عيدكم مبارك ، وعساكم من عواده وبحال أفضل وأجمل يارب...
موضوعي اقرب للفضفضة لأن طقت جبدي
نعم... آنساتي سيداتي سادتي
حكايتي مع أم عياله لا تنتهي أبدا أبدا أبدا
متجددة بتقادم الأيام والاسابيع والشهور
لازالت تقط كلام..
( يالساحرة
يالمطلقة
يالعجوز - المضحك ان انه اصغر منها بحوالي 10 سنوات
عساج تموتين بحادث وما تلقين احد يصلي عليج - على أساس اني يهودية يعني!
يعلج ما تحملين ولا تشوفين لج ذرية )
وووو إلخ
مش مشكلة اشعاد خل نغض البصر عن كل هالكلام...
الكارثة .. ان اهيه واخواتها مكلفين واحد يأخذ لهم تراب من على القبور
وودوه حق وحدة ما ادري شسوت فيه .. ونثروه عند بابي مع قطعة ما ادري شنهي .. وكلفهم هالعمل مبلغ و قدره
شلون عرفت ؟
بناتها قايلين لي ولأبوهم .. لانهم خايفين
وكنسوا التراب من عند بابي قبل لا ادري...
في نفس هاليوم شفت اختها عند بابي وتسائلت وايد شيايبها هني !
وقلت لزوجي قال تلقينها تبي تتجسس علينا.. وكلمها وهاوشها جدامي
ردة فعل زوجي على موضوع السحر ضحك وقال ان تعبوا وهم يسوون لي سحر ويحطونه تحت مخدتي عشان ما اتزوج و بعدين عشان احبها ما اشوف تأثرت
يعني يقول شكل اللي يسوون عندها هالسوالف تقص عليهم وتاخذ فلوسهم
موضوع الكلام اللي تقطه أحيانا ما اخبر زوجي عنه
واحيانا اذا خبرته يتهاوشون و تلم ثيابها بتطلع واخوها يرجعها...
صاروا بناته يترجوني ان ما اخبره..خايفين يطلقها او يبتعد اكثر
فسكتت عشان خاطرهم..
خايفين امهم تتطلق.. وقبل جم يوم بناتها كلموها وقالوا لها عيب عليج ووو إلخ .. حبستهم في غرفتهم لا فطور ولا سحور .. وابوهم ما يدري بكل هذا
بس آنه تمللت!
المشكلة ان اعرف نفسي اذا نفذ صبري والشياطين تنططت جدامي
بحرق عليها البيت باللي فيه!
لحد الآن يمكن مرتين رديت عليها
مرة لما قالت لي : ليش تزوجج مع اني اجمل منج - قلت لها غريبة مع ان ليل نهار يقول لي ما شفت انثى مثلج / النتيجة زادت شتايمها
و مرة لما قالت لي : يالعجوز - قلت لها الفرق بيني و بينج حوالي عشر سنوات / بعد زادت شتايمها
هالمرتين اليتيمتين اللي رديت عليها فيهم
و دايما تقول لي يالمغرورة - لاني ما ارد
يعني لا الرد نافع ولا السكوت نافع
ولا ممكن اطلع من هذا البيت - مستحيل بترك بيت تلعب فيه الخيل وفي منطقة راقية لبيت اصغر واكثر تواضعا وفوق هذا هني مكتبة زوجي و كتبه و مكتبه يعني ما اقدر اترك هالبيت... يعني هني في هذا البيت حياته و نصف يوميه يقضيه في مكتبته
ممكن ابلع الكلام اللي تقطه
بس مخوفني وايد موضوع السحر!
__________________
حاجة الناس إليكم من نعم الله عليكم ، فـ لا تملوا النِعم ☁✨
المشكله لو بتصغري عقلك مثلها ممكن زوجك يطفش منكم ثنتينكم من خلال مافهمته من شخصية زوجك
لو في إمكانيه يفتح لك زوجك من جهه ثانيه حتى لو من داخل اي غرفه تخرج ع فناء البيت يحط بهو صغير ويفتحلك باب خارجي في البهو
والباب الحالي خاص بزوجك انتي لا تطلعي منه ابداً وبكذا مارح تحتكي فيها إلا نادراً واصبري ع النادر
ضيعتني العاطفة : طبيعي ابي اشتري راحة بالي في كل الاحوال
وما بتخلى عن راحة من اجل راحة .. لان الامرين من حقي
متفائلة : فعلا تقريبا تقسيم البيت بالطريقة اللي قلتي عنها
البيت صاير وسط حوش..
الحوش فيه باب لي و باب لها و باب لقسم زوجي الخاص به
بابي .. اول ما تفتحينه تلاقين درج على راحة الدرج فيه باب يدخل حق بيتهم يستخدمونه زوجي والشغالة وبناتها فقط..
هي تخاف ان احد يدعي عليها دايما اقول لها حسبي الله و نعم الوكيل
تدش بحالة هستيرية! تقول لي لا تدعين علي واسحبي دعوتج
وتزيد في الشتايم والكلام الجارح!!
__________________
حاجة الناس إليكم من نعم الله عليكم ، فـ لا تملوا النِعم ☁✨
اشوف الانتقال من بيت زوجك الى شقة اجار افضل حل
زوجك لن يستطيع منعها وغير مسألة السحر فهذه بحد ذاتها مخيفة
انتي بتعيشي عمر ان شالله معاه مو يوم ولا اثنين وراح تحملي وتخلفي ان شالله و راح يزيد شرها الافضل تطلعي لشقة ماتعرف هي عنوانها
اهم شي راحة البال
الله يعينكم ، طبعا اللي تسويه غلط ، لكن هي أعصابها تالفه ، يعني اللي فيها تحطه فيك ، لكن فعلا قصة السحر تخوف و خاصة انها تخاف انك تتحسبي عليها ، معناه هي عارفه نفسها و ذنبها ، انصحك انك تحاول ما تتقابلوا ، ولا حتى ان تشوفك .
وإذا حصل وتقابلتوا ، جربي تنصحيها ، يعني لما تسبك و تدعي عليك ، قول لها استغفر الله عشان الله يوفقك ، و ادعي لنفسك بالخير ، وقولي لها ان ادعي لك بالخير ما ادعي عليك ، يعني في عز غضبها ذكريها بالخير .