أولاً : بسم الله الرحمن الرحيم
و السلام عليكم ورحمة الله وبركاتة

وصباح الياسمين ... إلخ

ثانياً : رجاءاً لحد يركز على انو العنوان بالفصحى والموضوع بالعامي
حاولت اكتب فصحى بس ماش ماضبطت الغريب في الأمر اني ما عرفت الاقي عنوان بالعامي
بس عرفت بالفصحى وما عرفت اكتب الباقي بالفصحى لكن عرفت بالعامي
ما علينا من هذا كله نخش بالموضوع


انا من الناس اللي اعشق وأقدر الأشياء البسيطه وتكون عندي بمثاابة شي كبيييير
ممكن تكون كلمة تعبر عن شعوره تجاهي او فعل بسيط يوحي بإهتمامه بي
نصيحة من قلب او حتى تهزيئة بس كان دافعها حب
كل اللي قلته نمر فيه كثير بس في مرات تكون غيييير إحساسها حلو وصعب تنسي
وممكن هالمواقف تصير باااهته مع الأيام سواءاً بسبب البعد ومشاغل الحياة
او الحساسيات والمشاكل وكثير اللي ينسون الذكريات الحلوة
بسبب أمور تافهه بالحيل وحتى لو كانت قوية وتجررح
مو معقول نركز عليها وننسى الباقي
لأن اكيد لما نتذكر المواقف السلبيه على طول راح تأثر فينا بعكس الإيجابية
اللي تخلينا نبتسم ونفرح
ابيكم تطيرون بي مع ذكرياتكم اللي أسعدتكم في يوم من الأيام من جد احتاج احس إن للحياة معنى
وكمان قولوا لي مين البطل اللي حط له بصمه مميزه في ذاكرتكم
أم أب أخ أخت صديق صديقة حتى لو احد هنا في المنتدى حرك فيكم شي
وفرصه بعد نشكر اللي يستحق الشكر ( ونستثني الزوج والزوجة لأن خلاص حامت تسبدي من الحياة الزوجية )
المهم
ومو بس نكتب هنا وخلاص لا كمان نذكرهم ونقول لهم كلمتين تقوطر عسل
ونصور الشاشه نبي نشوف الرد واذا ما تبون مو لازم اهم شي حَكُونا
بالنسبه لي عندي كثير يستاهلون اشكرهم
ومثل ما أسعدوني بإهتمامهم انا بعد بأسعدهم بأدق التفاصيل اللي سووها لي وما نسيتها

يالله نبدا ؟
انا عني بروح ارسل وبعد الرد بأجي اقول السالفه

انا اللي يسعدني حاليا ..

ولدي الكبير ..
حبيبي الله يسعده يارب ..
كثير يعمل لي أشياء تفرح لي قلبي

يارب على طول ..

وعليكم السلام ورحمة الله وبركاته.
صباحك رضا من رب رحيم.
الحمدلله لدي الكثير من الصديقات لا أنكر وجودهم في حياتي
حتى لو لم يسعدوني يكفي أنني في يوم من الأيام تحدثنا سويا.
وفي الحقيقة أصدق الكلام ، أصعبه قولاً..!
لا أعرف أن أعبر في الكتابة.
لدي صديقه اخجل ان يتبع اسمها وصف صديقتي فقط، هي نعمة رحمة من السماء💛
أم سلطان ( بنت الحكمي).. احتفظ بمواقفها معي للخصوصية.
لكن أقول لها أسال الله العظيم أن لا يجري لها دمع في غالي وأن يصلح لها الله النية والذرية.
ربي سألتك في هذه الساعة المباركة كما جمعتني بها في دنيا فانية أن تجمعني بها في جنة قطوفها دانية.

__________________
ما نال أحدٌ من الفضلِ في مالٍ أو جاهٍ أو علمٍ شيئًا بكسب يده، لكن الأمر كله لله، يُقدّم من يشاء بفضله، ويؤخّر من يشاء بعدله.

اختي اللي اكبر مني ع طول
واخوي الكبير

لو اشكرهم من اليوم الى يوم الدين ماوفيتهم حقهم..
ابعدتني الظروف عن صغيري وهو جالس عند امي
وهالاثنين مهتمين فيه ومعوضينه عني بالرغم من انهم متزوجين
لكن انهم يسكنون ب بنفس المنطقه ب(عكسي)..
والفضل الاكبر بعد الله ل امي وابوي طبعا هم الكل بالكل
من ناحية اهتمامه فيه وحرصهم عليه.
بس اقصد ان اخوي واختي بحكم سنهم وشبابيتهم
فيكون تعاملهم غير.

اسال الله ان يجزيهم عني خير الجزاء
وان يجمعني ب صغيري عاااااجلا غير اجل..

كل الشكر لك اقحوان..

__________________
اللهم اجعلني ل زوجي كما يحب
واجعله لي كما أحب
واجعلنا جميعا لك كما تحب.

يالله موضوع يفرّح القلب مع الصباح..
ابتسمت وانا اقرأ كلامك..
جا ببالي اطفال العائلة .. بنات وأولاد أخواتي يهدوني هدايا بسيطه بمناسبة وبدون مناسبة .. يتجاكروا مين يجي جنبي او ع رجولي اول .. ان قلت لواحد فيهم كلمه حلوه لازم اقول للكل .. يسعدهم ربي هم حياة بالنسبه ليا..
قبل كم يوم بنتين منهم جالسين وحده حاطه يدها ع رجلي اليمين وحده حاطه يدها ع رجلي اليسار وحده بالروضه ًالثانيه اصغر .. قالت اللي بالروضه خالتو لما تجيبي النونو اديه ماما وخذيني أسير بنتك .. قالت الثانيه لا والله انا خذيني .. أمهم قالت خلوها تأخذ النونو وتاخذكم معاها هديه ..
كل بعد فتره ارجع البيت القى كرت مرسوم عليه قلوب او يجيبوا ليا حلاوة .. بالأعياد ما يجيبوا هدايا الا ليا انا .. احبهم حب ما تتخيلوه..
بحياتي تفاصيل كثير تبسطني الحمدلله... صديقاتي.. أخواتي .. وجود امي .. بس اكثر اكثر شي يسعدني.. الأطفال ..

الله موضوع يجنن اقحوانه
مواقف جميله وسعيده لاتعد ولاتحصى من اشخاص كثيرين ماانساها ماحيييت
حنيت للماضي يابنت والمواقف المفرحه عسى ربي لا يحرمني منهم
لي عوده للموضوع والمواااقف السعيده
شكراا لك اقحوانه مواضيعك رائعه لإنك رائعه الله يجبر قلبك ويسعدك

هاذي وحده من المنتدى
ما ادري وش اقول عنها
ولا مره شفتها وما بينا غير مكالمات
وفوق هذا صارت اقرب من صديقاتي اللي اعرفهم من زمان
دااايم تحرجني بإهتمامها
على طول تكلمني اذا حست اني متضايقه
تفهمني على طول وافكارنا متقاربه
الزبده انها من اطلز من عرفت

ارسلت لها بعد ما كتبت الموضوع ذا وكان هذا ردها




هههههههه على بالها انو خلاص ما تدري ان اللي مثلها محد يخليه
يا حبني لتس ي انتي
انا ماقلت من هي بس اذا هي تبي تقول تقول

روح الطير & منفرده

مافي احلى من عطاء الأطفال
عطاء صاااادق من عُمق البراءة


اللقيا في الخلد

ما الومتس ي بعدي انا تأكدت انو مو لازم معرفه من سنين وكل فترة نتقابل
عشان تكون العلاقات حلوة بالعكس في ناس حتى لو ما شفتيهم بس انهم ينحطون على الجرح يبرى


فوفر

ما شاء الله
الله يخليهم لك ويجمعك بطفلك ويصلحه ويهديه
الأخوة أحلى حاجة بالدنيا
وتزيد حلاوتها اذا تترجمت بأفعال زي كذا
انتي متخيلة قد ايش يحبونك ومن كثر ما يحبونك ما يتركون ولدك ؟


الم الحنين

بإنتظارك
ولا تبخلي علينا بآدق التفاصيل


عادي حتى لو اي موقف بسيط يخطر ببالكم اكتبوه
مو تقولون تافهه او ماله داعي
ما يهم اهم شي انه كبير بالنسبه لكم

كان والدي شمس حياتي
كان لروحي روحها
لم يكن سببا لسعادتي
بل كان السعادة لي
اللهمّ اجمعني به في مستقر رحمتك

__________________
## مهم ##
هل تتعرضين للابتزاز في الانترنت؟


هنا من ينقذك

اسعد باولادي لما اشوف نقاطهم بالمدرسة والمعلمين يشيدون باخلاقهم..وبتربيتهم
ياربي لك الحمد والشكر ...
ايضا افرحني موضوعك لانك اعطيتنا فرصة حتى نعبر عما بداخلنا ..بعيدا عن المشاكل والهموم
سلمك الله من كل شر.

__________________