طبعا لا عزيزتي
الوراثة مالها اي دور في تحديد جنس المولود
المسألة كلها بارادة الله والنصيب

طبعا اكيد تعرفين من ايام العلوم والاحياء
بويضة الام تحتوي كروموسومين كلهم XX والحيوان المنوي يحتوي XY
راح يلتقي كروموسوم من بويضة الام(اللي كلهم انثويات ) مع واحد من كروموسومات الاب (المسؤول عن تحديد نوع الجنس وليس الام لان كروموسوماتها كلها انثوية)
اي من كروموسومات الاب يلتقي بكروموسوم الام؟؟ هذا هو اللي يحدد الجنس
فاذا التقى Y من الاب مع احد كروموسومات الام راح يكون ذكر والعكس صحيح

وفي الغرب يقولون محض الصدفة
احنا كمسلمين نعلم انه ارادة الله ورزقه

__________________
حمداً لله على نعمه وفضله

مشكوووورة يا دكتورتنا وربي يجزيك الجنة
يا ليت الرجال يعرفوا هادي المعلومة
وإن تحديد الجنس من عندهم بعد مشيئة الله
والله أنا أشوف حريم كتير مغلبينهم أزواجهم
ليش ما تجيبي أولاد ومدري ايش مع إن المشكلة من عندهم
الحمد لله طمنتيني وإن شاء الله حملي الجاي اللي مدري بعد كم سنة يكون بنت
مشكورة مرة تانية يا دكتورتنا وربي يسعدك

__________________
إلى الماءِ يسعى من يغَصُّ بلقمةٍ ::
إلى أين يسعى من يَغَصُّ بِمَاءِ؟!

السلام عليكم ياأم عصام ورحمة الله وبركاته
ماشاء الله تبارك الله لاحول ولاقوة إلابالله أسأل الله أن يبارك لكم أنتي وأخونا الكريم أبو عصام في ما أعطاكم ورزقكم من ذرية صالحة يارب
وألف ألف مبروك عليك الفارس القادم بإذن الله نسأل الله أن يحفظ لك أبو عصام وعصام يارب ويقر عينك بمولودك الجديد
والحين معكم عصام والجاي بإذن الله بسام وإللي عقبه حسام <<<<<<<<<<<<<<<<<< شكل أم عصام بتذبحني الحين
هههههههههههههههه
أمز ح معاك ياشيخه لاتعصبي
بس عندي إقتراح عليك أنتي والأخ أبو عصام ليش ماتسموا الأولاد على قافيه واحده والبنات على قافيه واحده بس تختلف عن الأولاد يعني كمثال الأولاد عصام وبسام والبنات شهد ورغد أو وجن ووسن أو أنفال وريتال يعني البنات قافيتهم غير عن قافية الأولاد ويارب تجيبي توأم بنات المره الجايه بعدين ترى زين إنك حملتي الحين وجبتي لعصام أخ له علشان مايحس إنه وحيد و يطفشك في البيت وما يريحك ترى بعض الأولاد إللي ماعندهم إخوان تلاقينهم إنطوائين ومايحبوا الإختلاط بالناس ودائما متعلق بأمه بالذات إذا كان ماعنده أقران من أقاربه يلعب معاهم بإستمرار ويختلط معاهم يزورونه و يزورهم وكمان يمكن إذا كان وحيد يصير له العكس يمكن يصير عدائي يضارب وعصبي وعنيد يعني على حسب نفسيته لاكن لو عنده أخ يشاركه اللعب والأفكار
حتى لو تضاربوا بعد شوي تلاقينهم سمن على عسل وكمان لو جاء الطفل الثاني نفس جنس الطفل الأول بيكون أفضل علشان يتأقلمون مع بعض وتقدر تلبسينهم أطقم الملابس مع بعض والألعاب زي بعض ومايكون هناك فيه إختلاف أنا أول بنت جبتها عقب ثلاثة أولاد لما إبتدت تكبر شفتها صارت تعاند أخوها إللي أ كبر منها تلبس ملابسه الرياضيه وجزمته وأنتم بكرامه وتاخذ كورته تلعب فيها وتقلده بشكل فضيع ألبسها ملابس بناتي تروح بنفسها خزانة الملابس حق أخوها وتلبس من فوق ملابسها
طقم أخوها الرياضي أبوها حلق لأخوها شعر راسه قامت تبكي تبغى تحلق شعرها مثل أخوها وراحت دورت على المقص وجلست تقص في شعرها حتى المقص جر ح إصبعها وجتني تصيح يدها مجروحه وماخفت من أسلوبها شوي إلا عقب ماجبت لها أخت ثانيه الحين الحمدالله أختها الصغيره طلعت تحب لبس البنات وإكسسواراتهم لاكني ما أقدر أسر ح شعر أختها قبلها ولا ألبسها قبلها دائما تقول لي أمي أنا الأول ولو سبقتها أختها في اللبس أو التسريحه بتصير سالفه وماعاد ترضى إلا بجاهه من البيت كله بعدين يطيح الحطب .
‏ أناهاذي تجربتي الشخصيه وأشوف إن الولد لوجاء بعد الولد خصوصا البكر بيكون أفضل أنا عندي ولدين الكبار ورى بعض أ كبر واحد عندي الحين عمره 14سنه والثاني
عمره 13 سنة جبتهم ورى بعض لأني أنا ما أخذت مانع بعد الولادة بطفلي الأول ظنيت إني بصير مثل أمي وأخواتي مايحملون إلا عقب سنتين وبدون مايستخدموا موانع بس يرضعون أطفالهم فقلت في نفسي أ كيد أنا مثلهم جلست أرضع إبني البكر وخلصت الأربعينيه وعقبها بشهر جلست أنتظر الدوره الشهريه رحت أسوي تحليل حمل وطلعت حامل وإبني عمره شهرين فقط ولدت بأخوه وعمره 11 شهر أقسم بالله العظيم كان باقي مايمشي صغير وجلس سنة و6شهور مايمشي كان عنده تأخر في المشي كان زوجي يقول شكله منتظر أخوه بيمشون سوى مع بعض تخيلي كيف لما نطلع نتمشي كان الناس يسألونا عيالكم توأم وفي المستشفى الأطباء والممرضات يسألونا بيبي توأم
سوى سمسم الحين كبروا الحمدالله والشكر لرب العالمين
لاحظت عليهم ميولهم واحد وطريقة تفكيرهم واحده وإللي يشوفهم وهما جالسين سوالف يقول إنهم أصحاب مو إخوان من إنسجامهم مع بعض وحتى في لبسهم ماعاد أتعب مقاسهم مقاس واحد سوى ملابس أو أحذيه أ كرمك الله والحمدالله صاروا يخدموني مايقصرون لو أبوهم مو موجود وأحتجت شئ أرسلهم يجيبونه لي من برى الله يحفظهم ويخليهم ويخلي لكل مسلم عياله يارب .

معليش أختي أم عصام أنا أطلت عليك بس حبيت أحكي لك بعض من تجاربي مع الأولاد والبنات طبعا قدمنا سالفة البنات علشان أنتي تحبين البنات وعسى ربنا يرزقك البنوته الحلوه إللي تملأ عليك البيت سعادة ووناسه يارب
وطبعا أخرنا سالفة الأولاد علشان أخونا أبو عصام يحب الأولاد ولا نبغاه يزعل على أولاده الله يحفظهم له لاكن أنا أتوقع إن لوجبتي بنت بعد الأولاد صدقيني إن أبو عصام ماعاد يشوف الأولاد شئ عند البنت لأن البنت محبتها تختلف عند أبوها إسئل مجرب ولاتسأل طبيب .
وأخيرا عقب هالقرقة أستودعك الله أختي الغاليه أم عصام أنتي وما في بطنك الذي لاتضيع ودائعه وأسأل الله بأن يرزقك الطفل السليم المشافى المعافى ويجعله هو وأخيه لك ولوالده قرة عين لكم وأسأل الله بأن يجعلهم من الأبناء الأخيار والبررة والصالحين وأسأل الله بأن يديم حياتك أنتي والأخ أبو عصام في سعادة ومحبة ومودة دائمه وأن لايغير عليكم بسؤ وأن يحفظكم من كل شر وعين وحاسد وأن يتم نعمته عليكم دنيا ودين اللهم آمين يارب .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله

يا حليلج يا أم عصام

أذكر أنني عندما كنت حاملاً في سلطان .. وقبل أن أعرف جنسه .. كنت أتحدث عن الجنين باعتباره أنثى من شدة اشتياقي للبنت .. لكن سبحان الله الذي شاء وقدر ووهبني أحلى سلطان

ولكن قبل أن أحمل في مهرة شحذت أسلحة الدعاء والاستغفار وكثفت ابتهالاتي طلباً للحمل الثابت والبنوتة التي يتمناها قلبي .. وسبحان الله الكريم الرزاق الذي استجاب دعائي ووهبني أحلى مهرة

الشاهد .. الزمي الدعاء والاستغفار وبإذن الله يعطيكِ ما تتمنين.


أما قول الطبيبة .. فالمسألة ليس مؤكدة دوماً .. إحدى قريباتنا أخبرها ثلاث أطباء أنها تحمل ولداً .. وظل هذا التأكيد حتى ساعة الولادة .. لتخرج في النهاية بنوتة مثل القمر الله يحفظها .. وحقيقةً كان الأمر مفاجئاً وصادماً لدرجة أن الأب اعتقد أنهم في المستشفى استبدلوا الجنين الذكر الذي كان يفترض أنه في بطن زوجته بتلك البنت


المهم .. صحتكِ وصحة النونو بالدنيا

__________________


اللهم طِيبَ الأثر .. وحُسْنَ الرحيل.

عرفته عرفته

فيمتووووووووووو

يلا الله يجعله ابن بار وصالح اهم شيء السلامه والعافيه

قصتكم ذكرتني بقصتي

اول مولود كان ولد
وحملت بالثاني بعد سنه ونص
والحقيقه وسبحان الله عملنا بالاسباب اللي ترجح كفة الحمل بانثى باذن الله
ولكن بما انه انا اريد وانت تريد والله يفعل ما يريد
حصل شيء خرب كل الحسبه وكل الاحتياطات والاسباب اللي عملناها
ورغم ذلك قلت ان شاء الله انها بنت
وعدى الشهر الاول والثاني والثالث والرابع وانا امني نفسي انها بنت لكن جواي كان عندي شعور قوي انه ولد
عموما كل ما دخلت محل ملابس اطفال اشوف الفساتين واحطها ببالي عشان بس اتاكد انها بنت ارجع واشتري منهم ..
وفي الشهر الرابع والنصف عملت الاشعه
وسالت فنية الاشعه بنت او ولد
وانا مغمضه عيوني بقوه كاني انتظر نتيجة امتحان مهم
قالت
بيبي بيبي بيبي
baby baby baby
booooooooooooy
بيبي ولد

وجاتني الضحكه ما مسكت نفسي مر في بالي الشريط وانا في السوق ابغى اشتري وانا وزوجي نضارب على الاسم وكل اللي حولي يكادو يجزمو انها بنت لكن الله اراد
فنية الاشعه شافتني اضحك قالت عندك بنت قبله؟ قلت لاااا ولد الحمدلله

كل شهر اعمل الاشعه اقول يمكن غلطو وكل مره اسال نفس السؤال
الين دخلت الشهر التاسع وغيرت الطبيبه اللي كنت متابعه معاها واول ما عملتلي الترا ساوند قالتل يانتي عارفه جنس المولود قلتلها ايوا ولد .. قالتلي يا شيييييييييخه !! لا يكون بس اشتريتي الاغراض حقت ولد
قمت من كرسي الكشف امسك يدها لا تقوليلي بنت
قالت هذا الظاهر قدامي انها بنت
فطلبت مني اشعه وانا على جمبي الا بعدين سبحان الله بان جنس المولود بشكل اوضح وكان ولد برضه ..

الحمدلله بعد ما ولدت وجبت زياد
قلبي تعلق فيه فوق ما كنت متصوره ..

ما ندري الخير وين
ربي يكرمنا جميعا بالبنين والبنات السليمين المعافين البارين الصالحين ..

__________________