون مبالغه لازم ينكد عليا قبل الخروج وبعده
يخليني اندم اذا خرجت وطول الخرجة وانا مو مبسوطة .
واللي يقول طيب لا لاتخرجي
انا والله مو من نوع الحريم اللي على طول لابسه عبايتها وخارجة
فين وفين اقسم بالله اغلب وقتي يا تحت عند اهلو معاه
واروح لاهلي مرة اسبوعياً
واذا كترت رحنا بنده جمب بيتنا نقضي ونرجع بس ....
المهم ما اطول عليكم المشكلة /
اخويا اتصل عليا من قبل اسبوع
وقال خلينا نخرج نتمشى امر عليكي وكدا
المهم استاذنت زوجي ووافق لكن بشروط
* لا تكشفي وجهك - لا تتلثمي - لا تبان رقبتك - انتبهي احد يعاكسك .
وانا مبسوطة وبكل براءة اقوله حاضر من عيوني .
المهم وانا حاطة في بالي اصلا 95٪ انو راح ينكد عليا الخرجة
كنت حاطة مكياج ناااعم جداً
عادة مع زوجي الحمدلله ما يخاصمني ولا عمره بينلي انو هذا الشي يضايقه لانو اصلا مابيبان شي مني الحمدلله ...
امس قبل لا يجي اخي بدقااايق معدودة
طالع فيا زوجي وقال (( ايش دا اللي انتي حاطتو ))
قلتلو ( بدينا في النكد )
المهم الا هوا عصصب جداً وقال
حنعيش مع بعض زي الاخوااان الين مايجو اهلك من السفر واخدك عند ابوكي يتفاهم معاكي ...
( لان اهلي مسافرين وغير متواجدين حالياً )
قلتلو طيب ،ورحت بامسح المكياج
الا الاقيه فاتح باب الشقه ويناادي اخته باعلى صوت
عشان اختو ساكنة قدااام شقتنا بالضبط ..
قلتلو ليش تناديها ؟؟؟
قال ابغاها تشهد عليكي وانتي حاطة المكياج دا كلو وخارجة !!!
قمت بعصبيه جلست ع الكرسي وقلتلو ناديها ماني خايفه منها
وفعلاً جات مفجوعه
وسار يصرخ ويزعق باعلا صوتو
شوفي دا شكل تخرج فيه
قالتلو اختو ايوا هيا دايما كدا لمن تخرج
قام قالها بس معايا انا عادي اسمحلها
بس مع اخوها لااااا
المهم سارت ماسكتو بقوة
وهوا زي اللي بدو يضربني
وهيا تهدي عليه خلاص يا فلان
المهم مع الزعيق سمعت الصوت امو وطلعت فوق عندنا
وبرضو يزعق ويصرخ انا خلاص هنا اتنرففزت وماقدرت اسكت
سرت اتلفظ بالفاظ زي (( انا خلاص معد بعيش معاك و ماليا جلسه في البيت دااا انا تعبت منك انتا لازم تنكد عليا وووو ))
تخيلو بعدين بدات اهدا شويه وكنا في الصاله انا واختو
الا يجي ويفتح الباب ويخرج لسانو بكل استفزاز
ويقول احسن اهم شي خليتك تغلطي بالكلام قدامهم .
انا هنا خلاااص بغيت انفجر من القهر اللي فيا
لانو استفزني وقهرني ونجح هوا في استفزازو ليا
حركات وسخه اقسم بالله
المهم قلتلو اطلع برا الغرفه مابغا اشوفك
وانا طبعا منهارة وابكي
الا قال اصلا مانتي متربيه
قلتلو ههههه خلينا التربيه ليك والله
اصلا معدنك وسخ
انا اعترف اني غلطت وبقوووة وقدام اختو كمان
الا قالت اختو لا معليش ايش قصدك ؟
انو معدنا احنا وسخ ؟
انتي اتجاوزتي حدودك والمهم زعلت وخرجت من شقتي
الا جيت بنادي زوجي ينزل الشنطة من فوق الدولاب
الا اختو كانت جمبو
قلتلو لو سمحت يا فلان نزلي الشنطة من فوق الدولاب
الا قالت اختو(( خلي اخوها يجي ينزلها الشنطة انت مالك صلاح ))
والزبدة دخلني الصاله وسار يهديني ويقول انا ماقلتلك اخرجي من البيت ولا طردتك
بس ياجماعه خلااااص نكد عليا حياتي والله تعبت من الحال دا
ليش يدخل اهلو بيننا
ليش ينادي اختو
ليش يخلي اهلو يكرهوني بعد ماكانو مرررة يحبوني والله
المهم جات الام وقالت انتي سفيهه وما احترمتيني وقلتي الفاظ مش كويسه قدامي وكيف تقولي معدنكم وسخ ووووالخ
انا انقهرت كيف واقفين معاه بعد دا كلو ؟؟؟
وشايفينني انا الغلط
انا الغلط صح لاني دافعت عن نفسي
مستجدات
الرد 27
http://www.66n.com/forums/showpost.p...0&postcount=27