السلام عليكم ورحمه الله وبركاته

لي فتره مادخلت المنتدى. كنت كثير تعبانه ومنومه فتره بالمستشفى بسبب حملي اللي جه بعد تعب بسبب مشاكل الانجاب عندي وعند زوجي ولله الحمد رزقني بفضله بطفل.

اللي حابه استشيركم فيه واللي تعبت جد جد منه في حياتي حاجتين

الاول واسفه على هذا الكلام من لما حملت لحد الان عمر طفلي شهور زوجي ماقصر معاي في اي شي من تعامل ماده اي شي احتاجه وقف معاي وقفت رجال بكل ما تحمله الكلمه من معنى. لكنا نعيش مثل الاخوان ما يصير بينا اي شي في البدايه كان يخاف على الحمل والجنين مع انه الطبيب بعد ما طلعت من المستشفى وتحسنت حالتي قال عادي
وبعدين ولدت بعمليه وخلاص عدت الفتره ورجعت لبيتي. بعدين زوجي ظل يوسوس ويقولي نفسيتي تعبانه بعد كل اللي مرينا فيه واخاف عليك وبعدين قال انه ما يقدر قلبه يألمه ويحس باجهاد. طبعا للان ما راح المستشفى ولا شاف وش فيه.
طيب والحل يعني علشان الله عطانا طفل تنلغي حياتنا الزوجيه. انا اعرفه كويس طبعا ماعنده شي خارج البيت. هو رجل كويس وعادي عايشه معه كذا ومشغوله بطفلي وعملي لكن ابي اقدم له هالشي من حقه للاسباب كثيره منها حبنا لبعض وقربنا ومودتنا وعلشان احس انه حيانا طبيعيه وعلشان احصن زوجي.
حاولت اتقرب منه وكذا بس خايفه عليه فعلا من موضوع الالم اللي بقلبه ورافض يروح الطبيب كل يوم يأجل بعدين قال خايف يروح وتطلع معه مشكله
هو اسلوب حياته كامل خطأ ولا فيه ريحه الصحه كل حياته عمل في عمل واجهاد. لا نوم كويس ولا اكل بيت ولا اجازه ولا سفره راحه ولا رياضه يجهد نفسه ويحملها فوق طاقتها يوم اجازته طول اليوم على اللاب توب مايعرف ينبسط ولا يرتاح يعتبر هالشي مضيعه للوقت. حاولت كثير معه مافي فايده


والشي الثاني اللي خارب كل حياتي زوجي شخصيته قياديه وهو مدير بعمله ومسئول. مشكلته ما عنده شي اسمه روح المشاركه بالبيت نص حياته مااعرف عنها شي نتفق على امور ونخطط يلغيها بدون حتى ما يرجع لي كثير امور يحطني فيها امام الامر الواقع واتفاجأ منه ماصرت اثق في كلامه
ثلاث ارباع مشاكلنا اذا من كلها بسبب هالاسلوب نحب بعض ونضحي ونقدم لبعض بس من قادرين نوصل لبعض. يعني بضرب لكم مثال مثلا اتفقنا مره نسافر تخيلو ماحدد لي بالضبط التاريخ ولا المكان قالي مفاجئه قلت له اجهز شنطتي قال طبعا واروح السوق واجهز كل شي بعدين اقوله وش صار اجازتي من العمل قربت تخلص وانا اخذتها علشان السفر وش قال ماحصل حجز طيب احنا متفقين ليه ما خبرتني ليه ماقلت لي تغيرت خطتك ليش ماقلت انك اساسا مو حاجز. وقيسو عليها امور كثيره يخليني فيها تحت ضغط فضيع اجي اسأله ما يجاوب ولا يحب اسأل وهو بداخله عنده الجواب وعنده اسباب وخطه بس ما يشاركني بشي يخليني اضرب اخماس بأسداس وانفعل واحط احتمالات وتصير مشكله كبيره ومرات اطلع من طوري جد واعصب واقوم القيامه وهو بكلمه يقدر ينهي كل هذا. وبعدين يطلعني انا الغلطانه ليه لاني ماصبرت لحد ماهو يحل الموضوع طيب شاركني تكلم معاي حاورني.
هالاسلوب محسسني اني كرسي بالبيت مالي اي كلمه ولا قيمه وانا شخصيتي قويه وقياديه بس اتنازل واعدي علشان الحياه تمشي عجزت اتكلم معاه في هالنقطه مافي فايده.

اخر شي استسلمت مااثق في كلامه ولا وعوده ابدا وهالشي متعب تخيلو حتى بو بيطلب من مطعم اسأله وش طلبت يرد علي كل الخير ويسكت تعبت جد تعبت منه مرات استسلم واقول ماعلي منه بعيش علشان اطفالي بس بس مااقدر لاني ابي اعيش كزوجه حقيقه متفاهمه مع زوجها. ولاني اعرف كويس هو انسان جدا طيب وحنون وداخله صافي ونقي هل ممكن يكون هالشي بسبب زواجه السابق طليقته عاش معها في مشاكل كبيره والظاهر انها من النوع اللي تفرض رايها حتى هالنقطه تكلمت معاه فيها بصراحه يرد علي انا رجال البيت ولا حد يمشي كلمته علي طيب انا ما قلت شي انك تشارك زوجتك في امور حياتكم ما ينقص من قيمتك ومكانتك كرجل.

ارجوكم سامحوني على كلامي اللي مش مرتب بس جد احتاج مساعده اعطوني حلول كيف اتعامل معه في هالحاجتين.