السلام عليكم ورحمة الله وبركاته

بعض الرجال في بداية زواجة تصير فيه حالة إنغلاث جنسي ويتعامل مع زوجتة (اللي ما تعرفت علية للحين) وكأنها ساعة رمل!! وانها راح تنتهي بيوم من الايام او تختفي بأي وقت!! لذلك لازم يستنزف جميع طاقاتة الجنسية وبسرعة ، وكأنه بهالشي يبغى يدخل موسوعة جينس للارقام القياسية!!والمسكينة يصير فيها أنفصام بالشخصية وحالات ثوالة مؤقتة ويطيح شعرها من كثر ماهي مش مستوعبة الوضع ، ناهيك بأنه يهمل جوانب مهمة كثيرة بزوجتة وهو أنه يفهم شخصيتها وطريقة تفكيرها واحتياجاتها النفسية وكيف يرسمون مستقبل عائلتهم الخاصة وووالخ ، وكل هذا عشان خاطر عيون الجنس!! ويجيك بالاخير ويقول زوجتي ماتفهمني!!

يخرب بيتك ماعطيتها فرصة تفهمك!!

والمشكلة بأن أغلب الرجال قبل زواجهم لما نعطيهم هالنصايح ونقولهم (لا إفراط ولا تفريط) يردون عليك بالرد الجماهيري المعروف " جايبها اتمنظر فيها انا!!" "جايبها ابجورة انا"!! يحسسونك أنهم جايبين زوجاتهم من محلات اثاث.

للأسف لا ثقافة زوجية ولا ثقافة بالحياة ولا نظرة للمستقبل والوضع من الأخير ع البركة!!

ماعلينا مو هنا المشكلة

المشكلة أن بعضهم يقعد يقابل زوجتة 7/24 (ساعة/يوم) ومايفارقها دقيقة وحدة وأغلب وقتة رازن خشتة في خشتها لين تجزع منة وتمل من وجهة ، واحتمال يجي وحامها علية من كثر ماهو لازقن فيها!! وليته عاد يقابلها عشانها لا ورب البيت مو عشانها!! عشان مشاريعة الجنسية الإستيطانية الفاشية اللي تلوع الكبد .. لين تحس الزوجة أنها من دون الجنس ماتسوى شي عند زوجها!! وما ينلامن والله!! والمصيبة ان هالنوعيات هاذي تصير حيل حساسة مع زوجاتهم ويتصيدون الغلطات احسن من اجهزة الليزر حقت المراقبة ، ويصير ارضائهم صعب جداً بعيد عن الجنس!!

والمصيبة ان بعضهم لايهتم بشكلة ولا بهندامة ولا بنظافتة ، ولا يحلق وريحتة نشادر ، ويزعل منها اذا قالتلة حبيبي ممكن تتروش او تفرش اسنانك!! على اساس أن الأخ مرهف الاحساس او متأكد من نظافتة!! وياليتة عاد يزعل ويصملها ويبتعد عنها كم يوم!! ماكو ساعة ساعتين وراد من كيفة ومتروش من غير لا يتليف بعد!! على اساس انه تنظف وحس على دمة الاسباني!!



- اعزائي الرجال اللي من النوع هذا

يخرب بيتكم والله الام وهي الام تمل من اعيالها لاقابلوها ، وحنا نمل من اخواننا لا صارت اخششهم بخششنا ، فما بالكم بزوجاتكم!! فكو شوي خلوهم يتنفسون!! حسسها انها مهمة من كل النواحي مش بس بالجنس!! واذا قامت اتردد كثير في زيارة اهلها او تطلب زيارة اهلها بكثرة تراهي مالة منك ف حس على دمك وافهم وخلها اتنفس!! ونظم حياتك مع زوجتك ووازنها وعطها فرصة تفهمك واستدرك الموضوع ترا والله ماراح تختفي .. ولاتخاف ياعمري بتقعد معك العمر كلة ف هدي شوي!!

- عزيزتي الزوجة اللي تعاني من النوع هذا من الازواج

ادري ان أفضل وقت عندك هو لما يروح زوجك للدوام او لما تروحين لأهلك!! هنا تحسين انك على موعد مع نفسك ، وكل اللي اقولة لك صبر الله قلبك واثابك على تحملك لزوجك اللزقة.


وسلامتكم.

__________________
استغفر الله واتوب إليه