كنت أبحث عنها بالقوقل بعدين لما شفت عنوان الموضوع فرحت مرررررة قلت ياسلام عليها هذي الي كتبت الموضوع !
وأول مافتح المنتدى جلست أضحك !
أثاري الموضوع عندنا وأنا طالعة أدوره برا
شجعتيني مررررررة لأني جالسة أدور مانع غير الحبوب لأني بأطول منع والحبوب مايصير آخذها كثير واللولب أحسن بعد ولادتين أو ثلاث والإبرة قريت كثير تجارب ماتمدحها !
فماعندي إلا الكبسولة، وكلامك عنها مريح جدا ماشاء الله ..
باقي أسأل عنها عندنا وأستخير وأركبها وبإذن الله بأقولكم تجربتي ..
والبنات الي يسألون هي بالسعودية ولا لأ أتوقع دامها نزلت باليمن بتكون نزلت عندنا إن شاءالله ..
أما اللصقات فمع إني قريت فتوى الشيخ عبدالعزيز آل الشيخ إلا إني قريت فتوى ثانية تحرمها دام إنها
حاجة وليست
ضرورة ..
وهذا الي كنت أتوقعه من زمان لأن الرسول صلى الله عليه وسلم يقول: (استفت قلبك ولو أفتاك الناس وأفتوك) ..
موانع الحمل كثيرة واللصقة بالذات عملها مثل عمل الحبوب بالضبط ..
وكون إني أخاف أنسى موعد الحبوب مو حجة أبدا لحجب جزء من جسمي عن الماء وقت الغسل ..
ياأخواتي ياحبيباتي لاتستهينون بأي مسألة لها علاقة بالطهارة والصلاة لأنها عماد الدين ..
هذي اللصقة تنفع للكفرة الي ماعندهم شي اسمه غسل وطهارة ..
لكن احنا مسلمين مأمورين بهالشي ..
الضرورات تبيح المحظورات
وفرق بين الشي الضروري الي مايستقيم الحال إلا به وبين الحاجة الي لها بدائل وحتى لو كانت هي أفضل من البديل ..
الشيخ الله يحفظه ضرب مثال على الجبيرة والجبيرة ضرورة بلا شك لكن والله لو اطلع الشيخ على الأمر كامل وقيل له الكلام هذا لتراجع مباشرة عن الفتوى وأنوي بإذن الله الاتصال به، ولكن الشركة إن كانت ماتخاف الله ماراح تشيل الفتوى الأولى من نشرتها !!
الله يبصرنا بالحق ويهدينا له ..