السلام عليكم كيفكم بركة الشهر
ارجوكم ساعدوني شيبت انا
ابوي وامي شيبوني
انا عمري 22 وانا الكبيره
امي رومنسيه وابويه مو رومنسي مشكلته ماعنده اسلوب مره >>>>>امي تقول معد تتحمل
هو يحبنا ويصرف علينا مايقصر الله لايحرمني منهم ويخلي لكم اهلكم
المشكله ان ذلحين اخوالي مسوين جمعات كل يوم ببيت نبارك لبعض بشهر
ابوي يقول لا انا ماابغا خلاص تجمعنا في بيت الشايب ماله داعي يجون عندنا>>جدي ابو امي كفايه
وامي عصبت تقول ليش واخواني اعمارهم 20 /17 /13 تخيلوا مانعرف عيال عمي ولا بنات عمي مايدخلون علينا ولاندخل عليهم اش اسوي انا مابغا نخسر اخوالي ونصير زي علاقتنا بعماني وعيالهم انا مابغا اخواني يصيرون كذا ابغاهم يعرفون علوم الرجال ويجلسون بالمجالس مو كنهم بنات حتى الواحد اذا سلم ماينسمع صوته
واخواني يقلون لا نبي نروح ونتجمع مع اخوالي ابوي يقول روحوا انا مابغا اروح انا ماحب الجلسه الطويله ابغا انسدح ابغا اشرب اجوع ابغا اكل انا عندي سكر مو زيكم وانا يدي توجعني >>>> الم بكتفه
بس مو عذر انا تعبت وامي تقول خلاص ابوك لااسلوب ولا يبغا نجتمع بااحد ولا يبتسم بوجه احد انا معد اتحمل افكر ساعات بطلاق انا تعبت طفشت

المشكله اللي بين أمك وابوك اعتقد الحل بيديهم ولا فيه شي بيدك تقدرين تسوينه غير الدعاء لهم

والله يهدي امك يارب اعتقد ابوك ما سوا شي غلط يمكن هو كذا طبعه غير رومنسي ومو ضروري يكون رومنسي وبعدين على كلامك امك وابوك كبار في السن موب صغار يعني اعتقد امك فوق الأربعين معقوله امرأه في هالسن تفكر بهالأمور بعد ما صاروا عيالها أكبر منها

وبالنسبه للجمعات والعزايم ابوك ما سوا شي غلط صراحه بالعكس فاتح لكم الباب ويقول روحوا ويمكن الرجال يبي يرتاح في بيته ومعذور المسكين فيه مرض سكر وكتفه تعوره الله يكون بعونه ويخلي لكم ابوكم وامكم

اما بالنسبه لأخوانك ان شاء الله انهم رجاجيل والمرجله في كل مكان في المدرسه في الأماكن العامه حتى في الشخص نفسه وبينه وبين ربه والمرجله قمة المرجله هي التمسك الحق بالدين اما دورك انتي فيكون في احترامهم وتحريكهم من البيت وتحسسينهم انهم امان للبيت ومالكم غنى عنهم ، أنا صراحه اذا اختي احترمتني وقالت لي بأسلوب حلو ودنا ولا جبنا احس اني رجال في بيتنا ولي مكانتي عندهم ولا أقصد بالمرجله هي التدخل في كل شيء ولا رفع الصوت ولا الأوامر ابداً والله انا ما ارفع صوتي على اهلي ولا أعطيهم أوامر واعتبر نفسي من أرجل الرجاجيل عند اهلي اللهم لك الحمد الله لا يحرمنا منهم ، ولا يحرمكم من بعض

وصبري على أبوي ومشاكله وعصبيته أعتبرها مرجله برضه ، تو قبل شوي كان يرمي علينا المراكي حقت غرفة المعيشه وساكت ولا قلت ولا شي بالعكس رحت اسولف معه وآخذ بخاطره واقضي له غرض

والله يكون في عونك يا أختي

واعتقد ان ما بيدك شي غير الدعاء وكل بيت فيه مشاكل

الله يوفقك ويسعدك

__________________
استغفر الله الذي لا إله إلا هو الحي القيوم وأتوب إليه

مشكلة الوالدين تنقسم لاثنين:
الرومنسية و طبع ابوك، والشي هذا احسه يخصهم
وممكن تساعدي امك بانك تطبعي لها اي نصايح من النت
و احسها مشكلة اغلب المتزوجات

اما رفضه للاجتماع مع اهل امك فمن حقه و هو بيدور عن راحته
كفاية راح لهم مرة ومايقاطعهم

مرحبا فيك اختي ,
ان شاءالله يتعدل حال ابوك والله يشافي يده ويهجد السكر اللي فيه ,,
امنيتي
انا عمري 27 وزواجي بوسط شهر 11 أن شاءالله ودي أشوف ابوي لو دقيقه وحده بالحيل مشتاقله المشكله اني ماقدر اروحله ولا أقدر أسمع صوته
حتى لو يهاوش او تاصل لمدة اليد مع انها بحياته ماسواها بس ميخالف يكفي اني امتع عيوني بشوفته
وامتع اذوني بصوته ,,, الله يرحمك يابيي ويجعل مثواك الجنه

__________________
يارب ترحم أبيي وتشافي اميمتي