اما انا
فكنت طول 5 سنين اللي تاخر عندي الحمل تتاخر الدورة واروح اعمل فحص للحمل ويطلع negative
اما لما عملت الحقن 6 مرات فكنت كل مرة اعمل فحص حمل ويطلع برضو negative
بعدين عملت انابيب ونمت 15 يوم على ظهري وما تحركت الا للصلاة وبعديها اجاني مغص قوي ووجع ظهر شديد جدا ونزل دم بكمية كبيرة وظليت ابكي طول الليل
بس بعدين وقف لمدة 3 ايام لما حكينا للدكتور حكى انو احتمالية الحمل عالية والدم ممكن يكون انوا احد الاجنة الثلاثة نزل
ولما عملت فحص طلع ايجابي والحمدلله
اما شعور زوجي فانبسط ولن بتحفظ وحكالي احسن نروح لعند الدكتور
ومرت الايام والشهور ( فلم مكسيكي ) وانا في سعادة كبيرة لانو بنتي الوحيدة وعمرها هلا 6 سنوات اخيرا رايح يصير عندها اخ
وطبعا كانو توم مما زاد فرحتي وتحملت التعب
وفي الشهر الرابع الدكتور حكالنا انهم ولد وبنت بنسبة دقة 99 % وساعتها طرنا من الفرح وحكينا الحمدلله وهيك رايحين نكتفي وما رايحين نعيد ونكرر المعاناه ورحت واشتريت لبس مختلف وجهزت
ولكن الفرحة ما كملت وكانو محكوم علينا انو ما عمروا تكمل الفرحة لانو لما رحنا للدتور بعديها بشهر انصدم انو شاف بنتين وليس ولد وبنت واستغرب كتيير لانو كان متاكد حتى كان معو دكتور تاني اكد انهم ولد وبنت وحولني على دكتور تالت بفحص بجهاز 4 الابعاد وبرضو اكدوا انهم بنتين والحمدلله الف مرة
طبعا احنا انصدمنا وتحولت الفرحة الى حزن لاني رايحه اضطر افكر بالحمل مرة تانية ( عمري الان 33 ) والله اعلم كم سنة رايحه اتعالج واكيد انتو بتعرفوا ضرورة وجود اخ في البيت وحزني انو من اول ما تزوجت واحنا بنتعرض لمواقف مشابهه
الخلاصة ان الانسان خلق في كمد وضيق ودائما الفرحة ناقصة وحتى لما رب العالمين يتفضل علينا بنضل نشعر بالنقص وعدم الرضا مع اني والحمدلله مؤمنه ودائما بشغل القران في البيت
ولكن بحس دائما انو فرحتي ناقصة
الحمد لله قدر الله وما شاء فعل والخيرة فيما اختاره الله
طبعا انا هلا بعد مرور شهر اشعر اني تقبلت الموضوع وبستغفر ربنا لاني زعلت على عطاياه
اسفه
وجعتلكو راسكو بالموضوع بس حبيت افضفض لاني مش قادره احكي شعوري لاحد