إذا أنتي فعلاً تفكرين تتزوجينه تواصلي مع طليقته أو أي أحد يعرفها وخذي المعلومات من الطرفين يعني منه ومنها وبعدين قرري

أما إذا بس عندك فضول لا خلي اللي بينهم يبقى بينهم

وأنا بصراحة أفضل إن قصتهم تبقى سر بينهم ما أحد له دخل بس المقلق بالموضوع على كلامك إنه طلقها 3 مرات

يعني قد حصل وطلقها ورجعت بعدين طلقها بعدين رجعت وطلقها وبينهم أبناء عشان هالنقطتين أنا أفضل تسمعين من الطرفين بس عشان تتأكدين إنه ما يظلم ولا هو جبار

اطرحي أسئلة ما تجرح ولكن تهمك!

يعني لما تسألينها اسأليها بطريقة ما أبغى أعرف التفاصيل لكن أبغى أعرف هل كان شيء يستاهل الطلاق أو هو سريع الغضب.

الأرجح إنها راح تشوه صورته إذا تكرهه

فالطريقة الثانية هي إنك تشوفين رده هو

ومثل ما قال اللي قبلي اسألي عنه في عمله وفي محيطه ما السائد عنه

يعني لو كان طلقها بعد شهور أو بعد سنة أو سنتين .. هل كنتِ سترينه تصرفاً منطقياً؟!

ولو كان طلقها بالثلاث مرة وحدة .. هل كنتِ سترينه تصرفاً منطقياً؟!

بعدين يا عزيزتي ترا الطلقات الثلاث كلها مع زوجة واحدة .. لو كان مطلق ثلاث نساء هنا كنا سنقول معكِ حق تتخوفي.


على كل حال هل أنتِ مضطرة لكل هذا القلق؟!!

يعني إن كنتِ غير مرتاحة لوضعه فارفضيه ببساطة وخلاص.

__________________


اللهم طِيبَ الأثر .. وحُسْنَ الرحيل.

ماقصروا اللي ردوا عليك اسألي عنه الناس اللي قريبه منه اصحابه واللي معاه فعمله امام المسجد
انا ما اايد سؤال الطليق والطليقه

ومثل ماقال احد الاخوان المطلق والمطلقة مو شرط يكونوا سيئين وهذا انتي مطلقة يعني تطلقتي لانك سيئه ؟؟

الله يكتب لك اللي فيه خير

ما رديتي منا كم عدد ابناؤه وكم اعمارهم وبيعيشون معاك لو تم الموضوع ؟؟

11 سنة مدة طويلة تحسب له لا عليه
لو هو غير مهتم باسرته كان ما صبر كل هذه المدة
طبعا بنت بكر تتخوف من مطلق فيها وجهة نظر
اذا تفكيرك بهذه الطريقة فلا تلومي الناس انهم يتخوفون من المطلقة
اما اولادك مالي دخل فيهم فهذه كبيرة
رجل مطلق و لديه اطفال فاذا تاخذيه تاخذيه بكج واكد هو و اطفاله
لا يناسبك هذا الشيء فارفضي ببساطة
فلو وافق والدهم على طلبك سيظلم الاطفال بسببك فالاطفال بحاجة الى ام ثانية و ليس لخادمة فقط
ببساطة ارفضيه و لا تظلمي الاطفال

بالنسبه للي يقول لاتظلمي اطفاله لا والله اخاف ربي وعلشان كذا ماابغى اتولاهم ابدا وامهم على قيد الحياة !!!
اخاف اقع بظلمهم 💔 على اني مستحيل اضرب او اجرح او اهاوش طفل !

لان انا شخصيتي جدا حساسه واتأثر جداً نفسيا والله المستعان

اهلي يبغوني ارفض !

مافي سبب واضح للرفض بس قالوا ممكن متهاون بموضوع الطلاق بذات انه طلق وهو عنده اطفال


وانا ودي اوافق لسبب اني كبرت !
وبرضوا لاني بحاجة رجل يهتم فيني ويراعاني ويتلمس احتياجاتي
ومحتاجه اكون ام

💔💔💔

السلام عليكم اختي
في موضوع الزواج خلي مرجعك الحقيقي الاستخارة
الاستخارة مو دائما شعور ..
أنا استخرت في شخص تقدم وحسيت براحة لكن الأمور ماتسهلت معناته مو النصيب
أستخيري واعملي بوصلة الخطوبة للأ. خلود الغفري وجاوبي على الأسئلة وارسمي الدائرة وشوفي اش يطلع معك
عموما ما تقدرين تحكمين على الشخص بشكل كبير الا لما تعاشريه وأقلها انك تشوفيه (النظرة الشرعية) وبعدها تقرري.

بالنسبة للأطفال ، والله اذا شايفة في نفسك تقدرين ترعيهم بشكل بسيط بوجود خادمة أو بدون شيء رائع ، ولَك أجر بغض النظر أمهم موجودة أم لا.
اذا متفرغة فهذا شيء حلو . (في نقطة مهمة الا وهي ان اذا والدهم مرتاح ماديا يقدر يسجلهم في نوادي أو مراكز صيفية واقترحي عليه هذا الشيء بذكائك بعد الزواج واقنعيه) هنا ما راح يكونون بالبيت 24 ساعة وراح تقدرين تأخذين راحتك بإذن الله.

وبعدين دفع الضرر مقدم على جلب المنفعة، اذا شايفة في جلوسك سيكون ضرر اقبلي ولا تنتظرين فارس الأحلام .
رسول الله صلى الله عليه وسلم قال: ( مِن جاءكم من ترضون دينه ، و خلقه .. هذي اهم حاجتين ركزي عليها.

والأهم اللي هو الدعاء طبعا وحتى اذا ماكان في هالإنسان نصيب لا تخافي فإنه (لن تموت نفسا حتى تستكمل رزقها).

__________________
-

طيب يا تباشير .. أنتِ قلتِ أن حياتكِ الزوجية السابقة انتهت بسبب قلة صبركِ .. ألا ترين هذا عيباً يفترض أن يقف أمامه أي خاطب؟


بخصوص الرجل .. لم أفهم ما هو التهاون الذي ترونه؟ .. يعني لا هو طلق من أول سنة .. ولا طلق بدون ما يرجعها .. بل أرجعها مرة ومرتين وهذه اسمها محاولات إصلاح .. فكيف يكون متهاوناً؟

__________________


اللهم طِيبَ الأثر .. وحُسْنَ الرحيل.

أم العيال والله ماتتطلق لكن يكون شي خارج عن الاراده ساعات

__________________
رَبِّ أَعِنِّي وَلَا تُعِنْ عَلَيَّ، وَانْصُرْنِي وَلَا تَنْصُرْ عَلَيَّ، وَامْكُرْ لِي وَلَا تَمْكُرْ عَلَيَّ، وَاهْدِنِي وَيَسِّرِ الهُدَى إِلَيَّ، وَانْصُرْنِي عَلَى مَنْ بَغَى عَلَيَّ، رَبِّ اجْعَلْنِي لَكَ شَكَّارًا، لَكَ ذَكَّارًا، لَكَ رَهَّابًا، لَكَ مِطْوَاعًا، إِلَيْكَ مُخْبِتًا قَلْبِي

ادرسي الفرصه جيدا
للحين ماسمعت عنه سؤال من مكان عنله اصدقاءه عائلته
اسالوا كويس وشوفوا