السلام عليكم ورحمة الله



رحلة 15 يوم إلي أجمل مدينة في العالم


فانكوفر الكندية



أول ما تقرون عنوان الموضوع بعضكم ببقول على اي أساس أقول إن فانكوفر أجمل مدينة في العالم ، البعض بيقول وين راحت جنيف و باريس و باقي دول العالم المشهورة.

صحيح فانكوفر مدينة مجهولة و غير معروفه للكثير من المسافرون العرب ، و الي فتره قريبة كان الكثير من المسافرون العرب ما عمرهم سمعوا اسمها.

لكن خذوها مني ، خذو العلم من شخص سافر للمدينة هذي 10 مرات متتالية ، و في كل مره أروح لها ألقاها اكثر جمال و جاذبية من المره اللي قبل.

كل شخص سألني عنها و راح لها بناً على كلامي ، رجع و قال ان اللي ذكرته عنها ما يجي ولا 10% من جمالها الحقيقي.

ابعطيكم في الموضوع هذا تفاصيل دقيقه الي أقصي درجة ممكنه عن رحلة لمدة 15 يوم ، ممكن تكون شهر عسل للمتزوجين الجدد و ممكن تكون رحلة رومانسية لزوجين حبو انهم يعيشون جو فانكوفر الرومانسي ، و طبعاً ممكن تكون رحلة استكشافية لمن يرغب في رؤية مدينة الأحلام فانكوفر.

الرحلة هذي بتكون مبنية على السفر الي فانكوفر ما بين شهر 6 و 9 ميلادي من أي سنة تختارونها

__________________


الحصول على تأشيرة الزيارة الي كندا:


ان طبعاً ما عمري سافرت الي كندا بتأشيره لأنه و بكل بساطه الي قبل سنتين ما كانوا الكنديين يطلبون تأشيره زيارة من السعوديين ، لذلك معرفتي الشخصية باجرات الحصول على التأشيرة محصورة في معلومات أخذتها من السفارة الكندية و من الانترنت.



متطلبات التقديم على تأشيرة الزيارة الي كندا:

-) تعبية النموذج الخاص بطلب التأشيرة.
-) صورتين ملونه لطالب التأشيرة.
-) كشف حساب بنكي لطالب التأشيرة.
-) تعريف من عمل طالب التأشيرة.
-) ان يكون جواز طالب التأشيرة صالح الي ما بعد تاريخ العودة من كندا.

المدة المتوقعة للحصول على التأشيرة في حدود 7 الي 15 يوم و ممكن أطول من كذا و بالذات للسعوديين كما هو مذكور في الموقع الرسمي للخارجية الكندية.


__________________


الطيران الي فانكوفر:


2) الخطوط الألمانية (لوفتهانزا):

-) الإقلاع من الرياض أيام السبت و الثلاثاء و الخميس الساعة 0225 .
-) مدة الرحلة الي فرانكفورت الألمانية 6 ساعات و 5 دقايق
-) الوصول الي فرانكفورت الساعة 0730 بتوقيت فرانكفورت.
-) الانتظار في مطار فرانكفورت لمدة 6 ساعات.
-) الإقلاع من فرانكفورت الي فانكوفر الساعة 1315 بتوقيت فرانكفورت.
-) مدت الرحلة الي فانكوفر من فرانكفورت 9 ساعات و 45 دقيقة.
-) الوصول الي فانكوفر الساعة 1400 بتوقيت فانكوفر.
-) تكلفة الرحلة حسب في حدود 4000 الي 5500 ريال.


3) فيه أيضا الخطوط الفرنسية و الدنمركية ( KLM) بس ما عندي فكره عن مواعيدهم لأني ما عمري سافرت معهم ، و اعتقد مواعيدهم ما تناسب المسافر من الشرق الأوسط.

و ممكن تطلعون من من السعودية على الخطوط السعودية الي لندن و من لندن اما على الخطوط البريطانية او الكندية الي فانكوفر.

4) الطيران عبر دول شرق أسيا عن طريق الكاثي باسفيك او السنغافورية او الماليزية او حتي الصينية، طبعاً المشوار اطول لان الرحلة من السعودية الي شرق أسيا في حدود 9 ساعات و من ثم 14 ساعة أخرا الي فانكوفر ، السعر طبعاً ارخص بس الفرق بس في حدود 500 ريال للتذكرة الوحدة.


______________________


في الطيارة من لندن الي فانكوفر:


حاولوا تقعدون جنب الشباك عشان تستمتعون برؤية المناظر من فوق ايسيلندا و شمال كندا ثم وسط كندا.
المناظر بالذات فوق كندا خيال و روعة ما لها وصف ، يتشوفون في البداية جزر الثلج المتحركة و ثلوج على مدا النظر ، و أول ما تنتصفون فوق كندا بتبدون تشوفون الغابات الكثيفة و البحيرات المتناثرة في كل محل و الأنهار الطويلة ، و أول ما تقربون من المقاطعات الكندية الغربية بتشوفون سلسلة جبال الروكي الكندية بجبالها الشاهقة و الثلوج اللي تغطي قمم الجبال.

و اذا قربتو من حدود مدينة فانكوفر بتندهشون من كبرها و جمالها و في نفس الوقت بتلاحظون تناسق العمران و تداخله مع لطبيعة الخلابة.

في الطيارة بيعطونكم المضيفين كروت تعبونها عشان الجوازات الكندية ، اذا كان عندكم مشكلة في تعبئة الكروت اطلبوا من المضيفين يساعدونكم و صدقوني بيطريون فيكم و يخدمونكم بعيونهم بالذات على الخطوط البريطانية و الكندية ، اما الألمان فيعتمد على مزاج المضيف.

الكرت بيكون فيه الأسئلة التالية:

-) سبب الزيارة و مدتها.
-) اذا كنت تعرف احد في كندا.
-) كمية الدخان و المشروبات الروحية اللي معك ( ما يسمحون بدخول أكثر من كمية محدودة من الدخان الأجنبي ، اللي يدخن الله يعينه لان دخانهم مخيس.
-) اذا كان معك هدايا لحد ( اذا معك هدية سعرها فوق 150 دولار بياخذون عليك ضريبة).
-) المكان اللي بتسكن فيه.


_______________________


الوصول الي مطار فانكوفر:

اول ما تنزل من الطيارة بتمشون حدود 5 دقايق الين توصل الي كونتر الجوازات ، اذا خفتو انك تضيع امشو بس ورا الركاب الثانين و هم يدلونكم الطريق.

على كاونتر الجوازات بيسألونكم عن سبب زيارتك و بيراجعون قايمة معهم عن أسماء أشخاص ممنوعين من دخول كندا و بيطلبون منكم تعطونهم تذاكركم حتي الطيارة عشان يتأكدون من موعد العودة حقكم.

أيضا بيطلبون منكم تعطونهم الكرت اللي انتم عبيتوه في الطيارة ، بعد ما يخلص موظف الجوازات من سؤالكم و مراجعة تذاكركم بيحط علامة على الكرت اللي معكم و يرجعة لكم و يسمح لكم بالدخول الي منطقة استلام العفش.

بعد ما تستلم عفشك و تتوجه للباب اللي يطلعك من صالة الوصول بيقابلك موظف عند الباب و يطلب منك الكرت اللي انت عبيته في الطيارة ، و هونا مربط الفرس ، اذا كان موظف الجوازات حط لك علامة مرور ( علاماتهم مدري وش تعني) فهذا يوم سعدك و بياخذون منك الكرت و يخلونك تطلع من الصالة ، اما اذا العلامة اللي على كرتك ماهي علامة المرور فهم بيرجعون لك الكرت و يدخلونك مع باب ثاني الي غرفه كبيره فيها مجموعة أخرا من موظفي الجوازات ، الموظفين هذول بيستجوبونك من جديد و يفتشون عفشك. ( يعني باختصار لا تكذب في الكرت اللي انت عبيته لانهم ممكن يصيدونك) ، طبعاً اذا صادوك الموضوع سهل ، بيصادرون اللي معك او يأخذون عليها ظريبة و بعدين يسمحون لك بمغادرة المطار.


____________________


الخروج من المطار:

قبل ما تطلعون من المطار بدلو الفلوس اللي معكم الي دولارات كندية ، و اذا كان معكم ريالات سعودية يفضل انكم تبدلونها و انتم في أوربا .

اول ما تطلعون من المطار منتم لاقين تكاسي قدامكم ، بيصير فيه واحد موجود و على ملابسه كتابه انه مسئول عن التكاسي ، اطلبو منه التكسي او اذا بغيتو لموزين طويل ، و قولول له انكم بتروحون الي فندق الهيلتون ميترو تاون ( Metro town Hilton ) ، التكسي تكلفته في حدود 30 دولار كندي ، و مدت المشوار حدود 25 دقيقة اذا ما فيه زحمة.

انا اتوقع انكم بتكونون طلعتو من المطار و في طريقكم للفندق حدود الساعة 1600 بتوقيت فانكوفر ، و يكون باقي على غرور الشمس حدود ساعتين الي ثلاث ، لذلك احرصو انكم تتفرجون على الطريق اللي بيمشي فيه التكسي لانه بيمر جمب بعض الغابات و نهر الفريزر ، و قبل الوصول للفندق بتلاحضون ان التكسي بدا يطلع ما يشبه طريق جبلي ، و السبب هو ان منطقة الفندق فوق هضبة مرتفعة عن باقي برنبي و فانكوفر. و انشاءالله ما يكون الجو ممطر عشان ما يفوتكم ولو جزء بسيط من جمال فانكوفر.

اول ما توصولون للفندق و تستلمون الغرفة حقتكم ، اكيد بتريحون شوي من مشوار الطريق و بتاخذون لكم دش و بتتعرفون على غرفتكم و تتفرجون على المناظر اللي تطل عليها شبابيك غرفتكم.


انا تعمدت اختار لكم هذا الفندق لانه اولاً جديد ( مبنى من حوالي 4 سنوات ) ، و لانه يقع في منطقه حلوه و هادية و استراتيجية ، الفندق جمبه كل شي ممكن يحتاج له الشخص.
الفندق 4 نجوم و يكلف حدود 400 ريال سعودي في اليوم.


بعد ما تريحون لكم حدود 3 ساعات في غرفة الفندق ، اكيد بتكونو جايعين و ودكم تاكلون شي زين.
انا ارشح لكم مطعم تايلندي ( انا ناسي اسمه ) ، لان اكله جداً لذيذ و لانه اول مطعم اكلت فيه اول مره زرت فانكوفر عام 1994 ، و ميزت المطعم انه خلف الفندق مباشره على شارع كنقز وي ( Kings Way ) ولا ياخذ منكم اكثر من 3 دقايق مشي.


رغم ان شهر 5 في فانكوفر هو منتصف فصل الربيع الا ان الجو يكون في بعض الاحيان شوي بارد ، عشان كذا خذو معكم من ديرتكم جكيت واحد خفيف و يفضل يكون مقاوم للموية عشان المطر.
في المطعم اوصيكم تاخذون كمقبيلات لحم تايلندي مشوي زي الكباب و يجي على عصيان صغيره و يكون معه صحن صغير من زبدت الفول السوداني و المطبوخ بطريقة خاصه كمقدمة للاكل ( ابتايزر) ، بعد كذا اطلبو لكم شوربة الربيان الحاره التوم يوم قوونق ( Tom Yum Goong ) ، و اذا تحبون الاكل الحار اطلبو منهم ما يحطون فيها فلفل.

بعد كذا اطلبو الطبق الرئيسي المفضل عندهم و اللي ما تلقونه عند احد غيرهم و هو طبق مشكل من الماكولات البحريه بالخضار ( Seafood platter ) ، شي يجنن شي خطير ، طبعاً الاكله تجي حاره بالفلفل ، بس انتم ممكن تقولون لهم يقللون كمية الفلفل او ما يحطونه بالمره. و اطلبو مع الاكله اطلبو رز ابيض او رز مقلي مع الخضار ( فرايد رايس).

و اذا ما تحبون الاكل البحري ، عندهم تشكيله كبيره من الاكلات الثانية.

العشاء بيكلف حدود 50 دولار كندي لشخصين.





يتبـــــــــــع