مع احترامي المشكلة في زوجتك مو في صديقتها
انت تقول طلاقكم الاول بسبب نصيحة طائشة من وحدة
ومشاكلكم الان بسبب وحدة ثانية برضو
اذا في شخص يحتاج وقفة وقرصة اذن واعتذر على لفظي فهي زوجتك
لانها واضح انها ترمي سمعها للحريم وتسمع كلامهم
اليوم اشتيكت على هذي وممكن تكرهها زوجتك وتقطعها على افتراض انها ماراح تسبللك مشكلة ولا تقولك تتدخل في صداقتي والخ
بكرة زوجتك بتتعرف على صديقات جدد من العمل او غيره
وقاموا يتكلمون عن ازواجهم وعن الرجل وغيره ، تتوقع ان زوجتك وقتها مابتسمع لهم ؟!
او ماراح تكون في مشاكل بينكم بسبب ان زوجتك تبدأ تطبق كلامهم ؟!

__________________
"فَاذهب فَإِنَّ لَكَ في الحياة أَن تَقُولَ لَا مِسَاسَ، وإنّ لكَ مَوْعِدًا لَّن تُخْلَفَهُ.". طه.
،،
" الطريق، الذي لاتواجهك به العقبات، هو طريق، لا ينبغي أن تستمر عليه."

والله انك بردت قلبي لما تقول برفع قضيه عليها ....

احنا نعاني من وحده زيها اتمنى ماتنسى تخبرنا بالنتيجه ....

وبالعكس رح يكون درس لزوجته انه رح افشلك مع صحباتك لو ارخيتي اذنك لهم ...

والمعذره لما قلت إمعه يااخوي ترى من قهري عليها وحده عيني عينك تخرب عليها وين عقلها الي ميزها الله فيه ...

والحمدلله انك عدلت عن الطلاق الله يكتب لكم حياه سعيده ويكفيكم شر من اراد بكم شرا

اخوي ماعليش زوجتك محتاجه قرصه اذن مو صديقتها
مو معقوله كل ماسمعت كلام احد بتشتكي عليه
اسمحلي العيب في زوجتك اللي تسمع وتنفذ ولا كان لها عقل تفكر
يعني زوجتك موظفه بتقابل اشكال والوان ما جات بس ع صديقتها هذي

يااخي اذا اشتكيت صديقتها تتوقع ان المشكله انحلت؟
المشكله بزوجتك مو بصديقتها دامها معطيه اذنها للناس وتسمع وتطيع اللي يقولوا لها بدون ماتفكر ماراح تستفيد
لان حتى لو اشتكيت صديقتها راح تحصل صديقه ثانيه او تكلمها بشكل مباشر في العمل
وللمعلوميه اخي كثير عينات صديقتها اللي همهم خراب البيوت

الله يعينك

ﻻ تكره زوجتك وﻻ تصغر بعينك
كلنااا ممكن نخطيء
وممكن يبهرنا احد بنتائج تجربته وننجرف
الانسان بطبيعته يؤثر ويتأثر..
متأكدة هالتجربة بتعطيها درس بالحياة..

ربي يصلح احوالكم ويجنبكم شياطين الانس والجن

مع كامل احترامي المشكله في زوجتي وفي صديقتها ايضاً

اخر احصائية 30 % من الطلاقات بسبب طرف ثالث يعني بتخبيب او نصائح سيئة

يعني نقول الزوجة غلطانه لانها سمعت والمخببه ليس عليها شئ لاحرج بالتخبيب ليل ونهار وان سمعت لها

مايصير الله يرضى عليكم الناس تغريهم التجربة بعدين لاتفكرون ان زوجتي فقط سنتجو من المشكله

طيب خله يصير درس جماعي درس لصديقتها انها لو بتخبب حرمة على زوجها بتعظ على لسانها اخاف بكرة توصل محاكم وفضايح خلني ساكته احسن

ودرس لزوجتي وتفهم ان مهما تكلمت فلانه وعلانه زوجي بيعرف وبيقلب الدنيا عاليها واطيها بسلامتهم ماني متكلمه عن بيتي

معاك اخوي
بس اخاف تدخل بمشاكل مع اهل الصديقه
اخي لا تلوم زوجتك
الانسان ضعيف
وادم عليه السلام نزل من الجنه بسبب تفاحه
اعذرها ولا تفكر بطلاق
حاول تنقل عملها الى منطقتك

عموماً امس صارت مشاكل اكبر مما كنت اتوقع

رجعت للبيت ماحصلتها بالبيت مع اني عارف انها وصت السواق يشغل السيارة انتظرتها تتصل ماتصلت رجعت للبيت مافيه احد بالبيت

واعتذر للجميع بتصرفي لكن لكل فعل ردة فعل وانا صبرت وتحملت

لاحد يلومني ويقولي ليه ماتصلت عليها تسألها وين بتروحين لما عرفت انها بتطلع باختصار كنت بشوف هل بتكلمني تستأذن او لا

اللي حصل طبعت صور المحادثات 3 نسخ 1 لأبوها و2 لأمها و3 لها

طلعت شنطها كلها وشنط العيال وعبيتها ملابس ولا كفت وعبيتها كلها بأكياس

اغراض مكياجها وعطوراتها كلها ظفيتها

كلمت ابوها وواعدته ولقيت السواق عند بيت اهلها قلت له ارجع للبيت ورجع

الشنط بالسيارة مانزلتها

اجتمعت مع امها وابوها وتكلمنا ساعة وهي موجوده وعيالي جوا عند خواتها وأسألها وش تبين كلمتك بالكوفي رضيتي ثم قلبتي علي فجأه

قالت فكرت وعرفت انك تكذب علي <<< قوية هالكلمة

قلت شوف يابو فلان انا مقصر بشئ ؟ قال لا والله ما قصرت

سألت امها انا مقصر مع بنتك بشئ ؟ قالت لا والله مامنك قصور

سألتها انا مقصر معاك بشئ ؟ قالت ايه ابي بيت زيي زي باقي الناس

قلت بيت مافيه ولو تحبين نجوم السماء ماني شاري بيت جديد ابشتري بيت ابوي واقسط له قيمته تبين تسكنين فيه حياك الله ما تبين خلك عند اهلك معززه مكرمه

قالت عادي تهددني بالطلاق انت اصلا ماهمني

قلت ما اهددك طلاق ماني مطلق ونجوم السماء اقرب لك من اني اطلق عندك المحكمة قريبه روحي اشتكيني فيها

واروح للسيارة وانزل كل اغراضها سألتها اخذ العيال ؟؟ قالت العيال عندي مايطلعون بدوني قلت خليهم اجل وهذي شنطهم

وهذي المحادثة اللي بينك وبين صديقتك الله لايعطيها عافية واعطيتهم النسخ

وقلت لأبوها اقراها بكرة علشان لو قريتها بتنقهر ومايجيك النوم

نادو العيال بسلم عليهم قبل اروح

فجأه قلبت علي انت شلون تسمح لك نفسك وتفتش جوالي ماتستحي مافيه ثقه << اي ثقه قلت لها انتي فتشتي جوالي قبل فترة ولقيتي مقطع رقص بنات << والمقطع والله واحد مرسله بالواتس من الشباب وتكلمت معاه ان جوالي بيد عيالي واطفالي لاترسل هالامور يشوفونها

واعتذر وماعاد ارسل ولا حتى سلام ونسيت احذفها وشافتها وصارت ليله سوداء عموماً نرجع للمهم

اتهمتني ان الاستديو مفتوح واني شفت صور خواتها وصديقاتها

ورديت عليها اولا انا قايل لك من اول صور بجوالك مابي لو يضيع بتنفضحون

ثانياً : لو احد يحصل الجوال ويبدأ يبتزك ماحد بيخسر الا انتي وتخسرين الثقه من كل اللي حولك

ثالثا: لاتغيرين الموضوع ليه تفتح جوالي لانك قد فتحتي جوالي ولقيتي مقطع رقص وكان تصرفك هستيري فيحق لي الآن على ما لقيت من بلاوي صديقتك اصير هستيري لكني اعقل منك

رابعاً : التفت على ابوها وقلت نصيحة لوجه الله انا ماعاد لي دخل ببنتكم وهي عندكم لكن حفاظاً على اعراض الناس خلوها تمسح صور خواتها وصديقاتها لانها ماتسمع مني

وقلت لها صديقتك فلانه بنت فلان الفلاني موعدها معي بالمحكمة الجزئية بقضية تخبيب بتجين معاها تعالي

الأدله كلها معاي وبنفس الوقت قولي للشيخ ابيه يطلقني والله لا اقلبها عليك وترجعين مهري واتزوج به وحده جديده وتسكن بعد 5 او 8 سنوات ببيت جنب دوامك

وخلي ملعونة الجدف تنفعك

والسلام عليكم ورحمة الله وبركاته

ناداني ابوها يابو فلان اصبر نتفاهم مايصير الا اللي بخاطرك طلعت وسكرت الباب وراي

ارسلت لي رساله حسبي الله عليك ابوي تعبان بسبتك ارتفع عليه السكر والله يصير له شئ مااسامحك طول عمري

رديت عليها لاتسامحين نفسك انتي اللي مسويه هالمشاكل انتي وصديقتك روحي لصديقتك وقولي لها هالكلام لاتقولينه لي

رجعت للبيت كلمت السواق قلت هات المفاتيح حقت السيارة

دقت عليه الصبح تقوله تعال ودي الشغل قال مافيه مفاتيح كلهم غابوا اليوم الحرمة والعيال غابوا

ارسلت لي رساله الصبح عيالك مالهم ذنب يغيبون عن المدرسه لانك تبي تعاقبني بالسواق

قلت العيال مسؤوليتي عندي ببيتي برا بيتي مش مسؤوليتي فقط اصرف عليهم مو هذا كلامك انتي اهم شئ يصرف على عياله ابشري لاتشيلين هم هالنقطة ابداً واسدد اقساط مدرستهم لاني ابيهم يتعلمون احسن تعليم وبس

ولا ردت وخلاص طلاق ماني مطلق خلها شهر شهرين 3 اللي هو ماعاد تفرق وعيالي كل اسبوع بروح اخذهم غصب عن اللي يقول لا

زين تسوي
بس من بيودي عيالك للمدرسه

هدي اعصابك يا اخي

اولا بالنسبة للقضية .. اعتقد لا يوجد عندك دليل قاطع لان المحادثات الالكترونية لا يعتد فيها في المحكمة لان الصديقة تستطيع تفنيدها بوسائل مختلفة كأن تقول انها ليست من تكلمها على البرنامج او ان هاتفها سرق وهناك من يستخدمه وبالتالي يجب أن تأتي بشهود لاثبات الحالة ، وهذه الصديقة يبدو انها خبيثة وان لم تثبت عليها شي في المحكمة ممكن ترفع عليك قضية تشهيـر وتتحمل انت وحدك المشاكل المترتبة على القضية .

لذلك يجب ان يكون الحل باستقلالية رأي زوجتك وحقيقة استغرب من ضعف ردة فعل اهلها وخاصة ابوها لانها تحتاج لحزم اكبر ، ولا ادري كيف تستقوي عليك بهذا الشكل بينما هي منساقة وراء افكار صديقتها .