ابو اولادي عقله صغير كيف اتفاهم معه
السلام عليكم وكل عام وانتم بالف خير وبأفضل حال
وجعلنا الله وإياكم من العتقاء من النار
وبصراحه ما لقيت غيركم اساله وابوح له بما في خاطري
وانا متاكده اني بالاقي عندكم مايفيدني
وزي ما يقولون ان الي خارج الصوره يقدر يشوفها بوضوح اكثر وبالتالي يحكم عليها بشكل صحيح
مشكلتي اني ما اقدر اطوي كل الماضي وانساه وكانه لم يكن لان عندي اطفال واجباري يكون هناك تواصل بيني وبين ابوهم حتى وان لم يكن مباشر واللي يصعب الموضوع اسلوبه وعقليته الي احس انها عقليه طفل صغير لايفقه
اسمحولي اذكر موقف حصل امس المساء عشان يوضح اسلوبه وانتوا قولوا لي كيف اتعامل معاه
كلم بالهاتف وطلب ولده وقاله بأمر عليك اوديك الالعاب الناريه وقالي ولدي ورديت عليه هل بنفع تترك ضيوفك الان واذا راحوا انا متفقه معاكم على طلعه مستعد تتنازل عنها؟ اقتنع الولد وقال لابوه ما ابغى اروح الان
وبعدين قال لي بابا بيمر علينا بكره الصباح ياخذنا كالعاده (كل خميس وجمعه)
-رديت يبدو ان ابوك ناسي ان اول ايام العيد عنده وثاني وثالث ورابع ايام العيد عندي(حسب حكم المحكمه واللى على حسب طلب الاب)
-زعل الاب وقال الموضوع مو محاسب والا كان خليتهم عندي اول يوم لحد الليل[ رجعهم بعد المغرب وبالتالي راحوا معاي لاجتماع الاسره(اقاربي واقاربه ) وعرف انهم راحو معاي من الولد وانا كنت حريصه جدا اني ماابين له هل انا ابغاهم يرجعون بدري عشان يرحون معاي او فرحانه انهم عند ابوهم عشان اروح بدونهم عشان مايشغلوني هناك لاني عارفه انه بيسوي اللي ماابغاه اويقول لاولاده امكم ماتحبكم تبي تروح وتخليكم وعشان تنبسط لحالها]
-قلت لا مو محاسب وانا ماطلبت ترجعهم في وقت محدد فماله داعي المن وغير كذا احنا بكره معزومين يعني مايناسب ياخذكم لو ما كان عندنا شيء يمكن اوافق
زعل وعصب على الولد وقال له ما اسمح لك تروح لاي مكان بكره وسكر السماعه
هذا اسلوبه يا احصل اللي ابيه يابازعل واعصب والمصيبه انه يحط حيله على ولده وينكد عليه لانه وش ماسوا لي ماارد واعدي يعني في السابق في مثل هالمواقف ممكن يجي على بيتنا وقت طلعتنا عشان معزومين ويسويلنا صيحه على الشارع ويرفع صوته في جرس الباب ويقول كلام ماله داعي
لكن الان اتوقع انه يكلم الولد يقعد يلومه على ذهابه معي ويقوله انت ماتحبني وانا بزعل عليك واطلع لي الان انا عند الباب بدون ماتعرف امك وغيره وغيره
في السابق كنت اقصر الشر واعطيه اللي يبي بس عشان افتك من شره لكن لمى اعطيه أي شيء يكون فرض واجب كل مره وياويلي لم مانفذت له اللي يبي وعلى الوقت اللي يبي بدون ما يحدد لي مسبقا الوقت
يعني على المكشوف ارتبطي بي ولا تتحررين مني وحتى طلعتك لازم تكون على مزاجي
قولو لي وشلون اتعامل مع هالانسان بصراحه مليت والولد بسم الله عليه عقله اكبر من ابوه ويفهم وهذا اللي تعبه لاني احس انه يتحمل اللي اكبر من سنه
الناس كانو يقولون لي اصبري اذا تزوج بيلتهي بزوجته وينساك لكنه تزوج وزاد قالو بكره بيجيله عيال وينشغل
ولمى جاله طفل ماسافر في الاجازه على غير عادته ولزق لنا عشان ينكد علينا اذا فكرنا بالسفر ولمى طلعت زوجته من النفاس زاد اكثر
احيانا تجيني افكار شيطانيه اني اصغر عقلي واعامله بنفس اسلوبه او بالاسلوب اللي هو يفهمه لكن مااقدر لانه حتى لو جاب نتيجه كويسه ماراح ارضى عن نفسي واحس اني مسويه شيء غلط
فما الحل باي اسلوب اتصرف