السلام عليكم ورحمة الله وبركاته

مساكم الله بالخير .. اشكركم على هالمنتدى الرائع.. الذي استفدت منه الكثير وانا اتابعه من سنوات رغم قلة مشاركاتي فيه..

انا متزوجة من تسع سنوات ولديه من الابناء 3 اكبرهم 6 سنوات واصغرهم سنتين..
عشت مع اهل زوجي سبع سنوات ثم انتقلت لبيت ابي الله يرحمه من سنتين مع زوجي.. سبب الانتقال كثرة المشاكل بين زوجي واخيه ( بسبب عيالي لانه مايستحمل الازعاج ومايحب الاطفال وماكان في اطفال فبيتهم غير اطفالي) ..

زوجي ايجابياته كريم يعطي بدون مقابل مو مقصر معي بالماده ولا مع عياله ..
يحب اطفاله كثيير همه الاول والاخير اطفاله
يحب اهلي ويخدمهم اكثر من اهله خاصة امي الله يحفظها
يسولف معي يمزح معي اذا كان مزاجه رايق ونفس الشي مع الاطفال يلعبهم يطلعهم يوفر لهم كل مايحتاجونه من العاب وطلعات وغيره

سلبياته مزاجي وهالشي متعبني كثير قبل مايطلع من البيت يكلمني ويكون شخص ثاني يطلع ويرجع شخص ثاني متنرفز مايستحمل يشوفني يسبني ويلعني حتى ماقدر اساله شوفيك وانا شو سويت لك..
دايما يشوفني مقصره مع عيالي دوم يقول انتي ماتهتمين بعيالي .. عيالي معي اغلب الوقت العبهم اطلعهم اغديهم اعشيهم ادرسهم ( عيالي حركين كثير.. فيهم حركة زايده.. ومايقعدو مكان واحد وهو يبيني الحقهم وين ماسارو وهالشي صعب)..

دايما يعق علي كلام انتي ماتيبين تحملين وتيبين لي عيال.. انزين الحمل مو بايدي بايد رب العالمين ولدي الصغير توه كمل سنتين.. اقوله بجيب لك عيال وبحمل باذن الله يقولي بعد شو بعد ماكبرت ونقص فرص الحمل علما هو عمره 36 وانا عمري 32 هل باهالعمر خلاص مابجيب عيال مابحمل..
نقطه ثانيه انا عايشه فبيت ابوي الله يرحمه فغرفة وصاله وقاعد يبني بيت وانا كنت حاطه فبالي يوم بروح لبيتي باذن الله بحمل وبجيب له عيال لانه فغرفه وحده ماتكفينا وفوق هذا عيالي ماشاء الله عليهم حركين بزياده..
ودايما رايح وراد ويقول بتزوج وبيب عيال ومصر عالزواج ويقول انا تعبت منك ومامنك فايده
صح انا اصيح واقوله لاتتزوج لاني ماستحمل بعدك لاني احبه بجنون.. وانا قايمه بواجباتي وبعيالي بس هو دايما يشوفني مقصرره..

نقطه ثانيه كان معي مبلغ 150 الف وطلبت منه ياخذ لي سياره بدال ما اصرف الفلوس عالفاضي وانا كان معي سياره هو اشترالي من قبل بس كنت ابا سياره جديده راح هو اشترا لي السياره وكمل المبلغ من عنده.. امس شاف خدش بسيط عالسياره وقام الدنيا علي ويلعني ويسبني ويدعي علي انزين انا ماعرف من وين يا الخدش يقولي انتي ماتهتمين بالسياره والسياره كانت فالوكاله من 3 ايام قلت له يمكن من الوكاله عصب زياده وسبني وطلع من البيت وطرش لي واتس كلام كثيييير ( انتي مو مهتمه بعيالي مو مهتمه فيني كل همك بس نفسك وطلعاتك وياياتك انا اشتغل ليل ونهار وابني بيت واجمع فلوس عشانكم وانتي ولاهمج شي بس تخسريني والله ندمت عاليوم الي اشتريت فيها السياره&#128532

والله يغلط علي ويرفع صوته وانا اسكت بس اسمعه واتاسف منه واعتذر وهو يطنشني ودايما اركض وراه وادور رضاه.. احاول ارضيه باي شكل بس مايرضى علي انا تعبت .. دايما يطلع فيني عيوب الكامل الله محد كامل .. شورو علي شو اسوي كيف اتعامل معاه ..

والله من اسبوع كان زعلان مني رضى علي يومين وطلعنا واليوم العصر كان عادي يسولف معي ويمزح من شاف الخدش عالسياره انقلب وقلب الدنيا علي وطلع وراح ولي الحين مارد البيت .. واذا اتصلت فيه مايرد علي وبلكني من الواتس..
ساعدوني الله يجزاكم خير .. كيف اتصرف معاه كيف ارد عليه يوم يعصب ويوم يلعني ويدعي علي ..

تصرفاتة هذي ماجت الا بعد ما سكنتو عند اهلك؟
كيف علاقتة مع اهلة وخاصة اخوة؟
وهل يزورهم؟
واذا كان يزورهم ينبسط عندهم؟

بصراحة تغير المزاج من فترة الي اخرى معناتها هالشخص يعيش
تحت ضغط ولكنة كتوم

__________________
سبحان الله وبحمده سبحان الله العظيم

انا اعترف هو مضغوط دوام وبيت والبيت الي قاعد يبني .. بس انا احاول اخفف عنه ما اطلب منه شي والله طلبات عيالي مدارس واجبات مكتبه مشاريع ومقاضي البيت الضروريه انا اوفره يوم هو فالدوام والله ماضغط عليه .. هو من نفسه يي يقولي بودي سيارتك للوكاله حق التجيك ويوم يودي يرجع لي شخص ثاني ويوم اقترحت عليه قلت له ابا سياره قال اوكي واشترا والحين على كل دقه وعلى كل شي يسويه لي يعصب ويتنرفز .. تعبت

زوجك يمر بضغوط وللاسف انتي الوحيده الي جالس يفرغ فيها ويصب عليها جام غضبه وكل الكلام الي يقوله في هالمرحله مايقصده بس مجرد تفريغ… فأنصحك ماتتصادمي معه ولا تلاحقينه كثير عطيه مساحه من الحريه

هو كدا من اول ماتزوجتيه ولا فجأة تغير عليكي بدون سبب وجيه ؟

غيري هذا الأسلوب ..

انا اعترف انه مضغوط بس يوصل لهالدرجه يسب ويلعن.. ان شاء الله بحاول ماتصادم معاه.. شكرا على ردك.. ارتحت شوي .. يعني كل ها من الضغوطات الي عليه

لا ماكان كده قبل.. مع الايام احس صاير اخس .. قبل يعصب بس مايسبني اما الحين

هذا الي اباه اعرفه شو الاسلوب الي اتبع معاه .. كيف اتعامل معاه عشان ارتاح من التفكير والضغط .. شوري علي الله يجزاج خير

فيه رجال لما يشوفون الزوجة تستميت في طلب رضاهم وراحتهم يتكبرون ويتجبرون ..
فإنتي خففي اهتمامك وتعلقك بك ( ألحين الأعضاء بيجوني ركض بعصيهم)
ماقلت اقطعيه ولكن خففي منه ..
بتلاقينه بعد فترة يفتقد هذا الاهتمام والتعلق ..
فيصحى لنفسه ويحس إنه بسبب معاملته لك خسر شي طيب كان يجيه ..
فيجيك ويتقرب منك وبيحاول يتجنب سوء خلقه وسوء تعامله معك ..