السلام عليكم ورحمة الله وبركاته
صباح الخير
أعتذر لو كتبت الموضوع في غير قسمه
ي جماعه الخير فتحت لي مشروع كافتيريا وجبات خفيفه
وأستقدمت عامل من جنسيه عربيه للعمل ك صانع شطائر وسندوتشات
الرجل قبل لا أستقدمه كان جاي بتأشيرة عمره ولا يرغب بالعوده لبلده ويرغب بالعمل بالسعوديه
بما أن ظروفه في بلده صعبه ولا تفرق معه يخالف النظام .. وكله في سبيل توفير مستلزمات الحياة لأسرته
صادفته عند احد الأصدقاء واستمعت لرغبته ف اقترحت عليه أن يعمل في مشروعي ويشهد الله أني لا أرغب في الأستقدام من نفس جنسيته .. لكن صعب علي وضعه وقلت أحتسبها عند الله ..
أتفقت مع الرجل أنه يرجع لبلده ويتعلم الصنعه ويتقنها وراح أرسل له التأشيرة وأتكفل بجميع المصاريف من الألف للياء ..
فرضت عليه شروط من ضمنها أني شخص لا أنقل كفالة أي عامل اذا لم يرغب بالعمل معي الاجراء المتبع عمل خروج نهائي .. سبحان الله أحمد الله أني أتفقت معه على هذا الشرط وهو في بلده ..
وصل الرجل بداية شهر ذو الحجه وطلب أن يؤدي فريضة الحج والنظام لا يسمح لمن لايملك تصريح
سعيت له في الأمر ولله الحمد والمنه اتممت فريضته والفضل لله ..
اسكنته أثثت سكنه أعطيه مصروفه ومصروف يرسله لعائلته .. يشهد الله ماقصرت معه
وكنت متأمل ومتوسم فيه الخير ..!
بدء فتح المحل وأبتدت المشاكل معه قام يتصرف تصرفات تطفش الزبائن يزود عليهم الأسعار الزبون أذا جاء مره
ماعاد يرد ثاني مره .. تكلمت معه فهمته أن الأسعار ثابته مانفع قلت له حبيبي مايصير تذبح الناس وتزود عليهم
ولا حياة لمن تنادي الكلام اللي اقوله له يسوي العكس جنني طير عقلي .. أتخذت قراري بانهاء خدماته سحبت إقامته
ورغبتي بتسفيره ثاني يوم تدخل أخوي الصغير وقلنا الرجل ركد عقله وفهم ..
ثاني يوم نفس الشئ والله ثم والله تعبت وصوتي راح ماعاد أحد يسمعه .. قلت له ي أبن الحلال انت جاي عشان أولادك وتربيتهم اتقي الله مانفع مهه لا طيب ولا قسوة .. هددته بالطرد مانفع جلس يبكي ويقول أقول لأهلي أيه
أقول أنا جيت ... طيب مو أنت مخرب كل شئ !
قلت ي ولد تحمل عشان اولاده والرجال مابكى إلا يبي يعتدل .. زودت راتبه واعطيته نسبه من الدخل لعل وعسى ينصلح حاله .. مافي فائده ..
يفتح الساعه 8 الصباح بعد مالناس تروح مدارسها ودوماتها. . طيب ليه فاتح مافي أحد تبيع له ..
يكذب ويقول انا فاتح من الساعه 6 وهو كذاب ماصدق .. الدخل فيه نقص وأنا متأكد لكن ما أبي اسئ الظن ..
الحين قررت أني انهئ خدماته لكن عارف انه راح يتبكبك ويسوي لي مناحه وأنا والله مابي احد نفسي في هالموقف
لأني عارف راح احن وأغير رائي ...
وش السواه ما ابي أظلمه ولا أبي أخسر نفسي
تعبت منه ...
تكفون أبي حل ..
والله عندي مشكله مهمه لكن هالمشكله ...اجبرتني على التأجيل بطرحها ..
ملاحظة
المنتدى فيه مشكله مع متصفح جوجل كروم بعد التحديث .. الكتابه ماتوضح فيه غير متوافق ..
مع متصفح فايرفوكس لايوجد مشكله

__________________
‏عابرُون و الدّنيا ليسَت لنا
‏سنمضِي يومًا تاركين خلفّنا كل شَي
‏ربناّ اختمْ حياتِنا بعمل صَالح نلقّاك به