اقتباس:
المشاركة الأصلية كتبت بواسطة مصونات
خواتي خايفة من الصدمات من الناس ماحد يبغاني ماحد متقبلني ليش فية صدمات بحياتي .....
|
حبيبتي مصونات الناس شو رح تقدملك وتنفعك اذا انت ما قدمتي ونفعتي نفسك
الناس ان اتقبلتني او لاء انا ليش بدي اتأثر كرمالهن
بس اذا انا وصلتلهن انو انا ما متقبلي نفسي وما عندي قناعة بحياتي اكيد رح حس انهن ما متقبليني
وشوفي كلام مبتعثة والله لو بيكون عندك مال وزوج واولاد وصحتك مش منيحة صدقيني هيدول كلهن ما بيشتروا صحتك ولا سعادتك
لو عندك كل شي وما عندك نعمة البصر بتتمني انك ما تملكي شي وبس تنعمي بنعمة البصر
طيب فرضا ربي ما كتبلي الزواج او الاولاد طيب معقول اجلس كل عمري ابكي على وضعي وارثي حالي
طيب لو عندك زوج واولاد وولد مريض كل وقته بالمستشفيات وعم تشوفيه عم يتألم امام عيونك معقول تحسي بالسعادة
طيب ليش ما بتقولي ممكن ربي ما كتبلي بالوقت اللي مضى كمل بزواجي وانجب اولاد مش احتمال كبير ربنا جنبك الم اكبر بكتير من اللي عم تحسيه هلئ
العمر عم يمر يا مصونات وليش عم تضيعي اجمل سنين عمرك بالحزن والهم
مصونات انت عايشة ببلد امان وعم تاكلي وتشربي وتنامي بسريرك مرتاحة
طيب شفتي اطفال الصومال شي يوم كيف عم يزحفوا عالارض ليلاقوا كسرة خبز
او شفتي ناس ما عندها سكن وسرير يناموا فيه
شفتي معاناة اطفال ونساء ورجال بغرف المستشفيات وانعزالهن عن العالم
وغير اللي عايشين برعب الحروبات والخوف
وبعد في كتير وكتير يا مصونات
هيدول ابسط شي بيبسطهن وعم يكافحوا ليبقوا عايشين وبيتمنوا فرصة من الفرص اللي موجودة عندك وعندي وعند الكثير من الناس
حبيبتي رجاءا جاوبيني بعدك متابعة عند الطبيبة او موقفة
اذا بعدك حاولي تغيريها اسعي للتغيير للافضل
كرمال نفسك قبل الناس
فوتي عالنت وشوفي معاناة الناس لتعرفي ئديش انك بنعم لا تعد ولا تحصى
وبنفس الوقت فوتي على اشيا مرحة وكوميدية واضحكي من قلبك
اتمرني عالضحك نص ساعة باليوم اعملي جو لنفسك
ما توقف حياتك على اتصال من طليقك
ولا رح توقف الدنيا على طليقك
صدقيني انا متلي متل كتير ناس اذا مش الكل ممكن ابكي بشكل يومي واحزن بس برجع بفتش على اشيا تضحكني وتفرحني وتسعدني
والا بعيش بدائرة الاحزان وبغرق فيها
انا عندي اطفال وهيدول نعمة من رب العالمين بس كمان بعيش برعب وخوف عليهن
الحياة هيك عالصغير والكبير عالفقير والغني كلنا مقدر علينا نفرح باوقات ونحزن باوقات ونبكي من الألم باوقات
ما حدا عايش سعادة مطلقة ولا احد عايش يتعاسة مطلقة بس راضين لانو النا رب العباد ارحم فينا من انفسنا ومن الناس اللي حولينا
رجاءا حبيبتي حاولي تساعدي نفسك شوي شوي
حاولي تصنعي عالم الك حلو وكلو امل وتفاؤل
حاولي تحبي نفسك كتير وتوثقي بقدراتك وتستمتعي بالنعم اللي عندك
اتركي مسألة طليقك للزمن ان الك نصيب معو رح تاخديه ولو بعد ايام واشهر وسنين
وان ما كان الك نصيب فيه كملي حياتك وكأنك بتملكي الدنيا وما فيها
قلبي معك وبتمنالك تشوفي حياتك وتسعديها وتعيشي حلوها ومرها
وانا رح اسمعلك وبنفس الوقت لازم تسمعي ولو بسيط من كلامنا لتشوفي العالم والدنيا على حقيقتها
ولتنزعي فكرة انو بس المزوجة هيي السعيدة
ربي يريح بالك ويسعدك دنيا وآخرة حبيبتي
احترامي